សំណូមពរនេះបានកើតមានឡើងបន្ទាប់ពីជនជាតិព្នងនៅភូមិពូលូង ឃុំរមនា ទើបនឹងឃើញមានស្នាមកាប់បំផ្លាញថ្មីៗ ដោយរណារយន្តទៅលើដើមរាំងដែលជារុក្ខជាតិធ្លាប់ផ្ដល់ផលជ័រជាច្រើនសម្រាប់ពួកគេយកទៅលក់ដូរនៅទីផ្សារ។
ជនជាតិព្នងនៅភូមិពូលូងបានឲ្យដឹងថា ៖ «ឃើញម៉ាស៊ីនកាត់មួយគេលាក់ទុកនៅក្នុងហ្នឹង។ ពួកខ្ញុំឃើញហ្នឹងប្រហែលជាថ្ងៃ១២ ព្រោះអីខ្ញុំចុះទៅថ្ងៃ១៣ ឃើញគេកាប់អ៊ីចឹង។ ខ្ញុំប្រាប់ហើយ ប្រាប់មេភូមិហើយនិងស្មៀនឃុំ គាត់ថាចាំថ្ងៃណាមួយទំនេរ គាត់នឹងចុះទៅ។ ខ្ញុំថា បើចាំថ្ងៃទំនេរអ៊ីចឹងព្រៃឈើមិនអស់ហើយ?»។
តំណាងជនជាតិព្នងម្នាក់ទៀតបានជម្រាបថា ក្រៅពីរបរចម្ការជនជាតិព្នងទាំងនោះរស់អាស្រ័យដោយជ័ររាំងនេះ ដោយនាំគ្នាទៅរើសក្នុងមួយថ្ងៃអាចបានប្រមាណ១០គីឡូក្រាម ហើយតម្លៃលក់នៅទីផ្សារគឺ២៥០០រៀលក្នុងមួយគីឡូក្រាម។ បើសិនជាមានមនុស្សរើសច្រើនអាចបានក្រោម១០គីឡូក្រាមក្នុងមួយថ្ងៃ។
តំណាងសហគមន៍បានអះអាងថា ដើមរាំងនៅទីនោះមានទំហំពីមួយអោបទៅពីរអោបមនុស្សចាស់ ហើយអាចធ្វើជាគ្រឿងផ្ទះបានយ៉ាងល្អ ប៉ុន្តែជនជាតិព្នងនៅទូទាំងឃុំរមនាមិនដែលនាំគ្នាកាប់ទេ សុខចិត្តទៅកាប់ដើមឈើផ្សេងយកមកធ្វើដោយទុកដើមនេះសម្រាប់ប្រមូលរើសជ័រដើម្បីចិញ្ចឹមជីវិត ព្រោះជ័ររាំងនេះហូរតាមដើមហូរតាមមែកដោយខ្លួនឯង ហើយជ្រុះធ្លាក់មកដោយខ្យល់បក់ឬប្រើចម្ពាមបាញ់ទម្លាក់មិនពិបាករកដូចជ័រដទៃឡើយ។
តំណាងសហគមន៍បានមានប្រសាសន៍ថា ៖ «ចង់ទប់ស្កាត់ឲ្យទាន់ពេលបច្ចុប្បន្ន។ ចង់សហការជាមួយអាជ្ញាធរ ជាមួយមេភូមិ ដើម្បីទៅទប់ស្កាត់និងរាយការណ៍តាមរយៈអង្គការវីជីឡែន»។
តំណាងសហគមន៍បានឲ្យដឹងថា ព្រៃរកជ័ររាំងស្ថិតនៅតាមផ្លូវទៅភូមិពូជ្រីដែលមានចម្ងាយប្រមាណ៨គីឡូម៉ែត្រពីភូមិពូលូង ហើយមានទំហំប្រមាណ៥០ហិកតារ។
មន្រ្តីសិទ្ធិមនុស្សនៃអង្គការវីជីឡែនគឺលោក ឯម វាសនា ដែលបានទទួលរបាយការណ៍ពីសហគមន៍ជនជាតិបានអះអាងថា នឹងដាក់បញ្ហានេះនៅក្នុងអង្គប្រជុំជាមួយនឹងអង្គការនានាដែលពាក់ព័ន្ធដើម្បីធ្វើការស៊ើបអង្កេត និងដាក់លិខិតអន្តរាគមន៍ទៅអាជ្ញាធរដែលពាក់ព័ន្ធដែលលោកអះអាងថា វាប៉ះពាល់ដល់ជីវភាពរស់នៅរបស់ជនជាតិនិងបរិស្ថាន ហើយពាក់ព័ន្ធទៅនឹងច្បាប់ទៀត។
នាយរងខណ្ឌរដ្ឋបាលព្រៃឈើខេត្តគឺលោក កែប កត់ បានជម្រាបថា ឲ្យជនជាតិធ្វើការទំនាក់ទំនងទៅការិយាល័យជំនាញនៅខេត្ត។
លោក កែប កត់ បានឲ្យដឹងថា ៖ «ប្រាប់ខ្ញុំទៅ ខ្ញុំប្រាប់ឲ្យគេចាត់ការហើយ។ ខ្ញុំបន់ឲ្យតែមានអ៊ីចឹងឲ្យគាត់នាំទៅ។ វាសំខាន់គឺរឿងអនុវត្តបញ្ជា០២ហ្នឹង គេចង់ដកហូតអ្នកណាហ្នឹង។ នាំទៅចង្អុលឲ្យចំមក គេចាត់ការតាមនីតិវិធីហ្នឹងហើយ»។
ដើមរាំងត្រូវបាននាយរងខណ្ឌរដ្ឋបាលព្រៃឈើបន្ថែមថា មិនដុះរាយប៉ាយទេគឺដុះតាមជ្រុំ ហើយជ័រវាគេច្រើនយកទៅប្រើបិទទូកកាណូតជាដើម៕