ប្រភពសុំមិនបញ្ចេញឈ្មោះបានថ្លែងឲ្យដឹងនៅព្រឹកថ្ងៃព្រហស្សតិ៍ ទី៤ ខែធ្នូថា សកម្មភាពនៃបទល្មើសកាប់បំផ្លាញព្រៃឈើដែលធ្វើឡើងដោយក្រុមមន្ត្រីយោធាមានអំណាច កំពុងកើតមានយ៉ាងគគ្រឹកគគ្រេងនៅក្នុងភូមិសាស្ត្រស្រុកសំឡូត ៖ «ហើយប្រភេទឈើដែលគេដឹកហ្នឹងមាន៥ប្រភេទឈើសំខាន់ៗ ឈើគ្រញូង បេង ផ្ចឹក សុក្រមហើយនិងធ្នង់។ ឈើហ្នឹងមុខកាត់វាតូចបំផុតក៏កន្លះម៉ែត្រដែរ»។
ប្រភពដដែលបន្តថា កាលពីថ្ងៃសុក្រ ទី២៧ ខែវិច្ឆិកា ឈើប្រណីតទាំង៥ប្រភេទខាងលើចំនួនប្រមាន១២ឡានសណ្តោង ត្រូវបានក្រុមទាហានដឹកចេញតាមច្រក៤០០និងច្រកពាមតា ទៅក្នុងប្រទេសថៃ ដោយមានក្រុមទាហានប្រដាប់ដោយអាវុធជាអ្នកការពារ។
ប្រភពសុំមិនបញ្ចេញឈ្មោះឲ្យដឹងដូច្នេះ ៖ «ដឹកចេញតាមច្រក៤០០ មួយទៀតដឹកតាមច្រកពាមតា ឡានថៃចូលមកដឹកតែម្ដង ឡានកាំមីញ៉ុងសណ្ដោង។ ទាហានភូមិភាគ៥ ជួរមុខដឹកនាំដោយលោក ប្រាក់ ផាន ស័ក្កិ៤កន្លះ»។
លោកវរសេនីយ៍ទោ ប្រាក់ ផាន ដែលទើបផ្លាស់ចេញពីច្រកពាមតា ទៅកាន់ច្រក៤០០ ក្នុងស្រុកសំឡូត មិនអាចទាក់ទងសុំការបញ្ជាក់បានទេ។ ប៉ុន្តែលោកឧត្តមសេនីយ៍ត្រី ទុយ ប៊ុនលី មេបញ្ជាការរងយោធភូមិភាគ៥ប្រចាំទិសស្រុកសំឡូតបញ្ជាក់ថា ៖ «ទេ! អាហ្នឹងបើមានវត្ថុតាងមានអី ប៉ុន្តែវាអត់មាន។ ឥឡូវឲ្យខាងក្រុមណាដែលគេឃើញឲ្យទៅមើលមើល៍ វាមានអត់»។
ទាក់ទិនការកាប់បំផ្លាញព្រៃឈើនេះ គេមិនអាចទាក់ទងលោក ហែន សុផល អភិបាលស្រុកសំឡូត ដើម្បីសុំការអត្ថាធិប្បាយបានទេ។
លោកស្រី គឹម លី មេឃុំតាតោក បានថ្លែងថា អាជ្ញាធរមូលដ្ឋានមិនអាចបង្ក្រាបពួកជនល្មើសបានទេ ៖ «រាល់ថ្ងៃសឹងតែដើរជាន់ក្បាលយើងហើយ»។
លោក ប្រាជ្ញ ច័ន្ទ អភិបាលខេត្ត និងលោក លី ជូបៀង នាយខណ្ឌរដ្ឋបាលព្រៃឈើបាត់ដំបង មិនអាចទាក់ទងសុំការបញ្ជាក់បានទេ ជុំវិញការករណីកាប់បំផ្លាញព្រៃឈើនៅស្រុកសំឡូត ដោយទូរស័ព្ទរោទ៍ជាច្រើនសាតែមិនមានអ្នកទទួល។
ទាក់ទិនករណីកាប់បំផ្លាញព្រៃឈើនេះ លោក យិន ម៉េងលី មន្ត្រីសិទ្ធិមនុស្សនៃសមាគមអាដហុក បានថ្លែងថា មន្ត្រីមូលដ្ឋានត្រូវរាយការណ៍ទៅអាជ្ញាធរខេត្តដែលមានអំណាចគ្រប់គ្រាន់ក្នុងការបង្ក្រាបបទល្មើសព្រៃឈើ។
លោក យិន ម៉េងលី មានប្រសាសន៍ដូច្នេះ ៖ «ចំពោះសមត្ថកិច្ច ឬអាជ្ញាធរពាក់ព័ន្ធត្រូវតែមានវិធានការ។ យើងឃើញមានការកាប់ច្រើន មានការស្រែកច្រើន ក៏ប៉ុន្តែយើងដាក់សំណួរសួរថា តើអ្នកជាប់គុកពីបញ្ហានេះមានប៉ុន្មានភាគរយ?»។
ព្រៃឈើនៅស្រុកសំឡូត ដូចជានៅឃុំស៊ុង ឃុំសំឡូត តាតោក និងនៅតាមបណ្តោយព្រំដែនខ្មែរ-ថៃ ត្រូវបានគេកាប់បំផ្លាញស្ទើរតែអស់ទាំងស្រុងទៅហើយ ប៉ុន្តែអាជ្ញាធរមានសមត្ថកិច្ចពាក់ព័ន្ធក្នុងខេត្តនេះ គេនៅពុំទាន់ឃើញមានវិធានការជាដុំកំភួនក្នុងការបង្ក្រាបឡើយ៕