អាជ្ញាធរចោទពលរដ្ឋថាចាប់ដីសង់លំនៅឋានដោយខុសច្បាប់នៅបាត់ដំបង
h062312mn.mp3
ចំនួននេះ មានសន្ទុះកាន់តែច្រើនឡើង ដែលអាចធ្វើឲ្យអាជ្ញាធរខេត្តលំបាក ក្នុងការរៀបចំបែងចែកដីសម្បទានសង្គមកិច្ច ទៅឲ្យប្រជាពលរដ្ឋដែលពុំមានដីធ្លីពិតប្រាកដ។
អ្នកភូមិនៅចំណុចអណ្ដូងកន្ទួត បានបញ្ជាក់នៅថ្ងៃទី២៣ ខែមិថុនា ថា សកម្មភាពចាប់ដីសង់លំនៅឋាននេះ កើតមានជាបន្តបន្ទាប់ ជាពិសេសក្រោយពីរាជរដ្ឋាភិបាលកម្ពុជា បានដាក់បញ្ជាឲ្យមានការកែទម្រង់ដីសម្បទានសេដ្ឋកិច្ច ហើយរៀបចំដីសម្បទានសង្គមកិច្ច ចែកជូនប្រជាពលរដ្ឋពុំមានដីធ្លីពិតប្រាកដ៖ «គេរៀបចំធ្វើជាភូមិ លំនៅឋាន មកគ្រប់ខេត្ត នៅចំណុចអូរព្រៃផ្ដៅមកអណ្ដូងកន្ទួត។ ចំណុចហ្នឹង វាអត់ដាច់ស្រេចនៅឡើយទេ»។
លោកឧត្ដមសេនីយ៍ត្រី ស ថេត ស្នងការនគរបាលខេត្តបាត់ដំបង មានប្រសាសន៍ថា ចំនួនគ្រួសារដែលមកពីបណ្ដាខេត្តផ្សេង ចូលទៅបោះទីតាំងរស់នៅលើដីនៅចំណុចនោះ មានចំនួនជិត ១ពាន់គ្រួសារ។ សមត្ថកិច្ចបានរាយការណ៍បញ្ហានេះ ហើយអាជ្ញាធរខេត្តកំពុងមានវិធានការដោះស្រាយ។
លោកឧត្ដមសេនីយ៍ត្រី ស ថេត៖ «កន្លងទៅ ខាងអធិការរាយការណ៍មក ប៉ុន្តែខ្ញុំមិនទាន់ច្បាស់យ៉ាងម៉េចទេ គ្រាន់តែថា មានអ្នកខ្លះទៅចលនាវាស់ប៉ុណ្ណេះ វាស់ប៉ុណ្ណោះ។ ហើយយកដូចជាម្នាក់ ៣០ម៉ឺន ចាំមើលខ្ញុំបានឈ្មោះពិតប្រាកដហើយ ខ្ញុំឆ្លងអភិបាលខេត្ត។ ប៉ុន្តែអភិបាលខេត្ត គាត់មិនទុកទេ ពីព្រោះគាត់នឹងចាត់ចែងទៅតាមការណែនាំរបស់សម្ដេច ព្រោះថា ត្រូវវាស់ចែកប្រជាពលរដ្ឋដែលអត់ពិតប្រាកដហ្នឹង ហើយអ្នកនៅពីក្រោយ យើងទប់ស្កាត់កុំឲ្យគាត់រាលដាលទៅកន្លែងផ្សេងទៀត»។
វិទ្យុអាស៊ីសេរី នៅមិនទាន់អាចសុំសេចក្ដីបញ្ជាក់ពីលោក ប្រាជ្ញ ចន្ទ អភិបាលខេត្តបាត់ដំបងបានទេ ជុំវិញបញ្ហានេះ។
ប៉ុន្តែមន្ត្រីសាលាខេត្តបាត់ដំបង មួយរូបបានបញ្ជាក់ថា ការហូរចូលរបស់ប្រជាពលរដ្ឋទៅចាប់ដីរបស់រដ្ឋនៅតំបន់នោះ គឺដោយសារមានមេខ្យល់នៅពីក្រោយខ្នង ហើយមេខ្យល់ទាំងនោះ បានយកលុយពីប្រជាពលរដ្ឋម្នាក់ពី ១៥ម៉ឺន ទៅ ២០ម៉ឺនរៀល។
សកម្មភាពនេះ លោកចាត់ទុកថា ជាទង្វើខុសច្បាប់៖ «មិនអាចអ្នកណាមកយកដីរដ្ឋ មកចែកដោយមិនឆ្លងកាត់អាជ្ញាធរទេ។ រឿងចែកដី ជាសមត្ថកិច្ចរបស់អាជ្ញាធរ។ គាត់នាំគ្នាធ្វើអញ្ចឹង ទៅជាអនាធិបតេយ្យហើយ។ ខេត្តមិនទុកឲ្យនៅអញ្ចឹងទេ អ្នកខ្លះមិនស្គាល់អណ្ដូងកន្ទួតហ្នឹងផង ហើយមកសួរគេថា ឯណាផ្លូវទៅកន្លែងគេចែកដី»។
លោក ប្រាជ្ញ ចន្ទ ជាអភិបាលខេត្តបាត់ដំបង កាលពីថ្ងៃទី១៥ ខែមិថុនា បញ្ជាក់ថា ក្រុមមន្ត្រីជំនាញរបស់គណៈកម្មការសុរិយោដី និងមន្ត្រីរដ្ឋបាលមូលដ្ឋាននៅគ្រប់ស្រុកទាំងអស់ក្នុងខេត្តបាត់ដំបង កំពុងយកចិត្តទុកដាក់លើការងារដីសម្បទានសង្គមកិច្ចនេះ ក្រោយពីលោកនាយករដ្ឋមន្ត្រី ហ៊ុន សែន បានដាក់បទបញ្ជារួចមក។
លោកនាយករដ្ឋមន្ត្រី ហ៊ុន សែន កាលពីថ្ងៃទី១៤ ខែមិថុនា ឆ្នាំ២០១២ បានបញ្ជាឲ្យរដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ ដកហូតកាត់ដីសម្បទានសេដ្ឋកិច្ចនៅទូទាំងប្រទេសកម្ពុជា ទុកបែងចែកឲ្យគ្រួសារប្រជាពលរដ្ឋ ដែលខ្វះខាតដីធ្លី និងបាត់បង់ដីស្រែ ដីចម្ការ បង្កបង្កើនផលនារយៈពេលកន្លងមក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
