តំណាងសហគមន៍ លោក ជុ សាវ៉ាត មានប្រសាសន៍ឲ្យដឹងនៅថ្ងៃសុក្រ ទី៥ កញ្ញា ឆ្នាំ ២០០៨ ថា ៖ «ទិញដី ទិញព្រៃហ្នឹងហើយ គេកាប់ច្រើនណាស់ ព្រោះគេនៅដឹកទាំងយប់ទាំងថ្ងៃ។ ដើមធំៗណាស់មិនមែនដើមតូចទេ មុខ១០០ជាង ហើយ ២៦ ២៧ ឯណោះ»។
ភ្នំរពឿងជាតំបន់ព្រៃឈើមានតម្លៃសេសសល់បន្ទាប់ពីការកាប់រានព្រៃឈើយកដីអស់ប្រមាណ២០០ហិកតារ កាលពីឆ្នាំ២០០៧កន្លងមក នៅតាមជើងភ្នំរពឿងរហូតដល់បឹងកឺន។
ភ្នំនេះបើតាមអ្នកភូមិប៉ាន់ប្រមាណថា មានទំហំជាងមួយគីឡូម៉ែត្រការ៉េជាតំបន់រ៉ែត្បូងនិងរ៉ែមាស និងមានព្រៃឈើសេសសល់នៅលើតួភ្នំតែប៉ុណ្ណោះ ដែលកំពុងរងការកាប់បន្តទៀត។
មេឃុំលុងឃុង លោក ធូន ភូន ទទួលស្គាល់ថាការកាប់រានព្រៃយកដីនៅក្បែរជើងភ្នំរពឿង កាលពីឆ្នាំកន្លងទៅពិតជាកើតមាន ហើយករណីនេះអ្នកភូមិបានប្តឹងផ្តល់ទៅដល់តុលាការសាលាឧទ្ធរណ៍និងក្រសួងយុត្តិធម៌រួចហើយដែរ។ លោកថាមិនបានដឹងអំពីសកម្មភាពលួចកាប់ឈើនៅតំបន់ភ្នំរពឿងនោះទៀតទេ។
លោក ធូន ភូន បានឲ្យដឹងថា ៖ «ឈើដែលកាប់ពីភ្នំរពឿងហ្នឹង ខ្ញុំជម្រាបប្រាប់ថាមិនទាន់ច្បាស់ទេ។ ខ្ញុំអាជ្ញាធរមិនទាន់ដឹងផង...»។
កាលពីឆ្នាំ២០០៨ អ្នកភូមិលុងឃុង ១៩៨គ្រួសារ បានដាក់ពាក្យបណ្តឺងទៅតុលាការសាលាឧទ្ធរណ៍និងក្រសួងយុត្តិធម៌ បន្ទាប់ពីក្រុមអាជ្ញាធរមូលដ្ឋាននិងមន្ត្រីព្រៃឈើ មិនយកចិត្តទុកដាក់ស៊ើបអង្កេតទៅលើរបាយការណ៍លក់ដីធ្លីសហគមន៍ ដែលជាមូលហេតុនាំឲ្យមានការកាប់ទន្ទ្រានព្រៃឈើពង្រីកយកដីជាកម្មសិទ្ធិពីឈ្មួញទិញដីដែលខុសច្បាប់នោះ។
មន្ត្រីទទួលខុសត្រូវព្រៃឈើប្រចាំស្រុកបរកែរ លោក វង្ស សុមេធី ជាច្រើនលើកបដិសេធថា មិនមានការកាប់រានព្រៃឈើដូចរបាយការណ៍របស់អ្នកភូមិទេ ហើយទទួលស្គាល់ថាការកាប់រានព្រៃឈើធ្វើឡើងចំពោះតែដីព្រៃបុសចម្ការវិលជុំរបស់សហគមន៍តែប៉ុណ្ណោះ។ ហើយនៅថ្ងៃសុក្រនេះលោកអះអាងថា មិនបានដឹងពីការកាប់ឈើដូចរបាយការណ៍អ្នកភូមិនោះឡើយ ៖ «ទេខ្ញុំអត់បានដឹងផង»។
មន្ត្រីស៊ើបអង្កេតសមាគមអាដហុក លោក ប៉ែន ប៊ុណ្ណារ៍ មានប្រសាសន៍ថានឹងចាត់មន្ត្រីទៅដល់ទីកើតហេតុដើម្បីប្រមូលភស្តុតាងនៅទីនោះ ហើយការកាប់រានព្រៃឈើកន្លងទៅនេះត្រូវបានគេដុតសំអាតធ្វើជាចម្ការឯកជនអស់ហើយ។
លោក ប៉ែន ប៊ុណ្ណារ៍ បានមានប្រសាសន៍ថា ៖ «បើតាមគាត់និយាយដីកន្លែងហ្នឹងគឺជាដីព្រៃចម្ការឈើប្រណីត ដែលពីសង្គមមកហ្នឹងគេការពារសម្បើមណាស់កន្លែងហ្នឹង បឹងកឺតហ្នឹង។ ប្រជាសហគមន៍គាត់បានដាក់ពាក្យថ្លែងអំណរគុណទៅឯកឧត្ដមរដ្ឋមន្ត្រីក្រសួងយុត្តិធម៌រួចហើយ ហើយបានរាយការណ៍កាប់បន្ថែមហ្នឹងទៀត»។
រដ្ឋមន្ត្រីក្រសួងយុត្តិធម៌នៃប្រទេសកម្ពុជា លោក អង្គ វង្សវឌ្ឍនា កាលពីពាក់កណ្តាលខែកក្កដា ឆ្នាំ២០០៨ បានចេញលិខិតអទិបញ្ជាមួយឲ្យព្រះរាជអាជ្ញាអមតុលាការខេត្តរតនគិរី លោក ម៊ី សាខន ផ្តល់របាយការណ៍លម្អិតទាក់់ទិនទៅនឹងការកាប់បំផ្លាញព្រៃឈើតាមបណ្តឺងរបស់អ្នកភូមិខាងលើដើម្បីចាត់វិធានការបន្ត ក៏ប៉ុន្តែអ្នកភូមិនិយាយថាប្រសិនដំណោះស្រាយតាមផ្លូវច្បាប់យឺតយូរ ព្រៃឈើនៅមូលដ្ឋាននេះនឹងត្រូវវិនាសអស់នាពេលដ៏ខ្លីខាងមុខនេះ៕