បទល្មើសឈើប្រណិតបន្តកើតមាននៅខេត្តក្រចេះ
h071912ay.mp3
បទល្មើសព្រៃឈើកំពុងកើតមានក្នុងខេត្តក្រចេះ ក្រុមប្រជាពលរដ្ឋបានស្នើឲ្យលោកនាយករដ្ឋមន្ត្រី ហ៊ុន សែន ជួយមានវិធានការទប់ស្កាត់ជាថ្មី។
ពលរដ្ឋរស់នៅខេត្តក្រចេះ បានចោទសមត្ថកិច្ចមូលដ្ឋានខ្លួនមិនបានទប់ស្កាត់បទល្មើសព្រៃឈើ ឲ្យមានប្រសិទ្ធភាពស្របតាមបទបញ្ជារបស់ប្រមុខដឹកនាំបានដាក់ចេញនោះទេ។
ពលរដ្ឋមិនបង្ហាញអត្តសញ្ញាណរស់នៅស្រុកស្នួល ខេត្តក្រចេះ បានឲ្យដឹងនៅថ្ងៃទី១៩ ខែកក្កដា ឆ្នាំ២០១២ ថា សកម្មភាពដឹកជញ្ជូនឈើប្រណិតតាមរថយន្តនាពេលរាត្រីឆ្លងកាត់ខេត្តក្រចេះ មិនទាន់ថយចុះទេ ហើយបានទាមទារឲ្យលោកនាយករដ្ឋមន្ត្រី ហ៊ុន សែន បញ្ជូនមន្ត្រីជំនាញឯករាជ្យចុះអង្កេតជាថ្មីជុំវិញបញ្ហានេះ។
ប្រភពឲ្យដឹងថា ក្នុង១យប់ៗមានរថយន្តដឹកជញ្ជូនឈើប្រណិតឆ្លងកាត់តាមច្រកអូលាវ ស្រុកស្នួល ឆ្លងទៅប្រទេសជិតខាងកម្ពុជា មិនជាង១០គ្រឿងទេ៖ «ការដឹកជញ្ជូនឈើប្រណិត គឺតាមច្រករបៀង ប៉ុស្តិ៍អូលាវ មានលោក ស៊ូ ចំរើន ជាប្រធាន។ រីឯភរិយារបស់គាត់ ជាអ្នកទទួលទិញឈើប្រណិតគ្រប់ប្រភេទ មានឈើក្រញូង បេង នាងនួន ធ្នង់ និងឈើប្រណិតផ្សេងៗទៀត ដែលដឹកចេញតាមច្រកអូលាវ។ សមត្ថកិច្ចស្រុកស្នួល ហាក់បីដូចជាគ្មានបញ្ចេញប្រតិកម្មទប់ស្កាត់អ្វីទាំងអស់។ អំពាវនាវទៅដល់រដ្ឋាភិបាល មេត្តាចូលរួមទប់ស្កាត់បទល្មើសកាប់បំផ្លាញព្រៃឈើនៅស្រុកខ្មែរ ឲ្យមានប្រសិទ្ធភាពខ្ពស់»។
ប្រជាពលរដ្ឋបានចោទសមត្ថកិច្ចជំនាញពាក់ព័ន្ធខេត្តក្រចេះ ថា អាចជាប់ពាក់ព័ន្ធបទល្មើសឈើប្រណិត ទើបមិនអាចបង្ក្រាប ឬទប់ស្កាត់បទល្មើសព្រៃឈើមិនមានប្រសិទ្ធភាព។
ទោះយ៉ាងណា លោក ជួង ស៊ាងហាក់ ស្នងការនគរបាលខេត្តក្រចេះ និងលោក សូយ សារិទ្ធ នាយខណ្ឌរដ្ឋបាលព្រៃឈើខេត្តក្រចេះ បានបដិសេធមិនផ្តល់អត្ថាធិប្បាយជុំវិញការចោទប្រកាន់ពីបទល្មើសព្រៃឈើបន្តធ្វើសកម្មភាពឆ្លងកាត់ខេត្តក្រចេះ ទេ នៅរសៀលថ្ងៃទី១៩ ខែកក្កដា។
លោក ឈឹម សាវុធ មន្ត្រីស៊ើបអង្កេតរបស់មជ្ឈមណ្ឌលសិទ្ធិមនុស្សកម្ពុជា បានអះអាងថា បទល្មើសកាប់បំផ្លាញព្រៃឈើ និងសកម្មភាពដឹកជញ្ជូនឈើប្រណិតនៅខេត្តក្រចេះ មានរូបភាពគួរឲ្យព្រួយបារម្ភ។
លោកសង្គមស៊ីវិលរូបនេះ បានចោទសមត្ថកិច្ចជំនាញខេត្តក្រចេះថា មិនបានជួយទប់ស្កាត់បទល្មើសព្រៃឈើ ដែលឈ្មួញបានធ្វើសកម្មភាពក្នុងមូលដ្ឋានរបស់ខ្លួននោះទេ៖ «ឥឡូវបទល្មើសកើតមានពេញបន្ទុក រាប់រយរាប់ពាន់ហិកតារកំពុងកាប់បំផ្លាញព្រៃស្រោង ហើយអ្នកដឹកឈើក៏ដឹកចេញច្រើនដែរ។ បើនិយាយពីរណាយន្ត មានរាប់រយគ្រឿង ដែលកំពុងកាប់ឈើរាល់ថ្ងៃនេះ។ មិនមែនបទល្មើសបន្តកើតមានទេ គឺកើតមានខ្លាំងលើសដើម ១ទៅជា១០ឥឡូវនេះ។ ហើយគ្មានមន្ត្រីអាជ្ញាធរណាចេញទៅទប់ស្កាត់ទេ។ រីឯឈើប្រណិតកាប់ចេញពីកែវសីមា ឆ្លងកាត់ពេញៗឡានបន្តរៀងរាល់ថ្ងៃ និងដឹកពីខេត្តផ្សេងឆ្លងកាត់តំបន់ហ្នឹងរាប់ឡាន។ បើនិយាយទៅ បទល្មើសព្រៃឈើកើតមានពេញបន្ទុកតែម្តង នៅភូមិភាគឥសានឥឡូវនេះ។ យើងកំពុងតែព្រួយបារម្ភ ហើយមិនដឹងជាទៅពឹងខាងណាឲ្យជួយអន្តរាគមន៍រឿងនេះទេ»។
លោកនាយករដ្ឋមន្ត្រី ហ៊ុន សែន កាលពីឆ្នាំ២០១០ បានចេញបទបញ្ជាឲ្យមន្ត្រីក្រោមឱវាទរបស់ខ្លួនជួយទប់ស្កាត់ ឬបង្ក្រាបបទល្មើសព្រៃឈើឲ្យមានប្រសិទ្ធភាព។
យុទ្ធនាការកន្លងមក បានឈានដល់ចាប់ខ្លួនមន្ត្រីរដ្ឋាភិបាល និងឈ្មួញរកស៊ីឈើខុសច្បាប់បានជាច្រើននាក់ បញ្ជូនទៅតុលាការផ្ដន្ទាទោស។
ច្បាប់ស្ដីពីព្រៃឈើ ដែលបានដាក់ឲ្យប្រើប្រាស់នៅឆ្នាំ២០០២ បានចែងថា បទល្មើសព្រៃឈើជាបទឧក្រិដ្ឋ។
បទល្មើសព្រៃឈើថ្នាក់ទី១ ត្រូវជាប់ពន្ធនាគារពី៥ឆ្នាំដល់១០ឆ្នាំ និងត្រូវរឹបអូសវត្ថុតាងទាំងអស់មកជាសម្បត្តិរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អ្នកអានអនាមិក
If i remember well, Hun Sen must cut his head off. because since he declare this, the log destruction still continue. and the main people behind is no other than his family & freinds at the cambodian senate!!!!! what cambodian people needs is not to cut his head but just use his head to stop those criminals.
Jul 21, 2012 06:32 AM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
