បញ្ហាទំនិញឡើងថ្លៃនិងផលប៉ះពាល់

ដោយ កែវពេជ្រ មេត្តា

2008-05-26

អ្នកតំណាងរាស្ត្រមួយចំនួនបានប្រាប់ឲ្យដឹងនៅថ្ងៃទី២២ ឧសភា ឆ្នាំ២០០៨នេះថា បញ្ហាទំនិញឡើងថ្លៃរហូតមកដល់ពេលនេះ គឺនៅតែជាការព្រួយបារម្ភមួយដ៏ធំសម្រាប់សង្គមកម្ពុជា ពីព្រោះគេមិនទាន់ឃើញមានវិធានការដោះស្រាយដ៏មានប្រសិទ្ធភាពណាមួយពីរាជរដ្ឋាភិបាល ដើម្បីទប់ស្កាត់បញ្ហានេះនៅឡើយទេ ។

AFP Photo

សាច់ជ្រូកដែលគេដាក់លក់នៅក្នុងផ្សារមួយក្នុងទីក្រុងភ្នំពេញ ។

បញ្ហានេះកំពុងជះឥទ្ធិពលអាក្រក់ទៅលើជីវភាពប្រជាពលរដ្ឋខ្មែរក្រីក្រ ក៏ដូចជាកម្មករនិងមន្ត្រីរាជការ ទាហាន ស៊ីវិល ដែលមានប្រាក់បៀវត្សរ៍កម្រិតទាប ។

អ្នកតំណាងរាស្ត្រមណ្ឌលភ្នំពេញមួយរូបគឺលោក យឹម សុវណ្ណ បានបញ្ជាក់ថា តាមពិតទៅគេអាចធ្វើការដោះស្រាយចំពោះបញ្ហាទំនិញឡើងថ្លៃនេះ ប្រសិនបើរដ្ឋាភិបាលលោកមានឆន្ទៈដោយពិនិត្យមើលអំពីឫសគល់នៃហេតុដែលនាំឲ្យមានការដំឡើងថ្លៃទំនិញនោះ ។

លោកបន្តទៀតថា ទំនិញគ្រប់មុខដែលត្រូវបានគេដំឡើងថ្លៃ គឺបណ្ដាលមកពីហេតុជាចម្បងគឺការប្រព្រឹត្តអំពើពុករលួយជាហេតុនាំឲ្យបាត់បង់នូវប្រាក់ចំណូលជាតិ នាំឲ្យរដ្ឋខ្វះថវិកាសម្រាប់ទប់ទល់នឹងបញ្ហាផ្សេងៗដែលកើតមានដូចសព្វថ្ងៃនេះ ។

លោក យឹម សុវណ្ណ បានមានប្រសាសន៍ថា ៖ «មើលរបាយការណ៍របស់អង្គការ USAID ហើយនិងរបាយការណ៍របស់វិទ្យាស្ថានសេដ្ឋកិច្ចជាតិ ក្នុងមួយឆ្នាំៗប្រទេសកម្ពុជាយើងបាត់បង់លុយដោយសារអំពើពុករលួយយ៉ាងតិច ៥០០លានដុល្លារ ដោយសារទង្វើខុសច្បាប់ផ្សេងៗ ដោយសារការកាប់បំផ្លាញព្រៃឈើ ដោយសារតែការរត់ពន្ធ ។ ហើយវិទ្យាស្ថានសេដ្ឋកិច្ចជាតិ ក៏បានលើកឡើងដែរថា នៅក្នុងវិស័យឯកជន មួយឆ្នាំៗយ៉ាងតិច ៣៣០លានដុល្លារ បាត់បង់លុយ ហើយលុយទាំងអស់ហូរចូលទៅក្នុងហោប៉ៅមន្រ្តីពុករលួយ ។ ដូច្នេះអំពើពុករលួយនេះធ្ងន់ធ្ងរណាស់ បើយើងរៀបចំប្រទេសឲ្យបានត្រឹមត្រូវ កាត់បន្ថយអំពើពុករលួយ ខ្ញុំជឿជាក់ថា រដ្ឋមិនខ្វះលុយសម្រាប់កសាងប្រទេសទេ» ។

អ្នកតំណាងរាស្ដ្រដដែលនេះបានបញ្ជាក់ទៀតដែរថា ភាពខ្សោយនៃការមិនមានវិធានការលុបបំបាត់អំពើពុករលួយដែលបានជំរុញឲ្យខ្សត់ថវិកាជាតិបែបនេះ រាជរដ្ឋាភិបាលត្រូវបង្ខំចិត្ដធ្វើការដំឡើងតម្លៃពន្ធក្នុងការនាំចូលនូវទំនិញនានា ជាពិសេសគឺពន្ធប្រេងសាំងដែលមានកម្រិតខ្ពស់ជាងគេបើប្រៀបធៀបទៅនឹងបណ្ដាប្រទេសផ្សេងៗទៀតក្នុងតំបន់ ។

លោកបានបន្តទៀតថាការដំឡើងពន្ធសាំងរបស់រាជរដ្ឋាភិបាល ដើម្បីឲ្យបានប្រាក់ចំណូលសម្រាប់ជាតិនោះ ក៏បានធ្វើឲ្យក្រុមហ៊ុនអ្នកវិនិយោគផ្នែកនេះគេត្រូវតែដំឡើងថ្លៃប្រេងរបស់គេដែរ ដើម្បីឲ្យបានប្រាក់ចំណេញសម្រាប់ក្រុមហ៊ុនរបស់គេ ចំណែកឯអ្នករងគ្រោះវិញនោះ គឺប្រជាពលរដ្ឋអ្នកក្រីក្រ ។

លោក យឹម សុវណ្ណ បានបញ្ជាក់ថា ៖ «ពីព្រោះគេចអត់រួចទេ ប្រជាពលរដ្ឋប្រើសាំងរៀងរាល់ថ្ងៃ រៀងរាល់ម៉ោង ចង់មិនចង់ ប្រជាពលរដ្ឋទោះថ្លៃយ៉ាងណា បង្ខំចិត្តដើម្បីទិញសាំងហ្នឹងយកមកប្រើ យកមកចាក់ម៉ូតូ យកមកចាក់ម៉ាស៊ីនបូមទឹក អ៊ីចឹងគាត់គេចមិនរួច ហើយរដ្ឋាភិបាលអត់មានសមត្ថភាពទៅប្រមូលលុយពីកន្លែងផ្សេងក្រៅតែពីជំរិតទារប្រាក់ពីប្រជាពលរដ្ឋ តាមរយៈសាំងហ្នឹងហើយ ។ អ៊ីចឹងបានដោយសារអំពើពុករលួយហ្នឹងហើយ ដែលធ្វើឲ្យរដ្ឋាភិបាលមិនអាចបញ្ចុះតម្លៃសាំងបាន» ។

បញ្ជាក់ប្រាប់ស្រដៀងគ្នានេះដែរ ទីប្រឹក្សារបស់រាជរដ្ឋាភិបាលមួយរូប គឺលោក សេរី កុសល បានឲ្យដឹងថា ជាការពិតកក្តាទំនិញឡើងថ្លៃនៅកម្ពុជាភាគច្រើនគឺបណ្តាលមកពីមានអំពើពុករលួយ ហើយក្រៅពីនេះទៀតអាចបណ្តាលមកពីការហូរចូលនូវជនអន្តោប្រវេសន៏ខុសច្បាប់ច្រើន ហើយនិងការធ្វើវិនិយោគដីធ្លីឲ្យនៅទំនេរច្រើនមិនបង្ករបង្កើនផល ។ល។

លោក សេរី កុសល បានមានប្រសាសន៍ថា ៖ «ដីជាច្រើនដែលអ្នកមានធំៗទិញទុកចោលពេញហ្នឹង អត់ធ្វើអីទេ នៅកណ្ដាលក្រុងក៏មានកន្លែងខ្លះទិញទុកចោល ហើយដោយឥតបង់ពន្ធ សុទ្ធតែដីល្អៗមានតម្លៃ រួមទាំងដីស្រែទៀត ដែលករណីនេះអត់យកពន្ធបានមួយសេនទេ អ្នកដែលមានអំណាច និងអ្នកដែលមានឥទ្ធិពល ប៉ុន្តែផ្ទុយទៅវិញយើងសង្កត់ក យកពន្ធបានតែអ្នកណាដែលគ្នារកស៊ីត្រង់» ។

ទីប្រឹក្សារបស់រាជរដ្ឋាភិបាល លោក សេរី កុសល បានមានប្រសាសន៏ប្រាប់ផងដែរថា ចំពោះទំនិញឡើងថ្លៃនៅក្នុងប្រទេសសព្វថ្ងៃនេះ តាមពិតទៅគឺមិនមែនមានតែនៅកម្ពុជានោះទេ បញ្ហានេះបាននិងកំពុងតែកើតមាននៅក្នុងប្រទេសផ្សេងៗទៀត នៅក្នុងពិភពលោកផងដែរ ដូចជានៅប្រទេសជិតខាងជាដើម ក៏ប៉ុន្តែខុសគ្នាត្រង់ថា ប្រទេសគេមិនសូវមានផលប៉ះពាល់ដល់ជីវភាពរស់នៅរបស់ពលរដ្ឋគេឡើយ ពីព្រោះពលរដ្ឋរបស់គេអាចរកប្រាក់ចំណូលប្រចាំថ្ងៃបានខ្ពស់ ហើយមន្ដ្រីរាជការរបស់គេវិញក៏មានប្រាក់បៀវត្សរ៍ច្រើនសមរម្យអាចទប់ទល់ទៅនឹងទំនិញឡើងថ្លៃបាន ។

លោកបានបន្ថែមទៀតថា ម្យ៉ាងទៀតទំនិញនៅប្រទេសគេក៏មិនត្រូវបានដំឡើងថ្លៃខ្ពស់ជ្រុលហូសនោះដែរ ដោយសាររដ្ឋាភិបាលរបស់គេបានធ្វើការទប់ស្កាត់ ក្នុងនោះគេបានសុំឲ្យប្រជាពលរដ្ឋចេះសន្សំសំចៃក្នុងការចំណាយទិញវត្ថុណាដែលមិនចាំបាច់ឬបន្ថយការដើរលេងកម្សាន្ដ ។

លោក សេរី កុសល បានឲ្យដឹងថា ៖ «គេណែនាំទៅប្រជារាស្រ្តគេដើម្បីសន្សំសំចៃប្រងផង ថវិកាផ្ទាល់ខ្លួនផង ក្រៅពីនេះ គេក៏ព្យាយាមទាក់ទងនឹងធនាគារពិភពលោកអីទៅ គេប៉ះប៉ូវនូវការខ្ចីអីទៅ ដើម្បីទប់ទល់នឹងសភាពការណ៍ បម្រើប្រជារាស្រ្តគេ ។ នៅកម្ពុជាយើង ទំនិញហ្នឹងវាឡើងថ្លៃពេក ទោះបីគណបក្សណាក៏ដោយ គឺថាវាប៉ះពាល់ទាំងអស់ហើយ» ។

គួររំឮកដែរថា ចំពោះបញ្ហាទំនិញឡើងថ្លៃនេះ លោក ហ៊ុន សែន នាយករដ្ឋមន្ត្រីកម្ពុជា កាលពីថ្ងៃទី២៣ ខែមេសាកន្លងទៅ ក្នុងឱកាសជួបជាមួយអ្នកវិនិយោគនៅក្នុងប្រទេសនៅក្រុងភ្នំពេញ ក្នុងឱកាសវេទិការាជរដ្ឋាភិបាលនិងឯកជនលើកទី១៣ បានមានប្រសាសន៏ប្រាប់ផងដែរ អំពីវិធានការរបស់រាជរដ្ឋាភិបាលក្នុងការទប់ស្កាត់និងការឡើងថ្លៃទំនិញនិងអតិផរណានៅកម្ពុជា ។

លោកនាយករដ្ឋមន្រ្តីបានបញ្ជាក់ថា មូលហេតុនៃទំនិញឡើងថ្លៃនិងអតិផរណាខ្ពស់នៅកម្ពុជាមាន៤យ៉ាងគឺ ៖ ទី១ ដោយសារការឡើងថ្លៃសាំងជាអន្តរជាតិ ទី២ ការកើនឡើងនូវតម្រូវការស្បៀងនិងទំនិញប្រើប្រាស់ក្នុងពិភពលោកនិងតំបន់ ជាពិសេសការយកធញ្ញជាតិទៅចម្រាញ់ជាជីវឧស្ម័ន ទី៣ ការធ្លាក់ចុះនៃតម្លៃប្រាក់ដុល្លារអាមេរិក និងទី៤ គឺជាកត្តាក្នុងប្រទេស គឺការកើនឡើងនូវតម្រូវការទំនិញនិងស្បៀងច្រើនជាងមុន ។

លោកនាយករដ្ឋមន្រ្ដីបានបន្ថែមក្នុងឱកាសនោះទៀតថា ប្រទេសកម្ពុជាមានអត្រាអតិផរណាប្រចាំឆ្នាំ ប្រមាណពី ៥ ទៅ ៦%ប៉ុណ្ណោះ តែនៅដើមឆ្នាំ២០០៨នេះ អត្រាអតិផរណាបានកើនឡើងខ្ពស់ជិត ២០% ហើយតម្លៃទំនិញនានាបានឡើងជាបន្តបន្ទាប់ ។

លោកបានបញ្ជាក់ទៀតថា ដើម្បីទប់ស្កាត់ការឡើងថ្លៃទំនិញ និងទប់ស្កាត់អត្រាអតិផរណាឲ្យបានទាប គឺកន្លងមករដ្ឋាភិបាលបានចាត់វិធានការមួយចំនួន ដូចជាការដំឡើងប្រាក់ខែបុគ្គលិករដ្ឋ និងកម្មករកាត់ដេរ ការឧបត្ថម្ភធនមួយចំនួនដើម្បីឲ្យថ្លៃអគ្គិសនីនៅទាប ហើយនិងការប្រកាសឲ្យបញ្ចេញអង្ករទៅលក់ក្នុងតម្លៃទាបដល់ប្រជាពលរដ្ឋ និងការបើកចំហការនាំចូលនូវម្ហូបអាហារមកពីខាងក្រៅជាដើម ។

បើទោះបីជាមានការបញ្ជាក់អះអាងពីប្រមុខរាជរដ្ឋាភិបាលបែបនេះក៏ដោយ គេឃើញអ្នកតំណាងរាស្ត្រមួយចំនួននៅតែសម្ដែងការបារម្ភពីបញ្ហានេះផងដែរ ពីព្រោះទំនិញសព្វសារពើជាពិសេសប្រេងសាំងនៅតែបន្តការឡើងថ្លៃឥតឈប់ឈរដែលជាការគំរាមកំហែងមួយក្នុងការរស់នៅរបស់ប្រជាពលរដ្ឋខ្មែរក្រីក្រ ៕

បោះពុម្ព អ៊ីម៉េល

ឧបករណ៍រឿង

	ស្តាប់សំឡេង
	ថតសំឡេង
	អ៊ីម៉េល
	ព្រឹត្តិបត្រព័ត៌មាន
	បោះពុម្ព