តម្លៃទំនិញមិនថយចុះ ទោះបីជាមានបាតុកម្ម

ដោយ គឹម ពៅសុត្តន្ត

2008-04-10

គ្មានការឆ្លើយតបទាល់តែសោះមកដល់ថ្ងៃនេះពីរដ្ឋាភិបាល ទៅលើការទាមទាររបស់មេដឹកនាំបក្សប្រឆាំង ដែលបានដឹកនាំបាតុកម្ម កាលពីប៉ុន្មានថ្ងៃមុនកន្លងទៅ ដើម្បីបញ្ចុះតម្លៃទំនិញនៅកម្ពុជា ដែលកំពុងតែឡើងថ្លៃខ្ពស់ក់បពពក ។

RFA Photo

សាច់ជ្រូកដែលគេដាក់លក់ក្នុងផ្សារ ។

មេដឹកនាំបក្សប្រឆាំង និងជាអតីតរដ្ឋមន្ត្រី ក្រសួងហិរញ្ញវត្ថុ លោក សម រង្ស៊ី រិះគន់ថា រដ្ឋាភិបាលខ្លាចប៉ះពាល់ទៅដល់ផលប្រយោជន៍របស់ខ្លួន ដែលជាមូលហេតុ នៃការបណ្តែតបណ្តោយឱ្យទំនិញឡើងថ្លៃលើស ប្រទេសនានានៅជុំវិញខ្លួន ។

លោក សម រង្ស៊ី បានឱ្យដឹងថា ៖ «ដូច្នេះគេមិនចង់បន្ថយ បញ្ចុះពន្ធទេ ដូចយើងទាមទារឱ្យគេឈប់យក គេអត់ចង់ឈប់យក គេយកទៀតវាចំណេញគេផ្ទាល់ ។ ហើយសិទ្ធិផ្តាច់មុខសុទ្ធតែគ្នាគេ បក្សពួកគេ ។ អ្វីដែលជាខ្លឹមសារ ជាសារសំខាន់ គេអត់ធ្វើទេគេធ្វើសើៗ» ។

កាលពីថ្ងៃឤទិត្យកន្លងទៅ លោក សម រង្ស៊ី បានដឹកនាំមនុស្សប្រហែល ៣០០នាក់ ធ្វើបាតុកម្មអហិង្សានៅក្នុងក្រុងភ្នំពេញ ប្រឆាំងចំពោះការឡើងថ្លៃទំនិញសព្វសារពើ នៅលើទីផ្សារ ជាពិសេសតម្លៃប្រេងសាំង ។

នៅក្នុងបាតុកម្មនោះ លោកបានផ្តល់លទ្ធភាពចំនួន ៥ចំណុច ដែលរដ្ឋាភិបាលឤចទប់ទល់បញ្ហាទំនិញឡើងថ្លៃបាន ដូចជាបញ្ចុះពន្ធលើប្រេងសាំង និងបញ្ចុះប្រាក់ចំណេញលើក្រុមហ៊ុនចែកចាយប្រេងឥន្ធនៈ ។ ទី២ បញ្ចប់សិទ្ធផ្តាច់មុខរបស់ជនខិលខូច ដែលចេះតែឡើងថ្លៃទំនិញតាមអំពើចិត្ត ។ ទី៣ គ្រប់គ្រងសេដ្ឋកិច្ចជាតិឱ្យបានត្រឹមត្រូវ ដោយរក្សាលំនឹងរូបិយវត្ថុ ។ ទី៤ គ្រប់គ្រងការបោះពុម្ពក្រដាសប្រាក់ និងទី៥ ត្រូវធ្វើកំណែទម្រង់ភូមិបាល គឺត្រូវចែកចាយដីធ្លីដល់ពលរដ្ឋដែលខ្វះដីធ្វើកសិកម្ម ។

ការលើកឡើងទាំងអស់ ត្រូវបានអ្នកនាំពាក្យរដ្ឋាភិបាលច្រានចោលដោយចោទថា លោក សម រង្ស៊ី កំពុងធ្វើការឃោសនាដើម្បីសន្លឹកឆ្នោតនាពេលខាងមុខប៉ុណ្ណោះ ។

លោក ខៀវ កាញារីទ្ធ អះឤងថា រដ្ឋាភិបាលបានឧបត្ថម្ភធនលើផ្នែកប្រេង ដោយអត់ដំឡើងពន្ធដារ បានទប់ស្កាត់ការនាំអង្ករចេញ និងបានដោះស្រាយនយោបាយដីធ្លី ដែលគេកំពុងធ្វើស្រាប់ ។

លោក ខៀវ កាញារីទ្ធ បានមានប្រសាសន៍ថា ៖ «រដ្ឋាភិបាលនៅតែខាតពន្ធដដែលតាំងពីយូរណាស់ហើយ អត់ទាំងហ៊ានដំឡើងផង គិតពន្ធតាមតោនតើ !យើងមានគិតពន្ធតាមចំនួនចូលឯណា ? ។ នៅលើមេឃយ៉ាងម៉េចគាត់ដឹងតើ ពិភពលោកអង្ករឡើងថ្លៃអ៊ីចឹង កសិករគេអរហើយ ។ អ៊ីចឹងរដ្ឋាភិបាលធ្វើម៉េចដំឡើងប្រាក់ខែ ជួយបញ្ហាដំឡើងប្រាក់បៀវត្សរ៍កម្មករ នាំសាច់ចូល ទប់អង្ករកុំឤលឱ្យចេញពីរខែ ដើម្បីទម្លាក់តម្លៃអង្ករហ្នឹង» ។

គួរជម្រាបជូនថា របាយការណ៍របស់ធនាគារពិភពលោក កាលពីចុងឆ្នាំ ២០០៧ បានបញ្ជាក់ថា អត្រាចំណីឤហារមានការកើនឡើងដល់ទៅ ២០% នៅកម្ពុជា រីឯ ប្រេងសាំងវិញមានអត្រាកើនឡើងដល់ទៅ ១២% ។

មកដល់ថ្ងៃនេះ តម្លៃអង្ករនៅរក្សាតម្លៃថេរ គឺស្រកចុះបន្តិចក្រោយពីវិធានការបណ្តោះឤសន្ន របស់រដ្ឋាភិបាល ប៉ុន្តែតម្លៃប្រេងសាំងវិញមួយលីត្រប្រហែល ៥០០០រៀល នៅដដែលមិនមានការធ្លាក់ថ្លៃឡើយ ៕

បោះពុម្ព អ៊ីម៉េល

ឧបករណ៍រឿង

	ស្តាប់សំឡេង
	ថតសំឡេង
	អ៊ីម៉េល
	ព្រឹត្តិបត្រព័ត៌មាន
	បោះពុម្ព