រដ្ឋាភិបាលស្នើឲ្យអាជ្ញាធរគ្រប់ខេត្តជួយផ្សព្វផ្សាយព័ត៌មានការងារដល់ពលរដ្ឋ
h072412tn.mp3
ដើម្បីកាត់បន្ថយចំនួនអ្នកចំណាកស្រុក រដ្ឋាភិបាលបានបង្កើតគោលការណ៍ថ្មីមួយ ដោយឲ្យអាជ្ញាធរខេត្ត ជួយរកការងារឲ្យប្រជាពលរដ្ឋធ្វើតាមរយៈភ្នាក់ងារជាតិមុខរបរ និងការងារនៅតាមមូលដ្ឋាន។ មន្ត្រីអង្គការសង្គមស៊ីវិល បានស្វាគមន៍គោលការណ៍ថ្មីនេះ ហើយថាវាជាជំហានដ៏ល្អសម្រាប់កម្ពុជា ដើម្បីត្រៀមខ្លួនចូលសមាហរណកម្មអាស៊ាន ឆ្នាំ២០១៥។
ប្រធានគណៈកម្មាធិការជាតិបណ្តុះបណ្ដាល ស្នើសុំឲ្យអភិបាលរាជធានី-ខេត្តទាំងអស់ ធ្វើការផ្សព្វផ្សាយនូវព័ត៌មានជ្រើសរើសកម្លាំងពលកម្ម តាមភ្នាក់ងារជាតិមុខរបរ និងការងារ ក្នុងដំណើរការជ្រើសរើសកម្លាំងពលកម្មរបស់បណ្ដាក្រុមហ៊ុន សហគ្រាស និងវិនិយោគនៅមូលដ្ឋានតាំងពីថ្នាក់ក្រោម រហូតដល់ថ្នាក់រាជធានី-ខេត្តនីមួយៗ។ ជាពិសេស ធ្វើការប្រមូលចងក្រងស្ថិតិប្រជាពលរដ្ឋអាយុពី ១៨ដល់៦៤ឆ្នាំ ដែលមានបំណងចង់ស្វែងរកការងារធ្វើ។
ក្នុងលិខិតស្នើសុំរបស់លោក សុខ អាន រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី និងជាប្រធានគណៈកម្មាធិការជាតិបណ្តុះបណ្ដាល ចេញកាលពីខែមីនា ដែលទើបតែផ្សព្វផ្សាយជាសាធារណៈ នៅថ្ងៃទី២៤ ខែកក្កដា បានបង្គាប់ទៅអភិបាលរាជធានីភ្នំពេញ និងអភិបាលខេត្តទាំងអស់ ឲ្យធ្វើការផ្សព្វផ្សាយដល់ប្រជាពលរដ្ឋនៅគ្រប់ភូមិ នូវព័ត៌មានជ្រើសរើសកម្លាំងពលកម្ម ដែលផ្តល់ជូនដោយទីភ្នាក់ងារជាតិមុខរបរ និងការងារក្នុងដំណើរការជ្រើសរើសកម្លាំងពលកម្មរបស់បណ្ដាក្រុមហ៊ុន សហគ្រាស និងវិនិយោគនានា នៅតាមភូមិ សង្កាត់ ឃុំ ខណ្ឌ និងស្រុក នៃរាជធានី-ខេត្តនីមួយៗ។
ជាពិសេស ធ្វើការប្រមូលចងក្រងស្ថិតិស្ដីពីប្រជាពលរដ្ឋអាយុ ១៨ដល់៦៤ឆ្នាំ ដែលមានបំណងចង់ស្វែងរកការងារធ្វើទៅតាមទម្រង់ស្ថិតិដែលមានភ្ជាប់ជាមួយនឹងទីភ្នាក់ងារជាតិមុខរបរ និងការងារ។
ក្នុងលិខិតដដែលរបស់ទីស្ដីការគណៈរដ្ឋមន្ត្រី ថាការប្រគល់ភារកិច្ចដល់ស្ថាប័នពាក់ព័ន្ធ ក្នុងការផ្សព្វផ្សាយពីព័ត៌មាន និងការជ្រើសរើសកម្លាំងពលកម្ម និងប្រមូលស្ថិតិពីចំនួនប្រជាពលរដ្ឋចង់រកការងារធ្វើ នឹងផ្តល់ភាពងាយស្រួលដល់ប្រជាពលរដ្ឋរកការងារធ្វើក្នុងស្រុក ជៀសវាងការធ្វើចំណាកស្រុកទៅធ្វើការខុសច្បាប់នៅប្រទេសជិតខាង។
វិធានការថ្មីរបស់រដ្ឋាភិបាល ធ្វើឡើងស្របពេលដែលមានសេចក្តីរាយការណ៍មួយចំនួនពីចំនួនកើនឡើងនៃក្រុមមនុស្សពេញកម្លាំង ដែលចំណាកស្រុកទៅធ្វើការនៅក្រៅប្រទេសទាំងប្រថុយប្រថាន ដោយសារតែកង្វះព័ត៌មានការងារតាមតំបន់នៅមានកម្រិត។
លោក ឈុន ឈន់ អភិបាលខេត្តកំពង់ធំ ឲ្យដឹងថា លោកបានចាប់ផ្ដើមអនុវត្តគោលការណ៍ថ្មីរបស់រដ្ឋាភិបាល ក្នុងការជួយស្វែងរកការងារដល់ប្រជាពលរដ្ឋ តាមរយៈផ្សព្វផ្សាយពីព័ត៌មាន និងជ្រើសរើសកម្លាំងពលកម្មរបស់ក្រុមហ៊ុន និងសហគ្រាសក្នុងមូលដ្ឋាន។ តែជាលទ្ធផល កិច្ចការនេះនៅមិនទាន់ទទួលបានជោគជ័យនៅឡើយទេ ព្រោះមន្ត្រីជំនាញកំពុងសិក្សាពីបញ្ហានេះ។
លោក ឈុន ឈន់ សង្ឃឹមថាគម្រោងនេះអាចនឹងដំណើរការយ៉ាងរលូនក្នុងពេលឆាប់ៗខាងមុខ និងអាចជួយពលរដ្ឋដែលចង់ស្វែងរកការងារធ្វើ ឲ្យមានការងារធ្វើ ដើម្បីផ្គត់ផ្គង់ជីវភាពគ្រួសាររបស់ពួកគេ៖ «មានបញ្ហាជាច្រើនដែលទៅជាបញ្ហាបោកប្រាស់អីអញ្ចឹង។ ដល់អញ្ចឹង ខ្ញុំថាបើគាត់ធ្វើឲ្យបានល្អត្រឹមត្រូវតាមគោលការណ៍ដែលបានឯកភាពគ្នានោះ វាអត់បញ្ហាអីទេ វាទៅរលូនហើយ»។
ប្រធានអង្គការកម្មវិធីអភិវឌ្ឍន៍ធនធានយុវជន លោក ជាង សុខា ឲ្យដឹងថា ប្រជាពលរដ្ឋពេញកម្លាំងធ្វើការភាគច្រើនមិនបានដឹងពីព័ត៌មានពេញលេញ នៃស្ថានភាពការងារនោះទេ។ លោកគាំទ្រចំពោះវិធានការថ្មីរបស់រដ្ឋាភិបាល ហើយថាចំណាត់ការនេះអាចនឹងកាត់បន្ថយហានិភ័យផ្សេងៗ ជាអាទិ៍ ការរំលោភសិទ្ធិពលករ ឬកម្មករជាដើម៖ «គំនិតផ្ដួចផ្ដើមនេះ មានសារសំខាន់មែនទែន ក្នុងការផ្តល់ព័ត៌មានពេញលេញ ហើយមានលក្ខណៈមួយជាប្រព័ន្ធ ដែលសង្គម និងរដ្ឋាភិបាលទទួលការគ្រប់គ្រងព័ត៌មានទាំងអស់នេះ គិតថាជាព័ត៌មានផ្លូវការ»។
នាយកប្រតិបត្តិអង្គការ ខារ៉ាម កម្ពុជា (CARAM Cambodia) លោក យ៉ា ណាវុធ ក៏បានស្វាគមន៍គោលនយោបាយថ្មីរបស់រដ្ឋាភិបាលដែរ។ ប៉ុន្តែរដ្ឋាភិបាលក៏គួរតែផ្តល់វគ្គបណ្ដុះបណ្ដាលបន្ថែម សម្រាប់ពួកគាត់ឲ្យយល់ដឹង ចេះពីកិច្ចការងារដែលត្រូវធ្វើផ្សព្វផ្សាយឲ្យបានទូលំទូលាយស្ដីពីព័ត៌មានជ្រើសរើសកម្លាំងពលកម្ម និងធ្វើយ៉ាងណាបង្កើនប្រាក់បៀវត្សរ៍ការងារក្នុងស្រុកឲ្យបានច្រើនប្រហាក់ប្រហែល និងប្រាក់ខែនៅបណ្ដាប្រទេសជិតខាង ដើម្បីកាត់បន្ថយការធ្វើចំណាកស្រុកខុសច្បាប់ទៅក្រៅប្រទេស៖ «គោលនយោបាយធ្វើយ៉ាងម៉េចឲ្យអនុវត្តទៅស្មើភាពគ្នា ដើម្បីអាចឲ្យគាត់អាចចូលមកវគ្គបណ្តុះបណ្ដាល ទទួលការងារហ្នឹងបានជារឿងសំខាន់ ដែលយើងអាចជួយទប់ស្កាត់ការធ្វើចំណាកស្រុកដោយប្រថុយប្រថាន ឬមិនមានឯកសារទៅកាន់ប្រទេសក្រៅ ហើយនឹងទាក់ទាញវិនិយោគិន និងធ្វើឲ្យសិប្បកម្មខ្នាតតូច និងខ្នាតធំធ្វើឲ្យបានល្អ»។
យោងតាមរបាយការណ៍អង្គការ ខារ៉ាម បង្ហាញថា មានពលករខ្មែរទាំងមានឯកសារស្របច្បាប់ និងគ្មានឯកសារជាង ៥ម៉ឺននាក់ កំពុងធ្វើការនៅប្រទេសម៉ាឡេស៊ី នៅប្រទេសថៃ មានជាង២សែននាក់ នៅប្រទេសកូរ៉េ មានជាង១ម៉ឺននាក់ និងនៅតាមបណ្ដាប្រទេសមួយចំនួន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
