លោក រស់ សុឃិត ត្រូវបានមន្ត្រីប៉ូលីសនិយាយថាបានសរសេរសារជាអក្សរផ្ញើតាមទូរស័ព្ទជាអនាមិកទៅលោក សយ សុភាព អគ្គនាយកមជ្ឈមណ្ឌលព័ត៌មានដើមអំពិល ថា លោក សយ សុភាព ពុករលួយ។ លោកបានត្រូវចាប់ខ្លួនកាលពីថ្ងៃទី២៨ តុលា នៅព្រំដែនកម្ពុជាវៀតណាមនៅក្នុងកាស៊ីណូមួយ ហើយបានបញ្ជូនខ្លួនមកតុលាការក្រុងភ្នំពេញចោទសួរ និងបានកាត់ទោសជាលើកទី១ នៅថ្ងៃព្រហស្បតិ៍ ទី២៩ តុលា។
ការពន្យារពេលកាត់ក្តីលើកទី១ បានកើតមានឡើងក្រោយពីលោក រស់ សុឃិត បានទាមទារឲ្យមានមេធាវីដើម្បីការពារក្តីរបស់លោក ប៉ុន្តែលោកមិនបានត្រូវអនុញ្ញាតឲ្យនៅក្រៅឃុំទេ។
លោក រស់ សុឃិត បានត្រូវចាប់ខ្លួនដោយប៉ូលិសក្រសួងមហាផ្ទៃតាមពាក្យបណ្តឹងរបស់លោក សយ សុភាព ពីប្រការដែលលោកទទួលសារជាអក្សរអនាមិក ចោទថា លោកជាអ្នកកាសែតពុករលួយ ជម្រិតទារប្រាក់ពីប្រជាពលរដ្ឋនិងមន្រ្តីគណបក្សប្រជាជនកម្ពុជា។
តាមកាសែតដើមអំពិលលេខចេញផ្សាយថ្ងៃទី៣០ ខែតុលា បានសរសេរថា ប្រការដែលលោក សយ សុភាព ប្តឹងឲ្យប៉ូលិសចាប់ខ្លួន លោក រស់ សុឃិត ដោយសារលោក រស់ សុឃីត បានផ្ញើសារចំនួន៤ដងក្នុងន័យគំរាមនិងបរិហារកេរ្តិ៍លោក។
លោក រស់ សុឃិត ជាអ្នកកាសែតម្នាក់ដែលធ្លាប់បំពេញការងារនៅស្ថាប័នព័ត៌មានធំៗជាច្រើននៅប្រទេសកម្ពុជាមានជាអាទិ៍ ព្រឹត្តិបត្រ The Cambodia Daily, កាសែត Phnom Penh Post, កាសែត Cambodia Time, វិទ្យុអាស៊ីសេរី, ទស្សនាវដ្តី អង្គរធំ ជាដើម៕