ចាងហ្វាងកាសែតបាយ័ន លោក សៀង ប៊ុនសុង បានឲ្យដឹងនៅថ្ងៃទី១៧ មេសា ថា កាលពីថ្ងៃទី១៥ មេសា ដែលជាថ្ងៃបញ្ចប់ពិធីបុណ្យចូលឆ្នាំខ្មែរ បុគ្គលិករបស់លោកឈ្មោះ ហង្ស ម៉ៅ និងអ្នកកាសែតមកពីកាសែត "វីរជនខ្មែរ" មួយរូបទៀត បានចុះទៅយកព័ត៌មាននៅតាមតំបន់កម្សាន្តនានាក្នុងខែត្រកំពត។ ប៉ុន្តែពេលទៅដល់ភូមិត្រពាំងរាំង ឃុំត្រពាំងរាំង ស្រុកជុំគីរី ស្រាប់តែអ្នកទាំងពីរបានឃើញដេប៉ូអារឈើធំមួយ ហើយពួកគេក៏ឈប់នៅទីនោះ ដើម្បីសួរនាំថា ដេប៉ូអារឈើនោះមានច្បាប់អនុញ្ញាតដែរទេ?
លោក សៀង ប៊ុនសុង បន្តថា នៅពេលនោះម្ចាស់សិប្បកម្មអារឈើ ឈ្មោះ ហួ ប៊ុនទូច ក៏ហៅលោក ហង្ស ម៉ៅ ចូលក្នុងផ្ទះ រួចគេចាក់សោរបង និងចាក់សោផ្ទះ ហើយក៏នាំគ្នាប្រើអំពើហិង្សាវាយលោក ហង្ស ម៉ៅ ឲ្យរងរបួស រួចគេទូរស័ព្ទហៅនគរបាលឲ្យមកចាប់ខ្លួនលោក ហង្ស ម៉ៅ ភ្លាមៗ។
វិទ្យុអាស៊ីសេរីមិនអាចទាក់ទងម្ចាស់សិប្បកម្មអារឈើ លោក ហួ ប៊ុនទូច ដើម្បីសុំបំភ្លឺអំពីការចោទប្រកាន់នេះបាននៅឡើយទេ នៅថ្ងៃទី១៧ ខែមេសា ឆ្នាំ២០១២ នេះ។
អធិការនគរបាលស្រុកជុំគីរី លោក គិត តារា បានស្ទាក់ស្ទើរក្នុងការបំភ្លឺអំពីករណីនេះ។ លោក គិត តារា គ្រាន់តែបញ្ជាក់ថា លោកមិនដឹងនោះទេ សមត្ថកិច្ចរបស់លោកគ្រាន់តែចាប់អ្នកកាសែតឈ្មោះ ហង្ស ម៉ៅ ទៅតាមការទូរស័ព្ទប្ដឹងរបស់លោក ហួ ប៊ុនទូច តែប៉ុណ្ណោះ។
មកទល់ពេលនេះ លោក ហង្ស ម៉ៅ ស្ថិតនៅក្នុងមន្ទីរឃុំឃាំងខែត្រកំពត នៅឡើយ គេមិនទាន់ដឹងនៅឡើយទេថា តើតុលាការនឹងសម្រេចយ៉ាងណាចំពោះករណីលោក ហង្ស ម៉ៅ នេះ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។