ប៉ូលិសវាយអ្នកកាសែតនៅរតនគិរីម្នាក់បែកក្បាល

អ្នកកាសែតម្នាក់នៅខេត្តរតនគិរី ត្រូវនគរបាលប៉ុស្តិ៍ឃុំតាឡាវ ស្រុកអណ្ដូងមាស វាយក្បាលនឹងកាំភ្លើងខ្លីធ្វើឲ្យមានស្នាមរបួសពីរថ្នេរ។

ដោយ វិជ័យ អានន្ទ
2012-09-26

លោក ឯក សុគុន្ធី អាយុ ៤០ឆ្នាំ ជាអ្នកកាសែតឈ្មោះ "តាព្រហ្ម" ឲ្យដឹងនៅថ្ងៃទី២៥ កញ្ញា ថា មានមន្ត្រីនគរបាលចំនួន ៣នាក់ ចូលក្នុងផ្ទះរបស់លោក ហើយបានយកកាំភ្លើងខ្លីមួយដើមវាយក្បាលរបស់លោកនឹងកាំភ្លើងនោះ ខណៈលោកកំពុងអង្គុយយោលអង្រឹងកូនឲ្យគេង។ លោកថ្លែងបន្តថា កន្លងមក លោកមិនធ្លាប់សរសេរព័ត៌មាន ឬមានជំលោះជាមួយនឹងមន្ត្រីនគរបាលរូបនេះឡើយ។ ប៉ុន្តែលោកមិនដឹងថា ហេតុអ្វីមន្ត្រីរូបនេះវាយលោកនោះទេ។

លោក ឯក សុគុន្ធី ឲ្យដឹងទៀតថា មន្ត្រីនគរបាលដែលបានយកកាំភ្លើងខ្លីវាយលោកនោះ មានឈ្មោះ ង៉ែត សេងហ៊ាន់ ជាមន្ត្រីនគរបាលប៉ុស្តិ៍រដ្ឋបាលឃុំតាឡាវ។

ទាក់ទងនឹងករណីនេះ អធិការស្រុកអណ្ដូងមាស លោក សូ វ៉ាន់ធិន មានប្រសាសន៍ថា លោកមិនទាន់អាចធ្វើការស៊ើបអង្កេត និងបញ្ជាក់ឲ្យបានច្បាស់លាស់ពីមូលហេតុនៃការវាយអ្នកកាសែតនេះបានទេ នៅយប់ថ្ងៃទី២៥ កញ្ញា។ លោកបន្ថែមថា មន្ត្រីនគរបាលដែលបានវាយលោក ឯក សុគុន្ធី នេះ ជាមន្ត្រីនគរបាលរត់ចោលជួរ ព្រោះគេបានអវត្តមានក្នុងការបង្ហាញខ្លួននៅអង្គភាពអស់រយៈពេល ១ឆ្នាំមកហើយ ហើយលោកមិនដឹងថា លោក ង៉ែត សេងហ៊ាន់ បានកាំភ្លើងខ្លីមកពីណាយកទៅវាយលោក ឯក សុគុន្ធី នោះដែរ។

ពាក់ព័ន្ធនឹងរឿងរ៉ាវកំលាំងសមត្ថកិច្ចប្រើអំពើហិង្សាដាក់អ្នកកាសែតនេះ នៅក្នុងខែកញ្ញា ឆ្នាំ២០១២ នេះជាលើកទីពីរហើយ ដែលកំលាំងសមត្ថកិច្ចបានប្រើអំពើហិង្សាដាក់អ្នកកាសែត បន្ទាប់ពីមានអ្នកកាសែតវរជនខ្មែរម្នាក់ ឈ្មោះ ហង្ស សិរីឧត្តម ត្រូវជនសង្ស័យជាមន្ត្រីកងរាជអាវុធហត្ថបានវាយសម្លាប់ កាលពីថ្ងៃទី៩ ខែកញ្ញា ឆ្នាំ២០១២៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។