ការសម្រេចពន្យារពេលធ្វើឡើងក្រោយពីមានសេចក្ដីស្នើសុំរបស់ភាគីលោក កឹម សុខា ដែលបានអះអាងថា លោកមិនអាចចូលមកបំភ្លឺរឿងនេះទាន់ពេលវេលា ដែលតុលាការបានគ្រោងទុកថា នឹងសាកសួរនៅថ្ងៃទី៦ កញ្ញាខាងមុខនេះទេ ដោយហេតុថា លោកកំពុងជាប់រវល់នៅក្នុងបេសកកម្មការងាររបស់លោកនៅសហរដ្ឋអាមេរិក។
ព្រះរាជអាជ្ញានៃតុលាការក្រុងភ្នំពេញ លោក សុខ រឿន មានប្រសាសន៍ឲ្យវិទ្យុអាស៊ីសេរីដឹងនៅថ្ងៃអាទិត្យ ទី៥ កញ្ញា ថា លោកបានយល់ព្រមហើយចំពោះការស្នើសុំនោះ ហើយគេគ្រោងថា នឹងធ្វើការកោះហៅលោកមកសាកសួរម្ដងទៀត នៅថ្ងៃទី២១ តុលាខាងមុខនេះវិញ។
លោក សុខ រឿន បានបញ្ជាក់ថា ៖ «បើគាត់សុំទៅហើយ គាត់ភាគីក្នុងរឿងមួយ ហើយបើគាត់សុំហើយ យើងមិនត្រូវពន្យារពេលឲ្យគាត់ បើគាត់នៅស្រុកក្រៅ!»។
លោក ឈឹម ផលវរុណ អតីតមន្ត្រីសិទ្ធិមនុស្សម្នាក់ ក្នុងចំណោមអតីតមន្ត្រីសិទ្ធិមនុស្ស ១៥នាក់ផ្សេងទៀត ដែលត្រូវគេបណ្ដេញចេញពីការងារ ហើយដែលបានដាក់ពាក្យបណ្ដឹងតបទៅលោក កឹម សុខា តាំងពីឆ្នាំ២០០៦មក បានបញ្ជាក់ថា លោកទើបតែបានដាក់ឯកសារផ្សេងទៀត កាលពីចុងខែសីហាកន្លងទៅ ស្ដីពីពុករលួយរបស់លោក កឹម សុខា និងព្យាយាមសើរើសំណុំរឿងនេះឡើងវិញបន្តទៀត។
លោកមានប្រសាសន៍ទៀតថា ការប្ដឹងផ្ដល់នេះមិនទាក់ទងនឹងនយោបាយទេ វាជារឿងយូរណាស់មកហើយ ហើយលោកនឹងមិនលះបង់ការប្ដឹងផ្ដល់ចំពោះលោក កឹម សុខា នោះទេ នៅក្នុងប្រយោជន៍ស្វែងរកយុត្តិធម៌សម្រាប់ខ្លួនលោក។
លោក ឈឹម ផលវរុណ បានអះអាងថា ៖ «មុននឹងយើងសម្រេចចិត្តទៅតុលាការ យើងបានប្រើអស់ហើយនូវសីលវិធីសីលធម៌ គោលដៅផ្ទៃក្នុងអង្គការ ប៉ុន្តែយើងបានបរាជ័យ ហើយមិនត្រឹមតែប៉ុណ្ណោះទេ យើងត្រូវគេបណ្ដេញចេញទៅទៀត! ដូច្នេះតែចូលទៅដល់បណ្ដឹងអាជ្ញា វាចប់ហើយ ទោះបីយើងមានឆន្ទៈដោះស្រាយយ៉ាងដូច្នេះក៏ដោយ»។
រឿងក្ដីក្ដាំរបស់លោក កឹម សុខា អតីតមេដឹកនាំមជ្ឈមណ្ឌលសិទ្ធិមនុស្ស ហើយបច្ចុប្បន្នជាមេដឹកនាំគណបក្សសិទ្ធិមនុស្ស បានផ្ទុះឡើងកាលពីឆ្នាំ២០០៦មក។ អតីតមន្ត្រីមជ្ឈមណ្ឌលសិទ្ធិមនុស្សបានចោទថា លោក កឹម សុខា បានបន្លំវិក្កយបត្រ កេងបន្លំប្រាក់ជំនួយអង្គការ ហើយនិងបានបន្លំទៅលើហត្ថលេខាបុគ្គលិកដើម្បីកិបកេងប្រាក់។ លោក កឹម សុខា ត្រូវគេប្ដឹងពីបទធំៗចំនួន ៣ គឺបទរំលោភសេចក្ដីទុកចិត្ត និងក្លែងឯកសារ និងប្ដឹងអំពីបទបរិហារកេរ្តិ៍ ក្រោយពីលោកបានមានប្រសាសន៍បកស្រាយនៅតាមវិទ្យុនានា និងតាមរយៈកាសែត។
ក្រោយពីផ្ទុះរឿងអាស្រូវនេះមក វិទ្យាស្ថានសាធារណរដ្ឋអន្តរជាតិ (IRI) ដែលជាម្ចាស់ជំនួយរបស់មជ្ឈមណ្ឌលសិទ្ធិមនុស្ស ក៏បានបើកការស៊ើបអង្កេត ហើយលទ្ធផលបានរកឃើញថា លោក កឹម សុខា មិនមានការពាក់ព័ន្ធនឹងអំពើពុករលួយនោះទេ រួចហើយរឿងរ៉ាវនោះក៏ស្ងប់បាត់មួយរយៈកន្លងមក។
ការលេចចេញនូវការកោះហៅសាកសួរបំភ្លឺករណីនេះជាថ្មីម្ដងទៀត ត្រូវបានអ្នកតំណាងរាស្ត្រគណបក្សសិទ្ធិមនុស្ស លោក យែម បញ្ញារិទ្ធ ចោទថា វាហាក់ដូចជាចេតនាចង់បង្កលក្ខណៈលំបាកដល់គណបក្សសិទ្ធមនុស្ស នៅក្នុងឱកាសដែលគណបក្សនេះកំពុងតែពង្រឹងកម្លាំងរបស់ខ្លួន ដើម្បីស្វែងរកការគាំទ្រសំឡេងឆ្នោតនាពេលខាងមុខ៕