ប្រភពព័ត៌មាន អាអេហ្វប៉េ (AFP) បានឲ្យដឹងថា ព្រះបរមនាថ នរោត្តម សីហមុនី ដែលគង់នៅក្នុងប្រទេសឆេកូ ជាង១៣ឆ្នាំ ពេលព្រះអង្គមានព្រះជន្មទើបបាន ៩ព្រះវស្សា នឹងយាងទស្សនានៅសាលាបឋមសិក្សាមួយ សាលាបង្ហាត់បង្រៀនរបាំសិល្បៈបាឡេ និងយាងចូលរួមក្នុងពិធីប្រគំតន្រ្តី ការសម្ដែងរាំបាំបាឡេ និងការតាំងពិព័រណ៍រូបគំនូរសិល្បៈនានា។
ព្រះមហាក្សត្រខ្មែរ ព្រះបរមនាថ នរោត្តម សីហមុនី ដែលចេះភាសាឆេកូស្ទាត់ជំនាញនោះ ព្រះអង្គនឹងទទួលសញ្ញាបត្របណ្ឌិតកិត្តិយសពីអតីតសាកលវិទ្យាល័យដែលព្រះអង្គធ្លាប់បានរៀនពីមុន និងជួបជាមួយប្រធានាធិបតីឆេកូ នៅថ្ងៃព្រហស្បតិ៍ ទី១៨ មីនាខាងមុខនេះ៕
