អាជ្ញាធរ​ខ្មែរ-ថៃ​ឯកភាព​ផ្អាក​ពលរដ្ឋ​ធ្វើ​ស្រែ​លើ​ដី​ជម្លោះ​ព្រំដែន

ក្រុម​អាជ្ញាធរ​ខ្មែរ និង​អាជ្ញាធរ​ថៃ បាន​ឯកភាព​គ្នា​ក្នុង​ការ​ហាម​ឃាត់ មិន​ឲ្យ​ប្រជាពលរដ្ឋ​ថៃ និង ប្រជាពលរដ្ឋ​ខ្មែរ​ធ្វើ​ស្រែ​នៅ​លើ​ដី ត្រង់​ចំណុច​បង្គោល​ព្រំដែន​លេខ ៤៣​ខាង​ជើង​ភូមិ​អូរបីជាន់ ឃុំ​អូរបីជាន់ ស្រុក​អូរជ្រៅ ខេត្ត​បន្ទាយមានជ័យ ជាប់​ទៅ​នឹង​ឃុំ​ណូនម៉ាក់មុន និង​ឃុំ​គោកធ្យូង ស្រុក​គោកធ្យូង ខេត្ត​ស្រះកែវ ថៃ ដើម្បី​ទប់​ស្កាត់​សភាពការណ៍​តាន​តឹង​ជា​បណ្ដោះ​អាសន្ន ហើយ​រង់​ចាំ​ រាជ​រដ្ឋាភិបាល​នៃ​ប្រទេស​ទាំង​ពីរ​ធ្វើ​ការ​ដោះស្រាយ។
ដោយ សួន សុផលមុន្នី
2012-06-09
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល

មន្ត្រី​នាំ​ពាក្យ​សាលា​ខេត្ត​បន្ទាយមានជ័យ លោក អ៊ុក កែវរតនៈ បាន​មាន​ប្រសាសន៍​នៅ​រសៀល​ថ្ងៃ​ទី​ ៩ ខែ​មិថុនា​ថា បន្ទាប់​ពី​មាន​សភាពការណ៍​តឹង​តែង ដោយ​សារ​ប្រជា​កសិករ​ថៃ បាន​ចូល​ទៅ​ធ្វើ​ស្រែ​នៅ​លើ​ដី​ចំណុច​បង្គោល​ព្រំដែន​លេខ ៤៣​នោះ​មក កង​ការពារ​ព្រំដែន​ខ្មែរ និង​ភាគី​ថៃ បាន​ជួប​ប្រជុំ​គ្នា ដោយ​បាន​សម្រេច​ផ្អាក​មិន​ឲ្យ​ប្រជា​កសិករ​ទាំង​ពីរ​ប្រទេស បន្ត​ចូល​ទៅ​ធ្វើ​ស្រែ​នៅ​លើ​ដី​នោះ​មួយ​រយៈ​សិន។

សេចក្ដី​សម្រេច​នេះ បាន​ធ្វើ​ឡើង​ក្រោយ​ពី​ប្រជា​កសិករ​ថៃ អម​ដោយ​កង​កម្លាំង​របស់​ថៃ​ជួយ​ការពារ​ពួក​គេ​ផង​នោះ បាន​សម្រុក​ចូល​ទៅ​ភ្ជួរ​ដី​ដើម្បី​ធ្វើ​ស្រែ​នៅ​លើ​ដី​នៅ​តំបន់​នោះ កាល​ពី​ព្រឹក​ថ្ងៃ​ទី​៩ ខែ​មិថុនា ប៉ុន្តែ​ត្រូវ​បាន​កង​កម្លាំង​កម្ពុជា​នាំ​គ្នា​ទៅ​ហាម​ឃាត់។

លោក អ៊ុក កែវរតនៈ៖ «ខាង​វរ​នៅ​ការពារ​ព្រំដែន ជា​មួយ​ទំនាក់​ទំនង​ព្រំដែន គេ​បាន​ជួប​គ្នា​គេ​អស់​ហើយ ដើម្បី​និយាយ​គ្នា​ពី​បញ្ហា​ហ្នឹង ឥឡូវ​ហ្នឹង គឺ​យើង​ផ្អាក​ក្រោយ​ការ​ប្រជុំ​ទាំង​ភាគី​ខ្មែរ​ដែល​មាន​ស្រែ​នៅ​ក្នុង​តំបន់​ហ្នឹង​ចំណុច​ក្ដៅ អត់​ឲ្យ​ធ្វើ ហើយ​ខាង​ភាគី​ថៃ​ក៏​មិន​ឲ្យ​ធ្វើ រង់​ចាំ​ឲ្យ​គណៈកម្មាធិការ​ថ្នាក់​ជាតិ​ព្រំដែន​ថ្នាក់​ជាតិ លោក​ចុះ​មក​ពិនិត្យ​ធ្វើ​ការ​ជាក់​លាក់​ឡើង​វិញ តើ​បង្គោល​នេះ ពិត​ជា​នៅ​ចំ​ចំណុច​ហ្នឹង ដែល​ស្ថិត​នៅ​ក្នុង​ផែនទី​ច្បាស់​លាស់​ហ្នឹង»

កសិករ​ថៃ​មួយ​ចំនួន​ក្នុង​ចំណោម ៣៧​គ្រួសារ បាន​ព្យាយាម​ចង់​យក​ត្រាក់ទ័រ និង​ម៉ាស៊ីន​គោយន្ត​ភ្ជួរ​ដី​ធ្វើ​ស្រែ​នៅ​លើ​ដី​ទំហំ ១៨០​ហិកតារ ក្បែរ​បង្គោល​ព្រំដែន​លេខ ៤៣ ខាង​ជើង​ឃុំ​អូរបីជាន់ ស្រុក​អូរជ្រៅ ខេត្ត​បន្ទាយមានជ័យ។ ខាង​ភាគី​យោធា​កម្ពុជា បាន​ហាម​មិន​អោយ​កសិករ​ថៃ​ចុះ​ធ្វើ​ស្រែ​នៅ​តំបន់​នោះ​តាំង​ពី​ចុង​ខែ​មេសា ឆ្នាំ២០១២។

លោក កែវ សែន អភិបាល​ស្រុក​អូរជ្រៅ បាន​បញ្ជាក់​ថា ស្ថាន​ភាព​ដណ្ដើម​ដី​គ្នា​ធ្វើ​ស្រែ រវាង​កសិករ​ ថៃ និង​កសិករ​ខ្មែរ នៅ​លើ​ដី​ត្រង់​ចំណុច​បង្គោល​ព្រំដែន​លេខ ៤៣ នោះ បាន​ស្ងប់​ស្ងាត់​ទៅ​វិញ​ហើយ ភាគី​ទាំង​ពីរ កម្ពុជា ថៃ នឹង​ធ្វើ​សេចក្ដី​រាយការណ៍​ពី​បញ្ហា​ទំនាស់​ដី​ធ្លី នៅ​តំបន់​ព្រំដែន​នោះ​ទៅ​រាជ​រដ្ឋាភិបាល​រៀងៗ​ខ្លួន។

លោក កែវ សែន៖ «អានេះ នៅ​ក្នុង​ការ​ជជែក​គ្នា រវាង​ភាគី​ថៃ យើង​ឲ្យ​ផ្អាក​សិន ហើយ​រាយការណ៍​ជូន​ថ្នាក់​លើ​រៀងៗ​ខ្លួន បញ្ហា​នេះ​ជា​បញ្ហា​របស់​គណៈកម្មាធិការ​ជាតិ​ព្រំដែន លោក​ធ្វើ ដែល​មាន​កំណត់​ហេតុ​ត្រឹម​ត្រូវ អត់​មាន​បញ្ហា​អី​ទេ»

មន្ត្រី​នាំ​ពាក្យ​សាលា​ខេត្ត​បន្ទាយមានជ័យ លោក អ៊ុក កែវរតនៈ បាន​បញ្ជាក់​ថា ដី​ដែល​ភាគី​ថៃ​កំពុង​ ព្យាយាម​យក​ធ្វើ​ស្រែ​នោះ ពី​ដើម​ជា​ទី​តាំង​ជុំរុំ​ជន​ភៀស​ខ្លួន​ខ្មែរ ប៉ុន្តែ​នៅ​ពេល​ដែល​ជន​ភៀស​ខ្លួន​ខ្មែរ ត្រូវ​បាន​រដ្ឋាភិបាល​នាំ​យក​ចូល​ក្នុង​ប្រទេស​កម្ពុជា​វិញ ភាគី​ថៃ​ក៏​ចាប់​ផ្ដើម​រំកិល​រំលោភ​យក​ដី​ខ្មែរ​នៅ​តំបន់​នោះ។

លោក អ៊ុក កែវរតនៈ៖ «ពេល​នោះ​ឯង ដែល​ថៃ​ចាប់​ផ្ដើម​រំកិល​ចូល ទាំង​ធ្វើ​ផ្លូវ ទាំង​ដី ខាង​កងទ័ព​ដែល​លោក​ប្រចាំការ​នៅ​ហ្នឹង គាត់​ថា ដី​ហ្នឹង ថៃ​វា​រំកិល បើ​គិត​ជា​ហិកតារ​ប្រមាណ ២៦០​ហិកតារ​ ចូល​ដី​ខ្មែរ អញ្ចឹង​ហើយ នៅ​ចន្លោះ​ពេល​ដែល​យើង​ដក​រំសាយ​កម្លាំង ប្រជាពលរដ្ឋ​ដែល​រស់​នៅ​តាម​ជុំរុំ​ពេល​នោះ​ដែល​ថៃ​ឆ្លៀត​ឱកាស​ចូល​ពេល​ហ្នឹង»

កាល​ពី​ដើម​ខែ​មិថុនា ឆ្នាំ​២០១២ នគរបាល​ព្រំដែន​ថៃ ជាង ១០​នាក់ ប្រដាប់​ដោយ​អាវុធ បាន​ចូល​ទៅ​ការពារ​កសិករ​ថៃ ឲ្យ​ចូល​ភ្ជួរ និង​ព្រួស​ស្រូវ​លើ​ដី​នោះ​ដែរ។ ប៉ុន្តែ​ពេល​ជួប​កង​ទាហាន​កម្ពុជា​ ប្រចាំ​ការ​នៅ​តំបន់​ព្រំដែន​នោះ ភាគី​ថៃ​បាន​ប្ដូរ​ទិស​ដៅ ដោយ​បាន​ស្នើ​សុំ​ទៅ​ពិនិត្យ​មើល​បង្គោល​ព្រំដែន​លេខ ៤៦ ភូមិ​ជោគជ័យ ឃុំ​អូរបីជាន់ ស្រុក​អូរជ្រៅ ខេត្ត​បន្ទាយមានជ័យ ដែល​នៅ​ជាប់​នឹង​ព្រំដែន​ខេត្ត​ស្រះកែវ ថៃ​វិញ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (0)
  • បោះពុម្ព
  • ចែករំលែក
  • អ៊ីម៉ែល