ព្រះមហាក្សត្រអំពាវនាវឲ្យប្រជារាស្ត្រឈប់កាប់ព្រៃឈើខុសច្បាប់
ដោយ មុំ សុផុន
2009-07-09
ព្រះមហាក្សត្រនៃប្រទេសកម្ពុជា សម្តេចព្រះបរមនាថ នរោត្តម សីហមុនី បានមានព្រះរាជបន្ទូលនៅថ្ងៃទី៩ ខែកក្កដា ក្នុងពេលដែលព្រះអង្គយាងទៅស្រុកក្រគរ ខេត្តពោធិ៍សាត់ ក្នុងទិវាដាំកូនឈើ ដោយសុំឲ្យប្រជារាស្ត្រដែលកំពុងតែប្រកបរបរអាជីវកម្មកាប់ព្រៃឈើខុសច្បាប់នោះ ឲ្យងាកមករកការប្រកបរបរចិញ្ចឹមជីវិតដោយធ្វើកសិកម្មវិញ។
ព្រះមហាក្សត្រសម្ដេចព្រះបរមនាថ នរោត្តម សីហមុនី យាងចូលរួមក្នុងទិវាដាំកូនឈើនៅខេត្តពោធិ៍សាត់ នាថ្ងៃទី៩ កក្កដា ២០០៩។
ព្រះមហាក្សត្រមានបន្ទូលទៀតថា ព្រៃឈើមិនត្រឹមតែនាំមកនូវផលប្រយោជន៍ខាងផ្នែកសេដ្ឋកិច្ចនិងសង្គមប៉ុណ្ណោះទេ តែបានផ្តល់ផលប្រយោជន៍ដែលមិនអាចប៉ាន់ប្រមាណ ដូចជាជួយថែរក្សាលំនឹងធម្មជាតិ ធ្វើឲ្យធាតុអាកាសកាន់តែប្រសើរឡើង រក្សាប្រភពទឹក ការពារទីជម្រាល និងការពារជីវចម្រុះផងដែរ។
សម្ដេចព្រះបរមនាថ នរោត្តម សីហមុនី មានព្រះរាជបន្ទូលយ៉ាងដូច្នេះ ៖ «សូមអំពាវនាវដល់អង្គការជាតិ អង្គការអន្តរជាតិនិងក្រសួងពាក់ព័ន្ធទាំងអស់ ត្រូវយកចិត្តទុកដាក់បន្តធ្វើការផ្សព្វផ្សាយដល់បងប្អូនដែលកំពុងប្រកបរបរចិញ្ចឹមជីវិត ដោយការធ្វើអាជីវកម្មព្រៃឈើខុសច្បាប់ ជាពិសេសបងប្អូនមួយចំនួនតូចនៅខេត្តពោធិ៍សាត់ ដែលកំពុងផលិតប្រេងម្រះព្រៅភ្នំ ដែលជាសារធាតុអាចយកទៅផលិតគ្រឿងញៀនបាននោះ ឲ្យងាកមកប្រកបរបរកសិកម្មដើម្បីលើកស្ទួយជីវភាពគ្រួសារជំនួសវិញ។ ពីព្រោះការផលិតប្រេងម្រះព្រៅភ្នំនេះ មិនត្រឹមតែបំផ្លិចបំផ្លាញធនធានព្រៃឈើ បរិស្ថានធម្មជាតិ និងជីវចម្រុះយ៉ាងធ្ងន់ធ្ងរប៉ុណ្ណោះទេ ប៉ុន្តែថែមទាំងបានបង្កឲ្យមានគ្រោះថ្នាក់ធ្ងន់ធ្ងរដល់បុគ្គលផ្ទាល់ខ្លួន សង្គមគ្រួសារ សហគមន៍មូលដ្ឋាននិងសង្គមជាតិទាំងមូលទៀតផង»។
ប្រភពពីមន្រ្តីរដ្ឋាភិបាលបានឲ្យដឹងថា ប្រទេសកម្ពុជាជាប្រទេសដែលសម្បូរធនធានធម្មជាតិមានព្រៃឈើជាដើម ប៉ុន្តែក្នុងរយៈពេលប៉ុន្មានឆ្នាំចុងក្រោយនេះ មានការកាប់បំផ្លាញយ៉ាងអនាធិបតេយ្យ។ តាមរបាយការណ៍របស់ក្រសួងកសិកម្ម រុក្ខាប្រមាញ់និងនេសាទ បានឲ្យដឹងថា សមត្ថកិច្ចបានបង្ក្រាបបទល្មើសព្រៃឈើនិងសត្វព្រៃ បាន ៨.១៣៥ ករណី ហើយដើមឆ្នាំ២០០៩នេះ បង្ក្រាបបាន ២៦៦ករណី និងបានរឹបអូសដីព្រៃពីក្រុមជនល្មើសដែលបានកាប់ឆ្ការឈូសឆាយធ្វើជាកម្មសិទ្ធិខុសច្បាប់មកទុកជាសម្បត្តិរដ្ឋវិញចំនួនជិត ៣សែនហិកតារ។
ព្រះមហាក្សត្រមានបន្ទូលទៀតថា ព្រះអង្គបានយាងចូលរួមទិវាដាំកូនឈើនេះបានប្រាំលើកមកហើយ ចាប់តាំងពីព្រះអង្គបានឡើងគ្រងរាជ្យមក។ ព្រះអង្គមានបន្ទូលសុំឲ្យប្រជាពលរដ្ឋគ្រប់រូបចូលរួមដាំដើមឈើឲ្យបានគ្រប់គ្នា។
ចំណែកឯលោក ច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ បានមានប្រសាសន៍ថា ចាប់តាំងពីឆ្នាំ១៩៨៩ មកប្រទេសកម្ពុជា បានដាំកូនឈើលើផ្ទៃដីចំនួន ១.២៣៧ហិកតារ។
លោកថ្លែងទៀតថា ឆ្នាំ២០០៩នេះ ក្រសួងកសិកម្ម រុក្ខាប្រមាញ់និងនេសាទ រួមជាមួយអាជ្ញាធរខេត្តពោធិ៍សាត់ បានយកទីតាំងភូមិត្រពាំងឃ្លៃ ឃុំបឹងកន្ទួត ស្រុកក្រគរ ដាំដើមឈើប្រភេទបេង គ្រញូង គគីរ អង្កាញ់ និងអាកាស្យា លើផ្ទៃដីចំនួន២០ហិកតារក្នុងគោលបំណងបង្កើតគម្របបៃតងឡើងវិញនិងធ្វើឲ្យប្រសើរឡើងនូវសោភ័ណភាពធម្មជាតិបរិស្ថាននៅក្នុងតំបន់នោះ៕
អត្ថបទដែលទាក់ទង
ព្រះមហាក្សត្រខ្មែរយាងទស្សនកិច្ចសាធារណរដ្ឋឆេកូ
ព្រះមហាក្សត្រយាងទៅពិនិត្យព្រះរាជសុខភាពនៅប្រទេសចិន
ព្រះមហាក្សត្រនឹងយាងទៅពិនិត្យព្រះរាជសុខភាពនៅចិន
ព្រះមហាវីរក្សត្រនឹងយាងមកកម្ពុជានៅខែមីនាខាងមុខនេះ
អតីតព្រះមហាក្សត្រប្រសិទ្ធពរឲ្យជាស៊ីមឆាប់ជាសះស្បើយ
ព្រះមហាក្សត្រយាងពន្លត់ភ្លើងជ័យនៃបុណ្យឯករាជ្យជាតិទី៥៦
ព្រះមហាវីរក្សត្រផ្ញើលិខិតជូនថ្នាក់ដឹកនាំស្ដីពីបញ្ហាព្រំដែន
កម្ពុជាប្រារព្ធខួបទី៥៦នៃបុណ្យឯករាជ្យជាតិ ៩ វិច្ឆិកា
ព្រះរាជជីវប្រវត្តិនិងបូជនីយកិច្ចរបស់ព្រះមហាវីរក្សត្រ
មតិ
បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួលនិងអាចចុះផ្សាយបានយោងតាមលក្ខខណ្ឌនៃការប្រើប្រាស់របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរីមិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។
មើលមតិទាំងអស់.