ព្រះអង្គទ្រង់ប្រសូតនាទីក្រុងភ្នំពេញ នៅថ្ងៃទី ១៤ ខែឧសភា ឆ្នាំ ១៩៥៣ គឺមុនប្រទេសកម្ពុជាបានទទួលឯករាជ្យពីអាណានិគមនិយមបារាំង ប្រមាណជា៦ខែប៉ុណ្ណោះ ។
កាលពីព្រះអង្គនៅកុមារ ទ្រង់សិក្សានៅក្រុងប្រាក ប្រទេសឆេកូស្លូវ៉ាគី ។ ព្រះអង្គមានជំនាញសំខាន់ខាងសិល្បៈ របាំ តូរ្យតន្រ្តី និងល្ខោន ។ ទ្រង់ធ្លាប់បានជាជ័យលាភីក្នុងការប្រកួតផ្នែករបាំបុរាណ classic នៅវិទ្យាស្ថានអភិរក្សខាងតូរ្យតន្រ្តី និងនាដសាស្រ្តជាតិ ទីក្រុងប្រាក កាលពីឆ្នាំ ១៩៧១ ។
នៅចន្លោះឆ្នាំ ១៩៧៥-១៩៧៦ ព្រះអង្គបានយាងទៅសិក្សាឧត្ដមសិក្សាខាងផ្នែកភាពយន្ត នៅកូរ៉េខាងជើង ។ ពីឆ្នាំ ១៩៧៦ ដល់ ១៩៧៩ ទ្រង់ជាប់ឃុំឃាំងក្រោមរបបខ្មែរក្រហមជាមួយព្រះវររាជបិតា និងព្រះវររាជមាតា ព្រមទាំងព្រះអនុជ សម្ដេច នរោត្ដម នរិន្ទដ្រាពង្ស ។
ផុតពីរបបវាលពិឃាតពីឆ្នាំ ១៩៧៩ ដល់ ១៩៨០ ទ្រង់បានបម្រើព្រះវររាជបិតាជាលេខាផ្ទាល់ ពេលព្រះអង្គគង់ប្រថាប់នៅប្រទេសចិន ហើយចាប់ពីឆ្នាំ ១៩៨១ទៅ ព្រះអង្គក៏បានយាងទៅគង់នៅប្រទេសបារាំង បំពេញព្រះតួនាទីជាគ្រូបង្រៀនរបាំបុរាណ របាំបាឡេ ជាប្រធានសមាគមរបាំខ្មែរនៅស្រុកបារាំង ជាតំណាងអចិន្រ្តៃយ៍របស់កម្ពុជា ប្រចាំអង្គការសហប្រជាជាតិ និងជាឯកអគ្គរាជទូតវិសាមញ្ញនិងពេញសមត្ថភាពនៃព្រះរាជាណាចក្រកម្ពុជាប្រចាំអង្គការយូណេស្កូ ។
ព្រះករុណា ព្រះបាទសម្ដេចព្រះ បរមនាថ ទ្រង់ចេះច្រើនភាសា ។ ក្រៅពីភាសាជាតិហើយ ព្រះអង្គទ្រង់ចេះភាសាបារាំង ភាសាឆេក និងភាសាអង់គ្លេស យ៉ាងស្ទាត់ជំនាញថែមទៀត ។
ក្នុងអំឡុងដែលព្រះអង្គគង់នៅក្រុងប៉ារីស កាលពីឆ្នាំ ១៩៩៣ ព្រះករុណា នរោត្តម សីហមុនី ទ្រង់បានកសាងស្នាព្រះហស្ថជាខ្សែភាពយន្តរបាំបាឡេ ចំនួន ២រឿង គឺរឿងសុបិន និងធាតុទាំង៤ ដែលបានទទួលការកោតសរសើរយ៉ាងទូលំទូលាយ ក្នុងចំណោមអ្នកស្រលាញ់សិល្បៈ ។
នៅថ្ងៃទី ១៤ ខែតុលា ឆ្នាំ ២០០៤ ព្រះអង្គបានត្រូវសមាជិកក្រុមប្រឹក្សារាជសម្បត្តិជ្រើសរើសជាឯកច្ឆន្ទ ជាព្រះមហាក្សត្រនៃព្រះរាជាណាចក្រកម្ពុជា មួយសប្ដាហ៍គត់ ក្រោយពីព្រះវររាជបិតា ព្រះករុណាសម្ដេចព្រះ នរោត្ដម សីហនុ ទ្រង់ដាក់រាជ្យ ជាលើកទីពីរនោះមក ។
ពេលទ្រង់ឡើងសោយរាជ្យ សម្ដេចព្រះករុណា សីហមុនី ទ្រង់មានព្រះជន្មបាន ៥១ព្រះវស្សា ។ តាំងពីពេលនោះមក រាជរដ្ឋាភិបាល ដែលដឹកនាំដោយគណបក្សប្រជាជនកម្ពុជា ក៏បានប្រកាសយកថ្ងៃទី ១៣-១៤ និង ១៥ ឧសភា រៀងរាល់ឆ្នាំ ជាទិវាប្រារព្ធរាជពិធីចម្រើនព្រះជន្មវស្សាថ្វាយព្រះអង្គ ជាព្រះមហាក្សត្រ ។ ទ្រង់គ្រងរាជសម្បត្តិ ប៉ុន្តែមិនកាន់អំណាចអ្វីឡើយស្របតាមបទប្បញ្ញត្តិរបស់ច្បាប់រដ្ឋធម្មនុញ្ញ ឆ្នាំ១៩៩៣ នៃព្រះរាជាណាចក្រកម្ពុជា ។
បច្ចុប្បន្ននេះ ព្រះករុណាទ្រង់នៅពុំទាន់មានព្រះមហេសី ជួយសម្រាលព្រះរាជភារកិច្ចប្រចាំថ្ងៃនៅឡើយទេ ថ្វីបើព្រះអង្គមានព្រះជន្មគ្រប់ ៥៥ យាងចូល ៥៦ ព្រះវស្សាទៅហើយនោះ ។
នៅក្នុងឱកាសដ៏មហានក្ខត្តឫក្សនេះ មេដឹកនាំនិងមន្រ្តីជាន់ខ្ពស់គណបក្សនយោបាយនានា ព្រមទាំងឥស្សរជនអង្គការសង្គមស៊ីវិល បាននាំគ្នាថ្វាយព្រះពរព្រះករុណា ព្រះបាទ ព្រះបរមនាថ នរោត្ដម សីហមុនី និងពិពណ៌នាអំពីលក្ខណៈពិសេសរបស់ព្រះអង្គដូចតទៅ ៖
លោក ជាម យៀប សមាជិកគណៈអចិន្រ្តៃយ៍នៃគណៈកម្មាធិការកណ្ដាល គណបក្សប្រជាជនកម្ពុជា មានប្រសាសន៍លើកតម្កើងលក្ខណៈរបស់ព្រះមហាក្សត្រដូច្នេះ ៖ «ព្រះអង្គមានព្រះតម្រិះយ៉ាងល្អប្រពៃ មិនដែលធ្វើឲ្យរង្គាសចិត្តដល់ប្រជាពលរដ្ឋ ឬដល់រាជរដ្ឋាភិបាល ឬអង្គការនីតិបញ្ញត្តិនោះអីទេ គឺព្រះអង្គបានសម្រួលនូវរាល់កិច្ចការងារលំបាកលំបិន របស់រាជរដ្ឋាភិបាល ក៏ដូចជា របស់អង្គការនីតិបញ្ញត្តិ ឬក៏អង្គតុលាការ ។ ក្រោយពេលព្រះអង្គសោយរាជសម្បត្តិមក ក្លាយទៅជាប្រធាននៃក្រុមប្រឹក្សាអង្គចៅក្រម ក៏ធ្វើឲ្យអង្គការតុលាការមានការរីកចម្រើន ព្រមទាំងព្រះអង្គបានមានព្រះតម្រិះ ធ្វើយ៉ាងណាដើម្បីរកយុត្តិធម៌ ជូនប្រជាពលរដ្ឋនៅគ្រប់ទិសទី នៃព្រះរាជាណាចក្រកម្ពុជា ហើយបានបំបាត់នូវអំពើអគតិដែលកើតចេញអំពីចៅក្រម ឬព្រះរាជអាជ្ញា ឬមន្រ្តីតុលាការបានមួយចំនួនធំ ដែលធ្វើឲ្យទូលបង្គំយើងខ្ញុំទាំងអស់ មានការកោតសរសើរយ៉ាងខ្លាំង ។ ហើយវិស័យសេដ្ឋកិច្ចជាតិ និងអន្តរជាតិ ក៏ព្រះអង្គបានជួយសម្រួលធ្វើយ៉ាងណាជំរុញឲ្យព្រះរាជាណាចក្រកម្ពុជាយើងមានការជឿនលឿនឡើង បំបាត់ភាពក្រីក្ររបស់ប្រជាពលរដ្ឋ និងបញ្ហាអន្តរជាតិ ព្រះអង្គបានទំនាក់ទំនងបានយ៉ាងល្អប្រសើរកន្លងមក» ។
លោក កែវ ពុទ្ធរស្មី ប្រធានគណបក្សហ៊្វុនស៊ិនប៉ិច ថ្វាយព្រះពរចំពោះព្រះមហាក្សត្រ ដោយកោតសរសើរតួនាទីរបស់ព្រះអង្គ ៖ «ព្រះបាទនរោត្ដម បរមនាថ សីហមុនី គឺព្រះអង្គបានបំពេញតួនាទីទៅតាមរដ្ឋធម្មនុញ្ញ ដែលជារាជានិយម អាស្រ័យរដ្ឋធម្មនុញ្ញ ។ ខ្ញុំយល់ថាព្រះអង្គបានបំពេញតួនាទីសំខាន់ណាស់ក្នុងការថែរក្សាឲ្យមានឯកភាពជាតិ ធានាឲ្យបាននូវសុខសន្តិភាព ដែលជាកត្តាធំ ។ ពិតណាស់ហើយថា នៅមានការមិនទាន់អនុវត្តបានគ្រប់គ្រាន់ នៃអ្វីៗដែលបានចែងនៅក្នុងរដ្ឋធម្មនុញ្ញ ក៏ប៉ុន្តែគឺទៅតាមលទ្ធភាពដែលព្រះអង្គបានទ្រង់កិច្ចការទាំងអស់នេះ គឺល្អណាស់ទៅហើយ ។ នៅក្នុងឱកាសនេះដែរ ក្នុងនាមថ្នាក់ដឹកនាំគណបក្សហ៊្វុនស៊ិនប៉ិច ក្នុងឱកាសចម្រើនព្រះជន្មាយុគម្រប់ ៥៥ ចូល ៥៦ ព្រះវស្សានេះ ខ្លួនខ្ញុំផ្ទាល់ក៏ដូចជាថ្នាក់ដឹកនាំ គណបក្សហ៊្វុនស៊ិនប៉ិចមានមហាកិត្តិយសថ្វាយព្រះពរសិរីមហាសួស្ដី មានព្រះជន្មាយុយឺនយូរ មានកម្លាំងពលំបញ្ញាញាណឈ្លៀសវៃដើម្បីនឹងគង់នៅជាម្លប់ដ៏ត្រជាក់នៃប្រទេសកម្ពុជា និងប្រជាពលរដ្ឋខ្មែរយើងទាំងអស់» ។
ចំណែកឯមន្រ្តីជាន់ខ្ពស់នៃគណបក្សសមរង្ស៊ី គឺលោក សុន ឆ័យ លោកមានយោបល់នៅក្នុងឱកាសដ៏មហានក្ខត្តឫក្សនេះ ដូច្នេះ ៖ «ព្រះអង្គទ្រង់គង់ប្រថាប់នៅក្នុងប្រទេសកម្ពុជាយើងបានច្រើនជាងព្រះវររាជបិតា ព្រះមហាវីរក្សត្រនៃយើង ។ ហើយគង់នៅប្រថាប់នៅក្នុងប្រទេសនេះជួយភាពកក់ក្ដៅនៃប្រជាពលរដ្ឋខ្មែរយើង ក៏ប៉ុន្តែព្រះមហាក្សត្រ ទ្រង់មិនទាន់បានបំពេញព្រះរាជភារកិច្ច របស់ព្រះអង្គឲ្យស្របតាមរដ្ឋធម្មនុញ្ញនៅឡើយនោះទេ ។ តាមរដ្ឋធម្មនុញ្ញឆ្នាំ១៩៩៣ ព្រះអង្គទ្រង់គង់ជាតំណាងឲ្យភាពយុត្តិធម៌នៃប្រព័ន្ធតុលាការ ឲ្យមានភាពឯករាជជាដើម បើទោះជាព្រះអង្គទ្រង់ជាប្រធាននៃឧត្ដមក្រុមប្រឹក្សាអង្គចៅក្រមក៏ដោយ ក៏ប្រព័ន្ធតុលាការនេះ កំពុងតែជាស្ថាប័នបង្កើតឲ្យមានភាពអយុត្តិធម៌ ការជិះជាន់ និងអំពើពុករលួយធ្ងន់ធ្ងរណាស់នៅក្នុងប្រទេសកម្ពុជាយើងសព្វថ្ងៃនេះ ។ ជាមួយគ្នានោះដែរព្រះមហាក្សត្រ ទ្រង់ជាអគ្គបញ្ជាការជាន់ខ្ពស់នៃកងទ័ពជាតិ ។ ព្រះរាជតួនាទីនេះសំខាន់ណាស់ក្នុងប្រទេសដែលកាន់លទ្ធិប្រជាធិបតេយ្យ សេរីពហុបក្សនេះ ព្រោះគេមិនដែលឲ្យគណបក្សទៅកាន់ទ័ពទេ ព្រោះយើងត្រូវតែប្រណាំងប្រជែងគ្នាតាមការបោះឆ្នោត តាមប្រជាប្រិយភាព ។ ហើយព្រះរាជតួនាទីរបស់ព្រះអង្គ ដែលជាអគ្គមេបញ្ជាការហ្នឹងនៅមិនទាន់បានកាន់កាប់ត្រឹមត្រូវនៅឡើយដែរ ។ ចំណុចសំខាន់មួយទៀត ព្រះអង្គទ្រង់មានព្រះរាជតួនាទីជាតំណាងឲ្យឯកភាពជាតិនេះ ដើម្បីធានាឲ្យមានការគោរពសិទ្ធិនៃគណបក្សនយោបាយ កុំឲ្យមានការបែកបាក់សង្គម ធានាឲ្យមានការគោរពសិទ្ធិមនុស្សជាទូទៅ ដូចមានចែងនៅក្នុងរដ្ឋធម្មនុញ្ញ ក៏ដូចជាសន្ធិសញ្ញា ប្រទេសកម្ពុជាយើងបានចុះហត្ថលេខាជាមួយនឹងអង្គការសហប្រជាជាតិនេះ ក៏នៅជាការបំពាន ។ យើងមិនបន្ទោសទៅដល់ព្រះមហាក្សត្រថា ព្រះអង្គព្រងើយកន្តើយ មិនបានបំពេញព្រះរាជតួនាទីនោះទេ យើងឃើញថារដ្ឋាភិបាលដែលកាន់កាប់យូរឆ្នាំនេះ មិនទាន់ផ្ទេរអំណាចទៅព្រះមហាក្សត្រឲ្យស្របទៅតាមរដ្ឋធម្មនុញ្ញ» ។
ក្នុងឱកាសបុណ្យចម្រើនព្រះជន្មាយុព្រះមហាក្សត្រនេះដែរ មន្រ្តីជាន់ខ្ពស់គណបក្សនរោត្ដម រណឫទ្ធិ លោក យូ ហុកគ្រី ថ្វាយព្រះពរព្រះករុណា ដោយកត់សម្គាល់ពីតួនាទីដ៏កំពូលរបស់ព្រះអង្គ ដូចតទៅ ៖ «ថ្វីត្បិតតែព្រះមហាក្សត្រព្រះអង្គសោយរាជ្យមិនកាន់អំណាចក៏ដោយ ប៉ុន្តែព្រះមហាក្សត្រមានព្រះរាជតួនាទីដ៏សំខាន់ណាស់ក្នុងកិច្ចការនយោបាយ របស់ព្រះរាជាណាចក្រកម្ពុជា ពីព្រោះព្រះអង្គជាព្រះនិមិត្តរូបនៃឯកភាពជាតិ និងនិរន្តរភាពជាតិខ្មែរ ហើយព្រះអង្គទ្រង់ជាអ្នកធានានូវឯករាជ្យជាតិ អធិបតេយ្យ បូរណភាពទឹកដី នៃព្រះរាជាណាចក្រកម្ពុជា ពិសេសទៅទៀត គឺព្រះអង្គជាអ្នកធានានូវការគោរពសិទ្ធិមនុស្ស និងសិទ្ធិរបស់ប្រជាពលរដ្ឋខ្មែរ ហេតុដូចនេះព្រះអង្គមានព្រះតួនាទីជាអាជ្ញាកណ្ដាល ដើម្បីការប្រព្រឹត្តទៅនៃអំណាចសាធារណៈ ។ បើយើងនិយាយតែប៉ុណ្ណេះ ជាការបង្ហាញនូវតួនាទីដ៏សំខាន់នៃព្រះមហាក្សត្រក្នុងការរក្សាស្ថិរភាពនយោបាយ របស់ព្រះរាជាណាចក្រកម្ពុជាយើងនេះ ។ ហើយនៅក្នុងរដ្ឋធម្មនុញ្ញមានចែងយ៉ាងច្បាស់នូវតួនាទីសំខាន់ៗ របស់ព្រះមហាក្សត្រ ដូចជាតួនាទីជាអគ្គមេបញ្ជាការជាន់ខ្ពស់នៃកងយោធពលខេមរភូមិន្ទ ព្រះអង្គជាព្រះប្រធាន នៃឧត្ដមក្រុមប្រឹក្សា នៃអង្គចៅក្រម ក៏ប៉ុន្តែអ្វីដែលមានចែងនៅក្នុងរដ្ឋធម្មនុញ្ញមិនទាន់ត្រូវបានអនុវត្តឲ្យបានម៉ត់ចត់នោះទេ ។ ហេតុនេះហើយបានជាគណបក្សនរោត្ដម រណឫទ្ធិ បើឈ្នះឆ្នោតនឹងពង្រឹងនូវស្ថាប័នព្រះមហាក្សត្រនេះឲ្យបានយ៉ាងល្អប្រសើរស្របទៅតាមអ្វីដែលយើងចែងនៅក្នុងរដ្ឋធម្មនុញ្ញឲ្យបានច្បាស់លាស់ ។ ឆ្លៀតឱកាសដ៏ប្រសើរនេះក្នុងព្រះបរមនាមនៃសម្ដេចក្រុមព្រះ នរោត្ដម រណឫទ្ធិ ព្រះប្រធាននៃគណបក្ស នរោត្ដម រណឫទ្ធិ ក្នុងនាមគណបក្សនរោត្ដម រណឫទ្ធិ ទាំងមូល និងក្នុងនាមខ្លួនទូលព្រះបង្គំខ្ញុំផ្ទាល់ ជាអគ្គលេខាធិការនៃគណបក្សនរោត្ដម រណឫទ្ធិ សូមបួងសួងប្រសិទ្ធពរជ័យ បវរមហាប្រសើរថ្វាយព្រះករុណា ព្រះបាទ នរោត្ដម សីហមុនី ប្រកបដោយព្រះពុទ្ធពរ ទាំង៥ប្រការ ដើម្បីព្រះអង្គគង់នៅក្នុងសិរីមហារាជសម្បត្តិ ជាម្លប់ដ៏ត្រជាក់សម្រាប់ប្រជាពលរដ្ឋខ្មែរទូទៅបានជ្រកកោន» ។
ហើយខាងប្រធានគណបក្សសិទ្ធិមនុស្ស លោក កឹម សុខា វិញ លោកក៏មានប្រសាសន៍ពីតួនាទីព្រះករុណាក្នុងឱកាសបុណ្យចម្រើនព្រះជន្មាយុព្រះអង្គដូច្នេះ ៖ «ទី១បញ្ហាតួនាទីជាប្រមុខរដ្ឋ គឺក្នុងរដ្ឋធម្មនុញ្ញបានចែងហើយ ហើយនិងមានការបកស្រាយមិនច្បាស់លាស់ ដូចជាព្រះអង្គជាឧត្ដមបញ្ជាការកងទ័ពអីហ្នឹង ដូច្នេះយើងឃើញកន្លងមកនេះ ការសម្រេចតែងតាំងកងទ័ព ឬក៏ផ្លាស់ប្ដូរកងទ័ពអី ហាក់បីដូចជាព្រះអង្គអត់មានឥទ្ធិពលទៅលើផ្នែកកងទ័ពទេ ខុសពីស្ដេចនៃប្រទេស ដូចថៃអី ។ យើងចង់ឃើញថា ទ័ពហ្នឹងនៅក្រោមការគ្រប់គ្រងរបស់ព្រះមហាក្សត្រផ្ទាល់ ពិសេសការតែងតាំងមេទ័ព ។ ទីពីរពាក់ព័ន្ធនឹងឧត្ដមក្រុមប្រឹក្សានៃអង្គចៅក្រម ព្រះអង្គជាព្រះប្រធាន យើងឃើញថាតាំងពីសម័យសម្ដេចឪម៉្លេះ គឺខ្ញុំផ្ទាល់ក៏បានចូលគាល់ព្រះអង្គហើយ តាំងពីខ្ញុំនៅតំណាងរាស្រ្ត សូមឲ្យព្រះអង្គជួយយ៉ាងណាធ្វើឲ្យបានតុលាការឯករាជ្យ ពិតប្រាកដ ពីព្រោះព្រះអង្គជាប្រធានឧត្ដមក្រុមប្រឹក្សានៃអង្គចៅក្រម ហើយតាំងពីជំនាន់សម្ដេចឪ សម្ដេចព្រះនរោត្ដម សីហនុ រហូតមកដល់ព្រះមហាក្សត្របច្ចុប្បន្ន ខ្ញុំឃើញថាតួនាទីរបស់ព្រះអង្គនេះ លោកបានបំពេញ គ្រាន់តែជាការដឹកនាំអង្គប្រជុំទេ បញ្ហារបស់តុលាការ គឺខ្ញុំមិនឃើញឥទ្ធិពលព្រះអង្គទៅលើហ្នឹងទេ ផ្ទុយទៅវិញ ឥទ្ធិពលខាងរដ្ឋាភិបាលទៅវិញទេ ទៅលើប្រព័ន្ធតុលាការទេ» ។
ហើយលោកប្រធានគណបក្សសិទ្ធិមនុស្សក៏ថ្លែងថ្វាយព្រះពរព្រះមហាក្សត្រក្នុងឱកាសនេះដូច្នេះ ៖ «ក្នុងនាមខ្ញុំផ្ទាល់ ក៏ដូចជាគណបក្សសិទ្ធិមនុស្ស សូមថ្វាយព្រះពរព្រះករុណា ជាអម្ចាស់ជីវិតតម្កល់លើត្បូង សូមព្រះអង្គទទួលបាននូវសុខភាពល្អ ព្រះជន្មយឺនយូរ និងទទួលបានជ័យជំនះ ក្នុងការបំពេញភារកិច្ច តួនាទីព្រះអង្គជាព្រះមហាក្សត្រ ដើម្បីឲ្យប្រទេសជាតិយើងមានសន្តិភាព មានការរីកចម្រើនទៅថ្ងៃមុខ» ។
ហើយក្នុងនាមជាតំណាងអង្គការសង្គមស៊ីវិលខ្មែរ លោកស្រីវេជ្ជបណ្ឌិត ពុង ឈីវកេក ថ្លែងពីតួនាទី ព្រះមហាក្សត្រក្នុងឱកាសចម្រើនព្រះជន្មាយុព្រះអង្គដូច្នេះ ៖ «ជាការពិត បើយើងមើលតាមរដ្ឋធម្មនុញ្ញទៅ ឃើញថាព្រះអង្គលោកមានតួនាទីច្រើន ប៉ុន្តែមានមួយឃ្លានៅក្នុងរដ្ឋធម្មនុញ្ញថា ព្រះអង្គលោកគ្រងសម្បត្តិ ប៉ុន្តែលោកមិនគ្រប់គ្រងរដ្ឋាភិបាលទេ គ្រប់គ្រងរដ្ឋាភិបាលនៅលើប្រមុខរដ្ឋាភិបាល ។ ដូច្នេះបើលោកមិនកាន់អំណាចទេ ខ្ញុំយល់ឃើញថាពិបាកលោកនឹងធ្វើយ៉ាងម៉េច ដូចជាលោកជាប្រធានឧត្ដមក្រុមប្រឹក្សានៃអង្គចៅក្រម លោកយាងមកអ៊ីចឹងដើម្បីអញ្ជើញសមាជិក ដែលមកជួបជុំគ្នាអ៊ីចឹង ប៉ុន្តែតើលោកធ្វើអ្វីបាន ? ខ្ញុំថារដ្ឋធម្មនុញ្ញយើងមិនច្បាស់លាស់ ថ្វាយតួនាទីលោកច្រើន ប៉ុន្តែមិនថ្វាយលោកអំណាច តើលោកធ្វើអ្វីបាន ? អ៊ីចឹងគឺជាការលំបាកមួយសម្រាប់ព្រះអង្គ» ។
ក្រៅពីទស្សនៈ និងយោបល់ព្រមទាំងពរស័ព្ទសាធុការ របស់ឥស្សរជនទាំងនេះហើយ ប្រជាពលរដ្ឋខ្មែរគ្រប់ស្រទាប់ក៏នាំគ្នាអបអរសាទរចំពោះថ្ងៃបុណ្យឈប់សម្រាក ក្នុងឱកាសទិវាចម្រើនព្រះជន្មលើកនេះ យ៉ាងខ្លាំងក្លាណាស់ដែរ ៕