ការធ្វើអន្តរាគមន៍នោះបានធ្វើទ្បើងភ្លាមៗតាមរយៈទូរស័ព្ទដោយតំណាងសហព័ន្ធខែ្មរកម្ពុជាក្រោមពិភពលោកកាលពីពេលថ្មីៗនេះពីសហរដ្ឋអាមេរិក។
ព្រះសង្ឃព្រះនាម ឃួន សារី ដែលមានដើមកំណើតជាខែ្មរកម្ពុជាក្រោមផងដែរនោះ គង់នៅវត្តអង្គព្រៃសេរីមានជ័យ ស្ថិតនៅក្នុងឃុំសំរោង ស្រុកកំពត ខេត្តកំពត បានមានដីកាប្រាប់វិទ្យុអាស៊ីសេរីថា ព្រះអង្គបានយល់ព្រមបោះបង់គម្រោងការធ្វើបាតុកម្មនោះហើយជាមួយនឹងការដាក់លក្ខខណ្ឌមួយចំនួនឲ្យព្រះសង្ឃ យឿង សិន បើកផ្លូវឲ្យមានការកសាងនៅវត្តសាមគ្គីរង្សីនាពេលខាងមុខនេះ។
ព្រះសង្ឃ ឃួន សារី បានមានដីកាថា ៖ «លោកបើកទ្វារទៅ អាហ្នឹងអាត្មាក៏សុំចប់ត្រឹមហ្នឹងដែរ ហើយពាក្យបណ្ដឹងហ្នឹងអាត្មាសុំដកវិញ។ គឺសហព័ន្ធបានទូរស័ព្ទមកជួបអាត្មាផងថា សហព័ន្ធថ្ងៃហ្នឹងបានស្ដាប់វិទ្យុអាស៊ីសេរី ហើយសហព័ន្ធបានប្រជុំគ្នាមក ហើយសហព័ន្ធសុំឲ្យអាត្មាផ្អាករឿងហ្នឹងសិន ទុកឲ្យគេសុំចរចានិយាយគ្នាជាមួយព្រះតេជគុណ យឿង សិន»។
ប្រតិកម្មទៅនឹងការចោទប្រកាន់ខាងលើនេះ ព្រះសង្ឃ យឿង សិន ប្រធានសមាគមព្រះសង្ឃខែ្មរកម្ពុជាក្រោមនៅកម្ពុជា និងជាព្រះចៅអធិការនៃវត្តសាមគ្គីរង្សីបានមានដីកាបញ្ជាក់ថា ៖ «ខាងទ្វារកណ្ដាល ទ្វារខាងជើងនេះ អាត្មាបិទ ដោយសារអាត្មាកំពុងតែកសាងព្រះវិហារ ហើយអាត្មាចាក់ខ្សាច់ច្រើនទៅ ក្មេងវាចូលមកនាំគ្នារត់ប្រលែងលើខ្សាច់នោះ និយាយមិនស្ដាប់។ ហើយបើអ្នកណាចង់ត្រូវការអីមកទំនាក់ទំនងប្រាប់ទៅ! លោកខ្ញុំសុំបើកទ្វារអ៊ីចេះអ៊ីចុះ។ មានទៅបិទអី ធម្មតាវត្តទ្វារពីរ បិទមួយមែន ប៉ុន្តែបើកមួយតើ មិនមែនបិទទាំងពីរទេ។ ប្ដឹងគ្រប់ទាំងអស់ ចោទប្រកាន់អាត្មាគ្រប់បែបគ្រប់យ៉ាង ថាអាត្មាហ្នឹងមកបង្កលក្ខណៈ ធ្វើឲ្យបែកបាក់សាមគ្គីរវាងកម្ពុជាវៀតណាម ហើយថាអាត្មាហ្នឹងបួសធ្វើនយោបាយ បង្កើតគណបក្ស បង្កើតលោក... ដើម្បីប្រឆាំងរដ្ឋាភិបាល។ ប្រឆាំងរដ្ឋាភិបាលប៉ុន្មានដងហើយ ? អាត្មាធ្វើស្អីខ្លះ? រឿងសម្ដីចំពោះស្ថានទូតវៀតណាម នោះជាមតិរបស់បុគ្គល ដែលមិនចង់ឲ្យយួនធ្វើបាបជិះជាន់ ធ្វើទុក្ខបុកម្នេញលើខ្មែរកម្ពុជាក្រោម ព្រះសង្ឃខ្មែរកម្ពុជាក្រោម ប្រជាពលរដ្ឋខ្មែរកម្ពុជាក្រោម»។
ទាក់ទងនឹងបញ្ហាវិវាទខាងលើនេះ លោក ថាច់ សេដ្ឋា ប្រធានសហគមន៍ខែ្មរកម្ពុជាក្រោមប្រចាំនៅក្នុងប្រទេសកម្ពុជាបានមានប្រសាសន៍អត្ថាធិប្បាយថា ៖ «ខ្ញុំសប្បាយចិត្តណាស់ នៅពេលដែលថាឲ្យមានការសម្របសម្រួលគ្នា កុំឲ្យមានបញ្ហាវាកើតឡើង ការវិវាទអធិករណ៍កើតឡើងក្នុងសង្គមព្រះសង្ឃជាពិសេសខ្មែរក្រោម»។
លោកបានទទូចសុំឲ្យព្រះសង្ឃខែ្មរកម្ពុជាក្រោមនានាគង់នៅក្នុងប្រទេសកម្ពុជាគប្បីប្រឹងប្រែងសិក្សារៀនសូត្រនិងរួបរួមសាមគ្គីគ្នាដើម្បីបម្រើផលប្រយោជន៍នៃសង្គមខែ្មរកម្ពុជាក្រោមទំាងនៅក្នុងប្រទេសកម្ពុជា និងនៅលើអតីតទឹកដីខែ្មរកម្ពុជាក្រោម ការទាមទារសិទ្ធិសេរីភាពនៃជំនឿសាសនាតាមបែបព្រះពុទ្ធសាសនាកម្ពុជា៕