សាលាក្ដីខ្មែរក្រហមចេញដីកាកោះមន្រ្តីជាន់ខ្ពស់ខ្មែរមកធ្វើជាសាក្សី

ដោយ ម៉ៅ សុធានី

2009-10-08

សាលាក្ដីខ្មែរក្រហមបានចេញដីកាកោះអញ្ជើញមន្ត្រីជាន់ខ្ពស់ខ្មែរ៦នាក់ ដើម្បីធ្វើជាសាក្សីក្នុងការឆ្លើយបំភ្លឺទាក់ទងនឹងករណីសំណុំរឿងទី២ ប្រឆាំងនឹងអតីតមេដឹកនាំខ្មែរក្រហម៤រូប ជុំវិញការចោទប្រកាន់ពីបទឧក្រិដ្ឋកម្មសង្គ្រាមនិងឧក្រិដ្ឋកម្មប្រឆាំងមនុស្សជាតិ។

AFP Photo

អង្គជំនុំជម្រះវិសាមញ្ញក្នុងតុលាការកម្ពុជាបើកសវនាការលើករណីបណ្ដឹងឧទ្ធរណ៍របស់ ខៀវ សំផន កាលពីថ្ងៃ៤ ធ្នូ ២០០៨។

ប្រភពព័ត៌មានបារាំងអា.អេហ្វ.ប៉េ ផ្សាយកាលពីថ្ងៃ៧ តុលានេះ បានឲ្យដឹងថា ក្នុងលិខិតដែលបានផ្ញើចេញ ចុះហត្ថលេខាដោយចៅក្រមស៊ើបអង្កេតជនជាតិបារាំង បានកោះអញ្ជើញមន្ត្រីជាន់ខ្ពស់ខ្មែរ៦នាក់ ឲ្យទៅឆ្លើយបំភ្លឺនោះ គឺមានលោក ជា ស៊ីម ប្រធានព្រឹទ្ធសភា លោក ហេង សំរិន ប្រធានរដ្ឋសភា លោក ហោ ណាំហុង ឧបនាយករដ្ឋមន្ត្រី និងជារដ្ឋមន្ត្រីការបរទេស លោក គាត ឈន់ រដ្ឋមន្ត្រីក្រសួងហិរញ្ញវត្ថុ លោក ស៊ីម កា សមាជិកព្រឹទ្ធសភា និងលោក អ៊ុក ប៊ុនឈឿន ដែលជាសមាជិកព្រឹទ្ធសភាផងដែរ។

នៅពេលសួរបញ្ជាក់អំពីការកោះអញ្ជើញមន្ត្រីជាន់ខ្ពស់ខ្មែរ៦រូបមកធ្វើជាសាក្សី លោក រាជ សម្បត្តិ ប្រធានកិច្ចការសាធារណៈនៃសាលាក្តីខ្មែរក្រហម បានប្រសាសន៍ថា លោកមិនមានបទអត្ថាធិប្បាយអ្វីទេ ព្រោះនោះជាការសម្រេចរបស់ចៅក្រមស៊ើបអង្កេតអន្តរជាតិ ដែលធ្វើឡើងតែម្នាក់ឯង។

លោក រាជ សម្បត្តិ មានប្រសាសន៍ដូច្នេះ ៖ «ហ្នឹងកិច្ចការរបស់សហចៅក្រមស៊ើបអង្កេតអន្តរជាតិ គាត់បានធ្វើកិច្ចការរបស់គាត់ហ្នឹងឯកតោភាគី អ៊ីចឹងយើងមិនមានអីបន្ថែមទេ»។

លោក ខៀវ កាញារីទ្ធ អ្នកនាំពាក្យរាជរដ្ឋាភិបាល និងជារដ្ឋមន្ត្រីក្រសួងព័ត៌មាន បានមានប្រតិកម្មទៅនឹងការកោះអញ្ជើញនេះ ដោយមានប្រសាសន៍ថា ជំហររាជរដ្ឋាភិបាល គឺមិនព្រមជាដាច់ខាត លើកលែងតែអ្នកទាំងនោះស្ម័គ្រចិត្តទៅផ្តល់សក្ខីកម្មក្នុងតុលាការខ្មែរក្រហម។

លោក ខៀវ កាញារីទ្ធ មានប្រសាសន៍បន្តថា ប្រសិនបើមានមន្ត្រីបរទេសនៃតុលាការខ្មែរក្រហមណាមួយដែលមិនពេញចិត្តទេ ពួកគេអាចវេចបង្វេចត្រឡប់ទៅប្រទេសរបស់ខ្លួនវិញ។

ប្រភពដដែលបន្តថា កន្លងមកមានការចោទប្រកាន់ថា រាជរដ្ឋាភិបាលខ្មែរបានជ្រៀតជ្រែកចូលកិច្ចការផ្ទៃក្នុងរបស់សាលាក្តីខ្មែរក្រហម ពីព្រោះចង់ការពារអតីតមេដឹកនាំខ្មែរក្រហម ដែលមានឋានន្តរសក្តិខ្ពស់ក្នុងជួររដ្ឋាភិបាល។

សូមជម្រាបជូនថា សាលាក្តីខ្មែរក្រហមនឹងចាប់ផ្តើមដំណើរការក្តីលើសំណុំរឿងលេខ០០២ ដែលមានអតីតមេដឹកនាំខ្មែរក្រហម៤រូបទៀតជាជនជាប់ចោទ គឺមាន នួន ជា, ខៀវ សំផន, អៀង សារី និង អៀង ធីរិទ្ធ៕

បោះពុម្ព អ៊ីម៉េល