មេធាវី៖ អៀង សារី ទំនងមិនអាចទ្រាំអង្គុយស្ដាប់សវនាការថ្ងៃ៣០មិថុនាបានទេ

ដោយ ហ៊ុយ វណ្ណៈ

2008-06-29

មេធាវីបានសម្តែងការព្រួយបារម្ភថា ដោយបញ្ហាសុខភាព កូនក្តីរបស់លោក គឺលោក អៀង សារី ទំនងជាមិនអាចស៊ូទ្រាំអង្គុយនៅក្នុងសវនាការមួយ ដែលគេគ្រោងធ្វើជាសាធា រណៈ នៅថ្ងៃច័ន្ទ ទី៣០ មិថុនានោះ បានឡើយ ។

AFP Photo

ក្នុងរូបថតឯកសារថតនៅថ្ងៃទី ៣ កក្កដា ២០០៣ អៀង សារី (ឆ្វេង) និងភរិយា អៀង ធីរិទ្ធ ចូលរួមបុណ្យសពរបស់ភរិយាទី១របស់ប៉ុលពត នៅក្រុងប៉ៃលិន។

លោក អាង ឧត្តម ដែលជាមេធាវីរបស់លោក អៀង សារី បានថ្លែងយ៉ាងដូច្នេះ គឺតែមួយថ្ងៃប៉ុណ្ណោះ នៅមុនពេលដែលសាលាក្តីខ្មែរក្រហម គ្រោងបើកការវិនិច្ឆ័យករណីបណ្ដឹងឧទ្ធរណ៍សុំនៅក្រៅឃុំរបស់ អៀង សារី ។

លោក អាង ឧត្ដម មានប្រសាសន៍ដូច្នេះថា ៖ «មិនទាន់ដឹងច្បាស់ទេ មិនដឹងគាត់អាចអង្គុយបានយូរប៉ុណ្ណា សុខភាពគាត់មិនមាំមួនទេ ។ រឿងយើងព្រួយបារម្ភគឺព្រួយបារម្ភរឿងសុខភាពហ្នឹងហើយ អ៊ីចឹង យើងនឹងលើកពីបញ្ហាហ្នឹង» ។

លោក រាជ សម្បត្តិ មន្ត្រីនាំពាក្យសាលាក្តីខ្មែរក្រហម ធ្លាប់បានថ្លែងថា លោក អៀង សារី ដែលមានវ័យ ៨៣ឆ្នាំហើយនោះ គឺមានរោគប្រចាំកាយ និងបានដឹកយកទៅកាន់មន្ទីរពេទ្យច្រើនដងជាង អតីតមេដឹកនាំខ្មែរក្រហម ៤នាក់ទៀត ដែលកំពុងជាប់ឃុំបណ្តោះអាសន្ននៅសាលាក្តីខ្មែរក្រហម ជាមួយគ្នានោះ ។

ទោះបីជាយ៉ាងណាក៏ដោយ លោកមេធាវី សុក សំអឿន ដែលជាមន្ត្រីច្បាប់មួយរូបនិងជានាយកប្រតិបត្តិអង្គការក្រុមអ្នកច្បាប់ការពារសិទ្ធិកម្ពុជា បានថ្លែងថា ដំណើរការសវនាការ អៀង សារី នៅថ្ងៃច័ន្ទនេះ នឹងមិនអាចត្រូវរាំងស្ទះដោយសារបញ្ហាសុខភាពនោះឡើយ ។

លោក សុក សំអឿន ថ្លែងដូច្នេះថា ៖ «ច្បាប់យើងមានកាត់កំបាំងមុខដែរ ហើយមេធាវីអាចឆ្លើយជំនួសបាន ឬបើមិនអ៊ីចឹងទេ ឥឡូវយើងមាន LCD បន្តឲ្យគាត់មើលទៅ សាលាក្ដីធ្វើបានទេតើ ។ គាត់ [អៀងសារី] មិនមែននៅក្រៅឯណា គាត់នៅក្នុងពន្ធនាគារ អ៊ីចឹងឲ្យគាត់សម្រាកនៅក្នុងបន្ទប់ណាមួយដែលអាចទំនាក់ទំនងបាន ។ គ្រាន់តែថា ជនជាប់ចោទមានសិទ្ធិចូលរួមសវនាការដើម្បីស្ដាប់ការកាត់ក្ដីប្រឆាំងខ្លួន ហើយបើត្រូវការឆ្លើយ អាហ្នឹងគាត់ត្រូវឆ្លើយហើយ ប៉ុន្តែវាជាការសម្រេចរបស់ជនជាប់ចោទខ្លួនឯង ពីព្រោះជាសិទ្ធិរបស់ខ្លួនឯង» ។

សូមជម្រាបថា លោក អៀង សារី ដែលជាអតីតឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសនៃរបបខ្មែរក្រហម ត្រូវបានចាប់ខ្លួនជាមួយប្រពន្ធរបស់លោក គឺលោកស្រី អៀង ធីរិទ្ធ ហើយបានជាប់ឃុំនៅសាលាក្តីខ្មែរក្រហម ចាប់តាំងពីថ្ងៃទី១៤ ខែវិច្ឆិកា ឆ្នាំ២០០៧ មក ។

សហចៅក្រមស៊ើបអង្កេតនៃសាលាក្តីខ្មែរក្រហមបានចោទលោក អៀង សារី ពីការទទួលខុសត្រូវលើឧក្រិដ្ឋកម្មចំនួន២ គឺឧក្រិដ្ឋកម្មប្រឆាំងនឹងមនុស្សជាតិ និងឧក្រិដ្ឋកម្មសង្គ្រាម ។

លោក អៀង សារី ធ្លាប់ត្រូវបានតុលាការប្រជាជនបដិវត្តន៍កម្ពុជា កាត់ទោសប្រហារជីវិត ដោយកំបាំងមុខ នៅខែសីហា ឆ្នាំ១៩៧៩ ដោយចោទពីបទប្រព្រឹត្តអំពើប្រល័យពូជសាសន៍ ក្នុងរបបខ្មែរក្រហម ដែលរបបនោះបានបណ្តាលឲ្យមានការស្លាប់រង្គាលមនុស្សប្រមាណ១,៧លាននាក់ ។

ក៏ប៉ុន្តែនៅខែកញ្ញា ឆ្នាំ១៩៩៦ លោក អៀង សារី ទទួលបានការលើកលែងទោសពីព្រះមហាក្សត្រនាពេលនោះ បន្ទាប់ពីលោកបាននាំកម្លាំងខ្មែរក្រហមជាច្រើនពាន់នាក់ ចុះចូលជាមួយរដ្ឋាភិបាលក្រុងភ្នំពេញ ។

សូមជម្រាបបន្ថែមថា សវនាការសំណុំរឿងបណ្តឹងឧទ្ធរណ៍របស់ អៀង សារី គឺទំនងជាសវនាការចុងក្រោយបង្អស់ក្នុងចំណោមអតីតមេដឹកនាំខ្មែរក្រហមដែលជាប់ឃុំដំបូងគេចំនួន ៥នាក់ ៕

បោះពុម្ព អ៊ីម៉េល

ឧបករណ៍រឿង

	ស្តាប់សំឡេង
	ថតសំឡេង
	អ៊ីម៉េល
	ព្រឹត្តិបត្រព័ត៌មាន
	បោះពុម្ព