ជាមួយគ្នានេះ លោកចៅក្រម គង់ ស្រ៊ីម ជាប្រធានអង្គជំនុំជម្រះតុលាការកំពូលបានថ្លែងបើកនៅក្នុងកិច្ចប្រជុំពេញអង្គលើកទី៤ នៃក្រុមចៅក្រមនោះថា សាលាក្តីវិសាមញ្ញ ក៏កំពុងប្រឈមនឹងភាពមិនច្បាស់លាស់ខាងជំនួយថវិកាផងដែរ។
លោក គង់ ស្រ៊ីម មានប្រសាសន៍ថា ៖ «គម្រោងថវិកាដែលបានកែប្រែថ្មី ត្រូវគេដាក់ជូនទៅក្រុមប្រទេសដែលមានចំណាប់អារម្មណ៍ នៅក្នុងកិច្ចប្រជុំ នៅទីក្រុងញូវយ៉ក កាលពីថ្ងៃទី២០ ខែមិថុនា កន្លងទៅនេះ។ នៅក្នុងគម្រោងថវិកាថ្មីនេះ មានការកាត់បន្ថយនូវមន្រ្តីបុគ្គលិកមួយចំនួនធំ ទាំងខាងរដ្ឋបាលនិងខាងអង្គជំនុំជម្រះដើម្បីឲ្យការចំណាយរបស់អង្គជំនុំជម្រះវិសាមញ្ញក្នុងតុលាការកម្ពុជា នៅត្រឹមកម្រិតអប្បបរមា។ គួរកត់សម្គាល់ផងដែរថា រហូតមកទល់ពេលនេះ ថវិកាខាងផ្នែកកម្ពុជា អាចអនុញ្ញាតឲ្យតុលាការបន្ត កិច្ចប្រតិបត្តិការរហូតដល់ត្រឹមឆមាសទី១ ឆ្នាំ២០០៩»។
ចំណែកឯ លោកស្រី Silvia Cartwright តំណាងចៅក្រមបរទេស បានថ្លែងនៅក្នុងកិច្ចប្រជុំពេញអង្គនោះ ដោយបានស្នើសុំឲ្យមានការដោះស្រាយ ឲ្យបានជ្រះស្រឡះជុំវិញការលើកឡើងពីអំពីពុករលួយនោះ ៖ «យើងយល់ស្របថា នេះគឺជាការកាត់ក្ដីជាប្រវត្តិសាស្រ្ដមួយ ដែលមានសារសំខាន់បំផុត សម្រាប់ប្រជាជនកម្ពុជា ក៏ប៉ុន្តែដំណើរការស្វែងរកយុត្តិធម៌នេះ គឺមិនត្រូវឲ្យមានដិតដាមនិងខូចឈ្មោះ ដោយអំពើពុករលួយនោះឡើយ»។
សូមជម្រាបថា កាលពីពាក់កណ្តាលខែសីហា កន្លងទៅ លោក ស៊ាន វិសុទ្ធ ប្រធានរដ្ឋបាលសាលាក្តីខ្មែរក្រហម បានសម្រេចបង្កើតឲ្យមានក្រុមប្រឆាំងអំពើពុករលួយក្នុងសាលាក្តីនេះ។
ឆ្លើយតបនឹងកង្វល់ចំពោះការលើកឡើងពីអំពើពុករលួយនោះ មន្ត្រីនាំពាក្យសាលាក្តី គឺលោក រាជ សម្បត្តិ មានប្រសាសន៍ប្រាប់ក្រុមអ្នកកាសែតថា ៖ «តែមកដល់ពេលហ្នឹង គឺយើងឃើញថា អត់មានការរកឃើញអីណាមួយ គ្រាន់តែយើងឮថា ការចោទប្រកាន់អ៊ីចឹង គេអត់ចង់ឮពាក្យអ៊ីចឹងទៀត ពីព្រោះពាក្យហ្នឹង វាអាចធ្វើឲ្យរំខានដល់ដំណើរការរបស់សាលាក្ដី»។
យោងតាមប្រសាសន៍របស់លោកចៅក្រម គង់ ស្រ៊ីម ថវិកាដែលភាគីកម្ពុជានៅមាននោះ គឺអាចប្រើដើម្បីតែបញ្ចប់សំណុំរឿង កាំង ហ្កិចអ៊ាវ ហៅ ឌុច តែមួយករណីប៉ុណ្ណោះ។
រហូតដល់ពេលនេះ សាលាក្តីបានឃុំខ្លួនអតីតមេដឹកនាំខ្មែរក្រហមសរុបចំនួន៥នាក់ហើយ សាលាក្តីកំពុងត្រូវការថវិកាជាង ៤០លានដុល្លារអាមេរិកទៀត។
លោកចៅក្រម គង់ ស្រ៊ីម បន្តថា មន្ត្រីសាលាក្តីទាំងជាតិនិងអន្តរជាតិ កំពុងទទឹងរង់ចាំជំនួយបន្ថែម ដើម្បីបញ្ចប់ការងាររបស់ខ្លួន។
មន្ត្រីសហរដ្ឋអាមេរិកធ្លាប់ថ្លែងថា ការលើកឡើងពីបញ្ហាពុករលួយ ធ្វើឲ្យប្រទេសអ្នកផ្តល់ជំនួយមានការអល់អែកក្នុងការផ្តល់ថវិកាដល់សាលាក្តីវិសាមញ្ញនេះ៕