នៅមុនពេលផ្អាកបន្តិច សាក្សី សួង ស៊ីគឿន បានប្រដូចអតីតមេដឹកនាំជាន់ខ្ពស់ខ្មែរក្រហម ឈ្មោះ ខៀវ សំផន ដូចជា ព្រះពុទ្ធ ហើយមេដឹកនាំ ២ រូបទៀត ជាព្រះធម៌ និងព្រះសង្ឃ។
ការប្រៀបប្រដូចអតីតមេដឹកនាំជាន់ខ្ពស់ខ្មែរក្រហម ឈ្មោះ ខៀវ សំផន ថាដូចជាព្រះពុទ្ធនេះ គឺសាក្សី សួង ស៊ីគឿន ធ្វើឡើងក្នុងពេលគាត់ឆ្លើយតបសំណួររបស់មេធាវីដើមបណ្ដឹងរដ្ឋប្បវេណី ដែលសួរទាក់ទងនឹងការអំពាវនាវរបស់ខ្មែរក្រហមឱ្យនិស្សិត បញ្ញាជននៅបរទេសវិលចូលមកកម្ពុជាវិញ កាលពីឆ្នាំ ១៩៧៥។
សាក្សី សួង ស៊ីគឿន ថ្លែងថា ការអំពាវនាវនៅពេលនោះ គឺតាមរយៈអង្គការរណសិរ្សប្រចាំនៅប្រទេសនីមួយៗ។ ម្យ៉ាងទៀត លោកថា បើទោះជាមិនមានការអំពាវនាវ ក៏និស្សិតនៅក្រៅប្រទេសទាំងនោះចង់វិលមកស្រុកវិញដែរ ដោយសារតែនៅក្នុងប្រទេសមានសម្ដេច សីហនុ និងជនជាប់ចោទ ខៀវ សំផន ដែលកាលនោះទុកដូចជាព្រះពុទ្ធ។
សាក្សី សួង ស៊ីគឿន៖ «រណសិរ្សពេលនោះមានដូចថា មានសម្ដេចព្រះ នរោត្ដម សីហនុ លោកជាប្រធាន ជាពិសេស នៅក្នុងប្រទេស មានព្រះពុទ្ធ ព្រះធម៌ ព្រះសង្ឃ។ បើសិនលោកមិនបានដឹងទេ លោកទើបនឹងអញ្ជើញមក ខ្ញុំចង់ប្រាប់ថា ព្រះពុទ្ធ គឺថា លោក ខៀវ សំផន។ ព្រះធម៌ គឺថា លោក ហ៊ូ យន់ ព្រះសង្ឃ គឺលោក ហ៊ូ នឹម។ ជាបញ្ញាជនស្អាតស្អំ ហើយប្រជាជនខ្មែរ យុវជនខ្មែរ លោកស្រឡាញ់ គោរព ស្នេហាណាស់។ លោកទាំង ៣ ហ្នឹង គឺដូចគេថាមែន»។
លោក សួង ស៊ីគឿន ថ្លែងថា សម័យកាលឆ្នាំ ១៩៧៥ នោះ ជារយៈពេលវេលាដែលពួកគាត់បានបំពេញកាតព្វកិច្ចឱ្យប្រទេសមានលក្ខណៈសម្បត្តិពេញលេញ សមជាប្រទេសឯករាជ្យ ឆ្ពោះទៅរកការកសាងជាតិ ការបង្រួបបង្រួម និងសុខដុមរមនា។
លោកថា ការក្រឡាប់ចក្របន្ទាប់មកគឺជាឈឺចាប់ចំពោះលោក៖ «យើងបំពេញបានច្រើនណាស់ ហេតុអ្វីបានវាទៅជា បែរជាសោកនាដកម្មដ៏ធំធេង ដែលសកលលោកមិនដែលមាន ដែលប្រវត្តិសាស្ត្រមិនដែលមានដូច្នេះ។ នេះហើយជាការឈឺចាប់របស់យើងទាំងអស់គ្នា ជាពិសេសរបស់ខ្លួនខ្ញុំផ្ទាល់ ដែលលះបង់អ្វីៗ ទាំងអស់»។
សាក្សី សួង ស៊ីគឿន ជម្រាបអង្គជំនុំជម្រះថា លោកជាបក្ខជនសកម្មម្នាក់នៃបក្សកុម្មុយនិស្តកម្ពុជា។ លោកចូលក្នុងវង់ម៉ាកឡេនីន នៅប្រទេសបារាំង ដែលបង្កើតឡើងដោយជនជាប់ចោទ អៀង សារី។ នៅក្នុងរបបកម្ពុជាប្រជាធិបតេយ្យ ពីឆ្នាំ ១៩៧៥ ដល់ ១៩៧៩ លោកជាកម្មាភិបាលផ្នែកឃោសនាការ និងព័ត៌មាន នៃក្រសួងការបរទេស ហៅកាត់ថា មន្ទីរ ប១។
ទាក់ទងនឹងការអំពាវនាវរបស់ខ្មែរក្រហមឱ្យនិស្សិត បញ្ញវន្តនៅបរទេសវិលចូលមកកម្ពុជាវិញ នៅឆ្នាំ ១៩៧៥ លោកថា ជាភារកិច្ចរបស់ អៀង សារី ដែលត្រូវអំពាវនាវឱ្យគេមកវិញ ព្រោះគាត់យល់ថា ពេលនោះក៏ជាឱកាសឱ្យនិស្សិតបញ្ញវន្តនៅបរទេស ត្រូវវិលត្រឡប់មកបម្រើជាតិវិញដែរ។
សាក្សីបដិសេធថា ទាំងគាត់ និងជនជាប់ចោទ អៀង សារី ប្រាកដជាមិនដឹងអំពីការកាប់សម្លាប់នៅក្នុងរបបនោះទេ។ លោក សួង ស៊ីគឿន ថ្លែងថា ចំពោះវិនាសកម្មវិញ គឺគាត់ទើបតែដឹងនៅក្រោយឆ្នាំ ១៩៧៩ ប៉ុណ្ណោះ។ លោកបញ្ជាក់ទៀតថា បើមិនមានការផ្លាស់ប្ដូរនៅឆ្នាំ ១៩៧៩ ទេនោះ ទាំងលោកខ្លួនឯង និងជនជាប់ចោទ អៀង សារី និងត្រូវស្លាប់៖ «ពួកខ្ញុំផ្ទាល់ កុំតែបាន ៧៩ កុំអីគ្មានបានរស់ទេ ខ្ញុំជម្រាបអ៊ីចឹង។ ពួកប៉ុន្មាននាក់ អៀង សារី សួង ស៊ីគឿន អៀង ធីរិទ្ធ អីហ្នឹង មានក្នុងបញ្ជីគេអស់ហើយ»។
ទាក់ទងនឹងការថ្លែងអំពីការលះបង់គ្រប់យ៉ាងរបស់លោក សួង ស៊ីគឿន ដែរ នៅក្នុងសៀវភៅឈ្មោះ ឆ្ងាយហួសពីជើងមេឃ ៥ឆ្នាំជាមួយពួកខ្មែរក្រហម របស់អ្នកស្រី ឡូរ៉ង់ ពិច ដែលភរិយាជនជាតិបារាំងរបស់គាត់ បានសរសេររៀបរាប់ជាច្រើនអំពីលោក សួង ស៊ីគឿន ដែលគិតតែពីការងារបក្ស និងរបបកម្ពុជាប្រជាធិបតេយ្យ ហើយមិនសូវគិតគូរដល់គ្រួសារសោះ។
ដោយសារតែសុខភាពរបស់ថមថយអស់កម្លាំងរបស់លោក សួង ស៊ីគឿន អង្គជំនុំជម្រះបានស្ដាប់សាក្សីឈ្មោះ អុង ថុងហឿង ជំនួសវិញ នៅរសៀលថ្ងៃអង្គារ ទី៧ សីហា។ សាក្សីឈ្មោះ អុង ថុងហឿង គឺជាអតីតបញ្ញាជននៅបរទេសមួយរូប ដែលវិលមកចូលរួមក្នុងខ្មែរវិញ នៅឆ្នាំ១៩៧៥។ សាក្សីបានរៀបរាប់ដោយក្ដុកក្ដួលក្នុងចិត្តអំពីការឈឺចាប់របស់លោក ដែលបានឆ្លងកាត់ក្នុងរបបនោះ។
អង្គជំនុំជម្រះនឹងបន្តការស្ដាប់សក្ខីកម្មរបស់សាក្សីនេះជាបន្តទៀត នៅថ្ងៃពុធ ទី៩ សីហា ដោយផ្លាស់ប្ដូរគ្នាជាមួយសាក្សី សួង ស៊ីគឿន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។