អតីតខ្មែរក្រហមសុំទោសសម្ដេច សីហនុ

នៅក្នុងសាលាក្ដីខ្មែរក្រហម នៅថ្ងៃពុធ ទី៨ សីហា សាក្សីថ្លែងសុំទោសសម្ដេចព្រះ នរោត្ដម សីហនុ ចំពោះការថ្លែងរបស់ខ្លួនវាយប្រហារវណ្ណៈរបស់ព្រះអង្គ កាលពីក្នុងកម្ពុជាប្រជាធិបតេយ្យ។ ស្របពេលគ្នានោះ សាក្សីក៏បានសរសើរដល់ស្មារតីស្នេហាជាតិរបស់ព្រះអង្គដែរ។

ដោយ ឡេង ម៉ាលី
2012-08-08

lm.mp3

៥-កក្កដា-២០០៦៖ លោក សួង ស៊ីគឿន ហៅ គង់ អតីតបក្ខជននៃបក្សកុម្មុយនិស្តកម្ពុជា និងជាកម្មាភិបាលមួយរូប នៃក្រសួងការបរទេស ហៅកាត់ថា មន្ទីរ ប១ ក្នុងរបបកម្ពុជាប្រជាធិបតេយ្យ។ ថតនៅផ្ទះរបស់លោកក្នុងស្រុកម៉ាឡៃ។

RFA/Leng Maly

ការថ្លែងសុំទោសចំពោះអតីតព្រះមហាក្សត្រ សម្ដេចព្រះ នរោត្ដម សីហនុ ត្រូវបានសាក្សី សួង ស៊ីគឿន ដែលជាអតីតបក្ខជនកុម្មុយនិស្តសកម្មមួយរូប ថ្លែងជាសាធារណៈ នៅក្នុងសវនាការសាលាក្ដីខ្មែរក្រហម នៅថ្ងៃទី ៨ ខែសីហា។

សាក្សី សួង ស៊ីគឿន ថ្លែងនៅពេលគាត់ឆ្លើយតបនឹងសំណួររបស់សហចៅក្រមអន្តរជាតិ លោក ហ្សង់ ម៉ាកឡាវ៉ែញ (Jean-marc lavergne) សួរថា តើទស្សនៈរបស់សម្ដេចព្រះ នរោត្ដម សីហនុ ដូចគ្នានិងទស្សនៈរបស់ ប៉ុល ពត និងបក្ខជនកុម្មុយនិស្តកម្ពុជាដែរឬទេ ចំពោះអនាគតប្រទេសកម្ពុជា។

សាក្សី សួង ស៊ីគឿន៖ «ខ្ញុំសូមឆ្លៀតឱ្យកាសនេះ ថ្វាយបង្គំគោរពព្រះអង្គ ហើយសុំទោសព្រះអង្គចំពោះអ្វីៗ ដែលកន្លងមក ខ្ញុំបានមានមតិចំពោះព្រះអង្គ មិនមែនមតិផ្ទាល់ទេ ចំពោះដូចថា វណ្ណៈសក្ដិភូមិជិះជាន់ បរិវារអាណានិគមនិយមបារាំងអី គឺថា ខ្ញុំសូមអភ័យទោសចំពោះព្រះអង្គ»។

សាក្សី សួង ស៊ីគឿន ថ្លែងថា អតីតព្រះមហាក្សត្រ សម្ដេចព្រះ នរោត្ដម សីហនុ ជាអ្នកមានស្មារតីស្រឡាញ់ជាតិមាតុភូមិដ៏ខ្ពង់ខ្ពស់មួយព្រះអង្គ ក្នុងចំណោមអ្នកដឹកនាំខ្មែរគ្រប់សម័យ៖ «ចំពោះសម្ដេចព្រះ នរោត្ដម សីហនុ ខ្ញុំយល់ឃើញថា ព្រះអង្គប្រកាន់នៅស្មារតីនេះខ្ពង់ខ្ពស់ណាស់»។

ក្រៅពីនេះ សាក្សី សួង ស៊ីគឿន ក៏បានសរសើរដល់សម្ដេច ប៉ែន នុត ដែលជំនួយការរបស់អង្គ និងជនជាប់ចោទ ខៀវ សំផន លោក ហ៊ូ យន់ និង ហ៊ូ នឹម។

សហចៅក្រមអន្តរជាតិ លោក ហ្សង់ ម៉ាកឡាវ៉ែញ បានព្យាយាមសួរដេញដោលសាក្សី សួង ស៊ីគឿន ចង់ដឹងថា តើធ្លាប់មានទំនាស់គ្នារឿងទស្សនៈទេ រវាងសម្ដេចព្រះ នរោត្ដម សីហនុ ជាប្រមុខនៃរណសិរ្សរួបរួមជាតិកម្ពុជា និងក្រុមបក្សកុម្មុយនិស្តកម្ពុជា ដែលដឹកនាំដោយ ប៉ុល ពត។

សាក្សី សួង ស៊ីគឿន ថ្លែងថា បញ្ហារកាំរកូសផ្ទៃក្នុងពិតជាមាន នៅក្នុងអំឡុងពេលតស៊ូប្រឆាំងនឹងរបបលោកសេនាប្រមុខ លន់ នល់។ ក៏ប៉ុន្តែ គាត់មិនបញ្ជាក់ពីបញ្ហាជាក់លាក់អ្វីទេ ដោយគ្រាន់តែថ្លែងថា ចំពោះបញ្ហាធំរបស់ប្រទេសជាតិ គឺភាគីទាំងពីរ មានទស្សនៈស្របគ្នា។

សាក្សី សួង ស៊ីគឿន រំឭកឡើងវិញថា កាលពីឆ្នាំ ១៩៧៣ មានសន្និសីទសន្តិភាពមួយ នៅទីក្រុងប៉ារីស ដើម្បីចរចាគូជម្លោះ។ ប៉ុន្តែភាគីតស៊ូជំទាស់នឹងគោលបំណងនោះ៖ «ខ្ញុំចាំបានថា សម្ដេចព្រះ នរោត្ដម សីហនុ ព្រះអង្គក៏ឯកភាពនឹងជំហរនេះដែរ។ដូច្នោះលើបញ្ហាធំ ដែលជាអាយុជីវិតរបស់ប្រទេសជាតិនេះ គឺភាគីទាំងពីរយល់ឯកភាពគ្នា។ ពិតមែនហើយមានការដូចថា រកាំរកូស អាហ្នឹងជាបញ្ហាផ្ទៃក្នុង យើងមិនអាចបដិសេធបានទេ។ ប៉ុន្តែជារួមនៅពេលនោះ ចលនាតស៊ូឯកភាពគ្នាថា នឹងបន្តការតស៊ូដោយ មិនមានការចរចា មិនមានការសម្រុះសម្រួល ជាមួយសាធារណរដ្ឋខ្មែរ សេនាប្រមុខ លន់ នល់ ទេ»។

សាក្សី សួង ស៊ីគឿន ថ្លែងថា លោកមិនបានដឹងពីទស្សនៈរបស់សម្ដេច សីហនុ ពេលនោះទេ។ ចំណែកខាងក្រុមរបស់លោកវិញ គឺមានទស្សនៈថា ដើម្បីឱ្យប្រទេសរក្សាឯករាជភាព មានអធិបតីភាព ហើយប្រជាពលរដ្ឋមានជីវភាពថ្កុំថ្កើង ប្រទេសរីកចម្រើន គឺត្រូវតែប្រកាន់យកលទ្ធិសង្គមនិយម និងកុម្មុយនិស្ត។

សាក្សីទទួលស្គាល់ថា ការជ្រើសរើសតាមបែបនេះកន្លងមក គឺពិតជាមិនអាចទៅរួច ហើយបែកបាក់ជាតិទៀតផង៖ «ខ្ញុំយល់ថាយើងឯកភាពគ្នា មិនប្រកាន់យកផ្លូវដើរនេះទៀតទេ។ តាមខ្ញុំដឹងច្បាស់ សូមអស់លោកកុំខ្លាចថា ខ្មែរក្រហមវិលមកវិញនោះ កុំខ្លាចអី។ មិនមានទេ ព្រោះខ្មែរក្រហមឆ្អិនឆ្អៅ មោះមុត មិនមានគិតដូច្នោះទេ។ ព្រោះអី? ព្រោះផ្លូវដែលដើរមកនេះ វាខ្លោចផ្សាឈឺចាប់ណាស់ ហើយមនុស្សដូចថា ឆ្មាដែលវារលាកទឹកក្ដៅម្ដងហើយ គ្រាន់តែទឹកត្រជាក់ក៏វាខ្លាចដែរ»។

ទាក់ទងនឹងការបែកបាក់ជាតិនេះដែរ លោក សួង ស៊ីគឿន បន្តថា នៅយុគសម័យពេលតស៊ូនោះ ទស្សនៈរបស់ខ្មែរកុម្មុយនិស្ត គឺត្រូវតែមានទស្សនៈក្រហម និងជំនាញ។ អ្នកដែលមានទស្សនៈផ្ទុយពីនេះ មិនអាចចុះសម្រុងនឹងគ្នាទេ។

លោក សួង ស៊ីគឿន ជម្រាបចៅក្រមថា ទីបំផុត លោកបានរស់រហូតមកដល់សព្វថ្ងៃនេះ គឺដោយសារតែវេជ្ជបណ្ឌិតឈ្មោះ គឹម វៀន ដែលធ្លាប់ជាសត្រូវនយោបាយ ជួយវះកាត់ជំងឺបេះដូងឱ្យលោក។ សវនាការស្ដាប់ចម្លើយរបស់លោក សួង ស៊ីគឿន នឹងបន្តធ្វើទៅថ្ងៃទី ៩ សីហាទៀត៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

អត្ថបទដែលទាក់ទង

មតិ (3)

ចុចត្រង់នេះដើម្បីបន្ថែមយោបល់របស់អ្នក

អ្នកអានអនាមិក

Some people from outside Cambodia do not really know the real situation of Cambodia. The King ( Sihanouk ) always serves his country and he tried very hard to avoid his country from the war. The ones destroyed my country are American and Communism ( included Vietnamese and Chinese communists ). During the Vietnamese war, the King kept Cambodia in neutral but can not neutral 100 %, if he did supported the Vietnamese communist, they against Sihanouk from the beginning. That is 100% true, but when the King supported VN Communitist, American regime at that time was not happy with the King, so why American support Lon Nol to against the King. Recently, some ones blame the King Sihanouk. That idea is not justice for Our King Sihanouk.

Aug 11, 2012 06:52 PM

John

ពី London

If Sihanouk is a good king and love his people then why don’t he offer himself in the witness box?. 1.7 millions Khmer died, isn’t that enough for him to say something that he was part of it at the time? I don’t really believe what these Tom, Dick and Harry said about him or those top men in KR regime, they all sat at the same table ate the same foods but none of them wanted to pay the bill.

Aug 08, 2012 03:08 PM