នៅក្នុងសវនាការពេលព្រឹកថ្ងៃទី១៨ ខែមេសា ឆ្នាំ២០១២ ជនជាប់ចោទ នួន ជា បានបដិសេធសក្ខីកម្មរបស់សាក្សី កាំង ហ្កេកអ៊ាវ ហៅ ឌុច ដែលជាអតីតប្រធានគុកទួលស្លែង។
ការបដិសេធនេះ ត្រូវបានជនជាប់ចោទ នួន ជា ប្រកាសក្នុងសវនាការតាមរយៈការអានសេចក្ដីថ្លែងការណ៍ខ្លីមួយ ដែលគាត់បានគ្រោងទុកតាំងពីសប្ដាហ៍មុន៖ «ខ្ញុំសូមប្រកាសជូនបងប្អូនប្រជាជនខ្មែរទាំងអស់ថា ខ្ញុំមិនដែលមានពេលណាមួយទទួលខុសត្រូវលើមន្ទីរ ស-២១ នោះទេ»។
ការបដិសេធរបស់ជនជាប់ចោទ នួន ជា នេះ គឺជាការថ្លែងបញ្ជាក់ជាបន្ថែមទៀត ដែលកន្លងមកមានចោទប្រកាន់ថា គាត់មានតួនាទីពាក់ព័ន្ធទៅនឹងការងារយោធា និងសន្តិសុខ ជាពិសេស គឺការងាររបស់មន្ទីរសន្តិសុខ ស-២១ ឬគុកទួលស្លែង។
ក្នុងសវនាការកាលពីពីរសប្ដាហ៍កន្លងទៅនេះ អតីតប្រធានគុកទួលស្លែង គឺ កាំង ហ្កេកអ៊ាវ ហៅ ឌុច បានផ្ដល់សក្ខីកម្មដល់អង្គជំនុំជម្រះសាលាដំបូងថា ជនជាប់ចោទ នួន ជា ជាមេរបស់គាត់ផ្ទាល់ ក្នុងប្រតិបត្តិការការងារសួរចម្លើយ និងសម្រេចសម្លាប់អ្នកទោស នៅគុកនោះ៖ «ស-២១ បើនិយាយពីបិទទ្វាពិបាកនិយាយណាស់។ បើនិយាយអំពីបញ្ជាបង នួន ឱ្យកម្ទេចមនុស្សឱ្យអស់ គឺប្រហែលនៅថ្ងៃ៣ ខែមករា ឆ្នាំ១៩៧៩។ ម៉ោង ១១ រថក្រោះវៀតណាម មកដល់មុខផ្ទះខ្ញុំ។ ម៉ោង ៣ យើងខ្ញុំចេញពី ស-២១ ទៅសាលាសន្សំកុសល។ អត់មានបិទទ្វាទេ គឺរត់ចេញតែម្ដង។ មេរត់ចោលបាត់»។
សាក្សី ឌុច បានបញ្ជាក់ថា គាត់ចាប់ផ្ដើមទាក់ទងធ្វើការការងារ និងបញ្ជូនចម្លើយសារភាពអ្នកទោសនៅមន្ទីរ ស-២១ ឱ្យជនជាប់ចោទ នួន ជា ពិនិត្យសម្រេច ចាប់តាំងពីខែសីហា ឆ្នាំ១៩៧៧ រហូតដល់ថ្ងៃរត់ចេញពីទីក្រុងភ្នំពេញ នៅខែមករា ឆ្នាំ១៩៧៩។
ជនជាប់ចោទ នួន ជា ថ្លែងថា គាត់មិនដែលទទួលឯកសារអ្វីមួយពី ឌុច ទេ ហើយក៏មិនមែនជាមេកើយរបស់ ឌុច ដែរ។ គាត់បន្តថា ឌុច ជាមនុស្សពូកែវោហារតាមរយៈសវនាការកន្លងមក៖ «ឌុច មានការភ័ន្តច្រឡំវិលវល់ មិនអាចកំណត់ចំណារឱ្យច្បាស់លាស់នោះ គាត់កែឆ្នៃចំណាររបស់ ប៉ុល ពត ថា ជារបស់ខ្ញុំ។ ខ្ញុំសុំស្នើអង្គជំនុំជម្រះច្រានចោលនូវការចោទប្រកាន់ទាំងប៉ុន្មានរបស់ ឌុច មកលើរូបខ្ញុំ»។
គាត់ថា ប្រសិនបើ ឌុច មានចំណារ បញ្ជាក់ថាជារបស់គាត់ពិតមែននោះ គាត់សុំឱ្យ ឌុច យកមកបង្ហាញគាត់ក្នុងអង្គសវនាការទាំងមូល។
ក្រោយការអានសេចក្ដីថ្លែងការណ៍ចប់ ជនជាប់ចោទ នួន ជា រក្សាសិទ្ធិមិនឆ្លើយតបសំណួររបស់ភាគីណាមួយ ដែលចង់សួរបញ្ជាក់ទៅគាត់វិញទេ។ ចំពោះសំណួររបស់ចៅក្រមជំនុំជម្រះ គាត់សុំពិភាក្សាជាមួយមេធាវីរបស់គាត់សិន ហើយគាត់នឹងឆ្លើយតបវិញពេលក្រោយ។
បន្ទាប់ពីការរក្សាសិទ្ធិមិនឆ្លើយតបសំណួររបស់ភាគី សវនាការនៅថ្ងៃទី ១៨ មេសា បានបន្តដោយការស្ដាប់សក្ខីកម្មរបស់សាក្សីឈ្មោះ សូ ទឿង ដែលជាអតីតកងការពារជនជាប់ចោទ នួន ជា មួយរូប។
សវនាការស្ដាប់សាក្សីរូបនេះ បន្តធ្វើនៅថ្ងៃទី១៩ ខែមេសា ទៀត៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។