សាលា​ក្ដី​ខ្មែរ​ក្រហម​ធ្វើ​សវនាការ​លើ​រឿង​ដោះ​លែង​ជន​ជាប់​ចោទ អៀង ធីរិទ្ធ

នៅ​ថ្ងៃ​អង្គារ ទី១៣ វិច្ឆិកា ឆ្នាំ​២០១២ តុលាការ​កំពូល​នៃ​សាលាក្ដី​ខ្មែរក្រហម បាន​បើក​សវនាការ​លើ​បណ្ដឹង​សាទុក្ខ​មួយ​របស់​សហ​ព្រះរាជ​អាជ្ញា ប្រឆាំង​នឹង​លក្ខខណ្ឌ​ដោះ​លែង​ជន​ជាប់​ចោទ អៀង ធីរិទ្ធ។
ដោយ ឡេង ម៉ាលី
2012-11-14
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
អៀង ធីរិទ្ធ ៣០៥
១៩-តុលា-២០១១៖ ជន​ជាប់​ចោទ អៀង ធីរិទ្ធ នៅ​ក្នុង​សវនាការ​នៃ​សាលាក្ដី​ខ្មែរ​ក្រហម។
Photo courtesy of ECCC

ភាគី​សហ​ព្រះរាជ​អាជ្ញា ទាម​ទារ​ឱ្យ​តុលាការ​កំពូល​ពិចារណា​ឡើង​វិញ អំពី​សេចក្ដី​សម្រេច​នេះ។

សវនាការ​របស់​តុលាការ​កំពូល នៅ​ថ្ងៃ​ទី១៣ វិច្ឆិកា គឺ​ធ្វើ​ឡើង​ដើម្បី​ស្ដាប់​ការ​វែកញែក​ផ្ទាល់​មាត់​បន្ថែម​ទៀត ពី​ភាគី​សហ​ព្រះរាជ​អាជ្ញា ដែល​ប្ដឹង​ទាស់​នឹង​សេចក្ដី​សម្រេច​ដោះ​លែង​ជន​ជាប់​ចោទ អៀង ធីរិទ្ធ កាល​ពី​ថ្ងៃ​ទី១៣ ខែ​កញ្ញា ឆ្នាំ២០១២។

ប្រធាន​អង្គ​ជំនុំ​ជម្រះ​តុលាការ​កំពូល លោក​ចៅក្រម គង់ ស្រ៊ីម ថ្លែង​ថា សវនាការ​គឺ​ផ្ដោត​ការ​ពិភាក្សា​សំខាន់​ជា​សាធារណៈ​តែ​លើ​រឿង​លក្ខខណ្ឌ​ដោះ​លែង​ទេ។

ក្រោយ​ការ​វាយ​តម្លៃ​សុខភាព​ជន​ជាប់​ចោទ អៀង ធីរិទ្ធ ឡើង​វិញ កាល​ពី​ថ្ងៃ​ទី១៣ ខែ​កញ្ញា ឆ្នាំ​២០១២ សាលា​ដំបូង​បាន​សម្រេច​ដោះ​លែង​គាត់ ដោយ​យល់​ឃើញ​ថា គាត់​ពុំ​មាន​សម្បទា​បញ្ញា​ស្មារតី​គ្រប់គ្រាន់ ដោយ​សារ​តែ​គាត់​មាន​ជំងឺ​វង្វេងវង្វាន់​ដែល​ទំនង​ជា​ជំងឺ​បាត់​ការ​ចងចាំ ឬ​ហៅ​ថា Alzheimer។

សាលា​ដំបូង​កត់​សម្គាល់​ថា ដោយ​សារ​ស្ថានភាព​ជំងឺ​នេះ ជន​ជាប់​ចោទ អៀង ធីរិទ្ធ ទំនង​ពុំ​អាច​ផ្ដល់​សក្ខីកម្ម​នៅ​ក្នុង​តុលាការ​បាន​ទេ ហើយ​បាន​ផ្អាក​នីតិវិធី​ដោយ​មិន​កំណត់​រយៈ​ពេល។ បន្ថែម​លើ​ការ​ផ្អាក​នីតិវិធី​នេះ អង្គ​ជំនុំ​ជម្រះ​សាលា​ដំបូង​បង្គាប់​ឱ្យ​ដោះ​លែង​ជន​ជាប់​ចោទ អៀង ធីរិទ្ធ ដោយ​ឥត​លក្ខខណ្ឌ ដោយ​សម្អាង​ហេតុ​ផល​ថា ខ្លួន​មិន​មាន​មូលដ្ឋាន​ច្បាប់​ក្នុង​ការ​ដាក់​លក្ខខណ្ឌ​ដោយ​បង្ខំ ឬ​ដាក់​ក្រោម​ការ​ត្រួត​ពិនិត្យ​លើ​ជន​ជាប់​ចោទ​រូប​នេះ បន្ទាប់​ពី​ការ​ដោះ​លែង​រួច។

នៅ​ថ្ងៃ​ទី១៤ ខែ​កញ្ញា ឆ្នាំ​២០១២ គឺ​មួយ​ថ្ងៃ​បន្ទាប់​ពី​ការ​ចេញ​សេចក្ដី​សម្រេច​របស់​សាលា​ដំបូង សហ​ព្រះរាជ​អាជ្ញា បាន​ប្ដឹង​សាទុក្ខ​ប្រឆាំង​នឹង​ដីកា​ដោះ​លែង​នោះ ហើយ​បាន​ស្នើសុំ​អង្គ​ជំនុំ​ជម្រះ​តុលាការ​កំពូល ឱ្យ​ផ្អាក​ការ​អនុវត្ត​ដីកា​ដោះ​លែង​នេះ​សិន។ សហ​ព្រះរាជអាជ្ញា​ជាតិ កញ្ញា សុង ឆវ័ណ ចាត់​ទុក​សេចក្ដី​សម្រេច​នោះ​ថា​មាន​កំហុស។

មេធាវី​ការពារ​ក្ដី​ជន​ជាប់​ចោទ អៀង ធីរិទ្ធ គឺ​លោក ផាត់ ពៅស៊ាង ថ្លែង​ថា បាន​ស្នើសុំ​ឱ្យ​អង្គ​ជំនុំ​ជម្រះ បដិសេធ​បណ្ដឹង​សាទុក្ខ​របស់​សហ​ព្រះរាជ​អាជ្ញា ដោយ​ចាត់​ទុក​ថា សេចក្ដី​សម្រេច​នោះ​មិន​មាន​កំហុស​ទេ ទាំង​អង្គហេតុ និង​អង្គ​ច្បាប់ ហើយ​ក៏​មិន​ប៉ះពាល់​សិទ្ធិ​របស់​ដើម​បណ្ដឹង​ដែរ។

ក្នុង​បណ្ដឹង​សាទុក្ខ​របស់​សហ​ព្រះរាជ​អាជ្ញា បាន​ស្នើសុំ​ឱ្យ​ដាក់​ជន​ជាប់​ចោទ​ក្រោម​ការ​ត្រួត​ពិនិត្យ​របស់​តុលាការ និង​មាន​លក្ខខណ្ឌ​ចំនួន ៦​ចំណុច គឺ​ត្រូវ​ស្នាក់​នៅ​ក្នុង​លំនៅឋាន​ជាក់​លាក់​មួយ និង​ប្រាប់​អំពី​អាសយដ្ឋាន ឬ​ត្រូវ​បង្ហាញ​ខ្លួន​មួយ​សប្ដាហ៍​ម្ដង ដើម្បី​ឱ្យ​អាជ្ញាធរ ឬ​ក៏​មន្ត្រី​ផ្លូវ​ការ ដែល​ចាត់​តាំង​ដោយ​សាលា​ដំបូង ពិនិត្យ​ពី​សុវត្ថិភាព ហើយ​ឱ្យ​គាត់​ប្រគល់​លិខិត​ឆ្លង​ដែន និង​អត្តសញ្ញាណ​ប័ណ្ណ​របស់​គាត់ ហើយ​មិន​ត្រូវ​ទាក់​ទង​ភាគី​ផ្សេងៗ​ទាក់​ទង​ជាមួយ​នឹង​សំណុំ​រឿង ដូចជា​សាក្សី និង​អ្នក​ជំនាញ​ដើម​បណ្ដឹង​រដ្ឋប្បវេណី លើក​លែង​តែ​ស្វាមី​របស់​គាត់ គឺ​លោក អៀង សារី និង​ទី៦ គឺ​ត្រូវ​ឋិត​នៅ​ក្រោម​ការ​ត្រួត​ពិនិត្យ​របស់​ពេទ្យ ដែល​តុលាការ​បាន​ចាត់​តាំង ៦​ខែ​ម្ដង។

ក៏​ប៉ុន្តែ អង្គ​ជំនុំ​ជម្រះ​តុលាការ​កំពូល​យល់​ឃើញ​ថា ជា​ការ​ពុំ​ចាំបាច់​ត្រូវ​បន្ត​ឃុំ​ខ្លួន​ជន​ជាប់​ចោទ អៀង ធីរិទ្ធ នៅ​មន្ទីរ​ឃុំឃាំង​តទៅ​ទៀត​ទេ ទើប​នៅ​ថ្ងៃ​ទី១៦ ខែ​កញ្ញា ឆ្នាំ​២០១២ អង្គ​ជំនុំ​ជម្រះ​តុលាការ​កំពូល​សម្រេច​ដោះ​លែង​គាត់ ក្រោម​លក្ខខណ្ឌ​បណ្ដោះ​អាសន្ន​មួយ​ចំនួន គឺ​ទី១ ជន​ជាប់​ចោទ​ត្រូវ​ប្រាប់​ពី​កន្លែង​ដែល​គាត់​រស់​នៅ និង​សុំ​ការ​អនុញ្ញាត​ពី​តុលាការ​មុន​នឹង​ផ្លាស់​ប្ដូរ​លំនៅ។ ទី២ គឺ​មិន​ត្រូវ​ចាក​ចេញ​ពី​ប្រទេស​កម្ពុជា និង​ត្រូវ​ប្រគល់​លិខិត​ឆ្លង​ដែន​ទៅ​តុលាការ។ ទី៣ ត្រូវ​តែ​ចូល​ខ្លួន ពេល​តុលាការ​កោះ​ហៅ ហើយ​ជាង​នេះ​ទៀត ជន​ជាប់​ចោទ អៀង ធីរិទ្ធ ត្រូវ​បាន​ឃាត់​មិន​ឱ្យ​ជ្រៀតជ្រែក​ចូល​ក្នុង​កិច្ចការ​រដ្ឋបាល​របស់​តុលាការ​ឡើយ។

បន្ទាប់​ពី​បាន​ស្ដាប់​ការ​វែកញែក​របស់​ភាគី​ហើយ​ក្ដី អង្គ​ជំនុំ​ជម្រះ​តុលាការ​កំពូល​មិន​ទាន់​ចេញ​សេចក្ដី​សម្រេច​អ្វី​នៅ​ឡើយ​ទេ។ ប្រធាន​អង្គ​ជំនុំ​ជម្រះ​តុលាការ​កំពូល លោក​ចៅក្រម គង់ ស្រ៊ីម ប្រកាស​ថា អង្គ​ជំនុំ​ជម្រះ​តុលាការ​កំពូល នឹង​ចេញ​សេចក្ដី​សម្រេច​ជា​លាយលក្ខណ៍​អក្សរ​នៅ​ពេល​ណា​មួយ​ខាង​មុខ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (1)
  • បោះពុម្ព
  • ចែករំលែក
  • អ៊ីម៉ែល

អ្នក​អាន​អនាមិក

ពី USA

I would say, all about STUPIDITY; Eang Rithy must not be free!!! She is a deep criminal one!!!

Nov 14, 2012 08:23 AM