ទាហាន​នៅ​ព្រំដែន​រង​ការ​ចោទ​ថា​ពាក់ព័ន្ធ​នឹង​ការ​ជួញដូរ​កម្លាំង​ពលកម្ម

កង​ទាហាន​ខ្មែរ និង​កង​ទាហាន​ថៃ ដែល​ឈរ​ជើង​ការពារ​នៅ​តាម​ខ្សែ​ក្រវាត់​ព្រំដែន​ខ្មែរ-​ថៃ ត្រូវ​គេ​ចោទ​ថា បាន​ឃុបឃិត​គ្នា​ជួញដូរ​កម្លាំង​ពលកម្ម នាំ​ប្រជាពលរដ្ឋ​ខ្មែរ​ឆ្លង​ដែន​ខុស​ច្បាប់​ចូល​ទៅ​ក្នុង​ប្រទេស​ថៃ។
ដោយ សួន សុផលមុន្នី
2011-12-03
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល

សកម្មភាព​នេះ កំពុង​កើត​មាន​នៅ​តាម​ច្រក​របៀង​នានា កាត់​តាម​ខ្សែ​ក្រវាត់​ព្រំដែន​កម្ពុជា-​ថៃ ក្នុង​ខេត្ត​បន្ទាយមានជ័យ ខេត្ត​បាត់ដំបង ប្រទេស​កម្ពុជា និង​ខេត្ត​ស្រះកែវ ប្រទេស​ថៃ។

ប្រភព​ពី​ប្រជាពលរដ្ឋ​រស់​នៅ​តាម​តំបន់​ព្រំដែន​ដែល​សុំ​មិន​បញ្ចេញ​ឈ្មោះ បាន​ឲ្យ​ដឹង​នៅ​ថ្ងៃ​ទី​២ ខែ​ធ្នូ ថា ការ​នាំ​ពលរដ្ឋ​កម្ពុជា ពី​ទឹក​ដី​ខ្មែរ​ឆ្លង​ដែន​ចូល​ទឹក​ដី​ថៃ មាន​ចាប់​តាំង​ពី​ម៉ោង​១ និង​ម៉ោង ២​យប់​រំលង​អធ្រាត្រ និង​នៅ​ពេល​ទៀបភ្លឺ​ជា​រៀងរាល់​ថ្ងៃ។ ក្នុង​សកម្មភាព​ជួញដូរ​កម្លាំង​ពលកម្ម​ខុស​ច្បាប់​នេះ​មាន​ក្រុម​សមត្ថកិច្ច​ជា​កង​ទាហាន​ខ្មែរ​បាន​ជាប់​ពាក់ព័ន្ធ។ ពួកគេ​បាន​ដឹក​ជញ្ជូន​ជា​លក្ខណៈ​ជា​ទ្រង់ទ្រាយ​តូច​ធំ​ទាំង​យប់​ទាំង​ថ្ងៃ។

ប្រជាពលរដ្ឋ​មិន​បញ្ចេញ​ឈ្មោះ៖ «អ្នក​ដែល​ចូល​ទៅ​ជិត គឺ​គេ​យក ១.៥០០​បាត បើ​អ្នក​ទៅ​ឆ្ងាយ​ជាង​ហ្នឹង​មាន​តែ ១.៩០០ ទៅ ២.០០០​បាត។ ក្នុង​ម្នាក់​គេ​ហ្នឹង​គេ​ទាក់ទង​ត្រូវ​ជាមួយ​ទាហាន​ថៃ ត្រូវ​គ្នា​អ៊ីចឹង​ទៅ គេ​យក​ទាហាន​ថៃ ដឹក​កម្លាំង​ទៅ​ដែរ។ ខ្លះ​វា​នៅ​ក្នុង​កង​រយ ១៣០២ ខ្លះ​នៅ​ក្នុង​កងរយ ១៣០៣ សុទ្ធ​តែ​ជា​មេទ័ព​ដែល​ធ្លាប់​បង់​ឲ្យ​ទាហាន ទាហាន​ហ្នឹង​បង់​ឲ្យ​ទាហាន​គ្នា​វា​ដែរ»

នៅ​ពេល​ពលរដ្ឋ​ខ្មែរ​ចូល​ទៅ​ដល់​ក្នុង​ទឹក​ដី​ថៃ​ហើយ ក្រុម​អ្នក​ជួញដូរ​កម្លាំង​ពលកម្ម​ខុស​ច្បាប់ ទាំង​កង​ទាហាន​ខ្មែរ និង​កង​ទាហាន​ថៃ​នោះ បាន​ទាក់ទង​គ្នា​តាម​ទូរស័ព្ទ ដើម្បី​បណ្ដោះ​ពលរដ្ឋ​ដែល​ត្រូវ​គេ​ជួញដូរ​កម្លាំង​ពលកម្ម​ចេញ​ដោយ​ប្រុងប្រយ័ត្ន តាម​រថយន្ត​ថៃ ដែល​នៅ​ចាំ​ទទួល​នៅ​ក្នុង​ទឹក​ដី​ថៃ៖ «តំលៃ​វា​ទៅ​តាម​ផ្លូវ​ជិត​ផ្លូវ​ឆ្ងាយ កន្លែង​ខ្លះ ៦០០ កន្លែង​ខ្លះ ៧០០​បាត ក្នុង​មនុស្ស​ម្នាក់។ ប្រសិន​បើ​មាន​តម្រួត​នៅ​តាម​ផ្លូវ​វា​ដាក់​ឲ្យ​មនុស្ស​យើង​ដេក​នៅ​ក្នុង​ឡាន​ហើយ គេ​យក​ស្បៃ​ខៀវ​គ្រប ជួន​កាល​ដាក់​អីវ៉ាន់​គាប​ពី​លើ ហើយ​មនុស្ស​ដេក​តម្រៀប​គ្នា​ដូច​ជ្រូក ក្នុង​មួយ​ឡាន​អាច​បាន ១០​នាក់​ទៅ ១២​នាក់។ ខ្លះ ៧​នាក់ បើ​គ្នា​តិច​ដាក់​ជិះ​នៅ​ក្នុង​កាប៊ីន»

កង​ទាហាន​ខ្មែរ​ឈរ​ជើង​ការពារ​នៅ​តាម​ព្រំដែន​ខ្មែរ-​ថៃ បាន​បដិសេធ​មិន​ធ្វើ​អត្ថាធិប្បាយ​ជុំវិញ​ការ​ចោទ​ប្រកាន់​នេះ។ ចំណែក​ខាង​កងទាហាន​ថៃ ដែល​កំពុង​ឈរ​ជើង​ការពារ​នៅ​ខ្សែ​ក្រវាត់​ព្រំដែន​ក្នុង​ខេត្ត​ស្រះកែវ ប្រទេស​ថៃ ពុំ​អាច​ទាក់ទង​សុំ​សេចក្ដី​ប្រតិកម្ម​បាន​នោះ​ទេ។

ក្រុម​អ្នក​ភូមិ​ដែល​រស់​នៅ​តាម​តំបន់​ព្រំដែន​ខ្មែរ-​ថៃ ក្នុង​ស្រុក​សំពៅលូន បាន​ឲ្យ​ដឹង​ថា ប្រជាពលរដ្ឋ​ខ្មែរ​ជា​ច្រើន​នាក់​បាន​ទទួល​រងគ្រោះ​នៅ​ក្នុង​ទឹក​ដី​ថៃ។

អ្នក​ខ្លះ​ត្រូវ​អាជ្ញាធរ​ថៃ ចាប់​ខ្លួន អ្នក​ខ្លះ​ទៀត​ត្រូវ​​​គេ​វាយ​តប់ និង​ដាក់​ទណ្ឌកម្ម​ឲ្យ​ធ្វើការ​ជា​ទម្ងន់​រហូត​មាន​បញ្ជូន​ទៅ​ឃុំ​ខ្លួន​ក្នុង​ពន្ឋនាគារ​នៅ​ក្នុង​​ប្រទេស​ថៃ៖ «ទៅ​អ៊ីចឹង​ឲ្យ​លុយ​គេ​ម្នាក់ ២​ពាន់​បាត អត់​មាន​ការងារ​ធ្វើ​គេ​អត់​ឲ្យ​លុយ​វិញ ហើយ​ត្រឡប់​មក​ផ្ទះ​វិញ ក៏​មាន​ដែរ​ជួនកាល​ថៃ ចាប់​យក​លុយ​យក​កាក់​គាត់​អស់​ក៏​មាន»

លោក ហេង សាយហុង មន្ត្រី​ឃ្លាំមើល​ការ​រំលោភ​សិទ្ធិ​មនុស្ស​របស់​អង្គការ​លីកាដូ ប្រចាំ​ខេត្ត​បាត់ដំបង។ លោក​បាន​និយាយ​ថា សកម្មភាព​ជួញដូរ​កម្លាំង​ពលកម្ម​ឆ្លង​ដែន​ខុស​ច្បាប់​ទៅ​ក្នុង​ប្រទេស​ថៃ មាន​សន្ទុះ​កើន​នៅ​ចុង​ឆ្នាំ​២០១១។ ការ​កម្រើក​ឡើង​នូវ​សកម្មភាព​ជួញដូរ​កម្លាំង​ពលកម្ម​មនុស្ស​នេះ គឺ​បន្ទាប់​ពី​ប្រទេស​កម្ពុជា និង​ប្រទេស​ថៃ ឈប់​មាន​ជម្លោះ​តានតឹង​ដាក់​គ្នា​នៅ​តាម​តំបន់​ព្រំដែន។ ជាមួយ​គ្នា​នេះ មន្ត្រី​អង្គការ​សិទ្ធិ​មនុស្ស​បាន​ថ្លែង​រិះគន់​ថា កង​ការពារ​ព្រំដែន​ខ្មែរ-​ថៃ គួរ​រួម​គ្នា​ទប់​ស្កាត់​លំហូ​ឆ្លងដែន​ខុស​ច្បាប់។

លោក ហេង សាយហុង៖ «ព្រោះ​តួនាទី​របស់​យោធា​មាន​តែ​ការពារ​ព្រំដែន​តែ​ប៉ុណ្ណឹង​ទេ រឿង​នាំ​មនុស្ស​ខុស​ច្បាប់​ផ្ដល់​មធ្យោបាយ​សម្រួល​ឲ្យ​មនុស្ស​ឆ្លង​ខុស​ច្បាប់​អ៊ីចឹង​មិន​ត្រឹមត្រូវ​ទេ។ ថ្ងៃ​ក្រោយ​មាន​បញ្ហា​នៅ​ស្រុក​គេ វា​រឿង​មួយ​ខុស​ច្បាប់​កាន់​តែ​ធ្វើ​ទុក្ខ​ទោស​ថែម​លើ​ហ្នឹង​ទៀត អ៊ីចឹង​គប្បី​អាជ្ញាធរ​នៅ​តំបន់​ហ្នឹង​ពិចារណា​ឡើង​វិញ»

របាយការណ៍​របស់​អង្គការ​លីកាដូ បាន​ឲ្យ​ដឹង​ថា នៅ​ចុង​ឆ្នាំ​២០១១ នេះ មាន​ប្រជាពលរដ្ឋ​ខ្មែរ​ចំនួន ៣៨​នាក់ ត្រូវ​បាន​សមត្ថកិច្ច​ប៉ូលិស​ប្រឆាំង​ការ​ជួញដូរ​ក្នុង​ខេត្ត​បាត់ដំបង ជួយ​សង្គ្រោះ​រួច​ផុត​ពី​ការ​ជួញដូរ​កម្លាំង​ពលកម្ម​ទៅ​ក្នុង​ប្រទេស​ថៃ។ ក្នុង​នោះ​ដែរ​មាន​មេខ្យល់​ចំនួន​បី​នាក់​ត្រូវ​បាន​ចាប់​ឃុំ​ខ្លួន​នៅ​ក្នុង​ពន្ធនាគារ​ខេត្ត​បាត់ដំបង៕

មតិ (2)
  • បោះពុម្ព
  • ចែករំលែក
  • អ៊ីម៉ែល

អ្នក​អាន​អនាមិក

Human trafficking is a International crime against humanity.The army of both countries are committing of the most serious offense especially Kampuchea army.On the Thai side they get both benefits: money and free labor.Blind man Hun Sen he never know of what happen at the border.All he worries now a day about his money at the international bank, under his bed and under his wife underwear.

Dec 03, 2011 10:45 AM

អ្នក​អាន​អនាមិក

តួនាទីរបស់យោធាកម្ពុជា គឺការពារតំណែងរបស់ ហ៊ុន សែន!

Dec 03, 2011 07:31 AM