ជម្លោះដីធ្លីរវាងអ្នកភូមិនិងក្រុមយោធានៅស្រុកភ្នំស្រួច ខែត្រកំពង់ស្ពឺ
ដោយ អ៊ុក សាវបូរី
2008-07-08
អ្នកភូមិទឹកចេញ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ ឲ្យដឹងថាក្រុមយោធាតំបន់អភិវឌ្ឍន៍អគ្គបញ្ជាការក្នុងភូមិចម្ការចេក កំពុងតែបង្កជម្លោះដីធ្លីជាមួយប្រជាជនក្នុងពេលយុទ្ធនាការឃោសនាកំពុងតែប្រព្រឹត្ត ។
ស្រ្តីរស់នៅភូមិទឹកចេញ ឈ្មោះ ផន សុផាត បានអះអាងថានៅថ្ងៃទី៧ ខែកក្កដា ក្រុមយោធាតំបន់អភិវឌ្ឍន៍អគ្គបញ្ជាការក្នុងភូមិចម្ការចេកនោះប្រដាប់ដោយអាវុធប្រមាណ២៥នាក់ បានមកជីកបោះបង្គោលលើដីគាត់ ហើយបង្ខំឲ្យរុះរើផ្ទះចេញពីដីកំពុងរស់នៅ ។
អ្នកស្រី ផន សុផាត បានឲ្យដឹងថា ៖ «បើមិនយកពន្ធយកដីទាំងអស់ មានអីនៅ យកដីតែម្ដងបានអីនៅ បើគណបក្សប្រជាជនធ្វើអ៊ីចឹង ។ ហើយឥឡូវខ្ញុំអស់ជំនឿបោះឆ្នោតឲ្យគណបក្សប្រជាជនហើយ ព្រោះខ្ញុំខាងគណបក្សប្រជាជនយូរហើយហ្នឹង» ។
ប្រធានក្រុមគណបក្សប្រជាជនកម្ពុជានៅភូមិទឹកចេញសុំមិនប្រាប់ឈ្មោះ បានអះអាងថាដីនិងផ្ទះរបស់គាត់ក៏ត្រូវក្រុមយោធាតំបន់អភិវឌ្ឍន៍អគ្គបញ្ជាការជីកបង្គោលព័ទ្ធយកដីដែរ ។ លោកថាសប្តាហ៍មុនផ្ទះឈើមួយខ្នងទំហំ ៧ គុណនឹង ៨ម៉ែត្រ របស់គ្រួសារ ព្រាប សាមិត្ត ត្រូវក្រុមយោធានោះរុះរើចេញពីដី ។
លោកថានៅពេលដែលសកម្មភាពឃោសនារកសន្លឹកឆ្នោតរបស់គណបក្សប្រជាជនកម្ពុជា ប្រកាសមិនយកពន្ធលើដីស្រែចម្ការ ប៉ុន្តែយោធាបែរជាព័ទ្ធយកដីនិងបង្ខំរុះរើផ្ទះចេញពីដីកំពុងរស់នៅទាំងស្រុងដូច្នេះ ។ ទង្វើនេះនាំឲ្យគាត់មានកង្វល់រឿងសន្លឹកឆ្នោតគណបក្សប្រជាជនកម្ពុជា នៅពេលបោះឆ្នោតជិតមកដល់នេះ ។
ប្រធានក្រុមគណបក្សប្រជាជនកម្ពុជានៅភូមិទឹកចេញបានបញ្ជាក់ថា ៖ «ខ្ញុំគណបក្សប្រជាជនដែរ ក៏ប៉ុន្តែឥឡូវខ្ញុំអស់ជំនឿនឹងគណបក្សប្រជាជនហើយ ព្រោះថាគណបក្សប្រជាជននេះភាគច្រើនណាស់ដើរតែរំលោភដីធ្លីអ៊ីចេះអ៊ីចុះ ឃុបឃិតតែគ្នាឯងហ្នឹង ប៉ុន្មានសាមុនហ្នឹងក៏ឃុបឃិតគ្នាលក់ដីលក់ធ្លី ២៩០០ហិកតាតាំងពីសម័យ អ៊ូ ប៊ុន កាត់ឲ្យ» ។
ប្រធានភូមិទឹកចេញ លោក ជា ឈឿន អះអាងថាភូមិនោះបានកកើតជាង១៤ឆ្នាំមកហើយ ។ នៅឆ្នាំ១៩៩៣ យោធាបានប្រគល់ដីច្រើនរយហិកតាមកឲ្យអាជ្ញាធរបង្កើតជាភូមិទឹកចេញ និងមានការទទួលស្គាល់ប្រជាជនរស់នៅស្របច្បាប់ ។ ស្រាប់តែព្រឹកមិញនេះយោធាមកវាស់បោះបង្គោលប៉ះផ្ទះអ្នកភូមិ និងឲ្យរុះរើចេញពីដី ។ គាត់ជួយអន្តរាគមន៍ដោយខ្លាចប៉ះពាល់សន្លឹកឆ្នោតគណបក្សកំពុងឃោសនា ។
លោក ជា ឈឿន បានមានប្រសាសន៍ថា ៖ «នៅក្នុងសកម្មភាពគឺបានន័យថាឲ្យចុះខ្សោយកម្លាំងដែលខ្ញុំកំពុងដំណើរការទៅមុខ ធ្វើឲ្យចុះថយមកវិញ ។ គណបក្សប្រជាជនតែម្ដងដែលរុះរើផ្ទះសម្បែងប្រជាពលរដ្ឋ» ។
មន្រ្តីជាន់ខ្ពស់យោធាតំបន់អភិវឌ្ឍន៍អគ្គបញ្ជាការ លោក ម៉ម ឈៀង មានប្រសាសន៍ថាខាងយោធាបានចរចាជាមួយអាជ្ញាធរស្រុកនិងតំណាងរាស្រ្តគណបក្សប្រជាជនកម្ពុជានៅព្រឹកថ្ងៃច័ន្ទនេះ ។
លោក ម៉ម ឈៀង បានឲ្យដឹងថា ៖ «ឯកឧត្ដម លី សុង ក៏គាត់ដឹង អភិបាលស្រុកភ្នំស្រួចក៏គាត់ដឹង ។ ខ្ញុំមកធ្វើរបងបន្ទាយហ្នឹង ហើយផ្ទះហ្នឹងផ្ទះកូនចៅ អត់អីទេ...» ។
ចំណែកអភិបាលរងស្រុកភ្នំស្រួច លោក ពេជ ចាន់ថា អះអាងថាគ្មានការបណ្តេញនិងរុះរើផ្ទះចេញពីដីឡើយនៅព្រឹកថ្ងៃច័ន្ទ ទី៧ កក្កដានេះ ។
ចំណែកអភិបាលស្រុកភ្នំស្រួច លោក ទេព មាន មានប្រសាសន៍ថាជនរងគ្រោះគួរដាក់ពាក្យប្តឹងទៅតុលាការប្រសិនបើមានប្លង់កាន់កាប់ដីធ្លី ៕
ឧបករណ៍រឿង
|
ស្តាប់សំឡេង |
|
ថតសំឡេង |
|
អ៊ីម៉េល |
|
ព្រឹត្តិបត្រព័ត៌មាន |
|
បោះពុម្ព |
អត្ថបទដែលទាក់ទង
ពលរដ្ឋសហគមន៍ក្រុម៧៨មិនព្រមទទួលយកសំណងក្នុងការចាកចេញពីលំនៅ
ចាងហ្វាងកាសែតម្នាក់ត្រូវបានឃុំខ្លួនពីបទរំលោភដីរបស់សេដ្ឋីមួយរូប
ទំនាស់ដីធ្លីរវាងពលរដ្ឋនិងក្រុមហ៊ុននៅស្រុកស្នួល ខែត្រក្រចេះ
ពលរដ្ឋនៅតំបន់បឹងកក់ព្រួយបារម្ភថានឹងត្រូវគេជម្លៀសចេញដោយគ្មានសំណងសមរម្យ
ពលរដ្ឋនៅក្រុងព្រះសីហនុគ្រោងដាក់ពាក្យប្ដឹងមកខុទ្ទកាល័យនាយករដ្ឋមន្រ្តីស្ដីពីបញ្ហាដីធ្លី
អ្នកភូមិ៣៣គ្រួសារនៅស្រុកស្ទឹងត្រង់ ខែត្រកំពង់ចាម បារម្ភពីការបាត់បង់លំនៅ
កម្លាំងយោធាបាញ់រះលើពលរដ្ឋ៥០នាក់ក្នុងជម្លោះដីនៅបាត់ដំបង
ប្រធានសណ្ឋាគាររណសិរ្សប្រឈមមុខនឹងការបណ្ដេញចេញ
ជម្លោះដីធ្លីនៅស្រុកសំឡូត ខេត្តបាត់ដំបង ឈានដល់ការផ្ទុះអាវុធ
បុរសម្នាក់ត្រូវបានចាប់ខ្លួនក្នុងទំនាស់ដីធ្លីនៅខណ្ឌព្រៃនប់ ក្រុងព្រះសីហនុ
