ពលរដ្ឋនៅកំពង់ចាមមកតវ៉ារឿងដីធ្លីដល់ផ្ទះនាយករដ្ឋមន្ត្រី
ដោយ អ៊ុក សាបូរី
2008-07-17
មនុស្សក្មេងចាស់ប្រមាណ១០០នាក់មកពីស្រុកស្ទឹងត្រង់ ខេត្តកំពង់ចាម តវ៉ានៅមុខផ្ទះនាយករដ្ឋមន្រ្តីខ្មែរឯខេត្តកណ្តាល កាលពីព្រឹកថ្ងៃព្រហស្បតិ៍ ទី១៧ ខែកក្កដា សុំឲ្យជួយអន្តរាគមន៍ពីការបង្ខំដេញពលរដ្ឋចេញពីដីចម្ការកៅស៊ូបឹងកេតដោយក្រុមហ៊ុនថ្មីមួយ ។
អ្នកយកព័ត៌មានវិទ្យុអាស៊ីសេរីសម្ភាសអ្នកតវ៉ារឿងដីធ្លីមកពីខែត្រកំពង់ចាម កាលពីថ្ងៃ១៧ កក្កដា ២០០៨ ។
ក្រុមអ្នកតវ៉ាមកពីឃុំព្រែកកក់ ស្រុកស្ទឹងត្រង់ អះអាងថាក្រុមហ៊ុន ឡុង ស្រេង អន្តរជាតិ ទើបបានទទួលឲ្យវិនិយោគបន្តពីក្រុមហ៊ុនរដ្ឋចម្ការកៅស៊ូបឹងកេត ចាប់ពីដើមឆ្នាំ២០០៨មក ។ ក្រុមហ៊ុន ឡុង ស្រេង អន្តរជាតិនោះ មិនទទួលស្គាល់ព្រំដីដាំដុះរបស់អ្នកភូមិ៣ឃុំ ក្នុងស្រុកស្ទឹងត្រង់ ដូចអង្គភាពរដ្ឋចម្ការកៅស៊ូបឹងកេតឡើយ មិនតែប៉ុណ្ណោះមកបង្ខំឈូសផ្ទះនិងដើមកៅស៊ូឯកជន ដើមស្វាយចន្ទី ចម្ការផ្លែឈើទៀតផង រហូតមានអន្តរាគមន៍ពីមន្រ្តីខុទ្ទកាល័យនាយករដ្ឋមន្រ្តី ចុះទៅស៊ើបអង្កេត នៅខែឧសភា ។ ប៉ុន្តែការដោះស្រាយមិនទាន់មានផងស្រាប់តែខាងក្រុមហ៊ុនថ្មីនោះ បង្ហាញដីកាតុលាការឲ្យប្រជាជនរុះរើចេញពីដីទើបពួកគាត់នាំគ្នាមកសុំជំនួយអន្តរាគមន៍ពីប្រមុខរដ្ឋាភិបាល ។
អ្នកតវ៉ាម្នាក់បានឲ្យដឹងថា ៖ «តុលាការគេចេញដីកាថា ដីដែលពាក់ព័ន្ធជាមួយដីក្រុមហ៊ុន ហេង ឡុង ដល់បោះឆ្នោតហើយ គេនឹងទៅឈូសឆាយចោលហើយ ហើយដីប្រជាជនដែលមានកៅស៊ូមានអីក៏អ៊ីចឹងដែរ គេគំរាមថាតែបោះឆ្នោតហើយគេយកអាត្រាក់ទៅឈូសរុញចោលអស់ហើយ» ។
មេភូមិអូរចក ឃុំព្រែកកក់ លោក ស្រួច ឈួន មានប្រសាសន៍ថាទាំងប្រជាជននិងអាជ្ញាធរត្រូវឆ្មាំក្រុមហ៊ុនបង្ខំបណ្តេញចេញនិងបង្ខំឈូសឆាយដំណាំដែលបេះផលលក់រាល់រដូវ យ៉ាងហោចមួយគ្រួសារ៥០០ទៅ១ពាន់ដុល្លារ ។
តំណាងអ្នកតវ៉ាក្រោយចូលជួបខុទ្ទកាល័យនាយករដ្ឋមន្រ្តី នៅព្រឹកថ្ងៃព្រហស្បតិ៍ ទី១៧ ខែកក្កដា លោក អាន ណារិទ្ធ ឲ្យដឹងថាមន្រ្តីខុទ្ទកាល័យនាយករដ្ឋមន្រ្តីសន្យាដោះស្រាយក្រោយបោះឆ្នោត ហើយសន្យាមិនឲ្យក្រុមហ៊ុន ឡុង ស្រេង អន្តរជាតិ គំរាមបណ្តេញអ្នកភូមិទៀតឡើយ ។
វិទ្យុអាស៊ីសេរីមិនអាចសុំការបំភ្លឺពីតំណាងក្រុមហ៊ុន ឡុង ស្រេង អន្តរជាតិ បានភ្លាមៗទេ លើការចោទប្រកាន់ខាងលើនេះ ។
ឯមេឃុំព្រែកកក់ លោក អៀត គឹមលាង ប្រាប់វិទ្យុអាស៊ីសេរីតាមទូរស័ព្ទថា ក្រុមហ៊ុនមិនទាន់ឈូសឬរុះរើផ្ទះអ្នកភូមិក្នុងឃុំព្រែកកក់ទេ ។ លោកថាក្រុមហ៊ុន ឡុង ស្រេង អន្តរជាតិ រដ្ឋបានអនុញ្ញាតឲ្យវិនិយោគដាំកៅស៊ូរយៈពេល៩៩ឆ្នាំ ពាក់ព័ន្ធដីឃុំព្រែកកក់ជាង១៤០០ហិកតា ប៉ះពាល់៨ភូមិនិងមនុស្សជាង៧០០គ្រួសារ ។ លោកថាអ្នករស់នៅទីនោះអាជ្ញាធរមូលដ្ឋានទទួលស្គាល់ការរស់នៅស្របច្បាប់ លើកលែងតែកម្មករចម្ការកៅស៊ូបឹងកេត ។
ពាក់ព័ន្ធនឹងបញ្ហានេះដែរមន្រ្តីសមាគមការពារសិទ្ធិមនុស្ស អាដហុក លោក អ៊ូច ឡេង ចុះមើលហេតុការណ៍តវ៉ាផ្ទាល់ឲ្យដឹងថា កសិករត្រូវការដីដាំដុះ ប្រសិនបើរដ្ឋផ្តល់ដីឲ្យក្រុមហ៊ុនវិនិយោគ គួរតែមានការដោះស្រាយ ឯកភាពគ្នាតាមច្បាប់ភូមិបាលឆ្នាំ២០០២ មិនគួររំលោភសិទ្ធិរស់នៅរបស់អ្នកស្រុកទេ ។
សូមជម្រាបថានៅថ្ងៃនេះដែរក៍មានប្រជាជនប្រមាណ៤០នាក់ផ្សេងទៀតតំណាងឲ្យប្រជាជន២៤៩គ្រួសារ មកពីភូមិជ័យសេនា ឃុំតាកែន ស្រុកឈូក ខេត្តកំពត ត្រៀមចូលតវ៉ានៅផ្ទះនាយករដ្ឋមន្រ្តីខ្មែរដែរ ទាមទារដីក្នុងចំណុចអន្លង់ក្រោមជាង៤៦០ហិកតា ដែលយោធាកងពលលេខ៣១ ត្រូវការដីនោះយកទៅអភិវឌ្ឍ ៕
ឧបករណ៍រឿង
|
ស្តាប់សំឡេង |
|
ថតសំឡេង |
|
អ៊ីម៉េល |
|
ព្រឹត្តិបត្រព័ត៌មាន |
|
បោះពុម្ព |
អត្ថបទដែលទាក់ទង
ពលរដ្ឋជាច្រើនគ្រួសាររស់នៅលើបឹងកក់ប្រឈមមុខនឹងការបណ្ដេញចេញ
ទំនាស់ដីធ្លីរវាងជនជាតិកួយនិងអាជ្ញាធរនៅខែត្រកំពង់ធំ
ជម្លោះរវាងពលរដ្ឋនិងក្រុមហ៊ុននៅកំពតជុំវិញការចាក់ខ្សាច់លុបផ្ទៃសមុទ្រ
មនុស្ស២នាក់ត្រូវចាប់ខ្លួនក្នុងជម្លោះដីធ្លីនៅខេត្តកោះកុង
មន្ត្រីរដ្ឋបាលព្រៃឈើក្រុងប៉ៃលិនចោទអង្គការមួយថាឈូសឆាយដីព្រៃរបស់រដ្ឋ
ទំនាស់ដីធ្លីរវាងក្រុមហ៊ុនខេឌីស៊ីនិងពលរដ្ឋនៅខែត្រកំពង់ឆ្នាំង
អ្នកភូមិនិងអាជ្ញាធរខេត្តកំពតនឹងចរចាគ្នាពីបញ្ហាចាក់ខ្សាច់លុបផ្ទៃសមុទ្រ
ជនជាតិព្នងនៅមណ្ឌលគិរីចោទថាមន្ត្រីប៉ូលិសម្នាក់កាប់ព្រៃទន្ទ្រានយកដី
អ្នកភូមិជនជាតិភាគតិចជាង ១០០នាក់នាំគ្នាតវ៉ារឿងដីធ្លីនៅរតនគិរី
ពលរដ្ឋជាង៧០០គ្រួសាររង់ចាំដំណោះស្រាយបញ្ហាដីធ្លីពីខុទ្ទកាល័យនាយករដ្ឋមន្រ្តី
