អតីត​យោធា​ខ្មែរ​ក្រហម​២៦​គ្រួសារ​រង​ការ​ប្ដឹង​ចោទ​ថា​ជា​មេខ្លោង​តវ៉ា​ទាម​ទារ​ដី

ដី​ទំនាស់​ទំហំ ៥៨​ហិកតារ តំបន់​ភ្នំ​វល្លិ នៅ​ក្នុង​ខេត្ត​កំពត រដ្ឋាភិបាល​បាន​ចែក​ឲ្យ​អតីត​យោធា​ខ្មែរ​ក្រហម ក្នុង​គោល​នយោបាយ​បង្រួប​បង្រួម​ជាតិ កាល​ពី​ឆ្នាំ​១១៩៤ ដើម្បី​បញ្ចប់​សង្គ្រាម​ស៊ីវិល​នៅ​តំបន់​នោះ។
ដោយ អ៊ុក សាវបូរី
2012-11-10
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល

ប៉ុន្តែ​ពេល​បច្ចុប្បន្ន​នេះ ម្ចាស់​ដី​ជា​អតីត​យោធា​ផ្តាច់​ខ្លួន​ចំនួន ២៦​គ្រួសារ ដែល​រដ្ឋាភិបាល​ចែក​ដី​ឲ្យ​ដាំ​ដំណាំ​នោះ រង​នូវ​ការ​ចោទ​ពី​អ្នក​ទិញ​ដី ប្ដឹង​ចោទ​ថា​ពួក​គាត់​ជា​មេខ្លោង​តវ៉ា​ទាម​ទារ​ដី​ទៅ​វិញ។ ពាក្យ​បណ្ដឹង​តប​នេះ ធ្វើ​ឲ្យ​ពួក​គាត់​មួយ​ចំនួន​ភ័យ​ខ្លាច ព្រម​ទាំង​បាន​រត់​គេច​ខ្លួន​ទៅ​ខេត្ត​ផ្សេងៗ។

តំណាង​ប្រជាពលរដ្ឋ ២៦​គ្រួសារ ជា​អតីត​យោធា​ខ្មែរ​ក្រហម នៅ​តំបន់​ភ្នំ​វល្លិ ខេត្ត​កំពត បាន​ដាក់​ពាក្យ​សុំ​កាន់​កាប់​ដី​ទំហំ ៥៨​ហិកតារ ទៅ​ឲ្យ​ក្រុម​យុវជន​ស្ម័គ្រចិត្ត​ចុះ​វាស់​ដី​ជូន​ប្រជាពលរដ្ឋ កាល​ពី​ថ្ងៃ​ទី៨ វិច្ឆិកា ឆ្នាំ​២០១២ បន្ទាប់​ពី​ដី​ពួក​គាត់​ត្រូវ​បាន​មេ​យោធា​ខេត្ត​កែប លក់​បន្ត​ទៅ​អ្នក​ផ្សេងៗ។

អតីត​យោធា​ខ្មែរ​ក្រហម​នៅ​ភ្នំ​វល្លិ លោក មាស អាង ថ្លែង​នៅ​ថ្ងៃ​ទី៩ ខែ​វិច្ឆិកា ថា កាល​ពី​ឆ្នាំ​១៩៩៤ ក្រោយ​ពី​មាន​ការ​ចរចា​បញ្ចប់​សង្គ្រាម​ស៊ីវិល ពួក​គាត់​បាន​ទទួល​ដី​ទំហំ ៥​ហិកតារ​ក្នុង​មួយ​គ្រួសារ នៅ​តំបន់​ភ្នំ​វល្លិ ពី​លោក ឈូក រីន ដែល​ជា​អតីត​មេ​យោធា​ខ្មែរ​ក្រហម​ផ្តាច់​ខ្លួន។ លោក ឈូក រីន ត្រូវ​ប្រមុខ​រដ្ឋាភិបាល​ផ្តល់​សិទ្ធិ​ចែក​ដី​តំបន់​ភ្នំ​វល្លិ ទៅ​ឲ្យ​ក្រុម​យោធា​ផ្តាច់​ខ្លួន មាន​ដី​សង់​ផ្ទះ និង​ដី​ស្រែ​ចម្ការ។ ប៉ុន្តែ​ក្រោយ​ពី​លោក ឈូក រីន ត្រូវ​បាន​រដ្ឋាភិបាល​ចាប់​ដាក់​ពន្ធនាគារ​មក ស្រាប់​តែ​នៅ​ឆ្នាំ​២០០៥ ដី​ពួក​គាត់​ទំហំ ៥៨​ហិកតារ​នោះ មាន​ជម្លោះ​ជាមួយ​មេធាវី​ម្នាក់​ឈ្មោះ ពុទ្ធាវី ប្ដឹង​ពួក​គាត់​នៅ​តុលាការ​ខេត្ត​កំពត។

ក្រោយ​មក តុលាការ​មិន​ចាត់​ការ​បណ្ដឹង ពួក​គាត់​បាន​ដាំ​ដំណាំ​លើ​ដី​ចែក​ជា​ធម្មតា​វិញ។ នៅ​ឆ្នាំ​២០១០ មាន​អ្នកស្រី​ម្នាក់​ឈ្មោះ ហៀវ លន់ ប្ដឹង​ពួក​គាត់​ថា រស់នៅ និង​ដាំ​ដុះ​លើ​ដី​គេ​បាន​ទិញ​ពី​មេ​យោធា​នៅ​ខេត្ត​កែប។ ក្រោយ​មក អ្នកស្រី ហៀវ លន់ បាន​ប្រើ​គ្រឿងចក្រ​ឈូស និង​ព័ទ្ធ​ដី​ទុក។ ទន្ទឹម​នោះ ពួក​គាត់​មាន​ដីកា​ពី​តុលាការ តាម​ចាប់​ខ្លួន​ចោទ​ថា ជា​មេខ្លោង​តវ៉ា​ដីធ្លី។ រហូត​មក​ដល់​ពេល​នេះ ពួក​គាត់​ខ្លះ​គេច​ខ្លួន​ទៅ​ខេត្ត​ផ្សេងៗ នៅ​មាន​តិច​តួច​រង់ចាំ​មើល​សភាពការណ៍​ដី​នោះ៖ «ហើយ​ក្រោយ​ខ្ញុំ​ដាំ​ដំណាំ​បាន​ពេញ ហើយ​គេ​មក​កាប់​ដំណាំ​ខ្ញុំ​ចេញ កាប់​សន្ទូង​កាប់​អី គេ​បរ​អាត្រាក់​ជាន់ គេ​ដាំ​ស្វាយ​នៅ​ពៀរ​លើ​របស់​ខ្ញុំ​ទាំង​អស់ ហើយ​ដេញ​ខ្ញុំ​ចេញ ព័ទ្ធ​របង​មិន​ឲ្យ​ខ្ញុំ​ធ្វើ។ ខ្ញុំ ២៦​គ្រួសារ​រង​ទុក្ខ​ហ្នឹង ក៏​មិន​ហ៊ាន​នឹង​គេ ក៏​ចុះ​ចេញ»

អតីត​យោធា​ខ្មែរ​ក្រហម​ដែល​គេច​ខ្លួន​ទៅ​ខេត្ត​ផ្សង ដោយ​សារ​ធ្វើ​ជា​តំណាង​តវ៉ា​ដី លោក ស ចេង អះអាង​ថា ដោយ​បាន​ឮ​លោក ហ៊ុន សែន ប្រកាស​ពី​រឿង​ដីធ្លី ត្រូវ​ពលរដ្ឋ​មាន​កម្មសិទ្ធិ ពួក​គាត់​ក៏​ដាក់​ពាក្យ​សុំ​កាន់​កាប់​ដី​ដែល​រដ្ឋ​បាន​ចែក​ឲ្យ​នោះ ជូន​ក្រុម​យុវជន​ស្ម័គ្រចិត្ត កាល​ពី​ថ្ងៃ​ទី៨ ខែ​វិច្ឆិកា។

អតីត​យោធា​ម្នាក់​ទៀត​ឈ្មោះ ឃុត ឃាន ថ្លែង​ថា ពួក​គាត់​បាន​ប្ដឹង​តវ៉ា​ដី​ដាក់​ពាក្យ​គ្រប់​ស្ថាប័ន ប៉ុន្តែ​គ្មាន​ដំណោះស្រាយ​ដល់​ពួក​គាត់​ឡើយ។ មិន​តែ​ប៉ុណ្ណោះ ពួក​គាត់​រង​នូវ​ការ​ចោទ​ជា​មេខ្លោង​តវ៉ា​ដី ទើប​រត់​គេច​ខ្លួន​ពី​ផ្ទះ។ ឥឡូវ​ក្រុម​យុវជន​ស្ម័គ្រចិត្ត​ចុះ​វាស់​ដី​នៅ​ទីនោះ ទើប​ពួក​គាត់​ដាក់​ពាក្យ​សុំ​កាន់​កាប់​ដី និង​បញ្ជូន​ពាក្យ​បណ្ដឹង​ទៅ​នាយក​រដ្ឋមន្ត្រី ពី​បញ្ហា​ដីធ្លី​ពួក​គាត់​ត្រូវ​មេ​យោធា​ខេត្ត​កែប រំលោភ​យក​ទៅ​លក់​ឲ្យ​អ្នកស្រី ហៀវ លន់។ លោក​បញ្ជាក់​ថា កាល​ពី​លោក ឈូក រីន ចែក​ដី​ឲ្យ​យោធា​ជា​កូន​ចៅ​នោះ ដី​ទំនាស់​តំបន់​ភ្នំ​វល្លិ ស្ថិត​នៅ​ក្នុង​ភូមិ​បុស្សញីញ ឃុំ​កូនសត្វ ស្រុក​កំពត ទេ។ ប៉ុន្តែ គេ​ប្ដឹង​ពួក​គាត់​ទៅ​តុលាការ ថា​រស់នៅ​លើ​ដី​អ្នកស្រី ហៀវ លន់ គឺ​ដី​នោះ​នៅ​ក្នុង​ភូមិ​ត្រពាំងព្រីង​ខាង​ជើង ឃុំ​ត្រពាំងព្រីង ស្រុក​ទឹកឈូ ខេត្ត​កំពត។

មន្ត្រី​បញ្ជា​ការ​យោធា​ខេត្ត​កែប លោក ជន សុផល បំភ្លឺ​រឿង​នោះ​ថា ដី​ដែល​បាន​លក់​ជូន​អ្នកស្រី ហៀវ លន់ នោះ មិន​មាន​ពាក់ព័ន្ធ​ដី​អតីត​យោធា​ខ្មែរ​ក្រហម​ដែល​ធ្វើ​សមាហរណកម្ម​នោះ​ទេ ជា​ដី​របស់​មេ​ទាហាន គឺ​លោក កែ គឹមយ៉ាន ដែល​បាន​កាន់​កាប់​តាំង​ពី​ឆ្នាំ​១៩៩៤ មក៖ «អីចឹង ការ​ចោទ​ប្រកាន់​របស់​បង​ប្អូន​កន្លង​ទៅ វា​មិន​ទាក់​ទង​អី​ខាង​ខ្ញុំ​អ្នក​លក់​នោះ​ទេ។ ក៏ប៉ុន្តែ ក្រោយ​មក​បង​ប្អូន​ចេះ​តែ​មាន​បញ្ហា​លើក​ថា​ដី​អ្នក​នេះ ដី​អ្នក​នោះ ក្រោយ​ពី​ឯកឧត្តម កែ គឹមយ៉ាន មាន​បញ្ហា»

វិទ្យុ​អាស៊ី​សេរី មិន​អាច​ទាក់​ទង​លោក ពុទ្ធាវី និង​អ្នកស្រី ហៀវ លន់ ដែល​រង​នូវ​ការ​ចោទ​ពី​អតីត​យោធា​ខ្មែរ​ក្រហម​បាន​ទេ​នៅ​ថ្ងៃ​ទី៩ វិច្ឆិកា។

ប៉ុន្តែ អតីត​មេ​ឃុំ​កូនសត្វ លោក ដាន សៅ ថ្លែង​ថា ដី​ជម្លោះ​នោះ​កាល​គាត់​នៅ​ជា​មេ​ឃុំ គឺ​ដី​ចែក​ឲ្យ​យោធា​សមាហរណកម្ម​នៅ​តំបន់​ភ្នំ​វល្លិ ស្ថិត​ក្នុង​ភូមិ​បុស្សញីញ ឃុំ​កូនសត្វ ស្រុក​កំពត ខេត្ត​កំពត ចែក​ឲ្យ​ពួក​គេ​ដាក់​អាវុធ​ឈប់​បាញ់​គ្នា ហើយ​ធ្វើ​ជា​ប្រជាពលរដ្ឋ មាន​ការ​សង់​ផ្ទះ និង​មាន​ដី​ដាំ​ដុះ។ ក្រោយ​មក ដី​នោះ​បាន​កាត់​ទៅ​ឲ្យ​ភូមិ​ត្រពាំងព្រីង​ខាង​ជើង ឃុំ​ត្រពាំងព្រីង ស្រុក​ទឹកឈូ បង្កើត​ជា​ភូមិ ឃុំ ទើប​កកើត​ថ្មី​ដោយ​ក្រសួង​មហាផ្ទៃ ទើប​កើត​មាន​ជម្លោះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (2)
  • បោះពុម្ព
  • ចែករំលែក
  • អ៊ីម៉ែល

អ្នក​អាន​អនាមិក

សូមសែព្រះរាជវង្សជូនការអគុណដល់ក្រុមសម្តេចតេជជោផង។

Nov 11, 2012 09:25 PM

អ្នក​អាន​អនាមិក

នេះជានោបាយវណ្ឌ័ករបស់ហ៊ុនសែន!

Nov 10, 2012 03:30 AM