ទំនាស់ដីធ្លីនៅស្រុកអូររាំងខេត្តមណ្ឌលគិរី
ដោយ ឱ ភារិទ្ធ
2008-05-11
ជនជាតិព្នងនៅភូមិពូឆប អូរទេ ឃុំដាក់ដាំ ស្រុកអូររាំង ខេត្តមណ្ឌលគិរី កំពុងស្វះស្វែងរកការជួយអន្តរាគមន៍ដើម្បីទប់ស្កាត់សកម្មភាពរបស់អាជ្ញាធរខេត្ត ដែលបានទៅគំរាមកំហែងប៉ុនប៉ងកម្ទេចលំនៅរបស់ពួកគាត់ និងប៉ុនប៉ងចាប់ពួកគាត់ដាក់គុកទៀត បើសិនជាពុំរុះផ្ទះសម្បែងចេញពីទីនោះទេ ។
ជនជាតិព្នង ១០គ្រួសារនៅភូមិពូឆប បាននាំគ្នាតវ៉ាដល់សាលាឃុំដាក់ដាំ កាលពីថ្ងៃទី ៩ ឧសភា ដើម្បីឲ្យជួយអន្តរាគមន៍ទប់ស្កាត់សកម្មភាពបណ្ដេញពួកគេចេញមិនឲ្យរស់នៅទីនោះ បន្ទាប់ពីអ្នកស្រុកឲ្យដឹងថា អភិបាលរងខេត្ត ចាន់ យឿន បាននាំគ្នាមួយក្រុមប៉ុនប៉ងទៅកម្ទេចលំនៅរបស់ពួកគាត់ និងប៉ុនប៉ងយកពួកគាត់ទៅដាក់គុកថែមទៀត ៖ «រើយកត្រង់ស៊ីន័រ កាត់ដុតតែម្ដង គំរាមយើងអត់ឲ្យនៅត្រង់ហ្នឹងតែម្ដង ។ ភ័យខ្លាចរត់អ៊ីចឹង» ។
អ្នកស្រុកឲ្យដឹងថា តំបន់ពូឆប អូរទេនេះ ជាដីកេរដូនតាតាំងពីយូរយារមកហើយដែលពួកគេបានធ្វើចម្ការវិលជុំរហូតមកទល់នឹងសព្វថ្ងៃនេះ ។ ប្រធានភូមិក៏បានបញ្ជាក់ដែរថា នៅឆ្នាំ២០០៤ ពួកគាត់១០គ្រួសារ បាននាំគ្នាមកតាំងលំនៅ នៅលើដីចម្ការវិលជុំនេះតែម្ដង ដើម្បីងាយប្រកបរបរអាជីវកម្ម ។ នៅពេលទទួលការគំរាមកំណត់ ៧ថ្ងៃឲ្យចាកចេញផុតពីទីនេះ អ្នកស្រុកមានភាពភ័យខ្លាចខំស្វែងរកការអន្តរាគមន៍គ្រប់ជាន់ថ្នាក់ ។
លោកប្រធានភូមិបានឲ្យដឹងថា ៖ «ប្រជាពលរដ្ឋឥឡូវគ្មានផ្ទះនៅទៀតទេ អស់ហើយ វាដុតម្សិលមិញ ដុតមិនឆេះយកសាំងចាក់ទៀតបានឆេះ... ។ ថ្ងៃហ្នឹងតវ៉ានៅសាលាឃុំ បើសិនជាមិនសម្រេចទេ អាហ្នឹងបែបទៅស្រុក ឬក៏ទៅខេត្តក៏មិនដឹង» ។
អភិបាលរងខេត្តមណ្ឌលគិរី គឺលោក ចាន់ យឿន ដែលត្រូវបានជនជាតិព្នងទាំងនោះចោទប្រកាន់ បានជម្រាបតាមទូរស័ព្ទថា ការរស់នៅរបស់ជនជាតិព្នងនៅអូរទេ ពូឆបនោះ មិនជារឿងធំដុំទេ សំខាន់គឺសុំឲ្យពួកគាត់គោរពច្បាប់ ។
លោក ចាន់ យឿន បានមានប្រសាសន៍ថា ៖ «ត្រូវសុំច្បាប់ពីភូមិ ឃុំ ហើយពេលណាដែលមានច្បាប់គ្រប់អីអ៊ីចឹងលោកដឹងហើយ ព្រោះយើងមានច្បាប់ទម្លាប់អ៊ីចឹង ឃុំស្រុកគេក៏អត់ទាន់អនុញ្ញាត អ៊ីចឹងគ្រាន់តែប្រាប់គាត់ ឲ្យរត់រកច្បាប់ទម្លាប់អីសិនទៅ» ។
មន្រ្តីនៃអង្គការវីជីឡែន គឺលោក វាសនា ដែលការពារការរំលោភសិទ្ធិមនុស្សបានឲ្យដឹងថា រឿងនេះប្រហែលជាពាក់ព័ន្ធទៅនឹងក្រុមហ៊ុនដាំដើមស្រល់ច្រើនជាង ព្រោះនៅថ្ងៃកើតហេតុនោះ អ្នកស្រុកឲ្យដឹងថា មានតំណាងក្រុមហ៊ុនចិន ដាំដើមស្រល់ទៅជាមួយដែរ ។ តែបើនិយាយពីរឿងច្បាប់លោកថា អាជ្ញាធរភូមិឃុំជាអ្នកណែនាំឲ្យពួកគាត់ធ្វើ ។
លោក វាសនា បានឲ្យដឹងថា ៖ «អាជ្ញាធរលោកឲ្យដោះស្រាយ ហាក់ដូចជាអមនុស្សធម៌ពេក ។ ដឹងហើយថា គាត់ជាជនជាតិដើមភាគតិច គាត់មិនសូវជាអ្នកចេះដឹង អ៊ីចឹងសំខាន់អាជ្ញាធរជាម៉ែ ជាឪ គាត់ត្រូវតែរៀបចំ ឬក៏ប្រាប់ដល់គាត់វិញថា គាត់ត្រូវតែធ្វើយ៉ាងម៉េច អីយ៉ាងម៉េច» ។
ការព្រួយបារម្ភរបស់ជនជាតិព្នងនៅឃុំដាក់ដាំ គឺខ្លាចបាត់បង់ដីចម្ការវិលជុំសម្រាប់ផលិតដោយពួកគាត់គ្មានមុខរបរផ្សងសម្រាប់រស់ និងខ្លាចគេចាប់ពួកគាត់យកទៅដាក់គុក ហើយបាត់បង់សេរីភាពក្នុងការរស់នៅ ដែលបញ្ហានេះមន្រ្តីនៃអង្គការវីជីឡែន បានអំពាវនាវសុំឲ្យមានការដោះស្រាយដោយសន្តិវិធី ៕
ឧបករណ៍រឿង
|
ស្តាប់សំឡេង |
|
ថតសំឡេង |
|
អ៊ីម៉េល |
|
ព្រឹត្តិបត្រព័ត៌មាន |
|
បោះពុម្ព |
អត្ថបទដែលទាក់ទង
ទាហានបន្តរុះរើផ្ទះអ្នកស្រុកនៅភូមិជ័យសេនា ខេត្តកំពត
ផ្ទះអ្នកភូមិជ័យសេនាក្នុងស្រុកឈូកខេត្តកំពតត្រូវទាហានរុះរើ
ជនរងគ្រោះដោយសារដីធ្លីនៅកំពតត្អូញត្អែរពីការមិនរកយុត្តិធម៌
អាជ្ញាធរខែត្រសៀមរាបស្វែងរកដំណោះស្រាយរឿងដីធ្លីជូនពលរដ្ឋ
កិច្ចប្រជុំរបស់ជនរងគ្រោះដោយសារការធ្វើសម្បទានដីត្រូវគេរារាំង
មនុស្ស៣នាក់បាត់ខ្លួនក្រោយការបង្ក្រាបករណីជម្លោះដីនៅកំពត
ជនជាតិព្នងនៅឃុំប៊ូស្រាខឹងនឹងអាជ្ញាធរក្នុងការដោះស្រាយបញ្ហាដីធ្លី
ស្ត្រីម្នាក់នៅស្រុកឈូក ខែត្រកំពត ចោទថាត្រូវក្រុមយោធាវាយ
ពលរដ្ឋជាង៤០០នាក់តវ៉ារឿងដីធ្លីប្រឆាំងនឹងទាហាននៅខេត្តសៀមរាប
ពលរដ្ឋ៥គ្រួសារនៅប៉ៃលិន ប្ដឹងអភិបាលរងក្រុងពីបទបំផ្លាញទ្រព្យសម្បត្តិ
