ពលរដ្ឋសុំឲ្យអាជ្ញាធរអន្តរាគមន៍បញ្ឈប់ការបំផ្លាញព្រៃលិចទឹកធ្វើកម្មសិទ្ធិ

ក្រុមអ្នកភូមិខ្លះបានអះអាងថា សកម្មភាពលួចឈូសព្រៃលិចទឹក ក្នុងតំបន់បឹងទន្លេសាបនោះ គឺមានមន្ត្រីថ្នាក់មូលដ្ឋានខ្លះ អាចជាប់ពាក់ព័ន្ធ ហើយព្រងើយកន្តើយ ក្នុងការបង្ក្រាបអំពើរុករានដីខុសច្បាប់នេះ។

ដោយ ហង្ស សាវយុត
2012-06-23

h062212hs.mp3

២១-មិថុនា-២០១២៖ ព្រៃលិចទឹក ត្រូវគេប្រើគ្រឿងចក្រជីកធ្វើជាទំនប់ថ្មី ដោយគ្មានការអនុញ្ញាតិពីអាជ្ញាធរ ធ្វើជាដីស្រែប្រាំងថ្មី នៅតំបន់អកស ឃុំកណ្ដែក ស្រុកប្រាសាទបាគង ខេត្តសៀមរាប។

RFA/Hang Savyouth

ក្រុមប្រជាពលរដ្ឋមួយចំនួនដែលរស់នៅក្នុងភូមិត្រពាំងទឹម នៃឃុំកណ្ដែក កំពុងនាំគ្នាផ្ដិតមេដៃ ដើម្បីធ្វើជាពាក្យបណ្ដឹង ដាក់ជូនទៅអាជ្ញាធរ និងអង្គការក្រៅរដ្ឋាភិបាលខ្លះ ឱ្យជួយធ្វើអន្តរាគមន៍ជាបន្ទាន់ បំណងឱ្យបញ្ឈប់សកម្មភាពរបស់មនុស្សមួយក្រុម ដែលកំពុងប្រើគ្រឿងចក្រជាច្រើនគ្រឿង លួចឈូសបំផ្លាញព្រៃលិចទឹក ដើម្បីរុករានយកដីតំបន់ទន្លេសាប ធ្វើជាកម្មសិទ្ធិឯកជននោះ។

ប្រភពពីប្រជាពលរដ្ឋឱ្យដឹងថា សកម្មភាពជញ្ជូនគ្រឿងចក្រ ដើម្បីលួចឈូសបំផ្លាញព្រៃលិចទឹក នៅតំបន់អកស ក្នុងឃុំកណ្ដែក ស្រុកប្រាសាទបាគង ចម្ងាយប្រមាណជា ៨គីឡូម៉ែត្រភាគខាងកើតពីតំបន់ភ្នំក្រោមនោះ គឺបានធ្វើឡើងតាំងតែពីអំឡុងពេល៣ថ្ងៃ មុនការបោះឆ្នោតក្រុមប្រឹក្សាឃុំ-សង្កាត់ អាណត្តិទី៣មក ហើយនៅតែបន្តរហូតមកដល់ពេលនេះ ដោយគ្មានអាជ្ញាធរមូលដ្ឋាន ឬសមត្ថកិច្ចណាចុះធ្វើការហាមឃាត់នៅឡើយទេ។

កាលពីរាត្រីថ្ងៃទី២១ ខែមិថុនា មានសេចក្តីរាយការណ៍ថា មនុស្សមួយក្រុមដែលតែងតាំងគ្នាឯង ជាមេក្រុមក្នុងការធ្វើសកម្មភាពឈូសបំផ្លាញព្រៃលិចទឹកនោះ បានប្រើគ្រឿងចក្រចំនួន ៦គ្រឿង លួចឈូសព្រៃលិចទឹកនៅពេលយប់ ព្រមទាំងបានធ្វើសកម្មភាពដកហូតយកម៉ាស៊ីនថតរូបរបស់អ្នកដែលតាមដានសកម្មភាពនោះទៀតផង។

ស្ត្រីឈ្មោះ ចាន់ រ៉ី ជាប្រជាពលរដ្ឋរស់នៅភូមិត្រពាំងទឹម នៃឃុំកណ្ដែក មានប្រសាសន៍ថា អ្នកស្រីសូមអំពាវនាវដល់មន្ត្រីសាលាខេត្តសៀមរាប និងអាជ្ញាធរបឹងទន្លេសាប មេត្តាចុះពិនិត្យ និងចាត់វិធានការជាបន្ទាន់ ដើម្បីបញ្ឈប់សកម្មភាពលួចឈូសបំផ្លាញព្រៃលិចទឹក បំណងរុករានយកដីចែកគ្នានេះ។

អ្នកស្រី ចាន់ រ៉ី៖ «អានោះ តំបន់អកស តំបន់ព្រៃលិចទឹក តំបន់ហាមឃាត់។ ក្នុងដីហ្នឹង អត់មានចែកអ្នកណាទាំងអស់ ពីព្រោះធ្វើស្រែស្រូវប្រាំងយើងទៅនេះ គេឱ្យតែត្រឹម៨០០ម៉ែត្រទេ តែក្រៅពីនោះ ជាតំបន់ព្រៃហាមឃាត់។ ចុះមូលហេតុអ្វី បានជាជលផលបណ្ដោយឱ្យធ្វើអីចេះ។ ដែលគេឈូសនោះ គេដើរយកលុយ ហើយអាខ្លះ គ្នាលក់ជ្រូកទាំងយប់ឱ្យគេ។ ក្នុង១ក្បាល ៨ម៉ែត្រ ឬក៏៧ម៉ែត្រ គឺ២០០ដុល្លារ។ គេមានប្រធានក្រុមគេ ៦ទៅ៧នាក់ បើបងចង់ដឹងការពិត ទាល់តែទៅសួរប្រធានក្រុម ព្រោះគេអ្នកកាន់កាប់អារឿងដីស្រែដែលគេលើកថ្មី ឈូសព្រៃធ្វើថ្មីហ្នឹងណា»។

ចំណែកស្ត្រីឈ្មោះ វីន ព័រ ជាអ្នកភូមិត្រពាំងទឹម ដែរ បានមានប្រសាសន៍ប្រហាក់ប្រហែលគ្នាថា អ្នកស្រីមានការព្រួយបារម្ភថាព្រៃលិចទឹកនៅទីនោះ នឹងបាត់បង់ទៅយ៉ាងឆាប់រហ័សជាទីបំផុត ហើយវាលស្រែប្រាំងថ្មីៗរាប់សិបហិកតារ នឹងលេចចេញជារូបរាងឡើងជំនួសវិញ ប្រសិនបើអាជ្ញាធររដ្ឋាភិបាលមិនចាត់វិធានការបង្ក្រាបឱ្យទាន់ពេលវេលាទេនោះ។

អ្នកស្រី វីន ព័រ៖ «ឃើញគេឈូស សួរគេថាគេឈូសធ្វើផ្លូវ ដល់ពេលរួចទៅឃើញគេចែកចង្កោមគ្នាគេ មិនដឹងគេចែកតាំងពីពេលណា ដល់ពេលពួកខ្ញុំទៅសុំគេ គេថា អស់ហើយ។ ទំនប់ហ្នឹងគេធ្វើលួចលាក់ផង គេមានអីចែកទៀត។ ទោះជាមិនបាន ក៏សូមសំណូមពរឱ្យបងជួយ ឱ្យអត់ទាំងអស់គ្នា ទុកព្រៃនោះឱ្យត្រីពងកូនសារឡើងវិញ។ តំបន់ព្រៃលិចទឹក ក្រៅពីលិចទឹក ក៏ប្រជាជនច្រូតស្បូវ កាប់អុសអីដុតធម្មតា បើសិនជាគេធ្វើជាស្រែប្រាំងទៀត យើងអត់មានស្បូវ មានអីច្រូត និងលក់ចិញ្ចឹមជីវិតទេ អត់មានអុស មានអីដុតទេ»។

ទោះយ៉ាងណា អាជ្ញាធរឃុំកណ្ដែក និងអាជ្ញាធរខេត្តសៀមរាប បានបញ្ជាក់ថា គេពុំទាន់បានដឹងអំពីសកម្មភាពឈូសបំផ្លាញព្រៃលិចទឹក ដើម្បីយកដីនោះទេ។

លោក ព្រិន សាវិន ជានាយខ័ណ្ឌជលផល ខេត្តសៀមរាប នៃអធិការដ្ឋានរដ្ឋបាលជលផលខាងជើងបឹងទន្លេសាប លោកមិនបានធ្វើការបំភ្លឺជុំវិញរឿងនោះយ៉ាងណាទេ ដោយលោកគ្រាន់តែមានប្រសាសន៍ថា កំពុងជាប់រវល់ប្រជុំ។

ចំណែកលោក ខាំ លឿ ជាមេឃុំកណ្ដែក បានមានប្រសាសន៍ថា លោកធ្លាប់បានទទួលព័ត៌មាននោះថា មានសកម្មភាពឈូសបំផ្លាញព្រៃលិចទឹក តាំងតែពីអំឡុងពេលនៃយុទ្ធនាការឃោសនាបោះឆ្នោតក្រុមប្រឹក្សាឃុំ-សង្កាត់ អាណត្តិទី៣ម្ល៉េះ។

ក៏ប៉ុន្តែ អាជ្ញាធរឃុំមិនអាចរារាំងសកម្មភាពនោះបានទេ ដោយសារតែក្រុមអ្នកឈូសព្រៃទាំងនោះ អះអាងថា ដីតំបន់នោះ គឺជាអតីតដីស្រែ ស្រូវឡើងទឹករបស់ជីដូនជីតាពួកគេ។ លោកមេឃុំ អះអាងថា បើតាមលោកដឹង តំបន់នោះធ្លាប់ជាដីស្រែ ស្រូវឡើងទឹក នៅអំឡុងឆ្នាំ១៩៦០។

លោក ខាំ លឿ៖ «ជម្រាបប្អូនថា កន្លែងនោះជាកន្លែងស្រែស្រូវវា។ ខ្ញុំកើតមក ខ្ញុំឃើញតែស្រែស្រូវវាដែរ។ ខ្ញុំអត់ទាន់បានដឹងដំណឹងផង ប៉ុន្តែលើកមុនខ្ញុំបានធ្វើរបាយការណ៍ទៅខេត្ត ទៅស្រុករួចហើយ តែគេចែកគ្នាបាន៨ម៉ែត្រៗម្នាក់ ក៏មិនដឹងនិយាយថាម៉េច ព្រោះគេអះអាងថាជាដីស្រែស្រូវវា ពីដូនតាគេ ខ្ញុំក៏មិនហ៊ាននិយាយ។ ធម្មតានៅភូមិ ស្រុក ជាមួយគ្នាវាជៀសមិនផុតពីសាច់ញាតិទេ តែខ្ញុំក៏មិនបានដឹងថា ឈ្មោះណាដែរ»។

ទោះយ៉ាងណា ប្រជាពលរដ្ឋខ្លះបានបង្ហើបថា ក្រុមអ្នកដែលបានជញ្ជូនគ្រឿងចក្រទៅឈូសបំផ្លាញព្រៃនោះខ្លះ គឺជាសាច់ញាតិយ៉ាងជិតស្និទ្ធជាមួយលោកមេឃុំកណ្ដែក ដោយពួកគេស្គាល់មុខ និងស្គាល់ឈ្មោះយ៉ាងច្បាស់ ហើយគេអាចសហការ និងប្រាប់ឈ្មោះអ្នកទាំងនោះបាន ប្រសិនបើអាជ្ញាធរពិតជាចង់ចាត់វិធានការផ្លូវច្បាប់មែននោះ។

លោក ស៊ូ ភិរិន្ទ ជាអភិបាលខេត្តសៀមរាបបានមានប្រសាសន៍ថា កាលពីថ្ងៃទី២១ ខែមិថុនា កន្លងទៅ គឺរូបលោកបានចុះទៅដល់តំបន់ទំនប់៧៨ ក្នុងឃុំកណ្ដែក នោះដែរ ដើម្បីធ្វើការដោះស្រាយបញ្ហាដែលប្រជាពលរដ្ឋខ្លះបានស្នើសុំធ្វើទំនប់បង្ហូរទឹកទីនោះ។ ក៏ប៉ុន្តែ មិនមានអាជ្ញាធរណាមួយ បានប្រាប់លោកឱ្យដឹងថា នៅតំបន់អកស មានការបញ្ជូនគ្រឿងចក្រទៅលួចឈូសបំផ្លាញព្រៃលិចទឹកឡើយ។ លោក ស៊ូ ភិរិន្ទ បានមានប្រសាសន៍ថា លោកនឹងធ្វើការសាកសួរទៅអាជ្ញាធរស្រុកប្រាសាទបាគង អំពីរឿងនេះ។

ប្រភពព័ត៌មានពីអាជ្ញាធរឃុំកណ្ដែក បានឱ្យដឹងថា ពេលបច្ចុប្បន្ននេះក្រុមអ្នកលួចឈូសឆាយដីព្រៃលិចទឹក បានប្រើគ្រឿងចក្រលើកធ្វើជាទំនប់ថ្មីមួយនៅតំបន់អកសនោះ ហើយបានដើរបោះបង្គោលក្បាលដីទំហំប្រមាណ ៨ម៉ែត្រ និងជម្រៅមិនទាន់ច្បាស់លាស់ ដើម្បីចែកទៅឱ្យក្រុមអ្នកភូមិប្រមាណ ៣០០នាក់ ចាប់ផ្ដើមធ្វើជាវាលស្រែប្រាំងថ្មី នៅក្នុងទឹកដីនៃតំបន់ទី២ ដែលកំណត់ការពារដោយអាជ្ញាធរបឹងទន្លេសាប៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។