អ្នកភូមិដែលមានទំនាស់ដីជាមួយក្រុមហ៊ុនស៊ីអាយវី ទៅផ្ទៀងផ្ទាត់ទំហំដីរបស់ខ្លួន

អ្នកភូមិចំនួន៣ភូមិ ក្នុងឃុំ២ធ្នូ និងឃុំស្រែចារ នៅស្រុកស្នួល ខេត្តក្រចេះ ដែលមានទំនាស់ដីធ្លីរ៉ាំរ៉ៃជាមួយក្រុមហ៊ុនស៊ី.អាយ.វី (CIV) បាននាំគ្នាមកពិនិត្យមើលបញ្ជីឈ្មោះ និងផែនទីដែលបង្ហាញពីប្លង់ដី និងគល់បញ្ជីផ្ទៃដីអ្នកភូមិ ក្រោយពីក្រុមនិស្សិតចុះវាស់វែងដីធ្លីនៅតំបន់ជម្លោះរួចមក។

ដោយ ទេព សុរ៉ាវី
2012-08-14

h081312tn.mp3

នៅថ្ងៃទី១៣ ខែសីហា ជាលើកដំបូងនៅខេត្តក្រចេះ ដែលអាជ្ញាធរបានបិទផ្សាយទិន្នន័យឯកសារ នៃការវិនិច្ឆ័យលទ្ធផល បន្ទាប់ពីក្រុមនិស្សិតបានចុះវាស់វែងដីធ្លីជូនប្រជាពលរដ្ឋរយៈពេលជាង១ខែរួចមក។ ការបិទផ្សាយនោះ មានចំនួន២កន្លែង ក្នុងឃុំស្រែចារ ដោយជ្រើសរើសយកផ្ទះអ្នកភូមិ ដែលក្រុមនិស្សិតស្នាក់នៅបណ្ដោះអាសន្ន ជាស្នាក់ការនៃការបិទផ្សាយនូវព័ត៌មានទាំងនោះ ដោយមួយកន្លែងសម្រាប់អ្នកភូមិថ្មហាលដីក្រហម ក្នុងឃុំ២ធ្នូ និងមួយកន្លែងទៀត បិទផ្សាយសម្រាប់អ្នកភូមិមានជ័យ និងភូមិក្បាលត្រាច ក្នុងឃុំស្រែចារ។

លោក ជាតិ វិចិត្រ អ្នកភូមិមានជ័យ ក្នុងឃុំស្រែចារ ដែលមានដីចម្ការនៅឃុំ២ធ្នូ ឲ្យដឹងថា គាត់មានដីទំហំ១ហិកតារកន្លះ ដែលកំពុងមានទំនាស់ដីធ្លីជាមួយក្រុមហ៊ុនស៊ី.អាយ.វី ដែលទទួលបានដីសម្បទានសេដ្ឋកិច្ចពីរដ្ឋាភិបាល។ លោកថា កាលពីខែមុន ក្រុមនិស្សិតបានចុះវាស់វែងដីធ្លីជូនអ្នកភូមិនៅតំបន់ទំនាស់នោះ ហើយថ្ងៃទី៧ ខែសីហា ក្រុមនិស្សិត និងអាជ្ញាធរ ក៏បានប្រកាសឲ្យអ្នកភូមិចុះមកផ្ទៀងផ្ទាត់ឯកសារវិនិច្ឆ័យ ដែលពួកគាត់ចុះវាស់វែង ក្រែងមានការខុសឆ្គង នឹងអាលប្ដឹងជំទាស់ ឬសុំការកែតម្រូវនូវប្រការណាមួយ។

លោកបន្តថា ក្រោយពីផ្ទៀងផ្ទាត់រួច គាត់ឃើញផ្ទៃដីដែលគាត់គ្រប់គ្រង និងទិន្នន័យដែលក្រុមនិស្សិតចុះវាស់វែង មានចំនួនដូចគ្នា ហើយលោកសង្ឃឹមថាអាជ្ញាធរនឹងចេញប្លង់កម្មសិទ្ធិស្របច្បាប់ជូនអ្នកភូមិ ហើយក្រុមហ៊ុនស៊ី.អាយ.វី ដែលធ្លាប់តែគម្រាមបាញ់សម្លាប់អ្នកភូមិរឿងទំនាស់ដីធ្លី លែងមានសិទ្ធិធ្វើបាបអ្នកភូមិតទៅទៀត៖ «កាលពីមុនមក មានក្រុមហ៊ុនបាញ់បោះ ហើយវាដុតរោងចម្ការ ផ្ទះនៅចម្ការអី វាដុតសព្វគ្រប់អស់តែទាំងអស់ហ្នឹង។ ហើយវាបាញ់បោះគម្រាមបាញ់សុទ្ធតែប្រឡោះជើងយាយៗ ប្រឡោះជើងឲ្យតែអ្នកណាចូល ក្បាលពួកហ្អែង ពួកងែង ក្បាលងែងមួយស្អីអញបង់តែមួយពាន់ដុល្លារ ពីរពាន់ដុល្លារអីទេ វាថាអ៊ីចឹង វាមិនដែលខ្លាចនរណាទេ។ សង្ឃឹមថាគាត់នឹងចេញប្លង់ពិតប្រាកដមែន»។

អ្នកភូមិម្នាក់ទៀតឈ្មោះ មែន អាន នៅភូមិមានជ័យ ឃុំស្រែចារ ឲ្យដឹងថា លោកមានដីចម្ការចំនួន៥ហិកតារ ដែលមានទំនាស់ដីធ្លីជាមួយក្រុមហ៊ុនស៊ី.អាយ.វី ។ លោកបានមកផ្ទៀងផ្ទាត់នូវឯកសារ និងពិនិត្យមើលបញ្ជីផែនទីប្លង់ដី ដែលមានបិទផ្សាយដោយក្រុមនិស្សិត និងមន្ត្រីសុរិយោដី ហើយវាស៊ីគ្នានឹងឯកសារដែលលោកកំពុងមាន និងសាក្សីដែលបញ្ជាក់ថា លោកពិតជាមានដីក្នុងតំបន់ដែលក្រុមហ៊ុនរំលោភបំពានចំនួន៥ហិកតារពិតមែន៖ «ខ្លួនខ្ញុំផ្ទាល់នេះ ខ្ញុំសង្ឃឹមថាដីប្រាកដជាមកបានប្រជាពលរដ្ឋ និងរូបខ្ញុំផ្ទាល់ ហើយខ្ញុំសង្ឃឹម១០០%តែម្តង។ ការគម្រាមកំហែងក៏គ្មានដែរចាប់ពីថ្ងៃហ្នឹងទៅ ពេលហ្នឹងទៅ»។

លោក ម៉ម ឌីណេ សមាជិកក្រុមការងារ៥ នៃការចុះវាស់វែងដីធ្លី និងជាអនុប្រធានការិយាល័យភូមិបាលស្នួល នៃមន្ទីរដែនដី នគរូបនីយកម្ម ឲ្យដឹងថា ការបិទផ្សាយនេះមានរយៈពេល១ខែ ចាប់ពីថ្ងៃទី១៣ ខែសីហា ដល់ថ្ងៃទី១១ ខែកញ្ញា ឆ្នាំ២០១២ សម្រាប់ឲ្យអ្នកភូមិដែលក្រុមការងារចុះវាស់វែងដីហើយ មកផ្ទៀងផ្ទាត់។ លោកបន្តថា ក្នុងលក្ខខណ្ឌមានការខុសឆ្គងភូមិ-ឃុំ ឈ្មោះណាមួយ អ្នកភូមិអាចដាក់ពាក្យសុំកែតម្រូវបាន ហើយប្រសិនបើខុសប្លង់ដី ឬគំនូសផែនទី ក្រុមការងារនិស្សិតចុះវាស់វែងដីធ្លីនឹងចុះវាស់វែងម្តងទៀត៖ «ការពារក្រែងថា ដីគាត់វាបាត់ ឬក៏វាអត់មាន។ គាត់មកមើលទៅឃើញថាគាត់វាមានឈ្មោះ ហើយវាមានផែនទីដីនៅលើរបស់គាត់មែន អ៊ីចឹង គ្រាន់គាត់ទៅផ្ដិតមេដៃថាគាត់បានមកមើល និងបានវាស់វែងពិតប្រាកដមែន»។

លោក ម៉ម ឌីណេ បញ្ជាក់ថា ការបិទផ្សាយបញ្ជីឈ្មោះអ្នកភូមិចំនួន៣ភូមិនោះ មានចំនួន៩៣៣ក្បាលដី ស្មើនឹងផ្ទៃដី១.៥៨០ហិកតារ។

តាមទិន្នន័យដែលវិទ្យុអាស៊ីសេរី ទទួលបានបង្ហាញថា ដី១ពាន់ហិកតារដែលក្រុមហ៊ុនស៊ី.អាយ.វី ទទួលបានពីរដ្ឋនោះ នៅសល់តែ១១០,៦៥ហិកតារប៉ុណ្ណោះ ក្រោយពីក្រុមនិស្សិតចុះវាស់វែងដីធ្លីជូនអ្នកភូមិរួច។ មន្ត្រីសុរិយោដីបញ្ជាក់ថា ក្រោយពីការផ្ទៀងផ្ទាត់ទិន្នន័យបញ្ចប់នៅខែក្រោយនោះ អាជ្ញាធរនឹងចេញប័ណ្ណកម្មសិទ្ធិបឋមជូនអ្នកភូមិទាំងនោះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។