ពលរដ្ឋនៅស្រុកសណ្ដាន់៖ អាជ្ញាធរស្រុក យកដីសហគមន៍ធ្វើជាកម្មសិទ្ធិផ្ទាល់ខ្លួន
H092312ZR
ដោយឡែកនៅឯខែត្រកំពង់ធំវិញ ក្រុមប្រជាពលរដ្ឋនៅឃុំមានរិទ្ធិ ស្រុកសណ្ដាន់បានចោទប្រកាន់អាជ្ញាធរស្រុកថា បានយកដីបម្រុងរបស់សហគមន៍ ធ្វើជាកម្មសិទ្ធិផ្ទាល់ខ្លួនទៅវិញ នៅពេលដែលក្រុមនិស្សិតចុះទៅវាស់វែងនោះ។ ប៉ុន្តែ ការចោទប្រកាន់នេះ ត្រូវបានអាជ្ញាធរស្រុកបដិសេធ។
ប្រជាពលរដ្ឋនៅភូមិអូរពកសាមគ្គីជាង ២០០ នាក់ ឃុំមានរិទ្ធិ ខែត្រកំពង់ធំ បានដាក់ពាក្យបណ្ដឹងមកខុទ្ទកាល័យលោកនាយករដ្ឋមន្ត្រី ហ៊ុន សែន ប្ដឹងក្រុមប្រឹក្សាស្រុកសណ្ដាន់ចំនួនបីរូប ពីបទយកដីរួមរបស់សហគមន៍ធ្វើជាកម្មសិទ្ធិផ្ទាល់ខ្លួន។
ប្រជាពលរដ្ឋមួយរូបឈ្មោះ រស់ ស៊ាន បានឲ្យដឹងថា កាលពីថ្ងៃទី២០ កញ្ញា លោកបានយកពាក្យបណ្ដឹងមកដាក់នៅខុទ្ទកាល័យលោកនាយករដ្ឋមន្ត្រី ហ៊ុន សែន ដើម្បីសុំជួយអន្តរាគមន៍លើករណីក្រុមប្រឹក្សាស្រុកសណ្ដាន់ ដែលមានឈ្មោះ ប៉ែន និន ឈ្មោះ គង់ សុខា និងឈ្មោះ ម៉ឹង សាម៉ៃ ហៅ ហ៊ បានយកដីរបស់សហគមន៍ជាង ៤ ហិកតារ ដែលបម្រុងទុកធ្វើសាលារៀន មន្ទីរពេទ្យ និងវត្ត តែត្រូវបានអ្នកទាំងបីចង់យកធ្វើជាកម្មសិទ្ធិផ្ទាល់ខ្លួនទៅវិញ។
លោក រស់ ស៊ាន៖ «ដីហ្នឹងរានថ្មីៗ នៅឆ្នាំ ២០០០។ ខ្ញុំក៏សំណូមពរទុកសម្រាប់ធ្វើជាដីសាធារណៈ ហើយក៏ព្រមឲ្យប្រធានភូមិ ចាស់ព្រឹទ្ធាចារ្យ អ្នកភូមិទាំងអស់គ្រប់គ្រង ពីព្រោះអនាគតទៅ យើងគ្មានអ្វីកសាងទេ ធ្វើសាលារៀន មន្ទីរពេទ្យ»។
លោក រស់ ស៊ាន ឲ្យដឹងទៀតថា កាលពីថ្ងៃទី១១ កញ្ញាកន្លងទៅ ក្រុមប្រឹក្សាស្រុកទាំងបីរូប បានហៅក្រុមនិស្សិតទៅវាស់ដីនោះ ប៉ុន្តែ ត្រូវបានក្រុមប្រជាពលរដ្ឋទៅទប់ស្កាត់មិនឲ្យវាស់។
ក្រុមប្រឹក្សាស្រុកសណ្ដាន់ លោក ប៉ែន និន បំភ្លឺចំពោះការចោទប្រកាន់នេះថា មូលហេតុដែលលោកបានយកដីនោះ ដោយសារតែកាលពី ៥ ឆ្នាំមុន អតីតអភិបាលស្រុកសណ្ដាន់ លោក ផាន់ សុផេង បានរកទីតាំងថ្មីសង់សាលារៀនបានរួចហើយ នៅឆ្ងាយពីទីតាំងចាស់ប្រមាណ ២ គីឡូម៉ែត្រ ហើយលោកក៏បានស្នើសុំដីបម្រុងនោះចែកគ្នាធ្វើចម្ការ។
លោក ប៉ែន និន៖ «ថ្ងៃទី១១ កញ្ញាហ្នឹង ខ្ញុំក៏បានពន្យល់ប្រជាពលរដ្ឋដែរថា យើងទាំងអស់គ្នាលួចកាប់រានដីរបស់រដ្ឋទាំងអស់គ្នា ហើយមិនសមមកដណ្ដើមយកពីខ្ញុំទេ ពីព្រោះថា ពួកខ្ញុំបីបួននាក់នេះ ចែកគ្នាបានម្នាក់កន្លះហិកតារទេ តែប្រជាពលរដ្ឋវិញកាប់រានដីព្រៃរបស់រដ្ឋ បានម្នាក់រាប់សិបហិកតារ រាប់រយហិកតារ»។
ទោះបីជាយ៉ាងនេះក្ដី ក្រុមប្រជាពលរដ្ឋអះអាងថា កាលពីឆ្នាំ ២០១០ មន្ត្រីសាលាស្រុកទាំងនោះ បាននិយាយថា ពួកគាត់ខ្ចីដីនោះ ធ្វើចម្ការជាបណ្ដោះអាសន្នសិន ហើយបើសិនសហគមន៍ត្រូវការដីវិញនៅពេលណា ពួកគាត់នឹងប្រគល់ជូនវិញ។ ដូច្នេះ ប្រជាពលរដ្ឋក៏ស្ងប់ចិត្តតាំងពីពេលនោះមក។ ស្រាប់តែនៅថ្ងៃទី១១ កញ្ញានេះ ទើបផ្ទុះរឿងថា ក្រុមប្រឹក្សាស្រុកទាំងនោះ មានគោលបំណងចង់យកដីនោះ ធ្វើជាកម្មសិទ្ធិផ្ទាល់ខ្លួន ដោយហៅក្រុមនិស្សិតទៅវាស់វែង។
វិទ្យុអាស៊ីសេរីមិនអាចទាក់ទងអតីតអភិបាលស្រុកសណ្ដាន់ លោក ផាន់ សុផេង បានទេ នៅថ្ងៃអាទិត្យទី ២៣ កញ្ញា ឆ្នាំ ២០១២ ដើម្បីសុំបំភ្លឺបន្ថែមអំពីករណីនេះ។
ទោះបីជាយ៉ាងនេះក្ដី ក្រុមប្រឹក្សាឃុំមានរិទ្ធិ លោក សុខ ម៉ាប់ មានប្រសាសន៍ថា កាលពីឆ្នាំ ២០០០ ក្រុមប្រជាពលរដ្ឋបានទៅកាប់រានដីព្រៃរបស់រដ្ឋ នៅតំបន់ភូមិអូរពកសាមគ្គីនោះ ធ្វើចម្ការ និងបង្កើតជាភូមិថ្មី។ ប៉ុន្តែ ប្រជាពលរដ្ឋទាំងនោះ បានរក្សាទុកដីជាង ៤ ហិកតាររួមទាំងអស់គ្នា។ នៅក្នុងឆ្នាំ ២០០៥ ប្រជាពលរដ្ឋ និងមន្ត្រីយោធាស្រុក ក៏បានធ្វើលិខិតស្នើសុំទៅលោកអភិបាលស្រុក ដើម្បីរក្សាទុកដីនោះ សម្រាប់ធ្វើស្នាក់ការបញ្ជាការដ្ឋានទ័ពជើងគោក សាងសង់សាលារៀន មន្ទីរពេទ្យ និងវត្តជាដើម។
លោក សុខ ម៉ាប់៖ «ក្រុមប្រឹក្សាស្រុកហ្នឹង ទៅនាំគ្នាវាស់ចែកគ្នាក្បាល ២០ ម៉ែត្រ ៣០ម៉ែត្រ។ ដល់អ៊ីចឹង ប្រជាពលរដ្ឋពួកគាត់អត់ព្រមទេ។ ពួកគាត់ទៅឃាត់»។
នៅក្នុងពាក្យបណ្ដឹងរបស់ប្រជាពលរដ្ឋដាក់ជូនទៅខុទ្ទកាល័យលោកនាយករដ្ឋមន្ត្រី ហ៊ុន សែន នោះ បានសរសេរថា ក្រុមប្រឹក្សាទាំងនោះ បានគំរាមចាប់ប្រជាពលរដ្ឋដាក់គុក បើសិនជាអ្នកណា នៅតែតវ៉ាអំពីបញ្ហានេះ។ ក៏ប៉ុន្តែ ក្រុមប្រឹក្សាស្រុក លោក ប៉ែន និន បានបដិសេធថា ពុំមានការគំរាមកំហែងចាប់ខ្លួនអ្វីនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
CheyVorman007
ពី AngKor Watខ្មុំមានចម្ងល់មួយដូចនៅស្រុកខ្មែរ ចង់មានការងារធើ្វក្នុងជួរ
រាជការត្រូវអោយលុយទៅគេ(មេឫឯចៅហ្វាយនាយ)កាលឆ្នាំ
មុនមិត្តខ្មុំម្នាក់បានប្រាប់ថាអស់តែប្រាំពាន់ដុល្លានឹងបានចូល
ធើ្វការខាងព្រហ្មទន្ត រកតែពីរបីឆ្នាំរួចខ្លួន ដល់ចង់ឈប់ធើ្វ
លក់កន្លែងនោះទៅវិញបានចំណេញលើសដើម។តើរបៀប
នេះឫដែលធើ្វអោយប្រទេសជាតិរួចផុតពីអំពើរពុករលួយ?
តើប្រទេសណាខ្លះដែលអនុវត្តវិធីសាស្រ្តនេះ?សូមអាស៊ីសេរី
ជួយបំភ្លឺពលរដ្ឆខ្មែរផង អរគុណ
Sep 23, 2012 10:28 AM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
