អ្នកភូមិនៅខេត្តឧត្ដរមានជ័យបារម្ភខ្លាចបាត់បង់ដីធ្លីធ្វើស្រែចម្ការ
2012.12.29
ពុំទាន់ដោះស្រាយរួច គឺដោយសារដីស្រែដែលអ្នកភូមិកំពុងប្រមូលផលស្រូវនោះ បែរជាមានម្ចាស់ដីអះអាងថា បានទិញដី និងបានរារាំងមិនអោយពលរដ្ឋវាស់វែងធ្វើប័ណ្ណកម្មសិទ្ធិ។
អ្នកភូមិពោធិវង្ស ប្រមាណជិត ៥០គ្រួសារ កំពុងព្រួយបារម្ភចំពោះការបាត់បង់ដីធ្លីធ្វើស្រែចម្ការ នៅពេលដែលជម្លោះដីធ្លីបានរារាំងនិស្សិតស្ម័គ្រចិត្តមិនអោយចុះវាស់វែង ចំណែកអាជ្ញាធរពាក់ព័ន្ធហាក់មិនយកចិត្តទុកដាក់ដោះស្រាយ។
តំណាងអ្នកភូមិដែលមានដីស្រែក្នុងតំបន់កំពុងមានជម្លោះ លោក សោម ធឿន មានប្រសាសន៍ថា ក្រុមអ្នកភូមិដែលមកពីតាមតំបន់ផ្សេងៗក្នុងខេត្តឧត្តរមានជ័យ និងពីតាមបណ្ដាខេត្តមួយចំនួនទៀត បានចូលទៅរានព្រៃ និងបង្កើតជាភូមិពោធិវង្ស ដែលនៅមិនឆ្ងាយប៉ុន្មានពីព្រំដែនខ្មែរ-ថៃ បានជិត ១០ឆ្នាំមកហើយ។ លោក សោម ធឿន បន្តថា ក្រុមអ្នកភូមិបានរានព្រៃ ក្នុងនោះគ្រួសារខ្លះបានមួយហិកតារ ខ្លះបាន ២ហិកតារ ក៏នាំគ្នាធ្វើស្រែតាំងពីឆ្នាំ២០០៤ មក។
លោករំលឹកដែរថា រហូតមកដល់ខែកញ្ញា កន្លងទៅ គឺនៅពេលដែលក្រុមនិស្សិតស្ម័គ្រចិត្តចូលមកវាស់វែងដីអោយពលរដ្ឋក្នុងភូមិ បែរជាមានអ្នកមករារាំងថា ដីស្រែរបស់ពលរដ្ឋដែលមានចំនួន ៤៧គ្រួសារ នៅលើទំហំដីជាង ៦០ហិកតារនោះ មានម្ចាស់ផ្សេងទៅវិញ។ រហូតមកដល់ពេលនេះ ក្រុមអ្នកភូមិចេះតែភ័យបារម្ភខ្លាចបាត់ដីធ្វើស្រែ។
លោក សោម ធឿន៖ «៧ឆ្នាំទៅហើយ វាទៅជាដីគេ ហីរហូតដល់យើងមានប័ណ្ណពាក្យស្នើសុំកាន់កាប់អីម៉ាចំនួនដែរ។ ហីដល់អីចឹងទៅ ខ្ញុំមិនដឹងគិតថាម៉េចដល់ថាប៉ះពាល់ទៅលើដីគេ។ អត់ដែលដឹងទេ ទើបនិស្សិតចុះមកកាលវស្សាមិញ។ មកវាស់ហ្នឹង គឺទំនាស់អត់អោយទេ។ ហើយយើងទៅទាមទារដាក់ពាក្យបណ្ដឹងហើយអីហើយ នៅតែមិនបាន។ ដាក់បាត់ៗអីចឹងទៅ មិនដឹងទៅឯណា»។
មេភូមិពោធិវង្ស លោក គឹម សារុន មានប្រសាសន៍ឆ្លើយតបនឹងក្ដីបារម្ភរបស់អ្នកភូមិថា លោកនឹងដោះស្រាយបញ្ហាដើម្បីយកដីស្រែមកអោយប្រជាពលរដ្ឋវិញ។ យ៉ាងនេះក្តី លោក គឹម សារុន មិនបានបញ្ជាក់ទេថា តើលោកនឹងប្រើប្រាស់មធ្យោបាយយ៉ាងណា ដើម្បីរកដំណោះស្រាយឡើយ៖ «ខ្ញុំក៏សន្យាជាមួយប្រជាពលរដ្ឋដែរថា បើដោះស្រាយដីនេះអត់ចេញ ខ្ញុំក៏អត់មានមុខធ្វើមេភូមិដែរ។ ខ្ញុំសន្យាជាមួយគាត់។ ខ្ញុំក៏សង្ឃឹមថាថ្នាក់លើ ខាងស្រុកខាងខេត្តហ្នឹង គាត់ជួយ ព្រោះភូមិនេះទាំងប្រជាពលរដ្ឋទាំងគណៈកម្មការអីមានការស្រុះស្រួលអភិវឌ្ឍន៍គ្រាន់បើដែរ»។
កន្លងមកតាមរយៈការសម្របសម្រួលដោះស្រាយទំនាស់របស់មេភូមិ អ្នកដែលអះអាងថាជាម្ចាស់កម្មសិទ្ធិលើដីស្រែអ្នកភូមិនោះ បានយល់ព្រមប្រគល់ដីទំហំប្រមាណ ៣០ហិកតារ គឺស្មើនឹងពាក់កណ្ដាលនៃទំហំដីសរុបទៅអោយអ្នកភូមិ។ ប៉ុន្តែត្រូវក្រុមអ្នកភូមិបដិសេធ ដោយសំអាងថា ពួកគេមានដីតិចតួច បើចែកពាក់កណ្ដាល គឺពុំនៅសេសសល់អ្វីដែលអាចចិញ្ចឹមគ្រួសារបានឡើយ។
ចៅសង្កាត់បន្សាយរាក់ លោក ហែម សេដា មានប្រសាសន៍ថា លោកនឹងដោះស្រាយបញ្ហាដីធ្លីនេះនៅដើមឆ្នាំថ្មីខាងមុខ៖ «ខេត្តគាត់កំពុងតែដោះស្រាយ ប៉ុន្តែគាត់ជាប់រវល់រឿងចុងឆ្នាំបិទបញ្ជីបិទអី។ មិនបាច់ទៅពិបាកបារម្ភអីប្រជាជន។ ខ្ញុំបានទាក់ទងប្រាប់មេភូមិ គេបានប្ដេជ្ញាចិត្តអីអស់ហើយតើ»។
ពិតមែនថាដីស្រែរបស់ប្រជាពលរដ្ឋទាំងជិត ៤០គ្រួសារ ត្រូវហាមឃាត់មិនអោយក្រុមនិស្សិតស្ម័គ្រចិត្តវាស់វែងក៏ដោយ ក៏អ្នកភូមិមិនបានដឹងទេថាអ្នកណាជាអ្នកដែលអះអាងថាជាម្ចាស់ដី គ្រាន់តែដឹងថាជាមន្ត្រីមានអំណាចម្នាក់នៅឯខេត្តសៀមរាប។ អ្នកភូមិបានសង្ស័យថា ទំនាស់ដីធ្លីក្នុងមូលដ្ឋានរបស់ពួកគាត់ កើតឡើងដោយសារតែការលួចលក់ដីរបស់ពលរដ្ឋពីសំណាក់អាជ្ញាធរមានសមត្ថកិច្ចនៅថ្នាក់មូលដ្ឋាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។