អភិបាលស្រុករងការចោទថារុះរើផ្ទះពលរដ្ឋយកដីលក់ឲ្យឈ្មួញនៅពោធិ៍សាត់

អភិបាលស្រុកវាលវែង ខេត្តពោធិ៍សាត់ កំពុងរងការចោទប្រកាន់ថា បានរុះរើផ្ទះសម្បែងប្រជាពលរដ្ឋនៅចំណុចស្រែយក្ស ដើម្បីរឹបអូសយកដីធ្លីទៅលក់ឲ្យឈ្មួញ។

ដោយ មណ្ឌល កែវ
2012-07-17

h071612pb.mp3

១៦-កក្កដា-២០១២៖ លោក ជិន វន តំណាងឲ្យប្រជាពលរដ្ឋនៅចំណុចស្រែយក្ស ភូមិកំពង់ក្ដី ឃុំក្រពើពីរ។

RFA/Mondul Keo

លោក ជិន វន ដែលបានអះអាងថាជាតំណាងឲ្យប្រជាពលរដ្ឋចំនួន៧០០គ្រួសារ នៅចំណុចស្រែយក្ស ស្ថិតក្នុងភូមិកំពង់ក្ដី ឃុំក្រពើពីរ ស្រុកវាលវែង ខេត្តពោធិ៍សាត់ បានឲ្យដឹងនៅរសៀលថ្ងៃទី១៦ កក្កដា ថា លោក ឆេ ឈីវ អភិបាលស្រុកវាលវែង បានប្រើកម្លាំងចម្រុះរាប់សិបនាក់ និងឡានជាច្រើនគ្រឿងទៅរុះរើផ្ទះសម្បែងអ្នកភូមិ។ ទោះបីជាអ្នកភូមិបានបង្ហាញពីលិខិតស្នាមពាក់ព័ន្ធផ្សេងក្នុងការរស់នៅ ក៏ក្រុមនេះមិនយកភ្នែកមើលឡើយ ហើយថែមទាំងហែកលិខិតស្នាមទាំងនោះចោលទៀតផង។

លោក ជិន វន បន្តថា លោកមានឯកសារជាច្រើនដែលបង្ហាញថា អភិបាលស្រុកវាលវែង គឺលោក ឆេ ឈីវ បានលក់ដីតំបន់នេះទៅឲ្យឈ្មួញរួចហើយ ទើបលោករុះរើផ្ទះអ្នកភូមិ ដើម្បីប្រគល់ដីនេះឲ្យឈ្មួញ៖ «សុំអង្វរករដល់សម្ដេច ហ៊ុន សែន និងលោកជំទាវមេត្តាជួយរកយុត្តិធម៌ដល់ពួកយើងខ្ញុំ ដោយផ្ដល់ដីនេះឲ្យពួកយើងខ្ញុំរស់នៅដោយស្របច្បាប់។ លោក ឆេ ឈីវ បានលក់ដីតំបន់នេះទៅឲ្យឈ្មួញ ហើយមានសង់ផ្ទះមួយយ៉ាងធំនៅទីនោះផង។ ហើយបើសិនជាអាជ្ញាធរគ្រប់លំដាប់ថ្នាក់ចង់ឃើញការពិត សូមអញ្ជើញទៅចំណុចស្រែយក្ស នឹងឃើញការពិតហើយ»។

កាលពីថ្ងៃទី៧ មិនា កន្លងទៅ កម្លាំងចម្រុះក៏បានចុះទៅរុះរើផ្ទះប្រជាពលរដ្ឋចំនួន២៧គ្រួសារ ដោយបានដុតផ្ទះចំនួន៣ខ្នងនៅទីនេះម្ដងរួចហើយ។

ប្រជាពលរដ្ឋឈ្មោះ រស់ ចំរើន នៅស្រុកមោងឫស្សី ខេត្តបាត់ដំបង បានឲ្យដឹងថា គាត់បានមករស់នៅទីនេះកាលពីឆ្នាំ២០០៨។ គាត់មានដីស្រែតែកន្លះហិកតារ កូនក្នុងបន្ទុកច្រើន ហេតុនេះហើយទើបគាត់មកសង់ផ្ទះនៅចំណុចស្រែយក្ស នេះ តែឥឡូវផ្ទះគាត់ត្រូវបានកម្លាំងចម្រុះរុះរើអស់ហើយ៖ «សូមសម្ដេច និងអាជ្ញាធរគ្រប់ជាន់ថ្នាក់ មេត្តាសន្ដោសប្រោសប្រណីដល់យើងខ្ញុំជាប្រជាពលរដ្ឋក្រីក្ររាប់រយគ្រួសារ ដែលកំពុងរងគ្រោះដោយសារការរំលោភបំពានពីអាជ្ញាធរស្រុក ព្រោះការពិតពួកយើងខ្ញុំសុទ្ធតែជាជនក្រីក្រ និងគ្មានដីធ្លីបង្កបង្កើនផលទេ»។

វិទ្យុអាស៊ីសេរី មិនអាចទាក់ទងសុំការបំភ្លឺពីអភិបាលស្រុកវាលវែង លោក ឆេ ឈីវ បានទេ នៅល្ងាចថ្ងៃទី១៦ កក្កដា ដោយលោកបានបិទទូរស័ព្ទនៅពេលដែលអ្នកយកព័ត៌មានវិទ្យុអាស៊ីសេរី បានប្រាប់ពីអត្តសញ្ញាណរបស់ខ្លួន។

យ៉ាងនេះក្ដី អភិបាលខេត្តពោធិ៍សាត់ លោក ខូយ សុខា បានពន្យល់ចំពោះបញ្ហានេះថា ប្រជាពលរដ្ឋបានមកវាតយកដីព្រៃរបស់រដ្ឋ ដើម្បីតាំងទីលំនៅដោយខុសច្បាប់៖ «ខ្ញុំបានទៅដល់កន្លែងនោះហើយៗមានទាំងខាងរដ្ឋបាលព្រៃឈើ និងខាងទូរទស្សន៍ទៀតផង ឃើញថាតំបន់នេះគឺជាដីព្រៃ។ ប្រជាពលរដ្ឋទាំងនេះទៅរំលោភកាន់កាប់ដីព្រៃឈើហ្នឹង។ ឥឡូវយើងអនុវត្តតាមប្រសាសន៍សម្ដេច ដោយមិនឲ្យចាប់យកដីព្រៃកាន់កាប់ទេ។ ហើយបើតាមច្បាប់ អ្នកទាំងនោះត្រូវមានទោសទៀតផង»។

ឯកសារដែលវិទ្យុអាស៊ីសេរី ទទួលបានបង្ហាញថា លោក ជិន វន និងលោក នូ ផេង ជាតំណាងឲ្យប្រជាពលរដ្ឋចំនួន៥២៧គ្រួសារ កាលពីថ្ងៃទី០២ ខែមិនា ឆ្នាំ២០០៩ បានដាក់ពាក្យសុំទៅអាជ្ញាធរខេត្ត ដោយមានការយល់ព្រមពីមេឃុំលោក ទេព កាន់ និងអភិបាលស្រុកលោក អួន យ៉ង់ (បច្ចុប្បន្នជាសមាជិកក្រុមប្រឹក្សាស្រុក) ឲ្យប្រជាពលរដ្ឋទៅរស់នៅចំណុចស្រែយក្ស ស្ថិតក្នុងភូមិកំពង់ក្ដី ឃុំក្រពើពីរ ស្រុកវាលវែង ខេត្តពោធិ៍សាត់ តែពុំទាន់មានការឯកភាពពីអាជ្ញាធរខេត្តនៅឡើយ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។