អាជ្ញាធរខេត្តកំពតដោះស្រាយដីដែលមានជម្លោះជាមួយក្រុមហ៊ុន សូ ងួន
ស្របពេលគ្នានេះដែរ អភិបាលខេត្តកំពត ព្រមានថា ប្រសិនបើអាជ្ញាធរណាយកលុយពីការធ្វើប្លង់នេះ នឹងត្រូវប្រឈមចំពោះមុខច្បាប់។
ក៏ប៉ុន្តែបញ្ហានេះ ត្រូវបានសង្គមស៊ីវិលរិះគន់ថា ធ្វើឡើងក្រោមរូបភាពនយោបាយជាជាងឆន្ទៈពិតប្រាកដ។ ការធ្វើយ៉ាងនេះ ក៏ព្រោះតែរដ្ឋាភិបាលបារម្ភបាត់បង់សំឡេងគាំទ្រក្នុងការបោះឆ្នោតឆ្នាំ ២០១៣ ខាងមុខ។
តំណាងប្រជាពលរដ្ឋអះអាងថា អភិបាលខេត្តកំពត បានបង្ហាញពីជំហរក្នុងការស្វែងរកដំណោះស្រាយលើជម្លោះដីធ្លីដ៏រ៉ាំរ៉ៃរវាងពលរដ្ឋ និងក្រុមហ៊ុនលោកឧកញ៉ា សូ ងួន ដោយចាត់ទុកថា ដីដែលកំពុងមានជម្លោះនោះត្រូវប្រគល់ឲ្យពលរដ្ឋជាអ្នកគ្រប់គ្រងវិញ។
លោក អ៊ុំ សាមិត ដែលអះអាងថាជាតំណាងពលរដ្ឋប្រមាណ ៣០០ គ្រួសារ នៅភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត។លោកមានប្រសាសន៍នៅថ្ងៃទី ១៦ ខែមិថុនាថា អភិបាលខេត្តកំពត គឺលោក ខូយ ឃុនហួរ បានប្រជុំប្រាប់ពលរដ្ឋ ដែលកំពុងមានវិវាទដីធ្លីជាមួយក្រុមហ៊ុនរបស់លោកឧកញ៉ា សូ ងួន កាលពីថ្ងៃទី ១៥ ខែមិថុនាថា រដ្ឋាភិបាលនឹងដោះស្រាយដី ដែលកំពុងប្រទាញប្រទង់គ្នារយៈជាង ៥ ឆ្នាំនេះ ឲ្យពលរដ្ឋវិញ។ លោកបញ្ជាក់ថា ក្នុងចំណាត់ការនេះ លោក ខូយ ឃុនហួរ បានព្រមាននឹងចាត់វិធានការតាមផ្លូវច្បាប់ ទៅលើមន្រ្តីណាយកលុយពីពលរដ្ឋជាថ្នូរទៅនឹងការចេញប្លង់កម្មសិទ្ធិនោះ។
លោកបន្តថា៖ «បើមានជនដែលទាមទារអើលុយកាក់ថ្លៃសាំងម៉ូតូអីរាយការណ៍ប្រាប់គាត់ចាប់ដាក់គុកហើយអភិបាលស្រុកអី មេឃុំអី វាទយកដីកន្លែងហ្នឹង គឺអត់បានទេ។ គាត់ក៏ចាប់ដាក់គុកទាំងអស់»។
វិទ្យុអាស៊ីសេរីពុំអាចស្នើសុំការបំភ្លឺពីលោក ខូយ ឃុនហួរ អភិបាលខេត្តកំពតបានទេ នៅថ្ងៃសៅរ៍ ទី ១៦ មិថុនា ជុំវិញបញ្ហានេះ។
តំណាងពលរដ្ឋឲ្យដឹងថា ដីដែលកំពុងមានជម្លោះ នៅភូមិព្រៃពាយជាង ៣.០០០ ហិកតារនេះ មិនមែនតែក្រុមហ៊ុនរបស់លោកឧកញ៉ា សូ ងួន នោះទេ ដែលដណ្ដើមកាន់កាប់។ពោលគឺ នៅមានមន្ត្រីមានអំណាច ២ រូបទៀត គឺលោកស្រី ម៉ែន សំអន ឧបនាយករដ្ឋមន្ត្រីប្រចាំ និងលោក ចម ប្រសិទ្ធ រដ្ឋមន្ត្រីក្រសួងពាណិជ្ជកម្មក៏បានទៅទន្ទ្រានយកដែរ ក្នុងរយៈជាង ៣ ខែចុងក្រោយនេះ។
ទាក់ទិនបញ្ហានេះ មន្ត្រីស៊ើបអង្កេតរបស់អង្គការការពារសិទ្ធិមនុស្ស លីកាដូ (Licadho) គឺលោក ឌឿ សុខុម ដែលតែងឃ្លាំមើលក្នុងជម្លោះដីធ្លីរវាងពលរដ្ឋ និងក្រុមហ៊ុនលោក សូ ងួន។លោកចាត់ទុកថា នេះគ្រាន់តែជាសារនយោបាយជាជាងឆន្ទៈក្នុងការស្វែងរកដំណោះស្រាយដ៏ពិតប្រាកដលើផ្នែកនេះ។
លោកបន្តថា៖ «យើងគិតថានេះធ្វើឡើងតាមរយៈបទបញ្ជារបស់អើលោកនាយករដ្ឋមន្ត្រីច្រើនជាងឆន្ទៈរបស់អាជ្ញាធរខេត្ត ដែលគាត់ចង់ដោះស្រាយ ហើយអើការធ្វើបទបញ្ជានេះបើតាមយោបល់របស់ខ្ញុំផ្ទាល់ខ្ញុំគិតថា ដោយសារតែទាក់ទងនឹងនយោបាយទាក់ទងនឹងសំឡេងឆ្នោតរបស់ប្រជាពលរដ្ឋ ដែលធ្វើការគាំទ្រទៅលើគណបក្សប្រឆាំងចំនួនពីរ»។
វិទ្យុអាស៊ីសេរីពុំអាចស្នើសុំប្រតិកម្មបានទេពីលោកស្រី ម៉ែន សំអន និងលោក ចម ប្រសិទ្ធិ ជុំវិញការអះអាងរបស់ពលរដ្ឋនេះទេ។
ក៏ប៉ុន្តែ លោកឧកញ៉ា សូ ងួន ដែលជាភាគីពាក់ព័ន្ធក្នុងជម្លោះដីធី្លនេះ លោកមានប្រសាសន៍ថា ក្រុមហ៊ុនរបស់លោកបានកាត់ដីមួយចំណែកសម្រាប់ពលរដ្ឋរួចរាល់ហើយ ដើម្បីបញ្ចៀសបញ្ហា និងអនុវត្តតាមគោលនយោបាយរបស់រដ្ឋាភិបាល។
លោកបន្តថា៖ «ប្រសាសន៍របស់សម្ដេចធ្វើហ្នឹង គឺល្អមែនទែន ដូចគំនិតរបស់ខ្ញុំៗ មានគំនិតធ្វើមុនគាត់តាំងពីមុន ២០១២ ឃើញហ្អេ។ ព្រោះយើងធ្វើអញ្ចឹង ដើម្បីឲ្យប្រជាជនក៏រស់សេដ្ឋកិច្ចជាតិក៏រស់ក្រុមហ៊ុនក៏រស់។ បើយើងគិតតែពីទាស់គ្នា អាហ្នឹងដំណើរអត់ចេញទាំងអស់គ្នា។ ស្ទះតែរហូត»។
បើទោះជាយ៉ាងនេះក្តី ក្រុមអង្គការសង្គមស៊ីវិល ដែលឃ្លាំមើលការវិវាទដីធ្លីនៅកម្ពុជាចាត់ទុកថា ការប្រញាប់ប្រញាល់របស់រដ្ឋាភិបាលព្យាយាមកាត់បន្ថយបញ្ហាក្នុងជម្លោះដីធ្លីនេះ គឺជាឆន្ទៈនយោបាយបារម្ភការបាត់បង់សំឡេងគាំទ្រក្នុងអាណត្តិបោះឆ្នោតសកលឆ្នាំ ២០១៣ ខាងមុខនេះ។
កាលពីថ្ងៃទី ៥ ខែមិថុនាពលរដ្ឋប្រមាណ ៥០ នាក់ បានយកញត្តិរបស់អ្នកភូមិដែលមានស្នាមមេដៃចំនួន ២០០ នាក់ ដាក់ចូលសាលាខេត្តកំពត ដើម្បីជំរុញឲ្យមានដំណោះស្រាយជម្លោះដីធ្លី ជាមួយក្រុមហ៊ុនលោកឧកញ៉ា សូ ងួន ដែលបានអូសបន្លាយ អស់រយៈពេលជាង ៥ ឆ្នាំ ចាប់តាំងមានជម្លោះក្នុងឆ្នាំ ២០០៦។
ការទាមទាររបស់ពលរដ្ឋនេះ ធ្វើឡើងនៅបន្ទាប់ពីពួកគេទទួលដំណឹងថា ប្រមុខរដ្ឋាភិបាលលោកនាយករដ្ឋមន្ត្រី ហ៊ុន សែន ប្រកាសឲ្យក្រសួង ស្ថាប័ន និងអាជ្ញាធរ បញ្ឈប់ការផ្ដល់ដីសម្បទានសេដ្ឋកិច្ចបណ្ដោះអាសន្ន ដែលប៉ះពាល់ដល់ដីពលរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
