ពលរដ្ឋរស់នៅជាប់របងប្រលានយន្តហោះពុំទទួលយកដំណោះស្រាយអាជ្ញាធរ
h080112ho1.mp3
ទោះយ៉ាងណា ពួកគាត់បានអត់ធ្មត់មិនធ្វើបាតុកម្មប្រឆាំងនឹងអាជ្ញាធរតាមផ្លូវសាធារណៈនោះទេ ប៉ុន្តែពួកគាត់បានព្យាយាមស្វែងរកអន្តរាគមន៍ពីលោកនាយករដ្ឋមន្ត្រី និងការដោះស្រាយតាមផ្លូវច្បាប់ នៅក្នុងអំឡុងពេលកំណត់ឲ្យចាកចេញរបស់អាជ្ញាធរនោះ។
អាជ្ញាធរបានជូនដំណឹងជាច្រើនលើកមកហើយដល់ពលរដ្ឋ ដែលរស់នៅជាប់របងប្រលានយន្តហោះអន្តរជាតិភ្នំពេញ ឲ្យរើផ្ទះចេញពីរបងប្រលានប្រមាណ១០ម៉ែត្រ ដើម្បីពង្រីកផ្លូវជុំវិញប្រលានយន្តហោះនេះ។ អាជ្ញាធរក៏បានបញ្ជាក់ជូនពលរដ្ឋដែរថា ក្នុងការរុះរើផ្ទះនោះ រដ្ឋពុំមានចេញសំណងជូនទេ ដោយរដ្ឋក្រ ពុំមានលុយចេញថ្លៃសំណងនោះបានឡើយ។
ប៉ុន្តែ ពលរដ្ឋមិនអាចទទួលយកសេចក្តីជូនដំណឹង និងការស្នើសុំរបស់អាជ្ញាធរនោះឡើយ។ ដោយសារពួកគាត់ក្រីក្រ ហើយដី និងផ្ទះនោះ ពួកគាត់ទិញដូរស្របច្បាប់ មានអាជ្ញាធរទទួលដឹងឮត្រឹមត្រូវ ម្យ៉ាងប្លង់ដី និងផ្ទះទាំងនោះ ពួកគាត់ភាគច្រើនបានដាក់បញ្ចាំនៅធនាគារ ដើម្បីយកប្រាក់ធ្វើផ្ទះនោះ។
ពលរដ្ឋម្នាក់ លោកស្រី ភួង សុភាព បានឲ្យដឹងថា ពួកគាត់ធ្លាប់ជាជនរងគ្រោះម្តងរួចមកហើយ ដោយសារអាជ្ញាធរក្រុង និងក្រុមហ៊ុនបណ្ដេញចេញពីបុរីកីឡា។ គាត់បានប្រាក់សំណងបន្តិចបន្តួច មកទិញដីធ្វើផ្ទះនៅភូមិថ្មគោល នេះ។ ទីបំផុត ក៏ជួបបញ្ហាបណ្ដេញចេញដោយពុំមានសំណងទៀត។
បុរសអ្នកភូមិម្នាក់ទៀត បានថ្លែងដែរថា រដ្ឋថាក្រ ពុំមានលុយផ្តល់សំណង តើពលរដ្ឋមានអ្វីមកពីណា បើរកមួយថ្ងៃមិនគ្រប់មួយថ្ងៃ ហើយមុខរបររកស៊ី និងផ្ទះសម្បែងធ្វើឡើងដោយជំពាក់លុយធនាគារសងមិនរួចផងនោះ។
ទោះយ៉ាងណាក្តី ពលរដ្ឋមិនទាន់បញ្ចេញប្រតិកម្មតវ៉ាតាមដងផ្លូវនោះទេ ប៉ុន្តែពួកគាត់បានជ្រើសយកការដោះស្រាយតាមផ្លូវច្បាប់ ដោយពឹងពាក់អ្នកច្បាប់របស់អង្គការមិនមែនរដ្ឋាភិបាលនានា។
អង្គការស្រាវជ្រាវជាតិកម្ពុជា (CNRO) ជាអង្គការមួយក្នុងចំណោមអង្គការសិទ្ធិមនុស្សដទៃទៀត ដែលបានទទួលយកពាក្យបណ្ដឹងពីប្រជាពលរដ្ឋ និងបានចុះសិក្សាស្រាវជ្រាវលើករណីនេះ។ អង្គការនេះបានរៀបចំឯកសារផ្លូវច្បាប់មួយ ដោយមានពាក្យបណ្ដឹងរបស់ប្រជាពលរដ្ឋ និងស្នាមមេដាយផង ដាក់ជូនទៅលោកនាយករដ្ឋមន្ត្រី នៅថ្ងៃទី៣១ កក្កដា ដើម្បីសុំកិច្ចអន្តរាគមន៍ទៅអាជ្ញាធរ ឲ្យបញ្ឈប់ការបណ្ដេញពលរដ្ឋចេញដោយពុំមានសំណងយ៉ាងដូច្នេះ។
ប្រធានអង្គការស្រាវជ្រាវជាតិកម្ពុជា និងក្នុងនាមគណៈកម្មាធិការពង្រឹងវិស័យច្បាប់ ដើម្បីការពារសិទ្ធិមនុស្សនៅកម្ពុជា លោកបណ្ឌិត ហ៊ាង ឫទ្ធី លោកមានប្រសាសន៍ពន្យល់តាមផ្លូវច្បាប់ថា រដ្ឋធម្មនុញ្ញកម្ពុជាមាត្រាទី៤៤ ត្រង់វាក្យខណ្ឌទី៣ បានចែងថា កម្មសិទ្ធិឯកជនស្របច្បាប់ស្ថិតនៅក្រោមការគាំពារនៃច្បាប់។ ចំណែកវាក្យខណ្ឌទី៤ បានចែងថា ដែលនឹងដកហូតកម្មសិទ្ធិជនណាមួយបាននោះ លុះត្រាតែប្រយោជន៍សាធារណៈតម្រូវឲ្យធ្វើក្នុងករណីដែលច្បាប់បានបញ្ញត្តិទុក ហើយត្រូវផ្តល់សំណងជាមុនដោយសមរម្យ និងយុត្តិធម៌។ មាត្រាទី៥ នៃច្បាប់ភូមិបាល បានចែងដែរថា គ្មានបុគ្គលណាមួយត្រូវបានគេដកហូតសិទ្ធិរបស់ខ្លួនបានទេ ប្រសិនការដកហូតសិទ្ធិនេះមិនមែនដើម្បីប្រយោជន៍សាធារណៈ។ ការដកហូត ត្រូវធ្វើទៅតាមទម្រង់នៅនីតិវិធីបញ្ញត្តិដោយច្បាប់ និងបទបញ្ជា បន្ទាប់ពីបានផ្តល់សំណងដោយសមរម្យ និងយុត្តិធម៌។
លោកបន្តថា យោងតាមច្បាប់ និងឯកសារដែលអាជ្ញាធរចេញឲ្យគាត់ប្រើប្រាស់លើកិច្ចការផ្សេងៗនោះ ពលរដ្ឋមិនត្រូវគេបណ្ដេញចេញដោយពុំមានសំណងនោះទេ។
លោក សៀ ភារម្យ នាយកលេខាធិការដ្ឋានក្រុមការងារពិសេសសិទ្ធិលំនៅឋាន លោកក៏បានលើកហេតុផលបញ្ជាក់ស្រដៀងគ្នានេះដែរ។ លោកបន្តថា បើសិនអាជ្ញាធរនៅតែអនុវត្តតាមសេចក្តីជូនដំណឹងរបស់ខ្លួននោះទៀត វាគឺជាករណីរំលោភច្បាប់ និងរំលោភសិទ្ធិមនុស្សយ៉ាងធ្ងន់ធ្ងរ។
វិទ្យុអាស៊ីសេរី ពុំទាន់អាចទាក់ទងអាជ្ញាធរខណ្ឌពោធិ៍សែនជ័យ និងអភិបាលរាជធានីភ្នំពេញ ដើម្បីសុំសេចក្តីពន្យល់លើបញ្ហានេះបានទេ នៅរសៀលថ្ងៃពុធ ទី០១ សីហា។
ប៉ុន្តែ អាជ្ញាធរខណ្ឌពោធិ៍សែនជ័យ កាលពីថ្ងៃទី២៥ កក្កដា កន្លងទៅ បានចេញសេចក្តីជូនដំណឹងមួយ ដោយយោងទៅតាមស្មារតីប្រជុំអង្គប្រជុំ នៅសាលារាជធានីភ្នំពេញ ថ្ងៃទី០២ កក្កដា បានបង្ហាញថា ពលរដ្ឋទាំងអស់ដែលបានសង់ផ្ទះ និងសំណង់គ្រប់ប្រភេទនៅជាប់របងអាកាសយានដ្ឋានអន្តរជាតិភ្នំពេញ ផ្នែកខាងត្បូងនោះ ជាសំណង់អនាធិបតេយ្យ ដោយបានយករបងអាកាសយានដ្ឋានធ្វើជាជញ្ជាំងផ្ទះ។
សេចក្តីជូនដំណឹង បានបង្ហាញទៀតថា ដើម្បីរក្សាសណ្ដាប់ធ្នាប់ សោភ័ណភាព សន្តិសុខ សុវត្ថិភាព អាកាសយានដ្ឋានអន្តរជាតិភ្នំពេញ សូមឲ្យពលរដ្ឋរុះរើចេញឲ្យបានគម្លាតពីរបងនោះប្រវែង១០ម៉ែត្រ ដោយស្ម័គ្រចិត្ត ហើយក្នុងរយៈពេល៧ថ្ងៃ ដោយគិតចាប់ពីថ្ងៃទី២៧ កក្កដា ដល់ថ្ងៃទី០២ សីហា ឆ្នាំ២០១២។
ក្នុងករណីរឹងរូសមិនអនុវត្តទៅតាមខ្លឹមសារសេចក្តីជូនដំណឹង សាលាខណ្ឌនឹងចុះចាត់វិធានការរដ្ឋាភិបាលរុះរើ ដោយពុំទទួលខុសត្រូវរាល់ការខូចខាត បាត់បង់ទ្រព្យសម្បត្តិ សម្ភារៈផ្សេងៗឡើយ។
ចំពោះបញ្ហានេះ លោក ហ៊ាង ឫទ្ធី មានប្រសាសន៍ថា តាមការពិនិត្យលើស្ថានភាពជាក់ស្តែង និងតាមផ្លូវច្បាប់ ឃើញថាការរស់នៅរបស់ប្រជាពលរដ្ឋនៅតំបន់នោះ ពុំមែនជាប្រភេទសំណង់អនាធិបតេយ្យទេ។
តែទោះយ៉ាងណា នៅរសៀលថ្ងៃពុធ ទី០១ សីហា អាជ្ញាធរខណ្ឌពោធិ៍សែនជ័យ បានប្រកាសពន្យារពេលនៃការរុះរើផ្ទះប្រជាពលរដ្ឋ តាមរយៈតំណាងប្រមាណ៦នាក់ បន្ទាប់ពីពួកគាត់បានស្វែងរកដំណោះស្រាយពីអភិបាលរាជធានីភ្នំពេញ។
ក្នុងពេលនោះដែរ អាជ្ញាធរខណ្ឌបានសម្របសម្រួលជាមួយប្រជាពលរដ្ឋស្ម័គ្រចិត្តបរិច្ចាគដីទទឹង៥ម៉ែត្រ និង៥ម៉ែត្រទៀត គិតតាមគម្រោងដោះដូររបស់អាជ្ញាធរ។ ប៉ុន្តែតំណាងពលរដ្ឋពុំទទួលយកការសម្របសម្រួលនោះឡើយ។
ពលរដ្ឋចាប់ផ្ដើមចូលទៅរស់នៅតំបន់នោះ ចាប់ពីឆ្នាំ២០០៩ ដោយបានទិញដីពីម្ចាស់ដើម ដែលធ្លាប់កាន់កាប់ដីនោះ នៅមុនឆ្នាំ២០០៩ បន្តគ្នារហូតមក ដោយមានអាជ្ញាធរ ចាប់ពីថ្នាក់សង្កាត់ រហូតដល់អាជ្ញាធរខណ្ឌ បានទទួលស្គាល់ចំពោះការលក់ដូរ និងការសង់ផ្ទះរស់នៅទីនោះ ដោយស្របច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
