ពលរដ្ឋខេត្តព្រះសីហនុ រិះគន់ក្រុមនិស្សិតថាខកខានវាស់ដីពួកគាត់
h072512in.mp3
ពលរដ្ឋដែលអះអាងថាជាតំណាងអោយប្រជាពលរដ្ឋជិត២០គ្រួសារ រស់នៅតំបន់វាលទ្រៀក ក្នុងភូមិស្ទឹងឆាយខាងជើង ឃុំស្ទឹងឆាយ ស្រុកកំពង់សីលា ខេត្តព្រះសីហនុ ស្នើអោយក្រុមនិស្សិត និងអាជ្ញាធរមូលដ្ឋានវាស់វែងដីធ្លីពួកគាត់ ដើម្បីបញ្ចប់ជម្លោះដីធ្លី បន្ទាប់ពីពួកគេទទួលដំណឹងថា ក្រុមនិស្សិតដែលបំពេញបេសកកម្មវាស់ដីធ្លីនៅក្នុងតំបន់នោះ បានបញ្ចប់ការងារខ្លួន និងបានដកត្រឡប់ទៅវិញ។
ពលរដ្ឋម្នាក់ គឺលោក ម៉ុក សុផល មានប្រសាសន៍តាមទូរស័ព្ទ នៅរសៀលថ្ងៃពុធទី២៥ ខែកក្កដា ថា ក្រុមនិស្សិតដែលបំពេញតួនាទីជាអ្នកវាស់វែងដីប្រគល់អោយប្រជាពលរដ្ឋទៅតាមបទបញ្ជារបស់លោកនាយករដ្ឋមន្ត្រី ហ៊ុន សែន បានចុះទៅដល់ទីតាំងដីទំនាស់ និងបានវាស់វែងដីប្រគល់អោយពលរដ្ឋជាច្រើនគ្រួសាររួចហើយដែរ។
លោក ម៉ុក សុផល បន្តថា លោកបានទទួលដំណឹងថា ក្រុមនិស្សិតទាំងនោះបានត្រឡប់ទៅវិញហើយ ប៉ុន្តែនៅមិនទាន់បានវាស់វែងដីជាច្រើនហិកតារទៀត សម្រាប់ពលរដ្ឋជិត២០គ្រួសារ ដែលដីធ្លីពួកគាត់ត្រូវក្រុមហ៊ុនឈូសឆាយបំផ្លាញ និងបានដាំកូនដូងប្រេងកាលពីឆ្នាំ២០១១។
លោក ម៉ុក សុផល៖ «សល់អឺ ប្រាំ ប្រាំមួយម៉ែត្រ អ្នកខ្លះសល់ម៉ាផ្ទះអីចឹង ហ្នឹងគេធ្វើ (វាស់វែង) អោយ។ តែដល់ដីប៉ះពាល់ គេអត់ធ្វើអោយ គេនិយាយថា គេចាំដោះស្រាយវគ្គក្រោយ។ ហើយពេលដែលមក គេមិនធ្វើផង ហើយចុះទម្រាំវគ្គក្រោយ តើពលរដ្ឋសង្ឃឹមអី។ ហ្នឹងខាងនិស្សិត ខ្ញុំតាមសួរថា មកហ្នឹងមកយ៉ាងម៉េចវិញ? បើមកក្នុងនាមដោះស្រាយ គឺដីមានបញ្ហា បានពាក្យថាដោះស្រាយ ហើយចុះបើមកគ្មានធ្វើតាមគោលការណ៍ផង មកសម្រាប់តែដីនៅសល់ហ្នឹង»។
ពលរដ្ឋម្នាក់ទៀត លោក អ៊ុន ទី បានអោយដឹងថា មិនខុសពីប្រជាពលរដ្ឋទាំងជិត២០គ្រួសារ ដែលនៅសេសសល់នៅពេលនេះទេ ដីចម្ការរបស់លោកទំហំជាង ៣ហិកតារ ត្រូវក្រុមហ៊ុនឈូសឆាយទាំងស្រុង។ លោក អ៊ុន ទី បានចោទសួរថា តើមានមូលហេតុអ្វីបានជាក្រុមនិស្សិតមិនព្រមវាស់វែងដីអោយពួកគាត់។
លោកក៏បានអំពាវនាវអោយមានអន្តរាគមន៍ ធ្វើយ៉ាងណាអោយក្រុមនិស្សិតដែលពួកគាត់ទន្ទឹងចាំ ថាអាចជួយដោះស្រាយបញ្ហារបស់គាត់នោះ នឹងវាស់វែងដីអោយពួកគាត់៖ «ចង់បានអោយអន្តរាគមន៍អោយបានរីករាយខ្លះផង អស់សង្ឃឹមហើយ។ អស់រលីងដីខ្ញុំហ្នឹង ផ្ទះរុញកប់ទៀត រុញកប់ចោល ឈើនៅសល់ហ្នឹងឥឡូវហ្នឹង»។
ឆ្លើយតបចំពោះការចោទប្រកាន់នេះ មេឃុំស្ទឹងឆាយ លោក ហេង ហឿន មានប្រសាសន៍ថា ក្រុមនិស្សិតដែលចុះទៅវាស់វែងដីធ្លីនៅក្នុងឃុំរបស់លោកនោះ នៅមិនទាន់បញ្ចប់ការវាស់វែងនៅឡើយទេ។
លោក ហេង ហឿន បន្តថា ភាពយឺតយ៉ាវក្នុងការវាស់វែងដីធ្លីនៅក្នុងចំណុចវាលទ្រៀក នោះ កើតឡើងដោយសារតែប្រជាពលរដ្ឋមួយចំនួនបានរារាំងមិនអោយពួកគេចុះវាស់វែង និងមានការបន្លំបន្ថែមចំនួនគ្រួសារដែលត្រូវបានដី៖ «នៅក្នុងហ្នឹងមានអ្នកបង្ខាំងដីមិនអោយក្រុមការងារវាស់ ដ៏អីចឹងវាជំទាស់ទាំងដីដែលប្រជាជនអត់មានដី វាជំទាស់អត់អោយគេវាស់។ បើមិនអោយវាស់ក៏ក្រុមយើងនៅតែវាស់អោយប្រជាជនដែលអត់នោះដែរ។ ឥឡូវហ្នឹង នៅវាស់អត់ទាន់ហើយទេ មិនទាន់ទេថ្ងៃហ្នឹង វាស់ទៀតនៅជាង២០គ្រួសារ»។
របាយការណ៍ពីសមាគមការពារសិទ្ធិមនុស្ស អាដហុក (Adhoc) អោយដឹងថា ជម្លោះដីធ្លីនៅតំបន់វាលទ្រៀក បានកើតឡើងកាលពីឆ្នាំ២០១១។ ប្រជាពលរដ្ឋជាង៤០គ្រួសារ បានចោទប្រកាន់ក្រុមហ៊ុនដាំដើមដូងប្រេងរបស់លោកឧកញ៉ា ម៉ុង ឬទ្ធី ថាបានឈូសឆាយរំលោភយកដីរបស់ពួកគាត់ ហើយជម្លោះដីនោះបានបន្តរហូតដល់តុលាការ និងមិនអាចបញ្ចប់រហូតដល់ពេលនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
