កោះពេជ្រដែលមានឈ្មោះពេញថា មជ្ឈមណ្ឌលសន្និបាត និងពិព័រណ៍កោះពេជ្រ បានសង់ស្ពានថ្មីចំនួន ៣ បន្ថែមទៅលើស្ពានចាស់ដែលមានកន្លងមក ដែលធ្វើឲ្យចំនួនស្ពានឆ្លងចូល និងចេញកោះពេជ្រទាំងអស់មាន៥។ ស្ពានទាំង ៣ ដែលសង់ថ្មីនោះ មានឈ្មោះថា ស្ពានឥន្ទធនូ និងស្ពានភ្លោះនាគរាជ។
ការសាងសង់ស្ពានថ្មីបន្ថែមនេះ ជាការគិតគូរមួយក្រោយពីទទួលបានមេរៀនដ៏តក់ស្លុត កាលពីថ្ងៃទី២២ ខែវិច្ឆិកា ឆ្នាំ២០១០ កន្លងទៅ។
លោក ផៃ ស៊ីផាន រដ្ឋលេខាធិការទីស្ដីការគណៈរដ្ឋមន្ត្រី និងជាអ្នកនាំពាក្យគណៈរដ្ឋមន្ត្រី បានមានប្រសាសន៍ថា ហេតុការណ៍កោះពេជ្រមានមនុស្សស្លាប់ជាង ៣០០នាក់ កាលពីឆ្នាំ២០១០ កន្លងទៅនោះ ជាអនុស្សាវរីយ៍ ជាមេរៀន និងជាការពិសោធដ៏ជូរចត់របស់រដ្ឋាភិបាល របស់អាជ្ញាធរមានសមត្ថកិច្ចក្នុងកិច្ចការពារពិធីបុណ្យដែលមានមនុស្សចូលរួមច្រើនកុះករ។
លោក ផៃ ស៊ីផាន បានបញ្ជាក់ថា ក្រោយពេលមានហេតុការណ៍កោះពេជ្រមានមនុស្សស្លាប់នោះ អាជ្ញាធរបានដោះស្រាយបញ្ហា ៣ ជាសំខាន់ គឺមានការជួយសង្គ្រោះ ការកែលំអហេដ្ឋារចនាសម្ព័ន្ធ ទីកន្លែងកើតហេតុ និងការរៀបចំឲ្យមានវិធានការម៉ត់ចត់ត្រៀមជាមុនសម្រាប់ពិធីផ្សេងៗលើកក្រោយទៀត។
ក្រៅពីសាងសង់ស្ពានបន្ថែម និងដាក់សញ្ញាចរាចរណ៍ដើម្បីសម្រួលចរាចរណ៍កុំឲ្យមានការកកស្ទះ និងដើម្បីឲ្យងាយស្រួលក្នុងការចេញចូលកោះពេជ្រនោះ កោះពេជ្រមានសង់អគារថ្មីៗបន្ថែមលើចំនួនអគារចាស់ដែលមានជាច្រើនថែមទៀត ហើយក៏មានហាងលក់ទំនិញ និងហាងលក់ចំណីអាហារមួយចំនួនបានបើកថ្មីៗ និងកន្លែងសម្រាប់កុមារា កុមារី ទៅជិះសេះ ជិះទោងកម្សាន្តផងដែរ។
បន្ថែមពីការសាងសង់ស្ពានបន្ថែម អគារថ្មីៗ ហាងទំនិញថ្មីៗ និងទំនើបសម្រាប់កម្សាន្តសប្បាយនៅលើកោះពេជ្រនោះ ក៏មានសាងសង់ស្តូបរំលឹកវិញ្ញាណក្ខន្ធអ្នកស្លាប់ដោយសារការផ្អើលជាន់គ្នានៅលើកោះពេជ្រ កាលពីបុណ្យអុំទូកឆ្នាំ២០១០ ដើម្បីជាកិច្ចរំលឹក និងគោរពដល់អ្នកអ្នកស្លាប់។
លោក កែប ជុតិមា អភិបាលរាជធានីភ្នំពេញ ធ្លាប់បានមានប្រសាសន៍ក្នុងឱកាសចូលរួមក្នុងពិធីបញ្ចុះបឋមសិលាស្ថាបនាស្តូបរំលឹកវិញ្ញាណក្ខន្ធអ្នកស្លាប់លើកោះពេជ្រ កាលពីខែសីហា ឆ្នាំ២០១១ ថា ព្រឹត្តិការណ៍យប់ថ្ងៃទី២២ ខែវិច្ឆិកា ឆ្នាំ២០១០ កន្លងទៅ គឺជាបទពិសោធន៍មួយដ៏ឈឺចាប់ដែលត្រូវកត់ត្រាទុកនៅក្នុងប្រវត្តិសាស្ត្ររបស់រាជធានីភ្នំពេញ ហើយក៏ជាមេរៀនដ៏ឈឺចាប់មួយដែលគ្មានអ្នកណាអាចភ្លេចបានឡើយ ជាពិសេសអាជ្ញាធរមានសមត្ថកិច្ចខ្លួនឯង ត្រូវតែគិតអំពីមេរៀននេះឲ្យបានម៉ត់ចត់នៅពេលមានពិធីធំៗដែលមានមនុស្សច្រើនចូលរួម។
លោកនាយករដ្ឋមន្ត្រី ហ៊ុន សែន ធ្លាប់បានមានប្រសាសន៍ថា ការស្លាប់មនុស្សនៅកោះពេជ្រនេះ ជាមេរៀនដ៏ធំមួយសម្រាប់អាជ្ញាធរមានសមត្ថកិច្ចក្នុងការគ្រប់គ្រងហ្វូងមហាជនដ៏ច្រើន ហើយមេរៀននេះមិនមែនសម្រាប់តែក្នុងពេលបុណ្យអុំទូកមួយមុខប៉ុណ្ណោះទេ តែវាជាមេរៀនសម្រាប់គ្រប់ពិធីបុណ្យធំៗទាំងអស់ក្នុងពេលអនាគត។ អាជ្ញាធរត្រូវតែមានផែនការឲ្យបានម៉ត់ចត់ ដើម្បីបញ្ចៀសនូវហេតុការណ៍ដែលកើតមានដូចនៅលើស្ពានកោះពេជ្រនេះ។
ទាក់ទងជាមួយហេតុការណ៍លើកោះពេជ្រនោះ លោក សុន ឆ័យ សមាជិកសភាមកពីគណបក្ស សម រង្ស៊ី បានមានប្រសាសន៍ថា គេត្រូវតែចងក្រងរបាយការណ៍មួយលម្អិតទាក់ទងទៅនឹងហេតុការណ៍ស្លាប់មនុស្សនោះ ហើយត្រូវតែមានអ្នកទទួលខុសត្រូវលើហេតុការណ៍នោះ។
ចំណែកឯលោក កឹម សុខា ប្រធានគណបក្សសិទ្ធិមនុស្ស បានលើកឡើងថា គេត្រូវការពារកុំឲ្យមានហេតុការណ៍បែបនេះកើតឡើងតទៅទៀត។ ដូចលោក សុន ឆ័យ ដែរ លោក កឹម សុខា បានទាមទារឲ្យមានការដាក់ទោសចំពោះអ្នកទទួលខុសត្រូវការពារសុវត្ថិភាពក្នុងពេលបុណ្យនោះ។
ប៉ុន្តែលោក ផៃ ស៊ីផាន រដ្ឋលេខាធិការទីស្ដីការគណៈរដ្ឋមន្ត្រី បានច្រានចោលការទាមទារឲ្យមានការផ្ដន្ទាទោសចំពោះអ្នកទទួលខុសត្រូវព្រឹត្តិការណ៍កោះពេជ្រនោះ។ លោកបានមានប្រសាសន៍ថា នោះជាការទទួលខុសត្រូវរួម។
ក្រៅពីជាកន្លែងកម្សាន្ត និងកន្លែងមានហាងទំនិញ កោះពេជ្រជាកន្លែងពេញនិយមរបស់ក្រុមហ៊ុនមួយចំនួនក្នុងការតាំងពិព័រណ៍ផលិតផល និងមានប្រជាពលរដ្ឋមួយចំនួនបានរៀបចំជប់លៀង និងរៀបអាពាហ៍ពិពាហ៍កូនចៅនៅទីនោះដែរ។ គេបានលើកឡើងថា ទីកន្លែង កោះពេជ្រនោះមានទីតាំងចតរថយន្តទូលាយជាងកន្លែងផ្សេងទៀត។
ពិតមែនតែកោះពេជ្រធ្លាប់មានមនុស្សទៅកម្សាន្ត ហើយផ្អើលជាន់គ្នាស្លាប់មនុស្ស ៣៥៣នាក់ និងរបួសជិត ៤០០នាក់ តែបច្ចុប្បន្ននេះ កោះពេជ្រនៅតែជាទីកម្សាន្ត កន្លែងយកខ្យល់អាកាសរបស់អ្នករស់នៅទីក្រុងភ្នំពេញមួយចំនួន នៅចុងសប្ដាហ៍ដដែល។ មិនតែប៉ុណ្ណោះ កោះពេជ្របានល្បីឈ្មោះ ធ្វើឲ្យមនុស្សជាច្រើនបានស្គាល់ និងចង់ទៅមើលទីកន្លែងកើតហេតុនោះទៀតផង៕