លោកស្រី អាយ ស៊ីសុគន្ធារី អភិបាលរងខេត្តមណ្ឌលគិរី បានផ្តល់សម្ភាសន៍កាលពីព្រឹកថ្ងៃទី១២ វិច្ឆិកាថា នឹងសុំទៅថ្នាក់ជាតិដើម្បីលុបចេញពីបញ្ជីអភិវឌ្ឍន៍ ចំពោះក្រុមហ៊ុនណាដែលគ្មានច្បាប់ហើយមិនព្រមចូលខ្លួនមកបំពេញទម្រង់បែបបទឡើងវិញ តាមការកោះអញ្ជើញរបស់អាជ្ញាធរខេត្ត។
លោកស្រីអភិបាលរងបានបញ្ជាក់ថា គេបានរកឃើញមាន៥២ក្រុមហ៊ុនមានតែឈ្មោះ ហើយបញ្ហានេះអាជ្ញាធរត្រូវតែកោះអញ្ជើញពួកគេមកសាកសួរអំពីមូលហេតុមុននឹងសម្រេចដកចេញ។
លោកស្រី អាយ ស៊ីសុគន្ធារី មានប្រសាសន៍ដូច្នេះ ៖ «យើងមិនអាចកាត់ផ្ដាច់គេចោលបានដោយគ្មានហេតុផលទេ ត្រូវអញ្ជើញគេមកដើម្បីជាមូលហេតុ បើសិនជាអ្នកអស់សុពលភាព ការងារនោះបាន៩០% ឲ្យគេបំពេញឲ្យគ្រប់១០០% ហើយអ្នកដែលអត់មានច្បាប់ទាល់តែសោះមានតែឈ្មោះ ក៏ឲ្យគេបំពេញច្បាប់ទម្លាប់ឡើងវិញ។ បើសិនជាក្រុមហ៊ុនខ្លះគេមិនចូលខ្លួនទេ ខ្ញុំនឹងសុំការអនុញ្ញាតថ្នាក់ជាតិដើម្បីលុបចេញ»។
អ្នកស្រីបានបន្តថា ខេត្តមានគោលបំណងចង់ឲ្យក្រុមហ៊ុនខ្លះបំពេញសំណុំបែបបទឡើងវិញ ដោយក្នុងនោះមានតែ១០ក្រុមហ៊ុនប៉ុណ្ណោះដែលមានស.ជ.ណ មានច្បាប់ត្រឹមត្រូវ ហើយកំពុងដំណើរការតែ៦ក្រុមហ៊ុន ឯ៤ក្រុមហ៊ុនទៀតដោយវិបត្តិសេដ្ឋកិច្ចពិភពលោកក៏ធ្វើឲ្យមានការអាក់ខានរហូតចង់ហួសសុពលភាព ប៉ុន្តែអ្នកស្រីអះអាងថា អាជ្ញាធរខេត្តនិងថ្នាក់ជាតិក៏នៅតែអនុគ្រោះយោគយល់ដដែល។
លោកស្រីអភិបាលរងបានឲ្យដឹងបន្ថែមទៀតថា បើសិនជាក្រុមហ៊ុនអនុវត្តតាមគោលការណ៍អភិវឌ្ឍន៍ត្រឹមត្រូវនោះ ជីវភាពប្រជាពលរដ្ឋនៅក្នុងខេត្តប្រាកដជាមានការប្រែប្រួល។
លោកស្រី អាយ ស៊ីសុគន្ធារី បានបន្តដូច្នេះ ៖ «៦០ក្រុមហ៊ុន បើសិនជាដំណើរការបានល្អរលូន ខេត្តមណ្ឌលគិរីអត់ក្រទេ អាចស្វយ័តខេត្តខ្លួនឯង ជួយជ្រោមជ្រែងដល់ថ្នាក់ជាតិទៀត»។
លោក ឆាយ ធី មន្ត្រីស៊ើបអង្កេតនៃសមាគមអាដហុក បានឲ្យដឹងថា មានក្រុមហ៊ុនមួយចំនួនបានធ្វើការឈូសឆាយហើយតែមិនបានដាំដុះមែន ដែលលោកបានបង្ហាញពីទស្សនៈគាំទ្រការផ្តួចផ្តើមរបស់អាជ្ញធរក្នុងការចង់ឲ្យក្រុមហ៊ុនគោរពគោលការណ៍អភិវឌ្ឍន៍នេះ។
លោក ឆាយ ធី មានប្រសាសន៍ដូច្នេះ ៖ «ខេត្តគាត់បានមានប្រសាសន៍ហ្នឹង យើងបានធ្វើការកត់សម្គាល់ក្រុមហ៊ុនមានតិចណាស់ដែលបានធ្វើការអភិវឌ្ឍ ប៉ុន្តែភាគច្រើនក្រុមហ៊ុនទាំងអស់ហ្នឹងអត់បានធ្វើអីសោះ ដូចជាការឈូសឆាយហ៊ុមព័ទ្ធយកដី មិនបានធ្វើការអភិវឌ្ឍ។ ធ្វើការជំរុញឲ្យក្រុមហ៊ុនហ្នឹងទៅអភិវឌ្ឍពិតប្រាកដ»។
លោកស្រី អាយ ស៊ីសុគន្ធារី អភិបាលរងខេត្តបានឲ្យដឹងបន្ថែមថា ការកោះអញ្ជើញឲ្យចូលជួបប្រជុំរកហេតុផលនៃការអាក់ខានមិនបានអភិវឌ្ឍនេះ ត្រូវបញ្ចប់នៅថ្ងៃទី១២ វិច្ឆិកានេះ ដោយតម្រូវឲ្យចូលខ្លួនចាប់ពីថ្ងៃទី១៦ វិច្ឆិកា ដល់ថ្ងៃ២៣ វិច្ឆិកា ក្នុងមួយថ្ងៃ១០ក្រុមហ៊ុន៕