អភិបាលរងខេត្តសៀមរាប លោក ប៊ុន ថាឫទ្ធិ បានមានប្រសាសន៍កាលពីព្រឹកថ្ងៃច័ន្ទ ទី១២ ខែតុលា ថា កាលពីថ្ងៃអាទិត្យ ទី១១ សីហា ក្រុមមន្ត្រីអន្តរក្រសួងដែលមានរដ្ឋមន្ត្រីក្រសួងបរិស្ថាន, រដ្ឋមន្ត្រីក្រសួងទេសចរណ៍ និងរដ្ឋមន្ត្រីក្រសួងសុខាភិបាល បានមកចូលរួមប្រជុំណែនាំជាគោលការណ៍ក្នុងការរៀបចំខេត្តដែលជាតំបន់សំខាន់ក្នុងការទាក់ទាញទេសចរណ៍បរទេសមួយនេះជាបន្ទាន់ឡើងវិញ ចំពោះការខូចខាតដោយទឹកជំនន់នោះ។
លោក ប៊ុន ថាឫទ្ធិ បានឲ្យដឹងថា ៖ «ម្សិលមិញហ្នឹងអន្តរក្រសួងគាត់មកប្រជុំណែនាំជាគោលការណ៍ ហើយល្ងាចនេះបានប្រជុំស្រុក... ដើម្បីរៀបចំលើគម្រោងជាក់ស្ដែង។ ទីក្រុងទេសចរណ៍ រាជរដ្ឋាភិបាលនឹងអនុញ្ញាតជាគោលការណ៍ឲ្យរៀបចំធ្វើឲ្យបានបន្ទាន់ឡើងវិញ»។
មន្ត្រីខេត្តសៀមរាបបានឲ្យដឹងថា ចាប់តាំងពីថ្ងៃទី២៩-៣០ ខែកញ្ញា រហូតដល់ថ្ងៃទី១១ ខែតុលា នៅស្រុកមួយចំនួននៃខេត្តសៀមរាប ដូចជាស្រុកវ៉ារិន, ស្រុកស្រីស្នំ, ស្រុកក្រឡាញ់, ស្រុកអង្គរជុំ និងស្រុកពួក គឺទឹកជំនន់នៅមិនទាន់ស្រកអស់នៅឡើយទេ។
អភិបាលស្រុកអង្គរជុំ លោក រ័ត្ន ជុំ បានមានប្រសាសន៍កាលពីព្រឹកថ្ងៃច័ន្ទថា ទឹកបានស្រកខ្លះហើយ ប៉ុន្តែនៅសល់តាមទីធ្លាសាលារៀនខ្លះ ទីធ្លាវត្តអារាមខ្លះ ហើយសាលារៀនខ្លះបានចាប់ផ្តើមឲ្យសិស្សបានចូលរៀនឡើងវិញ ប៉ុន្តែសាលាអនុវិទ្យាល័យនៃស្រុកអង្គរជុំទើបតែបើកទ្វារឡើងវិញកាលពីព្រឹកថ្ងៃច័ន្ទប៉ុណ្ណោះ។
លោក រ័ត្ន ជុំ បានបញ្ជាក់ថា ៖ «ទឹកស្រកហើយ ក៏ប៉ុន្តែវាមិនទាន់ស្រកដាច់ វានៅសល់ទីធ្លាសាលារៀនខ្លះ ហើយនិងទីធ្លាវត្តអារាមខ្លះ ហើយនិងមុខសាលាស្រុកនៅសល់តិចៗ។ សាលារៀនខ្លះបើកដំណើរការហើយ យើងនៅអនុវិទ្យាល័យ យើងចាប់ផ្ដើមដំណើរការនៅថ្ងៃច័ន្ទនេះ។ ស្រូវយើងមានប៉ះពាល់ខ្លះ ដល់ពេលវាលិច៦-៧ថ្ងៃ ស្រូវវាអត់មានគុណភាព វាមិនអាចដូចដើម។ (ស្រូវ)ដែលប៉ះពាល់ហ្នឹង១.៤៨០ហិកតារ»។
អភិបាលខេត្តសៀមរាប លោក ស៊ូ ភិរិន្ទ បានថ្លែងប្រាប់អង្គប្រជុំមន្ត្រីអន្តរក្រសួងកាលពីព្រឹកថ្ងៃទី១១ ខែតុលា ថា ចាប់តាំងពីថ្ងៃទី២៩ ខែកញ្ញា ដែលខេត្តនេះបានទទួលរងឥទ្ធិពលខ្យល់ព្យុះនិងទឹកជំនន់រហូតមកដល់ពេលនេះបណ្តាលឲ្យមនុស្សស្លាប់ចំនួន៨នាក់ រងរបួស១៦នាក់ ខូចខាតផ្ទះសម្បែងជាង៨០ខ្នង ខូចខាតស្រូវគ្រប់ប្រភេទជាង៣.២០០ហិកតារ និងខូចដំណាំរួមផ្សំគ្រប់ប្រភេទជាង១.០៨០ហិកតារ ងាប់គោក្របីចំនួន១១ក្បាល ជ្រូកជាង២០០ក្បាល និងមាន់ជាង២.៦០០ក្បាល។ ចំពោះហេដ្ឋារចនាសម្ព័ន្ធទឹកជំនន់បានគ្រប់ដណ្តប់ផ្លូវក្នុងទីក្រុងបណ្តាលឲ្យខូចខាតជាង១១.៦០០ម៉ែត្រ ឯកំណាត់ផ្លូវក្រៅទីក្រុងនិងផ្លូវជាតិគឺទឹកជំនន់បានបំផ្លាញឲ្យខូចខាតជាង៣.០០០ម៉ែត្រ។ ក្រៅពីនោះមានផ្លូវលំ, សាលាបឋមសិក្សា, សាលាអនុវិទ្យាល័យ និងទីវត្តអារាមមួយចំនួន ក៏ទទួលរងការខូចខាតដែរ៕