ក្រសួងអប់រំបង្កើតកម្មវិធីសិក្សាថ្មីផ្នែកបច្ចេកវិទ្យាព័ត៌មានដល់សិស្សវិទ្យាល័យ
h082412ko.mp3
ទាំងនេះ គឺដើម្បីឲ្យអ្នកសិក្សាមានចំណេះដឹង និងឱកាសគ្រប់គ្រាន់ក្នុងការចូលរួមក្នុងវិស័យនានា ដែលទាមទារឲ្យមានជំនាញបច្ចេកទេសផ្សេងៗ ហើយត្រូវការជាចាំបាច់នូវចំណេះដឹងផ្នែកបច្ចេកវិទ្យា។
នាយកដ្ឋានអភិវឌ្ឍន៍កម្មវិធីសិក្សា នៃក្រសួងអប់រំ បានចាប់ផ្ដើមរៀបចំអភិវឌ្ឍកម្មវិធីសិក្សាលម្អិតបច្ចេកវិទ្យាព័ត៌មាន និងសារគមនាគមន៍ សម្រាប់ថ្នាក់ទី១១ និងថ្នាក់ទី១២ ផ្ដល់ឲ្យសិស្សដែលបានបញ្ចប់ការអប់រំថ្នាក់មធ្យមសិក្សា នូវបំណិនវិជ្ជាជីវៈផ្អែកលើបច្ចេកវិទ្យាព័ត៌មាន និងសារគមនាគមន៍ ដែលជាតម្រូវការចាំបាច់សម្រាប់ទីផ្សារការងារ និងទទួលបានជោគជ័យក្នុងការសិក្សាថ្នាក់ឧត្ដមសិក្សា។
នៅក្នុងគេហទំព័ររបស់ក្រសួងអប់រំ យុវជន និងកីឡា បានបង្ហាញថា កម្មវិធីសិក្សាលម្អិតបច្ចេកវិទ្យាព័ត៌មាន និងសារគមនាគមន៍ សម្រាប់ថ្នាក់ទី១១ និងថ្នាក់ទី១២ ចងក្រងឡើងសម្រាប់ជាជំនួយដល់ការបង្រៀន និងរៀនតាមបែបបច្ចេកវិទ្យាព័ត៌មាន និងសារគមនាគមន៍ ដើម្បីទទួលបានបំណិនបច្ចេកទេសកុំព្យូទ័រ បំណិនក្នុងការប្រាស្រ័យទាក់ទង ការត្រិះរិះពិចារណា ព្រមទាំងសម្រេចចិត្តបានត្រឹមត្រូវ ក្នុងការជ្រើសរើសវិជ្ជាជីវៈ តាមរយៈកម្មវិធីការិយាល័យភាសាខ្មែរ (Open office) ដោយប្រើប្រាស់ពុម្ពអក្សរយូនីកូដខ្មែរ។
មន្ត្រីសង្គមស៊ីវិល និងអ្នកធ្វើការជាមួយយុវជន បានសាទរចំពោះការបង្កើតឲ្យមានកម្មវិធីសិក្សាថ្មី ដល់សិស្សវិទ្យាល័យផ្នែកបច្ចេកវិទ្យាព័ត៌មាន និងសារគមនាគមន៍នេះ។
ប្រធានអង្គការអភិវឌ្ឍន៍កម្មវិធីធនធានយុវជន (YRDP) លោក ជាង សុខា មានមតិថា ជំនាញបច្ចេកវិទ្យា គឺជាជំនាញមួយចាំបាច់សម្រាប់ធ្វើការទំនាក់ទំនងគ្នា។ លោកថា កម្មវិធីសិក្សាផ្នែកបច្ចេកវិទ្យាព័ត៌មាន និងសារគមនាគមន៍នេះ គឺជាស្ពានមួយក្នុងការកសាងនូវមូលដ្ឋានគ្រឹះសម្រាប់ចំណេះដឹងរបស់សិស្សានុសិស្ស នៅសាលាចំណេះទូទៅ។
លោក ជាង សុខា៖ «សម្រាប់ប្រទេសកំពុងអភិវឌ្ឍដូចកម្ពុជាហ្នឹង ការដែលចាប់ផ្ដើមបញ្ជ្រាបទាក់ទងនឹងចំណេះដឹង និងបច្ចេកវិទ្យាទៅសិស្សនៅវិទ្យាល័យហ្នឹង ជាទស្សនៈរបស់ខ្ញុំ។ ខ្ញុំគិតសំខាន់ ជារឿងដែលសំខាន់មែនទែន ក្នុងការកសាងមូលដ្ឋានគ្រឹះ និងចំណេះដឹងដែលពាក់ព័ន្ធជាមួយនឹងជំនាញនេះ។ ហើយកាលដែលគាត់ទទួលបាននូវចំណេះដឹង អាចធ្វើឲ្យគាត់មានលទ្ធភាពកាន់តែច្រើនថែមទៀត ក្នុងការសិក្សារបស់គាត់ នៅពេលដែលគាត់បានបញ្ចប់នូវសាលាចំណេះទូទៅបន្តការសិក្សាផ្នែកជំនាញ ឬក៏បន្តការសិក្សានៅមហាវិទ្យាល័យ ខ្ញុំគិតថា ជារឿងមួយល្អ»។
ឯកសាររបស់ក្រសួងអប់រំដដែលបានបញ្ជាក់ថា គោលបំណងនៃកម្មវិធីសិក្សាបច្ចេកវិទ្យាព័ត៌មាន និងសារគមនាគមន៍ថ្នាក់ទី១១ គឺផ្ដល់ឲ្យសិស្សានុសិស្សនូវបំណិនក្នុងការប្រាស្រ័យទាក់ទង ការត្រិះរិះពិចារណា ការដោះស្រាយបញ្ហា និងបំណិនបច្ចេកវិទ្យា។ រីឯគោលបំណង នៃកម្មវិធីសិក្សាបច្ចេកវិទ្យាព័ត៌មាន និងសារគមនាគមន៍សម្រាប់ថ្នាក់ទី១២ គឺផ្ដល់ឲ្យសិស្សានុសិស្សនូវទស្សនវិស័យច្បាស់លាស់អំពីការងារផ្សេងៗ ដែលមាននៅក្នុងវិស័យបច្ចេកវិទ្យាព័ត៌មាន និងសារគមនាគមន៍ ព្រមទាំងគន្លងវិជ្ជាជីវៈការងារ ដូចជា គន្លងការងារដែលមាននៅក្នុងវិស័យ ការធ្វើផែនការការងារគ្រប់គ្រងគម្រោង ការបណ្ដុះគំនិតពាណិជ្ជកម្មទាក់ទងនឹងការលក់ផលិតផលកុំព្យូទ័រ ការធ្វើជាអ្នកជំនួយការបច្ចេកទេស ការថែទាំ និងប្រឹក្សាយោបល់ទាក់ទងនឹងឧបករណ៍កុំព្យូទ័រផ្នែករឹង។
អគ្គរាជទូតសន្តិភាព នៃសហព័ន្ធសន្តិភាពសាកលលោក លោក ព្រាប កុល បានថ្លែងថា ការសិក្សាបែបនេះ គឺមានផលប្រយោជន៍ទូលំទូលាយណាស់ ដែលគួរតែពង្រីកការយល់ដឹងដល់សិស្សានុសិស្ស ក្នុងសម័យបច្ចេកវិទ្យាកំពុងរីកចម្រើននេះ។ លោកថា សម្រាប់ពលរដ្ឋក្នុងប្រទេសកម្ពុជា ការយល់ផ្នែកបច្ចេកវិទ្យាព័ត៌មាន និងសារគមនាគមន៍នេះ គឺនៅមានកម្រិតទាបនៅឡើយ។
លោក ព្រាប កុល៖ «ខ្ញុំយល់ថា វាជាចំណុចល្អ ពីព្រោះអីសារព័ត៌មាន ហើយព័ត៌មានវិទ្យា សារគមនាគមន៍ គឺវាជាច្រកទ្វារដើម្បីប្រមូលព័ត៌មាន និងទិន្នន័យ អាចឲ្យពួកគាត់ស្រាវជ្រាវបានទូលំទូលាយ និងយកចំណេះដឹងឲ្យបានគ្រប់ជ្រុងជ្រោយ ដើម្បីយកមកធ្វើការគិតពិចារណារៀនសូត្រ។ ហើយជាចំណុចខ្សោយកន្លងមក គឺយើងមិនសូវមានឯកសារទូលំទូលាយឲ្យបានគ្រប់គ្រាន់ពីគ្រប់មជ្ឈដ្ឋាន ការរៀបចំបែបហ្នឹង ខ្ញុំគិតថាជាការរីកចម្រើនមួយបែបទៀត នៅក្នុងយុគសម័យដែលគាត់អាចប្រើប្រាស់បច្ចេកវិទ្យានេះក្នុងការសិក្សា»។
ប៉ុន្តែជាចម្ងល់នោះត្រង់ថា តើគុណភាពនៃការបញ្ជ្រាបកម្មវិធីសិក្សាថ្មី ផ្នែកបច្ចេកវិទ្យាព័ត៌មាន និងសារគមនាគមន៍នេះ នឹងមានប្រសិទ្ធភាពត្រឹមកម្រិតណា ដល់សិស្សានុសិស្ស? លោក ជាង សុខា ប្រធានអង្គការអភិវឌ្ឍន៍កម្មវិធីធនធានយុវជន បង្ហាញក្ដីបារម្ភដូច្នេះ៖ «កន្លងមក យើងធ្វើការយើងតែងតែធ្វើការបញ្ជ្រាប»។
ក្នុងគេហទំព័ររបស់ក្រសួងអប់រំ យុវជន និងកីឡា បានឲ្យដឹងទៀតថា កម្មវិធីសិក្សាលម្អិតបច្ចេកវិទ្យាព័ត៌មាន និងសារគមនាគមន៍សម្រាប់ថ្នាក់ទី១១ មាន៥ជំពូក ១៥មេរៀន បានដាក់បញ្ចូលបំណិនក្នុងការប្រាស្រ័យទាក់ទង បំណិនបច្ចេកទេសកុំព្យូទ័រ ការត្រិះរិះពិចារណា និងគំនិតច្បាស់លាស់អំពីវិជ្ជាជីវៈ ដែលជាតម្រូវការចាំបាច់សម្រាប់ទីផ្សារការងារ ដោយប្រើប្រាស់បច្ចេកវិទ្យាព័ត៌មាន និងសារគមនាគមន៍ជាជំនួយ ក្នុងការអនុវត្តការងារនោះឲ្យមានប្រសិទ្ធភាពខ្ពស់។ ចំណែកសម្រាប់ថ្នាក់ទី១២ មាន៤ជំពូក ១៥មេរៀន ដែលផ្ដល់ទស្សនវិស័យច្បាស់លាស់ក្នុងការជួយសិស្សបន្តការសិក្សាទៅថ្នាក់ឧត្ដមសិក្សា និងរកការងារបានល្អ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អ្នកអានអនាមិក
Everything the Ministry has done is good, but the willingness inside the government is always a question mark? No matter what curriculum or reform, let me ask, will the students and the teachers are motivated to do it if the teachers' salary is too low to make end meet? Is the government committed to doing it? If so, the salary is the first priority.
Aug 26, 2012 08:08 AM
CheyVorman007
ពី AngKor Watស្ងៀមជាជាងស្រដី ស៊ីចេកខ្ចីជាជាងមាត់ទំនេរ ការបញ្ចូលចំ
ណេះល្អៗដល់មនុស្សប្រសើរជាងបង្រៀនមនុស្សអោយគិត
តែពីចេះផឹកBeerដូចតាមទូរទស្សមួយចំនួន សិស្សខ្លះសសេរ
លេងតាមFacebookថា ស្រាប៊ៀខ្មុំ លុយម៉ែខ្មុំ សុខភាពខ្មុំ
ពេលស្រវឹងជីវិតខ្មុំំ។សំខាន់ទៀតសូមអោយគ្នារៀនចេះដឹង
យល់ហើយអោយគ្នាបានប្រើតំរិះនោះផង កុំបានតែរៀនយក
Bon ដល់គ្នាចង់បញ្ចេញមតិស្រាប់តែចោទថាគ្នាញុះញ៉ង់
ទៅណាណោះឆ្កុយ
Aug 25, 2012 11:11 AM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
