ក្រសួងព័ត៌មានផ្សព្វផ្សាយពីការរាយការណ៍អំពីអាស៊ានដល់អ្នកសារព័ត៌មាន
h082212as.mp3
រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានជំរុញឲ្យអ្នកសារព័ត៌មានទាំងអស់ ស្វែងយល់ឲ្យបានច្រើនទាក់ទងនឹងបញ្ហាអាស៊ាន និងផ្សព្វផ្សាយឲ្យបានទូលំទូលាយ ឲ្យប្រជាជនកម្ពុជា ពេលដែលប្រទេសទាំងអស់នៅតំបន់អាស៊ានធ្វើសមាហរណកម្មនៅត្រឹមឆ្នាំ២០១៥ ខាងមុខ។
ក្លឹបអ្នកកាសែតកម្ពុជា រួមទាំងអ្នកសារព័ត៌មានជាង៥០នាក់ ចូលរួមការពិភាក្សាអំពីប្រធានបទដំណើរឆ្ពោះទៅកាន់សហគមន៍សេដ្ឋកិច្ចអាស៊ាន ឆ្នាំ២០១៥ នៅថ្ងៃទី២២ សីហា នៅសណ្ឋាគារសាន់វេ (Sunway Hotel) រាជធានីភ្នំពេញ ស្ដីពីឱកាស និងបញ្ហាប្រឈមសម្រាប់ប្រទេសកម្ពុជា។
ប្រធានក្លឹបអ្នកកាសែតកម្ពុជា លោក ប៉ែន សមិធិ មានប្រសាសន៍ថា អ្នកសារព័ត៌មាននៅកម្ពុជា មានតួនាទីសំខាន់ក្នុងការផ្សព្វផ្សាយអំពីបញ្ហាអាស៊ាន ឲ្យទៅដល់ប្រជាជន ដោយលោកបញ្ជាក់ថា ការពិភាក្សានេះសង្ឃឹមថានឹងអាចជួយឲ្យអ្នកសារព័ត៌មានធ្វើការរាយការណ៍បានត្រឹមត្រូវអំពីកិច្ចការអាស៊ាន។
យ៉ាងណាក៏ដោយ តំណាងមូលនិធិខុនរ៉ាដ ប្រចាំនៅកម្ពុជា លោក ឌិននីស ស្រេ (Denis Shcrey) មានប្រសាសន៍ថា វគ្គបណ្ដុះបណ្ដាលទាក់ទងនឹងការសមាហរណកម្មតំបន់នេះ មានសារសំខាន់សម្រាប់អ្នកព័ត៌មាន ក្នុងការបង្កើតផលិតភាពនៃការរាយការណ៍អំពីបញ្ហាអាស៊ាន រួមទាំងការរាយការណ៍ស៊ើបអង្កេត ដែលទាក់ទងនឹងសមាហរណកម្មតំបន់។
ការផ្សព្វផ្សាយអំពីអាស៊ាន នៅតាមវិស័យសារព័ត៌មាននៅកម្ពុជា រួមទាំងវិទ្យុ និងទូរទស្សន៍ជាដើម នៅមានកម្រិតនៅឡើយ។ កត្តានេះ ដោយសារតែចំណេះដឹង ឬការយល់ដឹងរបស់អ្នកសារព័ត៌មានភាគច្រើនមិនបានយល់ដឹងអំពីបញ្ហានេះបានស៊ីជម្រៅ ហើយក្រសួងដែលពាក់ព័ន្ធ ក៏ធ្លាប់បានអះអាងថា ការផ្សាយទាក់ទងនឹងអាស៊ាន ជាប្រធានបទដែលត្រូវការបច្ចេកទេស និងស្មុគស្មាញ ដែលទាមទារការផ្ដល់វគ្គអប់រំបន្ថែមដល់ពួកគាត់។
លោក ឌិននីស ស្រេ មានប្រសាសន៍បន្ថែមថា ការធ្វើសមាហរណកម្មបានផ្ដល់ផលប្រយោជន៍ចំពោះប្រទេសសមាជិកអាស៊ានជាច្រើន ពីលំហូរពលកម្មដោយសេរី ប៉ុន្តែបញ្ហានេះ ក៏ជាការប្រឈមរបស់ប្រទេសនីមួយៗ ដែលនឹងជួបប្រទះនៅពេលខាងមុខដែរ។
រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ មានប្រសាសន៍ថា នៅប្រទេសកម្ពុជា មនុស្សភាគច្រើនមានការយល់ដឹងអំពីបញ្ហាអាស៊ាន នេះ នៅមានកម្រិតនៅឡើយ ហើយគំនិតផ្ដួចផ្ដើមផ្ដល់វគ្គបណ្ដុះបណ្ដាលដល់អ្នកសារព័ត៌មាន គឺជារឿងត្រឹមត្រូវបំផុត ដោយលោកបញ្ជាក់ថា អ្នកសារព័ត៌មានគួរតែផ្សព្វផ្សាយឲ្យបានត្រឹមត្រូវ ជាពិសេស ទាក់ទងនឹងលំហូរពលកម្មរបស់ប្រទេសអាស៊ានទាំងអស់ ពេលធ្វើសមាហរណកម្មតំបន់ នៅឆ្នាំ២០១៥។
លោកបន្ថែមទៀតថា នៅប្រទេសកម្ពុជា មានការបើកចំហពលកម្មជំនាញពីប្រទេសខាងក្រៅឲ្យមកធ្វើការងារនៅប្រទេសកម្ពុជា ជាពិសេស ពលកម្មណាកម្ពុជានៅមានតិចតួចនៅឡើយ។
ទោះជាយ៉ាងណាក៏ដោយ នៅពេលដែលប្រទេសសមាជិកអាស៊ាន ទាំង១០ ធ្វើសមាហរណកម្មតំបន់នៅពេលខាងមុខ កត្តាលំហូរពលកម្មជាប្រធានបទសំខាន់សម្រាប់អ្នកសារព័ត៌មានត្រូវផ្សព្វផ្សាយឲ្យបានច្រើន ដើម្បីផ្ដល់ព័ត៌មានឲ្យប្រជាជនបានត្រៀមខ្លួនទុកជាមុន ចំពោះការប្រឈមដែលនឹងកើតឡើង ហើយជះឥទ្ធិពលដល់ទីផ្សារការងារនៅប្រទេសកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
