តុលាការ​កំពូល​នឹង​ជម្រះ​ក្ដី​លោក មឿង សុន នៅ​ថ្ងៃ​ទី​១១ មេសា

តុលាការ​កំពូល​គ្រោង​នឹង​លើក​យក​សំណុំ​រឿង​ក្តី​លោក មឿង សុន ប្រធាន​មូលនិធិ​ទ្រទ្រង់​អរិយធម៌​​ខ្មែរ មក​ជំរះ​នៅ​ព្រឹក​ថ្ងៃ​ពុធ ទី​១១ ខែ​មេសា ឆ្នាំ​២០១២។
ដោយ ដែន អយុធ្យា
2012-04-10
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល

លោក ​មឿង សុន ត្រូវ​បាន​មេធាវី​រាជរដ្ឋាភិបាល​ប្តឹង​ទៅ​កាន់​​តុលាការ ដោយសារ​លោក​បាន​​​ផ្តល់​មតិ​ព្រួយ​​បារម្ភ​លើ​ករណី​ដាក់​អំពូល​ភ្លើង​តាម​ជញ្ជាំង​ប្រាសាទ​អង្គរវត្ត កាល​ពី​ឆ្នាំ​២០០៩។

បណ្ដឹង​នេះ​ត្រូវ​បាន​តុលាការ​​សាលា​ដំបូង​រាជធានី​ភ្នំពេញ និង​តុលាការ​ឧទ្ធរណ៍ កាត់​ឲ្យ​ជាប់​ទោស ២​ឆ្នាំ និង​ពិន័យ​​ជា​ប្រាក់​ចំនួន ៤​លាន​រៀល ចោទ​ពី​បទ​ផ្សាយ​ព័ត៌មាន​មិន​ពិត ប៉ុន្តែ​បាន​ប្តូរ​បទ​ចោទ​ទៅ​បទ​ញុះញង់​ប្រព្រឹត្ត​​​បទឧក្រិដ្ឋ​ដោយ​មិន​សំរេច​ផល។

ទាក់ទង​ជាមួយ​ការ​គ្រោង​បើក​សវនាការ​នេះ លោក មឿង សុន ប្រធាន​មូលនិធិ​ទ្រទ្រង់​អរិយធម៌​ខ្មែរ បាន​ថ្លែង​ពី​ក្រៅ​ប្រទេស ដោយ​បាន​​ស្នើ​ឲ្យ​តុលាការ​កំពូល និង​មេធាវី​ការពារ​ក្តី​ឲ្យ​រដ្ឋាភិបាល ត្រូវ​វិនិច្ឆ័យ​ក្តី​ឈរ​លើ​មនសិការ​​​ស្នេហា​ជាតិ និង​ឲ្យ​មាន​យុត្តិធម៌។ លោក​ថា ការ​សម្ដែង​មតិ​ព្រួយ​បារម្ភ​ខ្លាច​បាត់បង់​សម្បត្តិ​វប្បធម៌ ជា​​កេរដំណែល​ដូនតា មិន​មែន​ជា​រឿង​បុគ្គល​របស់​មនុស្ស​ម្នាក់ៗ​នោះ​ទេ គឺ​ជា​រឿង​ជាតិ​ទាំង​មូល។

លោក មឿង សុន បន្ថែម៖ «ខ្ញុំ​សង្ឃឹម​ថា មេធាវី​រាជរដ្ឋាភិបាល លោក​ជា​អ្នក​កាន់​ព្រះពុទ្ធ​សាសនា​មិន​និយាយ​អ្វី​ដែល​ចោទ​​ប្រកាន់​មក​លើ​រូប​ខ្ញុំ​ទាំង​ស្រុក ឬ​ក៏​អ្វី​ដែល​ខ្ញុំ​មិន​បាន​ប្រព្រឹត្ត​នោះ​ទេ ដើម្បី​កុំ​ឲ្យ​មាន​វិប្បដិសារី​ក្នុង​មនសិការ​របស់​ខ្លួន​ចំពោះ​អ្វី​ដែល​ខ្ញុំ​បាន​ធ្វើ ដើម្បី​ប្រយោជន៍​ជាតិ ការពារ​ប្រាសាទ​អង្គរវត្ត។ ចំពោះ​ករណី​រូប​ខ្ញុំ​មិន​មែន​ដណ្តើម​​ឈ្នះ​ចាញ់​រឿង​ប្រយោជន៍​ផ្ទាល់​ខ្លួន​នោះ​ទេ គឺ​រឿង​ការពារ​ប្រយោជន៍​ជាតិ​ទាំង​អស់​គ្នា សម្បត្តិ​វប្បធម៌​ជាតិ​ និង​ពិភពលោក»

កាល​ពី​ថ្ងៃ​ទី​២៤ ខែ​ឧសភា ឆ្នាំ​២០១១ សំណុំ​រឿង​ក្តី​លោក មឿង សុន ត្រូវ​បាន​សាលាឧទ្ធរណ៍​​​ប្ដូរ​បទ​ចោទ​ពី​បទ​ផ្សាយ​ព័ត៌មាន​មិន​ពិត​ទៅ​បទ​ញុះញង់​ប្រព្រឹត្ត​បទឧក្រិដ្ឋ​​ដោយ​មិន​សំរេច​ផល។

សំណុំ​​រឿងនេះ តុលាការ​​បាន​ផ្តន្ទាទោស លោក មឿង សុន ជាប់​ពន្ធនាគារ​ចំនួន ២​ឆ្នាំ និង​ពិន័យ​ប្រាក់​ចំនួន ៤​លាន​រៀល។

ទាក់ទង​សវនាការ​នេះ លោក​ សុក សំអឿន ​មេធាវី​ការពារ​ក្តី​ឲ្យ​លោក មឿង សុន បាន​ថ្លែង​ថា ការ​សម្តែង​មតិ​ព្រួយ​​​​បារម្ភ​ខ្លាច​បាត់​បង់​សម្បត្តិ​វប្បធម៌​ជាតិ​របស់​កូន​ក្តី​លោក មិន​គួរ​ត្រូវ​​​បាន​រដ្ឋាភិបាល​ប្តឹង​​ទៅ​កាន់​តុលាការ​នោះ​ទេ។

លោក សុក សំអឿន៖ «ពេល​សាលាឧទ្ធរណ៍​កាត់​គេ​ឈប់​ចោទ​បទ​ផ្សាយ​ព័ត៌មាន​មិន​ពិត មក​បទ​ញុះញង់​វិញ។ ប៉ុន្តែ​ឥឡូវ​នេះ​នៅ​ក្នុង​សំណុំ​រឿង​តុលាការ​កំពូល​ដូច​ជា​ផ្សាយ​ព័ត៌មាន​មិន​ពិត​ទៅ​វិញ ហើយ​ខាង​រដ្ឋាភិបាល​ដែល​លោក​ធ្វើ​សារណា​ហ្នឹង ក៏​ផ្សាយ​ព័ត៌មាន​មិន​ពិត​ដែរ។ ដល់​អ៊ីចឹង​ពិបាក​យល់​ដែរ ចាំ​មើល​តុលាការ​គេ​សំរេច​ដូច​ម្ដេច»

លោក​បាន​បដិសេធ​មិន​ធ្វើ​អត្ថាធិប្បាយ​ច្រើន​ទេ​លើ​សំណុំ​រឿង​លោក មឿង សុន ប៉ុន្តែ​លោក​មាន​ជំនឿ​ថា តុលាការ​កំពូល​នឹង​​ពិចារណា​ឲ្យ​កូន​ក្តី​លោក​រួច​ផុត​ពី​ការ​ចោទ​ប្រកាន់។

​មេធាវី​ការពារ​ក្តី​ឲ្យ​រាជរដ្ឋាភិបាល​ លោក ប៉ាល់ ចន្ទតារា បាន​បដិសេធ​​​មិន​ធ្វើ​អត្ថាធិប្បាយ​ច្រើន​ទេ​ជុំវិញ​សំណុំ​រឿង​ក្តី​លោក ​មឿង សុន ដោយ​ឲ្យ​រង់ចាំ​មើល​លទ្ធផល​នៃ​ថ្ងៃ​បើក​សវនាការ ​ថ្ងៃ​​ទី​១១ ខែ​មេសា ទើប​ដឹង​ការ​ពិត។

​យ៉ាង​ណា​ក៏ដោយ លោក រ៉ុង ឈុន ​តំណាង​ក្រុម​ប្រឹក្សា​ឃ្លាំ​មើល​កម្ពុជា ​បាន​អះអាង​ថា សំណុំ​រឿង​ក្តី​លោក មឿង សុន បើ​តុលាការ​កំពូល​មាន​យុត្តិធម៌ និង​មិន​ស្ថិត​ក្រោម​សំពាធ​បក្ស​កាន់​អំណាច​ទេ លោក មឿង សុន គ្មាន​ទោស​​នោះ​ទេ។

លោក​បន្ត​ថា ការ​សម្ដែង​មតិ​ព្រួយ​បារម្ភ​ខ្លាច​បាត់បង់​សម្បត្តិ​វប្បធម៌ ឬ​កេរដំណែល​ដូនតា​របស់លោក មឿង សុន គួរ​ត្រូវ​បាន​រដ្ឋាភិបាល ឬ​ថ្នាក់​ដឹកនាំ​ប្រទេស​លើក​ទឹក​ចិត្ត មិន​គួរ​មាន​ការ​ចោទ​ប្រកាន់ ឬ​ផ្តន្ទាទោស​​​ទេ។

​កាល​ពី​ថ្ងៃ​ទី​២៤ ខែ​ឧសភា ឆ្នាំ​២០១១ លោក មឿង សុន ប្រធាន​មូលនិធិ​ទ្រទ្រង់​អរិយធម៌​ខ្មែរ ត្រូវ​បាន​​សាលាឧទ្ធរណ៍​កាត់​ឲ្យ​មាន​ទោស​ជាប់​ពន្ធនាគារ​ចំនួន ២​ឆ្នាំ និង​ពិន័យ​ជា​ប្រាក់​ចំនួន ៤​លាន​រៀល ចោទ​ពី​បទ​ញុះញង់​​​​​ប្រព្រឹត្ត​បទ​ឧក្រិដ្ឋ​ដោយ​មិន​សំរេច​ផល។ បច្ចុប្បន្ន​លោក មឿង សុន ​បាន​ភៀស​ខ្លួន​​ចេញ​ទៅ​រស់​នៅ​ក្រៅ​ប្រទេស គេច​ពី​ការ​ចាប់​ខ្លួន​របស់​សមត្ថកិច្ច​កម្ពុជា៕

កំណត់​ចំណាំ៖ ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ ដើម្បី​រក្សា​សេចក្ដី​​ថ្លៃថ្នូរ យើង​​ខ្ញុំ​នឹង​ផ្សាយ​តែ​មតិ​ណា​ដែល​មិន​​ជេរ​​ប្រមាថ​​ដល់​​អ្នក​​ដទៃ​តែ​ប៉ុណ្ណោះ។

មតិ (4)
  • បោះពុម្ព
  • ចែករំលែក
  • អ៊ីម៉ែល

អ្នក​អាន​អនាមិក

Sok Ann(Svar Read) is the one in charge about the Angkor's lights. He was the one brought up that problem.

Apr 12, 2012 12:35 PM

អ្នក​អាន​អនាមិក

Come on,Mr Hun Sen let him go he doesn't know how to talk like mother fucker chines,stop mind your own peoples,we are khmerblood and we are the ones have more bloodshed whenever war happen.

Apr 12, 2012 03:56 AM

អ្នក​អាន​អនាមិក

ស្រុលខ្មែរគឺអីចឹង។

Apr 10, 2012 11:44 PM

អ្នក​អាន​អនាមិក

I'll be very sad if supreme court decide that he's guilty. But i won't surprise with that. Every one know the fact that all the courts in Cambodia are under the ruling party.. Poor Cambodia.

Apr 10, 2012 10:36 AM