គ្រូបង្រៀនភាសាបាលីត្អូញរឿងបើកប្រាក់ខែយឺត

គ្រូបង្រៀនកិច្ចសន្យា និងគ្រូក្របខ័ណ្ឌភាសាបាលីខេត្តកណ្ដាល រិះគន់ថា ក្រសួងធម្មការ និងសាសនា មានភាពយឺតយ៉ាវក្នុងការបើកប្រាក់ខែជូនពួកគាត់ និងកាត់ប្រាក់ខែពួកគាត់ដោយមិនបង្ហាញហេតុផលច្បាស់លាស់។

ដោយ វិជ័យ អានន្ទ
2012-09-03

cp.mp3

គ្រូបង្រៀនកិច្ចសន្យាផ្នែកភាសាបាលីនៃពុទ្ធិកបឋមសិក្សាស្រុកមុខកំពូល ឲ្យដឹងនៅថ្ងៃទី២ កញ្ញា ឆ្នាំ២០១២ ថា គាត់ខកខានមិនបានបើកប្រាក់ខែអស់រយៈពេលជាច្រើនខែមកហើយ គឺចាប់ពីខែមករា ឆ្នាំ២០១២ មកទល់នឹងខែកញ្ញា ឆ្នាំ២០១២។

គ្រូឧទ្ទេសាចារ្យ ឬគ្រូបង្រៀនភាសាបាលីមួយរូបសុំមិនបញ្ចេញឈ្មោះ សម្ដែងការងឿងឆ្ងល់ថា តើក្រសួងជួបបញ្ហាពិបាកអ្វីទើបមានភាពយឺតយ៉ាវក្នុងការបើកប្រាក់ខែជូនគ្រូបង្រៀនភាសាបាលីយ៉ាងដូច្នេះ។ គ្រូឧទ្ទេសាចារ្យដដែលបញ្ជាក់ថា កាលពីឆ្នាំកន្លងទៅ គាត់បើកប្រាក់យឺតយ៉ាវដែរ តែមិនយឺតយ៉ាវដូចឆ្នាំនេះទេ គឺត្រឹមខែកក្កដា គាត់បានបើក។ ដោយឡែកឆ្នាំនេះ ឈានចូលដល់ខែកញ្ញា ទៅហើយ ប្រាក់ខែរបស់គាត់គេនៅតែមិនទាន់បើកឲ្យទៀត។

លោកបន្ថែមថា ភាពយឺតយ៉ាវនៃការបើកប្រាក់ខែនេះ នាំឲ្យប៉ះពាល់ដល់ជីវភាពរស់នៅរបស់គាត់៖ «ឆ្នាំ២០១១ ពីខែ១ ដល់ខែ ៧ បានបើក ឥឡូវខែ ១ ដល់ខែ ៩ ហើយ អត់បានបើក មិនដឹងយ៉ាងម៉េច»។

ដូចគ្នានេះ ឧទ្ទេសាចារ្យម្នាក់ទៀតនៅស្រុកមុខកំពូលដែរ លើកឡើងថា លោកក៏គេមិនទាន់បើកប្រាក់ខែឲ្យដែរ។ តែទោះជាយ៉ាងនេះក្ដី លោកនៅតែប្រឹងបង្រៀនដែរ ព្រោះលោកយល់ឃើញថា វិស័យពុទ្ធិកសិក្សានៅថ្នាក់មូលដ្ឋានមានការធ្លាក់ចុះគួរឲ្យកត់សម្គាល់ បើទោះបីលោកមានវ័យចំណាស់ហើយក៏ដោយ លោកចាំបាច់តស៊ូជាបន្តទៀត ដើម្បីបណ្ដុះបណ្ដាលចំណេះដឹងផ្នែកភាសាបាលីដល់យុវបព្វជិតជំនាន់ក្រោយ៖ «អារម្មណ៍ចេះតែមានហើយ តែធ្វើម៉េចខំប្រឹងបង្រៀនដើម្បីជ្រោងព្រះពុទ្ធសាសនា ព្រោះគ្រូនៅស្រុកមុខកំពូល ផ្នែកពុទ្ធិកហ្នឹងតិចណាស់ ម៉្លោះហើយចាស់ៗហ្នឹងចេះតែនាំគ្នាជួយ ដើម្បីពង្រឹងវិស័យពុទ្ធិកហ្នឹងឲ្យវាមានឡើង»។

ឧទ្ទេសាចារ្យរូបនេះបញ្ជាក់បន្ថែមថា ក្រៅពីបើកប្រាក់ខែយឺតយ៉ាវហើយ ពួកគាត់នៅត្រូវគេកាត់ប្រាក់បន្ថែមទៀត។ លោកអះអាងថា ប្រាក់ខែពួកគាត់ពី ៥ ទៅ ៦ខែទើបគេបើកឲ្យម្ដង ហើយជារៀងរាល់លើកនៃការបើកប្រាក់ខែម្ដងៗ ប្រាក់ខែពួកគាត់ត្រូវគេកាត់ ២០ម៉ឺននៅថ្នាក់ក្រសួង និង ៦ម៉ឺន នៅថ្នាក់ការិយាល័យធម្មការ និងសាសនាស្រុកទៀតផង។ ការកាត់ប្រាក់ខែនេះ គេមិនបានបញ្ជាក់ពីមូលហេតុច្បាស់លាស់ថា គេកាត់ប្រាក់ខែនោះយកធ្វើអ្វីនោះឡើយ។

ឆ្លើយតបការលើកឡើងរបស់ឧទ្ទេសាចារ្យនេះ ប្រធានការិយាល័យធម្មការ និងសាសនា ស្រុកមុខកំពូល លោក ឃុត សាខន អះអាងថា លោកក៏មិនបានដឹងច្បាស់ពីមូលហេតុនៃភាពយឺតយ៉ាវនោះឡើយ។ ចំណែកការកាត់ប្រាក់ខែកន្លងមកនោះ ដោយសារសាលាស្រុកតម្រូវឲ្យការិយាល័យនីមួយៗរៃអង្គាសលុយគ្នាដើម្បីចូលរួមឧបត្ថម្ភទាហានឯសមរភូមិ ខណៈភាគីខ្មែរ និងថៃ ប្រឈមមុខដាក់គ្នានៅឯខេត្តព្រះវិហារ។

លោក ឃុត សាខន៖ «យើងមិនមែនកាត់ដោយឯកច្ឆន្ទ អត្តនោម័តិដោយខ្លួនឯងទេ អាហ្នឹងកាលជំនាន់ទ័ពទេ ប៉ុន្តែឥឡូវវាអត់មានអីទេ កាលបើមានប្រាក់ខែមកប៉ុន្មាន យើងបញ្ជូនឲ្យគាត់ប៉ុណ្ណឹងទៅ»។

ទាក់ទងនឹងបញ្ហាយឺតយ៉ាវនៃការបើកប្រាក់ខែនេះដែរ គ្រូបង្រៀនក្របខ័ណ្ឌនៃពុទ្ធិកមធ្យមសិក្សាបឋមភូមិម្នាក់សុំមិនឲ្យបញ្ចេញឈ្មោះ នៅឯស្រុកកៀនស្វាយ ឲ្យដឹងថា លោកបានប្រលងជាប់គ្រូបង្រៀននៅពុទ្ធិកសិក្សាអស់រយៈពេលពីរឆ្នាំមកហើយ ហើយប្រាក់ខែរបស់លោកគេមិនទាន់បើកឲ្យឡើយ។ ចំណែកឯប្រាក់ខែរបស់លោកនៅឆ្នាំ២០១២ ចាប់តាំងពីខែមិថុនា មក ក៏គេមិនទាន់បើកឲ្យដែរ៖ «បើកប្រាក់ហ្នឹង ឧទាហរណ៍ ២ឆ្នាំ ឬ ២ឆ្នាំកន្លះអីហ្នឹង គេចាប់ផ្ដើមបើក មិនវិធានការក្រសួងធម្មការ និងសាសនាហ្នឹងគេយកគោលនយោបាយយ៉ាងម៉េចបានជាមន្ត្រីបានប្រលងជាប់ក្របខ័ណ្ឌរដ្ឋ ហើយមិនបានបើកប្រាក់ខែឲ្យមន្ត្រីគ្រូក្របខ័ណ្ឌនោះ ខ្ញុំចេះតែឆ្ងល់»។

វិទ្យុអាស៊ីសេរីមិនអាចទាក់ទងប្រធានមន្ទីរធម្មការ និងសាសនាខេត្ត លោក រុង ភីរម្យ បានទេ នៅថ្ងៃទី២ ខែកញ្ញា នេះ។

ទោះយ៉ាងនេះក្ដី រដ្ឋមន្ត្រីក្រសួងធម្មការ និងសាសនា លោក មិន ឃិន មានប្រសាសន៍ថា ក្រសួងបានទម្លាក់លុយដែលជាប្រាក់ខែរបស់គ្រូទាំងអស់ទូទាំងប្រទេសដល់មន្ទីរតាមបណ្ដាខេត្តនានារួចរាល់ហើយ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។