មន្ត្រីប៉ូលិសមណ្ឌលគិរី ត្រូវបានចោទថាគំរាមក្មេង
អំពើបាញ់គំរាមនេះក្រុមសហគមន៍ចាត់ទុកថាជាអំពើរំលោភសិទ្ធិមនុស្ស គំរាមកំហែងទៅលើស្មារតីកុមារ និងប៉ះពាល់ដល់គោលនយោបាយភូមិ-ឃុំ មានសុវត្ថិភាព។
ក្រុមសហគមន៍ជនជាតិដើមភាគតិចព្នង ឃុំដាក់ដាំ ស្រុកអូរាំង ខេត្តមណ្ឌលគិរី នៅថ្ងៃអាទិត្យ ទី៩ ខែកញ្ញា ឆ្នាំ២០១២ អំពាវនាវឲ្យស្នងការប៉ូលិសខេត្តចាត់វិធានការផ្លូវច្បាប់ទៅលើមន្ត្រីប៉ូលិសការពារព្រំដែនម្នាក់ ដែលបានប្រើប្រាស់អាវុធបាញ់គំរាមក្មេងប្រុសក្នុងភូមិដោយបំពានច្បាប់។
មន្ត្រីប៉ូលិសរងការចោទប្រកាន់នោះមានឈ្មោះ ជឹម វ៉ន ជានគរបាលវរៈការពារព្រំដែនលេខ១២១ នៃស្នងការដ្ឋានប៉ូលិសខេត្តមណ្ឌលគិរី។ ចំណែកក្មេងប្រុសដែលអះអាងថាជាជនរងគ្រោះមានឈ្មោះ ពុល សំណាង អាយុ១៥ឆ្នាំ ជាកូនប្រជាពលរដ្ឋសហគមន៍ភូមិពូនរ៉ែង។
ប្រធានសហគមន៍ លោក ពើល ធិ មានប្រសាសន៍បញ្ជាក់ថា កាលពីថ្ងៃទី៧ ខែកញ្ញា កន្លងទៅ លោក ជឹម វ៉ន ប្រដាប់ដោយអាវុធអាកា៤៧ (AK47) មួយដើម និងអាវុធខ្លីមួយដើមបានចូលមកដល់រោងសិប្បកម្មធ្វើគ្រឿងសង្ហារិមមួយឋិតក្នុងភូមិពួនរ៉ែង ហើយបានប្រាប់ឲ្យក្មេងឈ្មោះ ពុល សំណាង នៅក្បែរនោះលីកៅអីតុក្កតាដាក់រថយន្តរបស់លោក។ ចំណែកក្មេងនោះបានប្រកែក ដោយបញ្ជាក់ថា គេមិនអាចលីកៅអីដាក់រថយន្តបានទេ ក៏ប៉ុន្តែលោក ជឹម វ៉ន បានបង្ខំឲ្យក្មេងនោះលីកៅអីរហូតបានសំរេច ហើយលោកបានហ៊ុចប្រាក់ ៥ពាន់រៀលទៅឲ្យក្មេងប្រុសនោះ។ បន្ទាប់មក លោកបានយកកាំភ្លើងវែងបាញ់ទៅលើចំនួនបីគ្រាប់ បន្ទាប់ពីក្មេងនោះបានដើរចេញពីកន្លែងកើតហេតុដោយសារខឹងនឹងក្មេងប្រុសនោះ។
ប្រធានសហគមន៍ លោក ពើល ធិ បន្តថា នេះគឺជាអំពើប្រើប្រាស់អាវុធបាញ់បោះអនាធិបតេយ្យ ធ្វើឲ្យប្រជាពលរដ្ឋក្នុងភូមិភ័យខ្លាច និងគំរាមកំហែងស្មារតីក្មេងប្រុសនោះទៀតផង ៖ "ខាងសហគមន៍ខ្ញុំគឺសំណូមពរអញ្ចេះ ច្បាប់ចេញមកខែ៨ ថ្ងៃ២៩ ហើយគេថា បទល្មើសទាំងឡាយគ្រប់ប្រភេទ កាន់កាំភ្លើងខុសច្បាប់ក៏អត់បានដែរ ដល់អ៊ីចឹងទៅខុសពីច្បាប់ ហើយរំលោភសិទ្ធិកុមារទៀត។ ច្បាប់មានហើយនៅរំលោភច្បាប់ទៀត អ៊ីចឹងសូមមេត្តាធ្វើម៉េចធ្វើតាមផ្លូវច្បាប់"។
វិទ្យុអាស៊ីសេរីនៅថ្ងៃអាទិត្យនេះមិនអាចទាក់ទងលោក ជឹម វ៉ន សុំការបំភ្លឺពីករណីចោទប្រកាន់នេះបានទេ។
មេឃុំដាក់ដាំ លោក សំ វ៉ាន្នី ទទួលស្គាល់ថា សេចក្តីរាយការណ៍របស់សហគមន៍គឺជាការពិត ពីព្រោះអាជ្ញាធរឃុំបានចុះអង្កេតធ្វើកំណត់ហេតុពីករណីនេះដែរ ក៏ប៉ុន្តែសមត្ថកិច្ចមូលដ្ឋានមិនមានលទ្ធភាពគ្រប់គ្រាន់ដើម្បីឃាត់ខ្លួន ឬដកហូតអាវុធពីមន្ត្រីប៉ូលិសនោះបានទេ។
លោកកត់សំគាល់ថា ការបាញ់គំរាមក្មេងប្រុសក្នុងភូមិនេះប៉ះពាល់ធ្ងន់ធ្ងរដល់គោលនយោបាយភូមិឃុំមានសុវត្ថិភាព ៖ "ខ្ញុំចាត់វិធានការណ៍ ខ្ញុំប្រាប់ទៅខាងកងរាជអាវុធហត្ថ ខ្ញុំប្រាប់កងកម្លាំងកត់កំណត់ហេតុហើយ គេត្រឡប់ទៅវិញ។ យ៉ាងម៉េចពេលខាងមុខស្រេចតែគេខាងលើទៅ យើងហ្នឹងគ្មានសមត្ថភាពឯណា គេអាងអំណាចគេអ្នកណាហ៊ាន"។
ស្នងការប៉ារីសខេត្តមណ្ឌលគិរី លោក ញ៉ែម វ៉ាន្នី មានប្រសាសន៍បញ្ជាក់ថា លោកបានទទួលរបាយការណ៍ស្ដីពីករណីនេះ និងបានកោះហៅលោក ជឹម វ៉ន ឲ្យមកបំភ្លឺនៅស្នងការដ្ឋានប៉ូលិស នៅថ្ងៃច័ន្ទសបា្តហ៍ក្រោយនេះ។
លោកបន្តថា កងកម្លាំងនគរបាលមានបទបញ្ជា និងវិន័យតឹងរ៉ឹងណាស់ ហេតុនេះប្រសិនរកឃើញថាលោក ជឹម វ៉ន ពិតជាបានប្រព្រឹត្តខុសវិន័យកងនគរបាល ក្រុមប្រឹក្សាវិន័យនៃស្នងការនគរបាលខេត្តនឹងដាក់វិន័យទៅតាមគោលការណ៍ច្បាប់ ៖ "វិន័យកងកម្លាំងមិនដែលឲ្យមន្ត្រីនគរបាលធ្វើអ៊ីចឹងទេ។ ឥឡូវយើងស្រាវជ្រាវសិន ព្រោះខាងប្រធានវរៈគេក៏បានរាយការណ៍មកខ្ញុំដែរតាំងពីម្សិលមិញ។ អ៊ីចឹងពាក់ព័ន្ធបញ្ហានេះខ្ញុំឲ្យការិយាល័យបុគ្គលិកហ្នឹងកោះអញ្ជើញមកបញ្ហាពាក់ព័ន្ធរឿងបាញ់បោះសេរី អ៊ីចឹងមែនអាហ្នឹងយើងចាត់ការទៅតាមវិន័យរបស់កងកម្លាំងយើង"។
រាជរដ្ឋាភិបាលកាលពីឆ្នាំ២០០៩ បានដាក់ចេញគោលនយោបាយភូមិ-ឃុំមានសុវត្ថិភាព ឲ្យមន្ត្រីអាជ្ញាធរមូលដ្ឋាន ប្រជាពលរដ្ឋ និងបុគ្គលអង្គការសង្គមស៊ីវិលសហការអនុវត្តក្នុងគោលបំណងទប់ស្កាត់ និងលប់បំបាត់សកម្មភាពលួចឆក់ប្លន់ សកម្មភាពជួញដូរស្ត្រី និងកុមារ អំពើហិង្សាក្នុងគ្រួសារ និងការប្រើប្រាស់គ្រឿងញៀន ល្បែងស៊ីសងគ្រប់ប្រភេទ សកម្មភាពប្រើប្រាស់អាវុធខុសច្បាប់ និងបទល្មើសគ្រប់ប្រភេទ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
