រដ្ឋសភា​សម្រេច​អនុម័ត​ថវិកា​ជាតិ​សម្រាប់​ឆ្នាំ​២០១៣

រដ្ឋសភា​បាន​សម្រេច​អនុម័ត​ថវិកា​ជាតិ​សម្រាប់​ឆ្នាំ​២០១៣ ទាំង​ភាព​ចម្រូង​ចម្រាស់ បន្ទាប់​ពី​ត្រូវ​បាន​ដាក់​ជូន​សភា​ពិនិត្យ​ដើម្បី​អនុម័ត​រយៈពេល ២​ថ្ងៃ គឺ​ចាប់​ពី​ថ្ងៃ​ទី៦ ធ្នូ មក។
ដោយ វិជ័យ អានន្ទ
2012-12-08
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
ជាម យៀប ថវិកា​ជាតិ​២០១៣ ៣០៥
ឯកឧត្តម​បណ្ឌិត ជាម យៀប (ឆ្វេង) ប្រធាន​គណៈកម្មការ​សេដ្ឋកិច្ច ហិរញ្ញវត្ថុ ធនាគារ និង​សវនកម្ម ឬ​គណៈកម្មការ​ទី​២ នៃ​រដ្ឋ​សភា អាន​សេចក្ដី​ព្រាង​ច្បាប់​ថវិកា​ជាតិ​ឆ្នាំ​២០១៣ ក្នុង​អង្គ​ប្រជុំ​នា​វិមាន​រដ្ឋសភា កាល​ពី​ថ្ងៃ​ទី៧ ខែ​ធ្នូ ឆ្នាំ​២០១២។
RFA/Vichey Anandh

ការ​សម្រេច​អនុម័ត​របស់​រដ្ឋសភា ត្រូវ​តំណាង​រាស្ត្រ​គណបក្ស​ប្រឆាំង​ទាំង​អស់​ជំទាស់ ដោយ​ពួក​គេ​អះអាង​ថា ការ​អនុម័ត​របស់​រដ្ឋសភា​ទៅ​លើ​ច្បាប់​ថវិកា​ជាតិ​ឆ្នាំ​២០១៣ នោះ គឺ​អនុញ្ញាត​ឲ្យ​រដ្ឋាភិបាល​ចាយ​ខ្ជះខ្ជាយ​ខ្លាំង​ពេក។

បើ​ទោះ​បី​មាន​ការ​ជំទាស់​ពី​គណបក្ស​ប្រឆាំង​ទៅ​លើ​ការ​អនុម័ត​លើ​សេចក្តី​ព្រាង​ច្បាប់ ស្ដីពី​ហិរញ្ញវត្ថុ​សម្រាប់​គ្រប់គ្រង​ឆ្នាំ​២០១៣ យ៉ាង​ណា​ក៏ដោយ ក៏​នៅ​រសៀល​ថ្ងៃ​ទី៧ ធ្នូ រដ្ឋសភា​នៅ​តែ​អនុម័ត​លើ​សេចក្តី​ព្រាង​ច្បាប់​នោះ​ដដែល។

តំណាង​រាស្ត្រ​គណបក្ស សម រង្ស៊ី លោក យឹម សុវណ្ណ ឲ្យ​ដឹង​នៅ​ថ្ងៃ​ទី៧ ធ្នូ ថា ប្រការ​ដែល​នាំ​ឲ្យ​គណបក្ស​ប្រឆាំង​មិន​យល់​ស្រប​លើ​ការ​អនុម័ត​ច្បាប់​ថវិកា​ជាតិ​ឆ្នាំ​២០១៣ នោះ ដោយ​សារ​ច្បាប់​នេះ​អនុញ្ញាត​ឲ្យ​រដ្ឋាភិបាល​ខ្ចី​ប្រាក់​បរទេស​ច្រើន​ហួស​ហេតុ។ បន្ថែម​លើ​នេះ លោក​បញ្ជាក់​ថា រដ្ឋាភិបាល​អាច​រក​ចំណូល​បាន​រាប់​រយ​លាន​ដុល្លារ​សហរដ្ឋ​អាមេរិក គ្រប់គ្រាន់​ក្នុង​ការ​ចំណាយ​សម្រាប់​អភិវឌ្ឍ​ប្រទេស មិន​ចាំបាច់​ខ្ចី​បុល​បរទេស​នោះ​ឡើយ ដោយ​ពឹង​ផ្អែក​ទៅ​លើ​វិស័យ​បី។ ក្នុង​នោះ​រួម​មាន ចំណូល​បាន​មក​ពី​ការ​ដំឡើង​ពន្ធ​លើ​ដី​សម្បទាន​សេដ្ឋកិច្ច ការ​គ្រប់គ្រង​ឲ្យ​មាន​តម្លាភាព​ទៅ​លើ​ចំណូល​ដែល​បាន​មក​ពី​វិស័យ​ទេសចរណ៍ មាន​ន័យ​ថា ចំណូល​ដែល​បាន​មក​ពី​ប្រាសាទ​អង្គវត្ត និង​ចំណូល​ដែល​បាន​មក​កាស៊ីណូ។

ទោះ​យ៉ាង​ណា តំណាង​ឲ្យ​រដ្ឋាភិបាល ឧប​នាយក​រដ្ឋមន្ត្រី និង​ជា​រដ្ឋមន្ត្រី​ក្រសួង​សេដ្ឋកិច្ច និង​ហិរញ្ញវត្ថុ លោក គាត ឈន់ មាន​ប្រសាសន៍​នៅ​ក្នុង​អង្គ​ប្រជុំ​សភា​កាល​ពី​ព្រឹក​ថ្ងៃ​សុក្រ នេះ​ថា មុន​នឹង​រដ្ឋាភិបាល​សម្រេច​ខ្ចី​លុយ​ពី​បរទេស​មក​ចាយ​នោះ រដ្ឋាភិបាល​ក៏​បាន​គិតគូរ​យ៉ាង​ហ្មត់ចត់។ លោក​ថ្លែង​បន្ត​ថា ចាប់​តាំង​ពី​ឆ្នាំ​១៩៩២ មក​ទល់​នឹង​បច្ចុប្បន្ន រដ្ឋាភិបាល​បាន​ចាយ​វាយ​ដោយ​ផ្ដោត​សំខាន់​ទៅ​លើ​ការ​អភិវឌ្ឍ​ហេដ្ឋារចនាសម្ព័ន្ធ។ ដូច្នេះ លុយ​ដែល​បាន​មក​ពី​ការ​ខ្ចី​បុល​បរទេស​នេះ នឹង​ត្រូវ​ចាយ​វាយ​យ៉ាង​មាន​តម្លាភាព។

ច្បាប់​ថវិកា​ជាតិ​ឆ្នាំ​២០១៣ ដែល​រដ្ឋសភា​ទើប​អនុម័ត​នោះ មាន ៦​ជំពូក និង ១៨​មាត្រា។ ច្បាប់​នេះ​បាន​កំណត់​ការ​ចំណាយ​ជាង ១២​លាន​លាន​រៀល ឬ​ប្រហាក់​ប្រហែល ៣​ពាន់​លាន​ដុល្លារ​អាមេរិក ក្នុង​នោះ​ប្រមាណ​៨០% បាន​មក​ពី​ការ​ខ្ចី​បុល​ពី​បរទេស។

ទាក់​ទង​នឹង​ការ​អនុម័ត​ច្បាប់​ស្ដីពី​ហិរញ្ញវត្ថុ​សម្រាប់​ការ​គ្រប់គ្រង​ឆ្នាំ​២០១៣ ត្រូវ​បាន​អនុញ្ញាត​ឲ្យ​រដ្ឋាភិបាល​ចាយ​ថវិកា​ចំនួន​ជាង ១២​លាន​លាន​រៀល (១២.០៩៥.០៧៣,៣​លាន​រៀល) ឬ​ប្រហាក់​ប្រហែល ៣​ពាន់​លាន​ដុល្លារ ដែល​កើន​ឡើង ១២,៣២% ធៀប​នឹង​ច្បាប់​ស្ដីពី​ហិរញ្ញវត្ថុ​សម្រាប់​ការ​គ្រប់គ្រង​ឆ្នាំ​២០១២ ដែល​ស្មើ​នឹង ១៩,១២% នៃ​ផលិត​ផល​សរុប​ក្នុង​ស្រុក (ផ.ស.ស)។ នៅ​ឆ្នាំ​២០១២ ថវិកា​ជាតិ​មាន​ចំនួន​ជាង ២​ពាន់​លាន​ដុល្លារ (២.៦៩២​លាន​ដុល្លារ) ចំនួន​នេះ​បាន​កើន ១៣% ធៀប​នឹង​ឆ្នាំ​២០១១។

កាល​ពី​ថ្ងៃ​ទី៦ ខែ​ធ្នូ ឆ្នាំ​២០១២ លោក គាត ឈន់ បាន​អាន​សេចក្តី​ថ្លែង​ហេតុ​របស់​នាយក​រដ្ឋមន្ត្រី ហ៊ុន សែន ដែល​បាន​ផ្ញើ​ជូន​រដ្ឋសភា ដោយ​សង្កត់​ធ្ងន់​ថា សេចក្តី​ព្រាង​ច្បាប់​ថវិកា​ជាតិ​ឆ្នាំ​២០១៣ នឹង​បន្ត​ផ្តល់​អាទិភាព​ដល់​ការ​បង្កើន និង​លើក​កម្ពស់​គុណភាព​សេវាកម្ម​នៅ​ក្នុង​វិស័យ​សង្គមកិច្ច វិស័យ​អប់រំ សុខាភិបាល ការ​កសាង​ធនធាន​មនុស្ស និង​សំណាញ់​សុវត្ថិភាព​សង្គម រួម​ទាំង​ការ​បន្ត​អនុវត្តន៍​គោល​នយោបាយ​ផ្តល់​ដី​សម្បទាន​សង្គមកិច្ច ដល់​គ្រួសារ​អតីត​កង​កម្លាំង​ប្រដាប់​អាវុធ និង​ការ​បន្ត​ជំរុញ​ការ​អនុវត្ត​សកម្មភាព​ថ្មី​លើ​គោល​នយោបាយ​ចាស់​នៃ​កំណែ​ទម្រង់​ការ​គ្រប់គ្រង​ដីធ្លី។

លោក គាត ឈន់ បន្ត​ថា ច្បាប់​ថវិកា​ឆ្នាំ​ថ្មី​នេះ ក៏​ដើម្បី​ធានា​ដល់​ការ​រៀបចំ​ការ​បោះ​ឆ្នោត​តំណាង​រាស្ត្រ និង​ការ​បន្ត​ជំរុញ​ការ​អនុវត្ត​ច្បាប់​ស្ដីពី​ការ​គ្រប់គ្រង​រដ្ឋបាល​រាជធានី ខេត្ត ក្រុង ស្រុក ខណ្ឌ និង​បន្ត​ពង្រឹង​ការ​អនុវត្ត​លទ្ធិប្រជាធិបតេយ្យ និង​នីតិរដ្ឋ​នៅ​កម្ពុជា។ ច្បាប់​នេះ​ក៏​មាន​កំណែ​ទម្រង់​រដ្ឋបាល​សាធារណៈ កំណែ​ទម្រង់​ការ​គ្រប់គ្រង​ហិរញ្ញវត្ថុ​សាធារណៈ ប្រព័ន្ធ​យុត្តិធម៌ ការ​ប្រឆាំង​អំពើ​ពុក​រលួយ ការ​អនុវត្ត​បន្ត​គោល​នយោបាយ​ដំឡើង​ប្រាក់​បៀវត្ស​មូលដ្ឋាន​ជូន​មន្ត្រី​រាជការ​ស៊ីវិល និង​កង​កម្លាំង​ប្រដាប់​អាវុធ ២០% ជាដើម៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (0)
  • បោះពុម្ព
  • ចែករំលែក
  • អ៊ីម៉ែល