ចលនាប្រជាធិបតេយ្យសង្គ្រោះជាតិជួបអ្នកគាំទ្រនៅខេត្តកំពត
h082412ob.mp3
ការចុះជួបនោះ ក្នុងបំណងពង្រឹងទឹកចិត្តអ្នកគាំទ្រនៅមូលដ្ឋានបង្ហាញពីភាពរឹងមាំ ដែលមិនបែកបាក់ក្នុងចលនាប្រជាធិបតេយ្យសង្គ្រោះជាតិ។ ហើយក៏បានប្រាប់ទៅអ្នកគាំទ្រថា បានរួមគ្នាបង្កើតគណបក្សសង្គ្រោះជាតិ ដែលកំពុងសុំច្បាប់ពីក្រសួងមហាផ្ទៃ សម្រាប់ចូលរួមប្រកួតការបោះឆ្នោតនាពេលខាងមុខ។
តំណាងរាស្ត្រគណបក្ស សម រង្ស៊ី អ្នកស្រី មូរ សុខហួរ ថ្លែងប្រាប់អ្នកគាំទ្រច្រើនរយនាក់នៅខេត្តកំពត នៅថ្ងៃទី២៤ ខែសីហា ឆ្នាំ២០១២ ថា ចលនាប្រជាធិបតេយ្យសង្គ្រោះជាតិនេះ បានកើតចេញអំពីសំណូមពររបស់ម្ចាស់ឆ្នោត ដែលចង់ឲ្យគណបក្សប្រឆាំងមាន សម រង្ស៊ី និងសិទ្ធមនុស្ស រួមគ្នាដើម្បីបង្កើនកម្លាំងអ្នកប្រជាធិបតេយ្យ ចូលរួមប្រកួតការបោះឆ្នោត ឆ្នាំ២០១៣ ដើម្បីប្ដូរការដឹកនាំប្រទេស។
អ្នកស្រីបន្តថា ចលនាប្រជាធិបតេយ្យសង្គ្រោះជាតិនេះ បានបង្កើតនៅថ្ងៃ១៧ ខែកក្កដា ឆ្នាំ២០១២ នៅប្រទេសហ្វីលីពីន។ ចលនានេះ ក៏បានរួមគ្នាបង្កើតជាគណបក្សសង្គ្រោះជាតិ ដែលមានរូបសញ្ញាព្រះអាទិត្យរះ និងមានកាំរស្មីចែងចាំងចំនួន២៤ ដែលតំណាងឲ្យខេត្ត-ក្រុង នៅក្នុងប្រទេសកម្ពុជា។ បច្ចុប្បន្ន គណបក្សសង្គ្រោះជាតិ កំពុងតែសុំច្បាប់ពីក្រសួងមហាផ្ទៃ ដើម្បីបានសិទ្ធិស្របច្បាប់ចូលរួមបោះឆ្នោត។
អ្នកស្រី មូរ សុខហួរ បន្តថា បើគណបក្សសង្គ្រោះជាតិ ទទួលសិទ្ធិស្របច្បាប់ហើយ នឹងសុំអំណាចពីប្រជារាស្ត្រដោយការបោះឆ្នោត ដើម្បីឲ្យមានការប្ដូរថ្នាក់ដឹកនាំ ដោយជ្រើសរើសមេដឹកនាំណាដែលបានបម្រើពលរដ្ឋពេញលក្ខណៈ។ អ្នកស្រីបានប្រកាសដែរថា លោក សម រង្ស៊ី នឹងវិលមកប្រទេសកម្ពុជា ក្នុងខែវិច្ឆិកា ឆ្នាំ២០១២ នេះ៖ «ពីព្រោះមែនទែន អ្នកដែលអាចទៅដណ្ដើមយកសន្លឹកឆ្នោត ហើយដណ្ដើមការដឹកនាំពីលោក ហ៊ុន សែន អត់មានអ្នកណាក្រៅពីលោកប្រធាន សម រង្ស៊ី ទេ»។
អនុប្រធានគណៈកម្មការបណ្ដោះអាសន្នគណបក្សសង្គ្រោះជាតិ លោក ប៉ុល ហំម បានថ្លែងថា គណបក្សសង្គ្រោះជាតិ កំពុងមានការចូលរួមកាន់តែច្រើនពីអ្នកធ្លាប់គាំទ្រគណបក្សប្រជាជនកម្ពុជា គណបក្ស នរោត្តម រណឫទ្ធិ គណបក្សហ៊្វុនស៊ិនប៉ិច និងគណបក្សផ្សេងៗទៀត រួមទាំងសមាគមអ្នកប្រជាធិបតេយ្យដែរ។ លោកថា ចលនាប្រជាធិបតេយ្យសង្គ្រោះជាតិ សុំប្ដូរគណៈកម្មាធិការជាតិរៀបចំការបោះឆ្នោត និងសុំឲ្យលោក សម រង្ស៊ី បានចូលមកប្រទេសវិញ។ កន្លងមក អ្នកកាន់អំណាចមួយចំនួនប្រកាសថា ជាអ្នកប្រកាន់លទ្ធិប្រជាធិបតេយ្យ មិនប្រកាន់គណបក្សនយោបាយ តែបើពលរដ្ឋ ឬមន្ត្រីរាជការហ៊ាននិយាយការពិត ឬហ៊ានតវ៉ា គេប្រើប្រព័ន្ធតុលាការចោទឲ្យជាប់គុក។
ចំពោះការផ្តល់កាតជនជាតិខ្មែរ ក៏រើសអើងប្រជាពលរដ្ឋដែលជាជនជាតិខ្មែរសុទ្ធសាធនោះដែរ។ អ្នកដែលគេសម្គាល់ថា ហ៊ាននិយាយការពិត ឬចង់ដឹងអ្វីដែលខុសពីការដឹកនាំរបស់គេនោះ កាតសម្គាល់ខ្លួន គេនឹងមិនចេញឲ្យប្រជាពលរដ្ឋបានប្រើទេ៖ «អ្នកសង្គ្រោះជាតិជានរណា ខ្ញុំសុំបញ្ជាក់ម្តងទៀត មិនមែន ប៉ុល ហំម មូរ សុខហួរ កឹម សុខា សម រង្ស៊ី ប៉ុន្មាននាក់នោះទេ គឺយើងទាំងអស់គ្នានេះហើយ ដែលមូលគ្នាដើម្បីធ្វើការសង្គ្រោះជាតិយើង»។
នៅក្នុងពិធីជួបជុំជាមួយអ្នកគាំទ្រចលនាប្រជាធិបតេយ្យសង្គ្រោះជាតិ នៅខេត្តកំពត មានអតីតមន្ត្រីគណបក្សប្រជាជនកម្ពុជា គណបក្សហ៊្វុនស៊ិនប៉ិច គណបក្ស នរោត្តម រណឫទ្ធិ ថ្នាក់ស្រុក និងខេត្តមកចូលរួមនៅក្នុងចលនានេះ។
មន្ត្រីគណបក្សប្រជាជនកម្ពុជា និងជាអតីតអធិការរងស្រុកជុំគីរី លោក ជិន អឿន បានថ្លែងថា លោករង់ចាំក្រុមអ្នកប្រឆាំងពិតប្រាកដ ដើម្បីចូលរួមគាំទ្រ។ លោកថា ចលនាប្រជាធិបតេយ្យសង្គ្រោះជាតិ នេះ ជាក្តីសង្ឃឹមរបស់គាត់សម្រាប់ផ្លាស់ប្ដូរការដឹកនាំបែបផ្តាច់ការ និងគ្រួសារបក្ខពួកនិយម៖ «មានសិទ្ធិសេរី យើងនិយាយបាន។ ខាងនោះ បើយើងនិយាយ វាមិនស្រួល និងជួនមានទុក្ខមានទោស វាដាក់គុក ដាក់ច្រវាក់។ នៅនេះ យើងនិយាយបាន។ យើងប្រជាធិបតេយ្យ យករាស្ត្រជាធំ មិនដូចអាផ្តាច់ការទេ។ ផ្តាច់ការ យកអំណាចខ្លួនឯងជាធំ»។
មន្ត្រីគណបក្ស នរោត្តម រណឫទ្ធិ លោក ម៉ៅ រតនា បានថ្លែងថា ក្រោយពីសម្ដេចក្រុមព្រះ នរោត្តម រណឫទ្ធិ លាឈប់ពីតំណែងនយោបាយ លោកក៏បានមកចូលរួមជាមួយចលនាប្រជាធិបតេយ្យសង្គ្រោះជាតិ៖ «ខាងគណបក្ស នរោត្តម រណឫទ្ធិ នៅអតីតខេត្តកំពត ក្នុងស្រុកឈូក ស្រុកជុំគីរី ក៏បានអញ្ជើញមកចូលរួមដែរ ហើយសុំផ្ដាំទៅលោកពូលួន ថានៅជុំគីរី នេះ គឺយើងប្រមូលឲ្យអស់មក មិនបាច់ឲ្យនៅអី ទៅជឿអី ពួកក្រុមបោកប្រាស់ យើងឈប់ចាញ់បោកគេបន្តទៅទៀតទៅ»។
សមាជិកគណបក្ស នរោត្តម រណឫទ្ធិ ម្នាក់ទៀត លោក ប៊ូ លួន ថ្លែងដែរថា ដោយសារការបែកបាក់ផ្ទៃក្នុង គាត់មិនបានឈរឈ្មោះបោះឆ្នោតឃុំ-សង្កាត់ឡើយ។ ទើបគាត់ងាកមកគាំទ្រចលនាប្រជាធិបតេយ្យសង្គ្រោះជាតិ ដើម្បីប្រាប់មហាជនពីល្បិចលួចសន្លឹកឆ្នោតរបស់គណបក្សកាន់អំណាច៖ «ឈ្មោះស្ទួន ក្រុមការងារគណបក្សកាន់អំណាច គឺម្នាក់ៗឈ្មោះមិនខ្វះពី៥ ទៅ៧ ឬ៨ទេ ក្នុងខេត្តកំពត ទាំងមូលហ្នឹង។ ក្នុងម្នាក់ម្តងចុះទៅឃុំនេះ ម្តងចុះទៅឃុំនោះ ម្តងនៅឃុំត្រពាំងរាំង ក្នុងស្រុកជុំគីរី ខ្ញុំនេះ សម្បូរណាស់ក្រុមការងារគណបក្សប្រជាជន ដែលចុះពីភ្នំពេញ ពីខេត្តកំពត មកចល័តចុះឈ្មោះគ្រប់ឃុំ ហើយអត់ឲ្យលុបឈ្មោះទេ ឈ្មោះនោះគឺ PECខេត្តណែនាំមិនឲ្យលុបទេ។ តែខ្ញុំនេះហើយ ទាមទារតស៊ូឲ្យលុប ប៉ុន្តែគេមិនលុបដោយថា ទាមទារឯកសារ គ្មានសាមីខ្លួនមកបញ្ជាក់ អ៊ីចឹង គេអត់លុបទេ អ៊ីចឹងឈ្មោះនៅណែនពេញទាំងអស់ ឈ្មោះនោះមកដល់ថ្ងៃនេះណែន អ៊ីចឹង វិធីលួចឈ្មោះនោះ ងាយណាស់»។
មន្ត្រីគណបក្ស ហ៊្វុនស៊ិនប៉ិច លោក អិន ញេញ ថ្លែងថា គាត់បានឃើញការរួមគ្នារវាងគណបក្ស សម រង្ស៊ី និងគណបក្សសិទ្ធមនុស្ស បង្កើតជាចលនាប្រជាធិបតេយ្យសង្គ្រោះជាតិនេះ គាត់រីករាយ និងសង្ឃឹមថា អ្នកប្រជាធិបតេយ្យចុងក្រោយនៃក្តីសង្ឃឹមរបស់ពលរដ្ឋ ដែលខំតស៊ូយូរមកហើយ ដើម្បីសេរីភាពនៃការរស់នៅ។
តំណាងសមាគមអ្នកប្រជាធិបតេយ្យ លោក គង់ សើរ ថ្លែងថា គាត់សុំឲ្យអ្នកគាំទ្រចលនាប្រជាធិបតេយ្យសង្គ្រោះជាតិ ជួយធ្វើយ៉ាងណាឲ្យលោក ម៉ម សូណង់ដូរ បានចេញក្រៅឃុំ។
ប្រជាពលរដ្ឋនៅស្រុកជុំគីរី ដែលបានចូលរួមស្តាប់ការបកស្រាយពីភាពរឹងមាំ នៃការរួមបញ្ចូលគ្នារវាងគណបក្សប្រឆាំង ដើម្បីត្រៀមការបោះឆ្នោត ឆ្នាំ២០១៣ ខាងមុខ បានថ្លែងថា ពួកគាត់សង្ឃឹមថា ចលនាប្រជាធិបតេយ្យសង្គ្រោះជាតិមួយនេះនឹងមិនដឹកនាំពួកគាត់ទៅរករបបផ្តាច់ការ និងកុម្មុយនីស្តនោះឡើយ៖ «ផ្តល់មតិឲ្យប្រជាពលរដ្ឋហ្នឹង មានការសួរ និងសំណួរចម្លើយនោះបានច្រើន មិនដូចរបបផ្តាច់ការនោះ វាមិនអាច មិនហ៊ានឲ្យមានសំណួរចម្លើយទេ»។
បុរសម្នាក់ទៀតបន្ថែមថា ការចុះផ្ទាល់របស់ថ្នាក់ដឹកនាំមកដល់មូលដ្ឋាន នាំឲ្យអ្នកនៅជនបទមានក្តីសង្ឃឹម នៃការពឹងផ្អែកសម្រាប់នយោបាយផ្លាស់ប្ដូររបបដឹកនាំ៖ «ចំណេញទី១ ត្រង់ថា គណបក្សទាំង២នោះរួមគ្នាទៅ ធ្វើឲ្យប្រជាពលរដ្ឋគាត់បានសុខបានរីកចម្រើន ក្នុងជីវភាពរស់នៅរបស់ពួកគាត់។ ទី២ទៀត យើងកាត់បន្ថយភាពអំពើហិង្សាពីពួកក្រុមកុម្មុយនីស្ត ពួកផ្តាច់ការ»។
ចលនាប្រជាធិបតេយ្យសង្គ្រោះជាតិ បានជួបពលរដ្ឋ នៅថ្ងៃទី២៤ ខែសីហា ចំនួន៤ស្រុក។ ពេលព្រឹក នៅស្រុកឈូក និងស្រុកជុំគីរី ពេលរសៀល នៅស្រុកអង្គរជ័យ និងស្រុកបន្ទាយមាស។ នៅថ្ងៃសៅរ៍ នឹងជួបជាមួយប្រជាពលរដ្ឋ នៅស្រុកផ្សេងទៀត ក្នុងខេត្តកំពត។ នៅរាល់ពេល នៃការជួបជុំអ្នកគាំទ្រ ចលនាប្រជាធិបតេយ្យសង្គ្រោះជាតិ ក្នុងថ្ងៃ២៤ ខែសីហា ឆ្នាំ២០១២ សមត្ថកិច្ចក្នុងមូលដ្ឋាន បានជួយការពារពិធីប្រជុំនោះ ដោយគ្មានការរំខានអ្វីឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
Thean
ពី Sralanh Khmer) (Phnom PenhI'm so glad to hear that many party take part in the CholnaBrachea TibDey SangKrosCheat. This show that all democracy join each other to save our country from dictators. So I would like to suggest all Cambodian join together to get a good new leader to make our country grow up. thank
Aug 31, 2012 07:54 AM
ngoc quang
ពី mkhack) (ta khmaoi like that word NATIONAL RESCUE PARTY,but i don't like son subert and pen sovann they are VN undercover.good luck!
Aug 31, 2012 03:06 AM
អ្នកអានអនាមិក
ពី សៀមរាបខ្ញុំសូមឲ្យចលនាប្រជាធិបតេយ្យសង្រ្គោះជាតិចុះឲ្យបានគ្រប់ខេត្តក្រុង មុនពេលបោះឆ្នោតឆ្នាំ២០១៣នេះ ជាពិសេសទីជនបទឲ្យបានច្រើនលើក ដើម្បីឲ្យប្រជាជនគាំទ្រ។
Aug 26, 2012 09:49 PM
តេជះ
ពី ភ្នំពេញបើអាហែងឈ្នះមែន កុំភ្លេចថាអញ់មានកំលាំងច្រើនណាស់ អង្គរក្ស ប៉ូលីស អាវុហត្ថ ទាហាន កាលឆ្នាំ៩៣ អាហែងមានកំលាំងខ្លះអាឡូវអត់ផ្លូវទេអាវា បើអញ់កាន់មិនទាន់បានរហូតដល់អាយុ៩០ឆ្នំាទេកុំសុបិន្ត។
Aug 26, 2012 08:28 PM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
