ជនជាតិ​ចិន​ជិត​១០០​នាក់​ជាប់​សង្ស័យ​ពី​បទ​ចាប់​ជំរិត​ឆ្លង​ដែន

នាយកដ្ឋាន​អន្តោប្រវេសន៍​នៃ​ក្រសួង​មហាផ្ទៃ កំពុង​បំពេញ​នីតិវិធី​របស់​ខ្លួន​ទៅ​តាម​ផ្លូវ​ច្បាប់ ចំពោះ​ក្រុម​ជនជាតិ​ចិន​ជិត ១០០​នាក់ ដែល​អាជ្ញាធរ​កម្ពុជា ចាប់​បាន សង្ស័យ​ទៅ​លើ​បទ​ចាប់​ជំរិត​ឆ្លង​ដែន​តាម​ប្រព័ន្ធ​អ៊ីនធឺណិត (Internet)។
ដោយ ទីន ហ្សាការីយ៉ា
2013-01-06
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល

នាយកដ្ឋាន​អន្តោប្រវេសន៍​បាន​ឃុំ​ខ្លួន​ជន​ជាតិ​ចិន​នេះ នៅ​បន្ទាប់​ពី​សមត្ថកិច្ច​កម្ពុជា ចាប់​បាន​ក្រុម​ឧក្រិដ្ឋកម្ម​ចាប់​ជំរិត​ឆ្លង​ដែន​ជនជាតិ​ចិន នៅ​ក្នុង​រយៈពេល​ប៉ុន្មាន​ឆ្នាំ​ចុង​ក្រោយ​នេះ​ជា​បន្តបន្ទាប់ ដែល​ជនជាតិ​ចិន ទាំង​នោះ មាន​ទាំង​ស្រី និង​ប្រុស យក​ទី​តាំង​ប្រទេស​កម្ពុជា ដើម្បី​ប្រកប​មុខ​របរ​ខុស​ច្បាប់​របស់​ខ្លួន។

មន្ត្រី​ជាន់​ខ្ពស់​នៃ​អគ្គស្នងការដ្ឋាន​នគរបាល​ជាតិ បាន​ឲ្យ​ដឹង​នៅ​ថ្ងៃ​ទី​៦ មករា ថា នាយកដ្ឋាន​អន្តោប្រវេសន៍​កំពុង​សួរ​ចម្លើយ និង​បំពេញ​បែបបទ​ទៅ​តាម​ផ្លូវ​ច្បាប់ ដើម្បី​ចាត់​វិធានការ​ទៅ​លើ​ជន​សង្ស័យ​ជនជាតិ​ចិន ចំនួន ៨០​នាក់ ជាប់​សង្ស័យ​ទៅ​នឹង​រឿង​ចាប់​ជំរិត​ឆ្លង​ដែន។

លោក​ឧត្ដមសេនីយ៍ទោ ឆៃ ស៊ីណារិទ្ធិ ជា​ប្រធាន​នាយកដ្ឋាន​សន្តិសុខ​ផ្ទៃ​ក្នុង​នៃ​ក្រសួង​មហាផ្ទៃ មាន​ប្រសាសន៍​ថា នាយកដ្ឋាន​អន្តោប្រវេសន៍​កម្ពុជា កំពុង​បំពេញ​នីតិវិធី​របស់​ខ្លួន​ដើម្បី​ចាត់​វិធានការ​ផ្លូវ​ច្បាប់ ចំពោះ​ជន​សង្ស័យ​ជនជាតិ​ចិន​ទាំង​នោះ ដែល​ជាប់​ទាក់ទង​នឹង​ការ​ចាប់​ជំរិត​ឆ្លង​ដែន​តាម​ប្រព័ន្ធ​ទូរស័ព្ទ​ទំនើប វីអូអាយភី (VOIP) និង​ប្រព័ន្ធ​អ៊ីនធឺណិត។

លោក ឆៃ ស៊ីណារិទ្ធិ បាន​បន្ថែម​ថា លោក​មិន​ទាន់​បញ្ជាក់​បាន​ទេ​ថា តើ​ជនជាតិ​ចិន ទាំង​នោះ​គេ​នឹង​បញ្ជូន​ទៅ​កាន់​ប្រទេស​ចិន​វិញ ឬ​យ៉ាង​ណា​នោះ។

ជនជាតិ​ចិន​ចំនួន ៨០​នាក់ ក្នុង​នោះ​មាន​ស្រ្តី ១៧​នាក់ ដែល​សមត្ថកិច្ច​ចាប់​ខ្លួន​បាន​នៅ​ក្នុង​រាជធានី​ភ្នំពេញ កាល​ពី​ថ្ងៃ​ទី​៥ មករា នោះ គេ​យក​ទៅ​ឃុំ​ខ្លួន​នៅ​ក្នុង​នាយកដ្ឋាន​អន្តោប្រវេសន៍​នៃ​ក្រសួង​មហាផ្ទៃ ដែល​ពួកគេ​ទាំង​នេះ កាន់​លិខិត​ឆ្លង​ដែន​ស្រប​ច្បាប់​ចូល​មក​កម្ពុជា ដើម្បី​លួច​ធ្វើ​សកម្មភាព៖ «ក្នុង​នាម​សមត្ថកិច្ច​សុំ​ឲ្យ​ប្រជាពលរដ្ឋ​យើង​សហការ​ជាមួយ​សមត្ថកិច្ច ប្រសិន​បើ​ជា​មាន​ការ​សង្ស័យ​ថា ជនជាតិ​ចិន នៅ​ផ្ទះ​ជួល​មិន​ប្រក្រតី​នោះ»

លោក​ឧត្ដមសេនីយ៍​ទោ ឆៃ ស៊ីណារិទ្ធិ បាន​សង្កត់​ធ្ងន់​ថា ជន​សង្ស័យ​ជន​ជាតិ​ចិន ជាប់​ទាក់ទង​នឹង​បទ​ឧក្រិដ្ឋកម្ម​ចាប់​ជំរិត​ឆ្លង​ដែន មក​លាក់​ខ្លួន​នៅ​ក្នុង​ប្រទេស​កម្ពុជា​នេះ នៅ​មាន​មួយ​ចំនួន​ទៀត ដែល​សមត្ថកិច្ច​កំពុង​ស៊ើប​អង្កេត​បន្ត​ដើម្បី​ចាប់​ខ្លួន។

លោក​បញ្ជាក់​ថា ក្រុម​ជន​ជាតិ​ចិន ទាំង​នោះ មក​ស្នាក់​នៅ​ផ្ទះ​ជួល​ជា​ក្រុមៗ​ក្នុង​ប្រទេស​កម្ពុជា ពិសេស​នៅ​ទីក្រុង​ភ្នំពេញ៖ «ការ​ជួល​ផ្ទះ ជួល​ទៅ​ឲ្យ​ជន​បរទេស​ត្រូវ​ពិនិត្យ​ឲ្យ​បាន​ច្បាស់លាស់ ឬ​ជូន​ដំណឹង​ទៅ​អាជ្ញាធរ ពួក​ហ្នឹង​នៅ​ប្រមូល​ផ្ដុំ​គ្នា ការ​រស់​នៅ​ជា​លក្ខណៈ​ខ្លួន ពួក​ហ្នឹង​ធ្វើ​សកម្មភាព​មិន​ស្រប​ច្បាប់​ទេ»

សមត្ថកិច្ច​កម្ពុជា កន្លង​មក​ចាប់​ខ្លួន​ជន​ជាតិ​ចិន ជាប់​សង្ស័យ​ពី​បទ​ឧក្រិដ្ឋកម្ម​ចាប់​ជំរិត​ឆ្លង​ដែន​នេះ​ជា​បន្ត​បន្ទាប់​នៅ​ក្នុង​រយៈ​ពេល​ប៉ុន្មាន​ឆ្នាំ​ចុង​ក្រោយ​នេះ ដែល​ភាគ​ច្រើន​គេ​បញ្ជូន​ទៅ​កាន់​ប្រទេស​ចិន​វិញ។

របាយការណ៍​នាយកដ្ឋាន​សន្តិសុខ​ផ្ទៃក្នុង​ក្រសួង​មហាផ្ទៃ បាន​ឲ្យ​ដឹង​ថា គិត​ពី​ឆ្នាំ​២០១១ ដល់​ដើម​ឆ្នាំ​២០១៣ នេះ សមត្ថកិច្ច​កម្ពុជា ចាប់​ខ្លួន​ជន​សង្ស័យ​ចាប់​ជំរិត​ឆ្លង​ដែន​ជន​ជាតិ​ចិន ប្រមាណ ៥០០​នាក់ បញ្ជូន​ទៅ​ប្រទេស​ចិន​វិញ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (0)
  • បោះពុម្ព
  • ចែករំលែក
  • អ៊ីម៉ែល