មន្ត្រីដដែលបញ្ជាក់ថា ការបិទបញ្ជីដំបូងនេះមានសារសំខាន់សម្រាប់ការបោះឆ្នោតឆ្នាំក្រោយៗទៀត។
លោក ទេព នីថា បានបញ្ជាក់ថា ៖ «ក្នុងករណីដែលឃើញមិនត្រឹមត្រូវ គឺអាចស្នើសុំស្មៀនឃុំ សង្កាត់ ដើម្បីធ្វើការកែតម្រូវ ហើយក្នុងករណីថា ឃើញឈ្មោះណាដែលយើងយល់ថា មានព័ត៌មានឬមានភស្តុតាងគ្រប់គ្រាន់ថា អ្នកហ្នឹងពុំមានសិទ្ធិត្រឹមត្រូវក្នុងការមានឈ្មោះក្នុងបញ្ជីបោះឆ្នោតទេ គឺអាចប្ដឹងជំទាស់បាន។ អ៊ីចឹងសូមអញ្ជើញទៅពិនិត្យមើលឲ្យបានទាំងអស់គ្នា»។
លោក ហង្ស ពុទ្ធា នាយកប្រតិបត្តិអង្គការឃ្លាំមើលការបោះឆ្នោត ហៅកាត់ថា និចហ្វិក មានប្រសាសន៍ថា នៅឆ្នាំនេះអ្នកដែលមានសិទ្ធិទៅចុះឈ្មោះបោះឆ្នោតមានការប្រុងប្រយ័ត្នខ្ពស់ក្នុងការចុះឈ្មោះនេះ។
លោកបន្តថា ការបោះឆ្នោតឆ្នាំ២០០៩នេះ អង្គការនិចហ្វិកបានរកឃើញថា មានលក្ខណៈប្រសើរជាងបណ្តាឆ្នាំកន្លងទៅ។ ជាមួយគ្នានេះដែរ លោក ហង្ស ពុទ្ធា ក៏បានអំពាវនាវដល់ប្រជាពលរដ្ឋដែលបានចុះឈ្មោះបោះឆ្នោតទាំងអស់ សូមអញ្ជើញទៅពិនិត្យបញ្ជីឈ្មោះចុងក្រោយនេះឲ្យបានគ្រប់គ្នា ដើម្បីឲ្យប្រាកដថា ខ្លួនមានឈ្មោះក្នុងបញ្ជីឈ្មោះ និងអាចមានសិទ្ធិក្នុងការបោះឆ្នោតឆ្នាំក្រោយៗទៀត។
លោក ហង្ស ពុទ្ធា បានមានប្រសាសន៍ថា ៖ «លទ្ធផលនៃការរៀបចំការពិនិត្យបញ្ជីឈ្មោះនិងចុះឈ្មោះនៅឆ្នាំនេះ គឺជាការប្រមូលនូវអ្នកបោះឆ្នោតបន្ថែមទៀតចូលទៅក្នុងបញ្ជីបោះឆ្នោតដែលត្រៀមនឹងបោះឆ្នោតសម្រាប់ការប្រកួតប្រជែងគណបក្សនយោបាយខាងមុខនេះទៀត»។
លោក គល់ បញ្ញា នាយកប្រតិបត្តិអង្គការខុមហ្វែ្រល មានប្រសាសន៍ថា ប្រព័ន្ធបោះឆ្នោតនៅកម្ពុជាគឺមានភាពសាំញ៉ាំដែលបង្កការលំបាកដល់ប្រជាពលរដ្ឋដែលគ្រប់អាយុទៅចុះឈ្មោះបោះឆ្នោត។
លោក គល់ បញ្ញា បានផ្តល់ជាអនុសាសន៍ទៅគ.ជ.ប. (គណៈកម្មាធិការជាតិរៀបចំការបោះឆ្នោត) ថា គួរផ្លាស់ប្តូរប្រព័ន្ធបោះឆ្នោតដែលមានលក្ខណៈសាំញ៉ាំទាំងនេះចេញ ដើម្បីបង្កលក្ខណៈងាយស្រួលដល់ប្រជាពលរដ្ឋមកចុះឈ្មោះបោះឆ្នោតនេះ។
លោក គល់ បញ្ញា បានមានប្រសាសន៍ថា ៖ «ប្រព័ន្ធចុះឈ្មោះសព្វថ្ងៃហ្នឹងវាបង្កើតការលំបាកដល់ប្រជាជនណាស់ មើលរាល់ឆ្នាំអ៊ីចឹង វាមានបញ្ហាដែរណា៎! យើងគួររៀបចំប្រព័ន្ធយ៉ាងម៉េចគឺគេចុះឈ្មោះម្ដង គេអាចដឹងថាឈ្មោះគេនៅក្នុងហ្នឹងរហូតមួយជីវិត លើកលែងតែគេផ្លាស់ប្ដូរទីលំនៅ ឬក៏គេស្លាប់ គេអីអ៊ីចឹង។ កុំឲ្យធ្វើឲ្យឈ្មោះគេបាត់បង់ឬក៏ខុសឈ្មោះគេ អាហ្នឹងគ.ជ.ប.ត្រូវទទួលខុសត្រូវ ព្រោះយើងមិនអាចចេះតែបង្ខំឲ្យប្រជាជនរាល់ៗឆ្នាំហ្នឹងចេះតែទៅមើលឈ្មោះអ៊ីចឹងបានទេ មិនអាចចេះតែដាក់កាតព្វកិច្ចអ៊ីចឹងទេ»។
គ.ជ.ប.បានឲ្យដឹងថា ការបិទបញ្ជីឈ្មោះបោះឆ្នោតដំបូងឆ្នាំ២០០៩ ដែលអាចបើកច្រកឲ្យប្រជាពលរដ្ឋធ្វើការតវ៉ានេះមានរយៈពេល៥ថ្ងៃ គឺចាប់ពីថ្ងៃទី២៤ ខែតុលានេះតទៅ។
កាលពីថ្ងៃទី២២ ខែតុលា គ.ជ.ប. បានប្រកាសលទ្ធផលបណ្តោះអាសន្ននៃការចុះឈ្មោះបោះឆ្នោតឆ្នាំ២០០៩ បានឲ្យដឹងថា ឆ្នាំ២០០៩នេះមានអ្នកចុះឈ្មោះបោះឆ្នោតថ្មីចំនួន២៦០.៥២០នាក់, កែតម្រូវឈ្មោះមានចំនួន៤០.២៩៩នាក់, លុបឈ្មោះចេញពីបញ្ជីឈ្មោះដោយសារអ្នកបោះឆ្នោតស្លាប់ ត្រូវដកសិទ្ធិ និងផ្លាស់ប្តូរទីលំនៅ សរុបចំនួន១១១.០៨១នាក់៕