គ.ជ.ប ប្រតិកម្មចំពោះរបាយការណ៍របស់លោក សុរិយា ស៊ូប៊ែឌី
h082812in.mp3
ក្នុងនោះ បានផ្ដោតទៅលើសិទ្ធិលំនៅឋាន ដីធ្លី សេរីភាពបញ្ចេញមតិ សាលាក្ដី ពិសេសកាត់ទោសអតីតមេដឹកនាំខ្មែរក្រហម អ្នកការពារសិទ្ធិមនុស្ស និងជាពិសេសលោកបានផ្ដល់អនុសាសន៍ច្រើនទៅលើតួនាទីនៃស្ថាប័នដែលពាក់ព័ន្ធដល់ការបោះឆ្នោត។
អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្ស លោក សុរិយា ស៊ូប៊ែឌី ជំរុញឲ្យកម្ពុជាកែទម្រង់ប្រព័ន្ធបោះឆ្នោតជាបន្ទាន់ នៅមុនពេលការបោះឆ្នោតថ្នាក់ជាតិឆ្នាំ២០១៣ ខាងមុខ។
សេចក្ដីអំពាវនាវរបស់លោក សុរិយា ស៊ូប៊ែឌី នេះ បានដាក់បញ្ចូលរួចហើយទៅក្នុងរបាយការណ៍ដែលលោកនឹងដាក់ជូនមហាសន្និបាតរបស់អង្គការសហប្រជាជាតិ នៅខែកញ្ញា ឆ្នាំ២០១២។
ចំណុចដែលលោកចង់អោយមានការផ្លាស់ប្ដូរទាំងនោះ រួមមានការកែប្រែបទដ្ឋានច្បាប់មួយចំនួនពាក់ព័ន្ធនឹងដំណើរការរបស់គណៈកម្មាធិការជាតិរៀបចំការបោះឆ្នោត (គ.ជ.ប) ដើម្បីឲ្យស្ថាប័ននេះឯករាជ្យ និងមានស្វ័យភាព។ ក្នុងនោះ ការជ្រើសរើសតែងតាំងប្រធាន និងសមាជិក គ.ជ.ប ត្រូវជាតួនាទីរបស់រដ្ឋសភា ហើយអ្នកទាំងនោះគឺជាមន្ត្រីដែលចូលនិវត្តន៍។ មន្ត្រីគ្រប់ជាន់ថ្នាក់នៃ គ.ជ.ប ត្រូវរៀបចំតាមគោលការណ៍តុល្យភាពទៅតាមគណបក្សដែលមានអាសនៈក្នុងសភា។
លោក សុរិយា ស៊ូប៊ែឌី បានស្នើអោយបង្កើតប្រព័ន្ធការងារថ្មីមួយចំនួន ដែលធានាសិទ្ធិបោះឆ្នោតរបស់ពលរដ្ឋ មានដូចជាក្រុមការងារដោះស្រាយជម្លោះទាក់ទងការបោះឆ្នោត គណៈកម្មការតាមដានភាពយុត្តិធម៌ និងស្មើភាពគ្នាក្នុងការប្រើប្រាស់ប្រព័ន្ធផ្សព្វផ្សាយ ក្នុងពេលឃោសនាបោះឆ្នោត សម្រាប់គណបក្សនយោបាយធំៗ និងក្រុមការងារ ធានាការចុះបញ្ជីអ្នកបោះឆ្នោតដែលគ្មានការរើសអើង ធានាអោយអ្នកដែលផ្លាស់ទីលំនៅ អ្នកត្រូវបណ្ដេញចេញពីលំនៅឋាន និងពលរដ្ឋខ្មែរដែលកំពុងបំពេញការងារនៅក្រៅប្រទេស។
ក្នុងនោះដែរ ចំណុចចុងក្រោយនៃសំណើរបស់លោក សុរិយា ស៊ូប៊ែឌី គឺត្រូវពលរដ្ឋកម្ពុជាគ្រប់រូបត្រូវបានធានាថា បានចូលរួមពេញលេញក្នុងការដឹកនាំ និងគ្រប់ដំណាក់កាលនៃការបោះឆ្នោត ដែលជាចំណុចស្នូលនៃលទ្ធិប្រជាធិបតេយ្យ បើទោះជាអ្នកនោះមានទស្សនៈនយោបាយផ្ទុយពីបក្សដឹកនាំ ក្នុងនោះលោកបានរំលឹកថា គេត្រូវរកមធ្យោបាយសម្របសម្រួលផ្នែកនយោបាយ ធ្វើយ៉ាងណាអោយប្រធានគណបក្សប្រឆាំង គឺលោក សម រង្ស៊ី ដែលមានទោសដោយសារនយោបាយនោះ បានវិលមកប្រឡូកក្នុងនយោបាយនៅកម្ពុជា ក្នុងឋានៈជាអ្នកដឹកនាំបក្សប្រឆាំងឡើងវិញ។
ចំពោះសំណើទាំងនេះ អគ្គលេខាធិការ គ.ជ.ប លោក ទេព នីថា មានប្រសាសន៍នៅថ្ងៃអង្គារ ទី២៨ ខែសីហា នេះថា របាយការណ៍របស់លោក សុរិយា ស៊ូប៊ែឌី គឺហាក់ដូចជាលោកបានស្ដាប់តែបក្សប្រឆាំង និងក្រុមអង្គការមិនមែនរដ្ឋាភិបាលមួយចំនួន គឺមិនបានឆ្លុះបញ្ចាំងពីការងាររបស់ គ.ជ.ប បច្ចុប្បន្ននេះឡើយ។ លោក ទេព នីថា អះអាងថា រាល់ការស្នើរបស់លោក សុរិយា ស៊ូប៊ែឌី គឺ គ.ជ.ប បានបំពេញរួចរាល់ហើយ គឺបូករួមទាំងឯករាជ្យភាព ស្វ័យភាព និងការធានាសិទ្ធិអ្នកបោះឆ្នោតជាដើម។ បើទោះជាយ៉ាងណា លោក ទេព នីថា ពុំបានចាត់ទុកអវត្តមានប្រធានគណបក្សប្រឆាំងនោះ គឺធ្វើអោយប៉ះពាល់ដល់ការបោះឆ្នោត ឬដំណើរការប្រជាធិបតេយ្យនៅកម្ពុជាឡើយ៖ «ចំពោះថាការបោះឆ្នោតត្រូវតែមានប្រធានគណបក្សប្រឆាំង ឬអ្នកមានបញ្ហាបានចូលរួម ខ្ញុំគិតថាមិនមែនសមត្ថកិច្ចរបស់ គ.ជ.ប ទេ។ ហើយប្រជាធិបតេយ្យ ឬការបោះឆ្នោតនៅប្រទេសមួយ មិនអាស្រ័យលើមនុស្សម្នាក់ទេ អាស្រ័យលើច្បាប់ លើអ្នកចូលរួមទាំងអស់»។
នាយកប្រតិបត្តិគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ខុមហ្វ្រែល (Comfrel) លោក គុល បញ្ញា មានប្រសាសន៍ថា សំណើរបស់លោក សុរិយា ស៊ូប៊ែឌី គឺជាចំណុចសំខាន់ និងចាំបាច់ដែល គ.ជ.ប ត្រូវផ្លាស់ប្ដូរ។ ហើយអ្វីដែលចាំបាច់ និងត្រូវផ្លាស់ប្ដូរបន្ទាន់នៅមុនការបោះឆ្នោតជាតិនោះ គឺការធានាសិទ្ធិពេញលេញសម្រាប់អ្នកបោះឆ្នោត៖ «អំពីការធានាសិទ្ធិបោះឆ្នោតតាមរយៈការចុះឈ្មោះបោះឆ្នោត ធ្វើបច្ចុប្បន្នភាពបញ្ជីឈ្មោះបោះឆ្នោត ឃើញនៅមានបញ្ហា ដែលគណបក្សនីមួយៗគេតវ៉ាអោយ គ.ជ.ប ហ្នឹងផ្លាស់ប្ដូររឿងហ្នឹង ប៉ុន្តែ គ.ជ.ប អត់បានគិតរឿងហ្នឹង នៅពេលចន្លោះការបោះឆ្នោតហ្នឹង ដែលត្រូវការកែលំអប្រព័ន្ធចុះឈ្មោះបោះឆ្នោត តែ គ.ជ.ប អត់បានធ្វើផងហ្នឹង»។
កម្ពុជាបានឆ្លងកាត់ការបោះឆ្នោតជាតិ ឬការបោះឆ្នោតជ្រើសរើសតំណាងរាស្ត្រចំនួន៤លើកមកហើយ។ ក្រៅតែពីការបោះឆ្នោតដែលរៀបចំដោយអាជ្ញាធរបណ្ដោះអាសន្នរបស់អង្គការសហប្រជាជាតិនៅកម្ពុជា (UNTAC) កាលពីឆ្នាំ១៩៩៣ ការបោះឆ្នោតនៅកម្ពុជា ដែលរៀបចំដោយ គ.ជ.ប តែងតែរងការរិះគន់ពីសំណាក់គណបក្សប្រឆាំង និងអង្គការមិនមែនរដ្ឋាភិបាល ដែលឃ្លាំមើលការបោះឆ្នោតថា ពុំបានធានាអោយមានការប្រកួតប្រជែងដោយស្មើភាព និងមានយុត្តិធម៌ រវាងគណបក្សកាន់អំណាច គឺគណបក្សប្រជាជនកម្ពុជា និងគណបក្សប្រឆាំងឡើយ។ ការនោះ បានជំរុញអោយគណបក្សកាន់អំណាចនៅតែជាគណបក្សឈ្នះឆ្នោតនៅគ្រប់អាណត្តិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អ្នកអានអនាមិក
លោក ទេព នីថា ពិតជាលំអៀងមែន លោកមិនគិតជាតិខ្លួនឯងទេឬ ?
គិតតែពីប្រយោជន៍ខ្លួននឹងបក្សពួករបស់លោក។
ខ្ញុំតូចចិត្តណាស់ដែលមានមេដឹកនាំដែល ផ្តាច់ការបែបនេះ។
ខ្ញុំយល់ស្រប់រាល់មតិខាងលើទាំងស្រុង ។ ខ្ញុំចងឪ្សមានការកែប្រែ គណៈកម្មាធិកា គជប ឡើងវិញ ។ដើម្បីការបោះឆ្នោតដោយសេរី គ្មានការរើសអើងបក្សពួក ។
Aug 31, 2012 06:22 AM
អ្នកអានអនាមិក
ខ្ញុំគាំទ្រទាំងស្រុងចំពោះសេចក្តីថ្លែងការណ៍របស់លោក ស៊ូប៊ែឌី។ មានតែយួនទេដែលជំទាស់ ។ ហើយអ្វីដែលត្រូវដូរថែមទៀតនោះគឺបើអាចដូរបាន គួរតែមានការសម្ភាសធ្វើបណ្ណ័បោះឆ្នោតដូចកាលសម័យអ៊ុនតាក់ ព្រោះសុទ្ធយួនមានអត្តសញាណប័ណ្ណអស់ហើយ។ សូមជួពិចារណាមើលទៅ!
Aug 31, 2012 06:02 AM
មិត្តកសិករ
ពី ភ្នំពេញអ្នករាយការណ៍ពិតជារាយការណ៍ត្រឹមត្រូវអំពីបញ្ហាសិទ្ធិមនុស្ស
នៅក្នុងប្រទេសកម្ពុជា ។
Aug 31, 2012 12:25 AM
Castro De La Monreo
ពី Paris, FranceYes, because Human rights reporter for the UN is working for salary from the UN and alots of Cambodian nationalism just respect whatever foreigner said or idea and say mucho gracias to them because they so extreme to whatever they are thinking. Guess! if they done somethings and they never get any encouragement or credit but mos of the time they got so many critics. I just want to see how they can stand? We are human, we are not animals or statues. To be honest, you should learn how to critic like American politicians and be fair to all not prosposors.
Aug 29, 2012 10:09 PM
អ្នកអានអនាមិក
អាម្នាក់ដែលសរសេរនេះ គឺជាយួនប៉ុណ្ណោះ។ អ្វីដែលរដ្ឋាភិបាលបានធ្វើដូចដែលអ្នកឯងនិយាយនោះវាគ្រាន់តែជាការបំផ្លាញអស់នូវធម្មជាតិ រួចហើយខ្លាចគេស្តីបន្ទោស ខំសាងសង់នេះ សាងសង់នោះបិទបាំងវិញប៉ុណ្ណោះ ។ លោកឯងបើកភ្នែកមើលឲ្យមែនទែន ជិតរលាយអស់ហើយ រឺក៏អ្នកឯងមានទ្រពសម្បត្តិ ហើយមានបងប្អូនរស់នៅសហរដ្ឋអាមេរិក រឺក្រៅប្រទេស អាចរត់យករួចខ្លួនមែនទេ បានជាលោកមិនខ្លាចទឹកលិចច្រមុះ?
Aug 31, 2012 06:11 AM
អ្នកអានអនាមិក
ខ្ញំយល់ស្របចំពោះមតិខាងលើ១០០% គជប ធ្វើការពិតជាលំអៀងនិងមិនមានភាពសុក្រិត បើសិនជាសុក្រិតនោះមិនមែនប្រជាពលរដ្ឋខ្មែរយ៉ាងច្រើនសន្ធឹកសន្ធាប់គ្មានឈ្មោះបោះឆ្នោតនោះទេ តែផ្ទុយទៅវិញ វៀតណាមមានឈ្មោះបោះឆ្នោតស្ទើរគ្រប់ខេត្ត ហើយក្នុងខេត្តនោះមិនមែនមានតែ៤ ៥នាក់នោះទេ មានចំនួនច្រើនខ្លាំងណាស់ ខ្ញំធ្លាប់បានស្វែងរកចំនួនអ្នកដែលចូលរួមបោះឆ្នោតឃុំសង្កាត់ហើយ ហើយខ្ញំឃើញច្បាស់ណាស់!ត្រូវតែប្តូរ គជប ប្តូរចេញអោយបាន បើមិនដូច្នោះទេ គ្មានការបោះឆ្នោតត្រឹមត្រូវ ក្នុងប្រទេសកម្ពុជាទ្បើយ។
Aug 29, 2012 09:50 PM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
